رواية لم يكن تصادف الفصل الرابع عشر 14 – بقلم زينب محروس

رواية لم يكن تصادف الفصل الرابع عشر 14 

 – – بلاش تحكمي عليه، اتكلمي معاه و افهمي هو زعل من ايه و بلاش تيجي عليه.

قبل ما ميريهان تتكلم، وصلتها رسالة من عمر، أول ما فتحتها اتفزعت من مكانها و قالت بصدمة: 

– عمر…… 

البنات سألوها بقلق: 

– ايه ماله؟ في حاجة؟؟ 

ميريهان بتوضيح: 

– واقف تحت، و باعت رسالة طالب مني أنزل

مريم بجدية: 

– طب ما تنزلي تتكلمي معاه. 

بالفعل ميريهان نزلت تشوف عمر اللي عرف العنوان بسبب تتبع موقع فونها، كان واقف و ساند على العربية قدام مدخل العمارة و أول ما شافها قال: 

– فين شنطتك؟ 

ميريهان بزعل: 

– اجيبها ليه؟ أنا مش راجعة معاك البيت تاني.

عمر اتنهد و قال: 

– يا بشمهندسة بلاش عناد.

ميريهان حست بضيق بسبب تكلفه فقالت بحزم: 

– طب و الله مش هرجع البيت، ارجع لوحدك يا بشمهندس.

عمر بتهكم: 

– انا مش فاهمة أنتي زعلانة ليه! و انتي عارفة إن كل العيلة مش مصدقين كلام يارا…… في ايه بقى؟؟ 

ميريهان بصلته و قالت بترقب: 

– و أنت مصدق يارا و لا مصدقني؟؟؟ 

عمر سكت لثواني و هو بيفتكر كلام يارا و لما شاف ميريهان و احمد واقفين على السلم، فهي فهمت سكوته دا غلط فقالت بحزن: 

– ارجع البيت يا بشمهندس. 

قالت كلامها و سابته و رجعت للبنات، و هو خبط رجله في عجلة العربية بغضب و همس لنفسه بلوم: 

– لساني بيتربط ليه! بسكت و مش بقول عن اللي جوايا ليه!! 

قفلت باب الشقة بحزن و دخلت الصالون، ف سلمي سألتها باهتمام: 

– حليتي الخلاف؟؟ 

ميريهان هزت راسها برفض و قالت: 

– لاء، أنا عارفة إنه جاي يرجعني بس عشان خاطر إنه مسؤول عني قدام بابا و علاء، لكن هو مصدق كلام يارا. 

سلمي بدفاع عن عمر: 

– يا بنتي ما انتي بتقولي إنه دافع عنك قدامها، يبقى اكيد مصدقك.

ميريهان: 

– لاء، لما سألته مصدقني و لا مصدق يارا  مردش عليا. 

مريم بصت لأختها بشرود و بعدين اتنهدت و قالت: 

– أنا عارفة إني مش المفروض اقولك الكلام دا عشان ميخصنيش، بس أنا هحكيلك اللي حصل عشان ممكن دا يكون سبب في زعل عمر. 

ميريهان سألت باستغراب: 

– ايه العلاقة يعني مش فاهمة! 

مريم بدأت تحكي كل حاجة لميريهان من أول جواز عمر من يارا، و ازاي هو كان زوج مخلص و كويس بالرغم من كل تصرفات يارا و اسلوبها معاه، لحد ما عمر اتغدر بيه من اقرب تاني، مراته و أحمد عشرة عمره.

ميريهات كانت بتسمع و بيزول زعلها من عمر و بيزيد احترامها ليه و بيكبر في عيونها اكتر و أكتر، لأن بالرغم من كونه مش غلطان إلا أنه رفض يبرر سبب طلاقه عشان محدش يلوم يارا أو يغلط فيها. 

بعد ما مريم خلصت كلامها ميريهان وقفت و قالت بعزم: 

– أنا لازم ارجع البيت فورًا

سلمي قالت باعتراض: 

– تروحي فين الساعة بقت اتناشر، استني الصبح. 

