رواية ذئاب لا تعرف الحب الفصل الثالث عشر 13 – بقلم منال محمد سالم
في قصر عائلة الجندي ،،،،
احتدم الجدال بين كلاً من أوس وعدي حول وجود تقى في قصره بدون سبب وجيه ، و…
-عدي بنبرة غاضبة : بتعمل ايه البت دي هنا ؟ رد عليا !
أخـــذ أوس نفساً مطولاً ، ثم زفره بتمهل ، ونظر مباشرة في عيني عدي ، و…
-أوس بهدوء : دي .. دي الخدامة بتاعتي
-عدي بنبرة مصدومة : ايييه ؟
-أوس بنفس الهدوء الانفعالي : زي ما سمعت ، الخدامة بتاعتي
-عدي باستنكار يحمل التهكم : من قلة خدامين عندك عشان تجيب البت دي تشغلها
-أوس ببرود : مزاجي كده
-عدي بعدم اقتناع : يعني ايه مزاجك كده ؟ انت ناسي إن أمها حرامية وسرقت أختك ، مش بعيد بنت الـ*** تعمل زي أمها وتسرقك
-أوس مبتسماً بثقة : مش هاتقدر
-عدي بنبرة استهجان : انت متعرفش الأشكال دي بتفكر إزاي ، ولا بيدبروا لايه ، يا أوس دول عالم ولاد تيت ، تربية حواري ومن زبالة الناس ، يعني أي حاجة متوقعة منهم
-أوس بنبرة هادئة : إلا البت دي
-عدي بسخرية : ليه بنت بارم ديله ؟
-أوس ضاحكاً : لأ مش للدرجادي
زفــــر عدي في انهاك ، ثم مرر يده في خصلات شعره ، ومن ثم رفع رأسه في مواجهة أوس ، ونظر إليه بنظرات جادة قبل أن يردف بـ …
-عدي محذراً وهو يشير بيده : انت بتلعب بالنار يا أوس ، وجود البت دي هنا هيعملك مشاكل انت في غنى عنها
-أوس بنبرة واثقة للغاية : اطمن مش هاتقدر تتنفس حتي إلا بأمر مني
-عدي بتوجس : أنا مش مستريح للموضوع ده ، وحاسس إن نهايتك هاتكون على ايد البت دي
-أوس بنبرة تحمل الغرور : لأ عندك ، نهايتها هي هاتكون على إيدي أنا ..!
…………………………………………..
في منزل أم بطة ،،،،
دلفت بطة إلى داخل غرفتها ، وجلست على طرف فراشها وهي تغمغم بكلمات مبهمة ووجهها محتقن للغاية من الغيظ ..
لحقت بها والدتها بعد أن لاحظت تبدل حالها طوال حفل الحناء ، و…
-أم بطة بنبرة معاتبة : انتي يا مزغودة في قلبك ، كنتي قالبة وشك ليه طول الأعدة
-بطة بنبرة حانقة وهي تشير بكلتا يديها : يا أمه الولية مفكراني بضاعة عمالة تفعص في كل حتة من جسمي عشان تتأكد إن كنت أنفع لابنها ولا لأ
-أم بطة بعدم اكتراث : وماله ، ما تتأكد وتشوف
-بطة بنبرة مغتاظة وهي ترفع كلا حاجبيها للأعلى : نعم ؟ يعني انتي عاجبك اللي هي عملته ده
-أم بطة بعدم مبالاة : أه عاجبني ، عشان تعرف إن بنتي جمالها طبيعي ورباني مش مضروب
-بطة بنبرة شبه متشنجة : يا أمه .. دي .. دي كان ناقص إنها تقلعني ملط وآآ…
-أم بطة مقاطعة بنبرة حادة : بت انتي بقولك ايه ، أنا مش ناقصة خاوته ولا وجع راس ، الولية تعمل اللي هي عاوزاه طالما احنا واثقين في نفسنا
-بطة وهي تلوي شفتيها في استنكار : يا سلام !! بالبساطة دي !
-أم بطة بجدية : اه هو كده ، وقومي يالا خلينا نروق البيت بدل ما الدنيا سايبنها برا تضرب تقلب ، انجري يالا قدامي ، بلاش دلع البنات المِريء ده ..!!!!!
ثم تحركت أم بطة في اتجاه باب الغرفة ، بينما تابعتها بطة بنظراتها المشتعلة من الغيظ ، و…
-بطة بنبرة غاضبة لنفسها بخفوت : الله يحرقك يا أم عبده ..!!
