رواية و للنصيب رأي أخر الجزء الثاني 2 الفصل الثاني عشر 12 – بقلم لوليتا محمد

و للنصيب رأى آخر ( قسوة الحنين )…

الجزء الأخير ل روايه ( و مرت الأيام )…..

بقلمي/ لوليتا محمد….

《الحلقه ١٢ 》….

فجأة سمعوا صوت واحده بتقولهم:

…: excuse me….  (  لو سمحت )

وائل و نهي وقفوا لعب و هزار و بصولها… و هي بصتلهم بإبتسامه هاديه و إحراج وهي بتقولهم:sorry for my interrupted….

( آسفه إني قاطعتكم)….

نهي بصتلها من فوق لتحت بحده و غضب… و وائل بصلها بتوتر و لسه يادوب هيتكلم…. لقي نهي لفت جسمه كله و أدت للبنت ظهره…. و قالتلها بحده و نرفزه: ?? how can I help u ( إزاي أقدر أساعدك)؟؟

البنت إستغربت تصرف نهي مع جوزها… و وائل رجع وشه و بصلها بنرفزه و حده، و قالها بالعربي: إيه إللي إنتي بتعمليه ده؟؟؟

نهي قالتله بحده و غيظ: لف وشك بدل ما أقلب عليك… ماهي مش ناقصه خناق ع الصبح….

البنت بصراحه كانت مزه يعني… لابسه هوت شورت و كات… حاجه كده من إللي بنشوفها ف الأفلام….. 

وائل مردش عليها و بص للبنت إللي بصالهم بحيره و إستغراب على تصرفاتهم و كلامهم إللي مش مفهوم بالنسبالها…. و وائل مااداش إهتمام ل كلام مراته و قال للبنت: yes…. ( أيوه… )…

نهي ربعت إيديها بحده و غضب و بصتله شرزآ و هي نفسها تول^ع فيه… و البنت بصوت حزين نسبيآ: I’m  Selina, and 

my house is front of yours

( أنا سيلينا…. و بيتي قصاد بيتكوا )…

نهي بغتاته:  ok, how can we help u؟؟؟؟

( ماشي… إزاي نقدر نساعدك ) ؟؟؟

وائل كان ساكت بس مكنش عاجبه طريقة نهي ف الكلام معاها…. و سيلينا ب نبره حزينه شويه: 

Selina: sorry, but my dog is…..

سيلينا: آسفه، بس الكلب بتاعي….

نهي مخلتهاش تكمل كلامها…. و بصوت آيتن عامر: ناعااااااام…… ال إيه يا عنيا؟؟؟؟؟

سيلينا إتصدمت و إتخضت من صوتها و طريقتها و رجعت خطوه لورا…. و وائل مكنش أقل منها ف صدمتها لأنه أول مره يشوف مراته بتتكلم مع حد بالشكل ده…. لحظات و قالها بصدمه: نهار أزرق…. إيه ده؟؟؟؟

نهي بصتله بحده و غيظ: كلب….. جايه لغاية هنا عشان كلب….. دي بتستهبل ولا بتستعبط….

وائل بلع ريقه بتوتر وهو بيبتسم و بيحاول يهدي مراته: طب ممكن تهدي شويه و نفهم الأول إيه الموضوع…. أصبري بس شويه…..

نهي ربعت إيديها و بحده: شوفها ياخويا…. أما أشوف آخرة الأجانب دول إيه…. قال كلب قال…..

وائل رجع بصلها و هي بتسأله بخوف من مراته شويه…. 

( هنكمل بالعربي بس الحوار بالإنجليزي)….

سيلينا: هي مراتك كويسه؟؟؟ ولا تعبانه؟؟؟؟

نهي فكت إيديها الأتنين و قالت بغيظ بالعربي وهي خلاص على آخرها و هتجيبها من شعرها: بنت ال….. أنا تعبانه….

وائل بعصبيه وهو بيمسكها من دراعها قبل ما تتهور و تفرج عليهم الأجانب و القري المجاورة: يا نهي أهدي بقا ف يومك إللي مش باين له ملامح ده…. أهدي شويه و عديها بقا…. عديها….

نهي بعصبيه و نرفزه: عاجبك إللي هي بتقوله ده؟؟؟؟

وائل بتنهيده: لأ طبعا مش عاجبني…. بس إنتي بتديها فرصه تقول كده…. نهي بصتله بغضب جامح… وهو بهدوء شويه: أهدي و إسمعي للآخر….