ميريهان حركت دماغها برفض و قامت تجيب شنطة هدومها و قالت: 

– لاء مش هستنى لحد الصبح، مش هسيب عمر ينام و هو زعلان، سواء كان مني أو عشاني لازم ارجع و اتكلم معاه..

مريم ابتسمت بهدوء و قالت بتشجيع: 

– و أنا جاية اوصلك بالعربية…. 

سلمى بصت لأختها و قالت بعتاب: 

– ايه اللي انتي بتقوليه دا، الصبح اتصرفوا براحتكم، إنما دلوقت مينفعش نخرج بنات لوحدنا. 

ميريهان اعترضت و مريم و قالت: 

– لو هتيجي معانا تعالي مش هتيجي خليكي….

بعد حوالي نص ساعة، وقفت عربية سلمى قدام البوابة الخارجية لبيت عمر ، و كانت مع اختها في العربية مستنين رسالة ميريهان عشان تطمنهم إنها خلاص دخلت البيت  فكانت مريم بتتفقد فونها و فون سلمى بانتظار الرسالة، ف سلمى سألتها بحيرة: 

– انا مش عارفة انتي متحمسة كدا ليه؟! 

مريم ابتسمت و قالت: 

– أصل بشمهندس عمر دا شخصية محترمة جدًا يا سلمي و قلبي انكسر قبل كدا بسبب يارا اللي هو حبها و هي مقدرتش حبه و لا احترمت جوازهم، و أنا حاسة إن ميريهان بتحبه فمش حابة يكون في بينهم خلافات.

ميريهان قربت من باب الدور الأرضي و قبل ما تخبط على الباب سمعت عمر بيقول: 

– أنا ميهمنيش بقى سواء ترجع أو مترجعش، أنا خلاص عملت اللي عليا.

سمية برجاء: 

– يا ابني اللي حصل دا مينفعش، يعني ايه نسيبها تمشي في الوقت ده؟؟ 

عمر اتنهد و قال: 

– بعد إذن حضرتك يا ماما متكلمنيش في الموضوع دا تاني، أخوها و والدها موجودين هما يهتموا بيها بقى.

كان دا رد عمر على سمية اللي بتطلب منه يقنع هدى و يروح معاهم يرجعوا يارا و يتكلم مع أحمد عشان يردها عشان خاطر ابنه اللى لسه مجاش للدنيا.

و بما إن الكلام مكنش واضح بالنسبة لميريهان اللي مسمعتش الحوار من أوله، ف فكرت إنه يقصدها، و خطت خطوتين بعيد عن الباب قبل ما تقف و هي بتقول بهمس لنفسها: 

– هو أنا بناء علي ايه هاخد الكلام عليا؟ انا هدخل و هتكلم مع عمر عشان أنا لو أسأت الفهم ممكن اخسره لآخر عمري و أنا مش عايزة كدا.

و بالفعل رجعت تاني للباب و خبطت و استنت لحد ما الباب اتفتح كانت سمية طلعت شقتها و ظهر عمر اللي لما شافها فضل يبصلها و هو ساكت و بيفكر ليه رجعت في قرارها و هل يستغل الوقت و يتكلم عن مشاعره و لا لاء؟؟ 

ميريهان ابتسمت بهدوء و قالت: 

– مش هتخليني ادخل و لا ايه يا عم عمر! 

رمش بعيونه و قبل ما يتكلم هي قالت بمرح: 

– خلاص همشي. 

قبل ما تلف ضهرها كان هو ماسك ايدها وقال: 

– لاء، متمشيش…. خليكي.

نقلت نظرها بين وشه و بين ايده اللي على معصمها، ف عمر شال ايده بسرعة وقال بحرج: 

– أنا آسف… آسف….. ادخلي.