-أم بطة بنبرة عالية : يالا يا بتي ، بطلي تبرطمي كده كتير ، وقومي حصليني
-بطة بضيق جلي : جاية أهووو ..!!!!
………………………….
في قصر عائلة الجندي ،،،،،
خـــــرج الطبيب ناجي من غرفة النوم الخاصة بأوس بعد أن انتهى من الكشف على تقى وتضميد جراح قدمها اليمنى ، ثم توجه ناحية الدرج ، ومنه إلى الطابق السفلي حيث ينتظره أوس وبصحبته عدي الذي رفض المغادرة حتى يعرف ما الذي ستؤول إليه الأمور ..
وقف الطبيب ناجي أمام أوس وبيده ( روشتة ) ما مدون عليه بعض أسماء الأدوية ، و…
-أوس متسائلاً بجدية : ايه الأخبار يا د. ناجي ؟
-ناجي بنبرة هادئة : من الشكل العام للحالة اللي فوق دي واضح انه ضعف عام ، وأنا باشتبه في وجود أنيميا كمان ، وآآ…
-أوس مقاطعاً بنبرة باردة : لأ أنا بسأل عن رجلها مش عن مرضها
-ناجي وهو يتنحنح في حرج : احم .. آآه… هو الجرح مش عميق ، بس مش هاتقدر تمشي عليها على الأقل لـ 4 أيام لحد ما يلم وآآ.. ودي روشتة بالأدوية اللي المفروض تاخدها ، وآآ..
جـــذب أوس الروشتة من يد الطبيب ناجي ، ثم نظر إلى محتواها بنظرات غير مكترثة ، وقام بطي الورقة بين أصابعه ، فإندهش ناجي من تصرفه هذا ، وارتسمت علامات الحيرة على وجهه ، و…
-أوس بنبرة فظة وهو يحدج الطبيب بنظرات قوية : شرفت يا دكتور !
ثم استدار برأسه للخلف ، وأشــــار لمدبرة القصر بعينيه ، و…
-أوس بلهجة آمــرة : عفــــاف وصليه للباب ..!!!
ابتلع الطبيب ناجي ريقه ، وشعر بالحرج من تصرفات أوس الوقحة ، ولكنه أثر الرحيل على أي حال ، فلا داعي للبقاء مع أمثاله ..
اقترب عدي من أوس ، ووقف إلى جواره ، و…
-عدي متسائلاً بعدم فهم : انت ناوي على ايه مع البت دي ؟ سيبها تمشي بدل ما يجرالها حاجة وتروح في داهية
-أوس بلهجة صارمة : عدي !!! البت دي تخصني ، وأنا بس اللي هاقرر هاعمل ايه معاها ، وهاتصرف إزاي
-عدي بجدية : أنا عاوز مصلحتك يا أوس
-أوس بنبرة أكثر قوة : وأنا عارف فين مصلحتي !
تحرك عدي خطوة واحدة ليقف في مواجهة أوس ، ثم نظر مباشرة في عينيه ، و…
-عدي بنبرة جادة : طب بالمناسبة في مشكلة خاصة بأخر عقد إحنا كنا آآ…
-أوس مقاطعاً بعدم اهتمام : خلي الكلام في الشغل لبكرة ، الوقتي أنا ورايا حاجات أهم
ثم تطلع ببصره إلى الأعلى ، فتابعه عدي بنظراته ، وشعر أن وجوده لا طائل منه ، لذا بادر بـ ..
-عدي على مضض : واضح كده إنك مش هاتكون فايقلي ولا مركز مع أي حاجة هاقولها ، فبراحتك ، أنا ماشي
-أوس ببرود : مع السلامة ، ونتكلم بعدين
-عدي بعدم اكتراث : أها .. سلام !
ثم ســــار في اتجاه باب القصر وهو متوجس مما قد يحدث لاحقاً ..
ارتسمت ابتسامة لئيمة على شفتي أوس وهو ينظر إلى الأعلى .. كما قبض على الروشتة بشدة بقبضة يده ، و…
-أوس بتوعد : خروجك من هنا مش هايكون بالساهل أبداً
راقبته المدبرة عفاف وعلى وجهها علامات القلق ، و..
-عفاف لنفسها بقلق : ربنا يسترها عليكي يا بنتي ، انتي وقعتي في ايد اللي ما بيرحمش حتى أهله !!!!
………………………………………
•تابع الفصل التالي “رواية ذئاب لا تعرف الحب” اضغط على اسم الرواية