نهي فضلت تاخد كذا نفس ورا بعض عشان تهدي…. و وائل بهدوء للبنت: ممكن تقوليلنا ماله الكلب بتاعك….

نهي بصتلها بحده… و سيلينا بهدوء: نزلت البدروم أجيب حاجات منه ولما خلصت محستش بيه إنه نزل ورايا غير لما قفلت الباب بالمفتاح و سمعت صوته جوه…..

نهي بالعربي و هي بتبصلها بقرف و غتاته و غيظ: يا حنينه…. إيه فقعة المراره دي….

وائل قال لمراته بالعربي بس بغلاسه وهو بيضحك ضحكه خفيفه: ههه…. مش إنتي شيلتي المرارة… يبقي هتفقعهالك إزاي بقا؟؟؟

نهي بصتله بحده و غضب و قالتله بالعربي: إتلم يا وائل و عدي يومك علي خير…. ماشي؟؟؟

وائل هز دماغه ب حاضر وهو بيكتم ضحكته بالعافيه علي كلامها…. و سيلينا مافهمتش كلام نهي…. و نهي بتكمل كلامها بغيظ منها بس بالإنجليزي: إيه المشكله؟؟؟؟ ما تفتحيله الباب…. هي صعبه أوي كده….

وائل كان مبتسم بهدوء لأنه فاهم نهي و حاسس بيها و بغيرتها عليه…. و عارف إن نهي فاهمه البنت و الموضوع مش مجرد إنها محتاجه مساعده حد… لأ…. هي بتقرب من جوزها بطريقه غير مباشره….

سيلينا بحزن مصطنع: ما أنا فعلا جيت أفتحله المفتاح إتكسر جوه الباب و الباب لسه مقفول….

نهي بغيظ منها بالعربي وهي بتوجه كلامها لجوزها: ما تتصل ب جمعية الرفق بالحيوان و هما يتصرفوا…. إشمعنا إحنا يعني…

وائل مقدرش يمسك نفسه أكتر من كده و إنفجر من الضحك…. سيلينا مافهمتش حاجه من كلامها… بس كشرت شويه من ضحك وائل…. و نهي بغضب من جوزها: عجبتك أوي؟؟؟؟؟

وائل بضحك: هههههه….. الله يسامحك يا نهي….. 

نهي بغيظ: ولا…… بطل غتاته….

وائل بدأ يهدي شويه من الضحك…. و قال ل سيلينا: طب ثواني…. هغير هدومي و هاجي معاكي أكسر الباب و نخرجه….

سيلينا إبتسمت له بهدوء: ok…. هستناك….

نهي بعصبيه و حده بالعربي: تروح معاها فين!!!! أنت بتستهبل يا وائل؟؟؟؟

وائل بإبتسامه غلاسه وهو باين ف كلامه إنه مصمم على رأيه إنه يروح معاها: هروح معاها أخرج الكلب…. فيها حاجه دي؟؟؟؟

نهي لما لاحظت و حست إنه مصمم علي رأيه و حست إن العند معاه هيجيب نتيجه عكسيه و برده ه ينفذ إللي ف دماغه، ف قالتله بغضب جامح و غيره عليه: آه يا وائل في… وائل بصلها بهدوء بس بإنتباه وهي بحده و غيره: مش هسيبك تروح معاها لوحدك…. وائل لسه زي ما هو ساكت بس بيبصلها بإهتمام….. و هي بتكمل كلامها بحده: فيها لا اخفيها ….. رجلي علي رجلك…. و غصب عنك مش بمزاجك يا وائل….. و إلا و الله ل هنكد عليك عيشتك إنهارده… أنت سامع؟؟؟؟ 

نهي كانت خلاص جابت آخرها و فقدت السيطره على نفسها و أعصابها و مقدرتش تتحكم فيها و لا ف غيرتها عليه….

وائل إبتسم إبتسامه خفيفه و مقدرش ينكر من جواه إنه كان مبسوط وهو شايف غيرة مراته عليه و حاسس بيها… إبتسم بهدوء وهو بيقولها: ماشي يا نهي…. تعالي معانا…

وائل بيوسع لمراته و بيشاورلها ب إيده عشان تمشي قدامه وهو وراها…. ف نهي و هي بتجز على سنانها بغيظ منه: أمشي قدامي يا وائل بدل ما أطلع عليك عفاريتي كلها…. قدامي….

وائل كتم ضحكته بالعافيه وهو بيمشي قدامها…. و نهي بصت للبنت بغضب لقتها بتبصلها هي كمان بضيقه….