نطق بجملته الأخيرة و بعد عن الباب، ف ميريهان دخلت و اتجهت علطول للصالون و عمر لحقها بعد ما قفل الباب، سابت شنطة هدومها على الأرض و قالت بمرح: 

– أنا سمعت كدا جملة و انا على الباب، فأتمنى متكنش قاصدني.

عمر فهم قصدها و علطول افتكر نفس الموقف لما حصل مع يارا اللي فهمت كلامه في الفون إنه يقصدها، ف رد و قال بصدق: 

– لاء و الله مكنتش اقصدك، أنا مقدرش اقول كدا عنك، بس ماما كانت بتكلمني عشان يارا، عايزاها ترجع عشان خاطر الحمل، و محدش فى العيلة عايزها ترجع.

ميريهان حركت دماغها بتفهم و قالت: 

– يعني انا وجودي فارق؟؟ و رجوعي هنا يهمك؟.

عمر قال تلقائي: 

– طبعًا فارق، أنا و الله كنت جايلك تاني بس…….

قطع كلامه بسرعة، بس خلاص الجملة المهمة كانت اتقالت، ف ميريهان ابتسمت بحب و قالت: 

– اهو أنا سبقتك و مهنتش عليا تنام زعلان مني…. انا آسفة.

عمر قال بحب: 

– انا مبسوط انك رجعتي يا ميري، و أنا اللي آسف و الله مكنتش قاصد أبدًا إنك تزعلي سواء مني أو من يارا…..وعد و الله إن لحد ما الإجازة تخلص محدش هيزعلك أبدًا. 

ميريهان وقفت قدامه بعد ما احتفظت بمسافة مناسبة و قالت: 

– و أنا مش زعلانة منك أبدًا يا عمر، انا زعلت بس عشان كنت مفكرة إن وجودي مزعج بالنسبة ليك. 

عمر بصدق: 

– أبدًا و الله، عمر وجودك ماكان مزعج أبدًا، بالعكس وجودك في حياتي هو اللي مخليني حابب حياتي و حابب أعيش. 

ميريهان سألته بمشاكسة: 

– يعني أفهم من كدا إنك حاببني؟؟ 

عمر بص في عيونها و قال برومانسية: 

– ايوه بحبك. 

تلاشت البسمة اللي على وشها، و بصتله بدهشة فهو كرر: 

– ايوه بحبك….. أنا بحبك يا ميري. 

كانت ضربات قلبها سريعة جدًا، و خدودها احمرت بسبب الخجل، و لأول مرة تحس إنها مش قادرة تتكلم أو تنطق و ترد على عمر، جواها مشاعر ملغبطة، مبسوطة و مكسوفة و خايفة و متوترة و عاشقة، لما أدركت شعورها الأخير فمكنش منها رد غير إنها جريت بسرعة و طلعت للشقة اللي بتبات فيها و نست إن المفتاح معاه. 

وقفت قدام الباب و هي بتلقط أنفاسها بصعوبة، و بتبتسم بسعادة، خبطت على جبهتها لما افتكرت المفتاح و قالت: 

– اهو كدا مجبرة انزل تاني، و أنا محروجة اوي. 

سمعت صوته من وراها بيقول: 

– لاء مش مجبرة، و هعمري ما هقبل تكوني مجبرة.

لفت بسرعة فكان عمر واقف و معاه شنطة هدومها و المفتاح و بيبصلها بابتسامة، قرب فتح الباب و حط الشنطة و بصلها و قال: 

– انتي مش مجبرة علي حاجة، ممكن تعتبريني مقولتش حاجة. 

تخطاها عشان ينزل فهي فهمت إنه فسر رد فعلها غلط، فسألته و قالت: 

– تقصد ايه؟ 

عمر رد عليها من غير ما يلف و قال: 

– يعني لو مش بتحبيني عادي، متعود على كدا. 

ميريهان قالت بتكشيرة: 

– لاء، مش بحبك……….

يتبع……..

  •تابع الفصل التالي “رواية لم يكن تصادف” اضغط على اسم الرواية