وائل طلع يغير هدومه المبلوله هو و نهي إللي كانت طول الوقت مش طايقه نفسها ولا طايقاه و لا طايقه حد…. سألته بحده و نرفزه و عصبيه: أنا مش قادره أفهم… أنت ليه مصمم تروح معاها….

وائل بهدوء وهو بيغير هدومه: الناس ل بعضيها يا نهي… الرسول عليه أفضل الصلاه و السلام ( عليه أفضل الصلاة والسلام )…. وصانا على سابع جار…. وائل بهدوء أكتر من الأول: مالناش دعوه بنيتهم إيه…. إحنا لينا إللي بيبقي قدام عنينا…. نهي أخدت نفس جامد وخرجته جامد بضيقه… و وائل بإبتسامه هاديه وهو بيقرب منها بحب: خلي عندك حسن ظن يا نهي…. وائل بجديه شويه: يمكن فعلا محتاجه للمساعده….

نهي بصت ل بعيد بضيقه… لحظات وبصت له بهدوء: ماشي يا وائل…. هحاول أقنع نفسي بكده…

وائل إبتسم بهدوء وهي بحده و غيره و وعيد: بس و الله العظيم لو طلع إحساسي صح ل هجيب عليها واطيها…. وائل تنح و أتصدم من كلامها… و هي بتكمل كلامها بحده: آه…. ما أنا مش هستني لما الفاس تقع ع الراس…. و أقعد أغني ظلموه…. أنت سامع؟؟؟؟

وائل وهو بيضرب كف علي كف: لا حول ولا قوة الا بالله العلي العظيم…. طب أعمل فيها إيه بس يا ربي…. نهي بصتله بغضب و غيظ وهو بهدوء وهو بينزل على تحت: ربنا يهديكي يا نهي….

نهي بغيظ منه و هي نازله وراه: و يهديك و يبعد عنك الحريم….

وائل لف وشه بسرعه و بتتنيحه: حريم؟؟؟؟

نهي بغتاته: آه ياخويا الحريم…. عاجبك ولا مش عاجبك؟؟؟

وائل غصب عنه ضحك بهدوء وهو بيضرب كف على كف بسبب تحول مراته المفاجئ ده: هو أنا أقدر أقول حاجه….

نهي بغتاته: آه… بحسب….

نزلوا ورا بعض و البنت إتفاجئت إن وائل نازل مع مراته و هتروح معاهم…. كانت فاكره إن وائل هيروح معاها لوحدهم…. ف لما لقت مراته معاه كشرت أوي و بانت عليها تكشيرتها…. ف نهي بتقولها بالعربي و الإنجليزي و هي مبتسمه أوي بغلاسه و نصر إنها محققتلهاش إللي نفسها فيه إن جوزها بس هو إللي هيروح معاها: يلا يا حبيبتي… يلا   …..go together, the  three of us

يلا يا حبيبتي…. هنروح إحنا التلاته مع بعض… نهي بالعربي: أسره مع بعضينا.. (بصوت خالد الصاوي ف فيلم ” الباشا التلميذ” )….

البنت إضطرت تمشي قدامهم بغضب وهي بتحاول تداري على قد ما تقدر خنقتها و ضيقتها منها…..و وائل ماشي جنب مراته وهو بيداري ضحكته و مراته إللي عماله تبصله بحده و غضب و هي بتغزه ف دراعه من فتره للتانيه….

دخلوا البيت و نزلوا البدروم، و فعلا سمعوا صوت الكلب من جوه عمال ينبح…. وائل رجعهم ورا و فضل يضرب الباب ب رجله مره ف التانيه لغايه ما كسره و خرج الكلب…

الكلب جري علي سيلينا و هو عمال يحضن فيها و هي كمان قال إيه كانت قلقانه و زعلانه عليه….

وائل كان هادئ بس مبتسم…. و نهي كانت بصالها و هي مش طايقاها و نفسها تول^ع فيها و ف كلبها…. 

لحظات و وائل بهدوء: معلش… كنت مضطر أكسر الباب عشان أخرجه….

نهي بصتله بغضب… و البنت قامت بهدوء و هي مبتسمه أوي و بتوجه كلامها ل وائل بإبتسامه هاديه: thanks a lot, how can I bring it back?

البنت: شكرا أوي… إزاي أرد جميلك؟؟؟

بتقوله كده و هي يادوب بتقرب منه عشان تحضنه…. ( أجانب بقا و عادي بالنسبالهم)….

وائل إتوتر من تصرفها و كشر أوي وهو بيرجع خطوه لورا و نهي بسرعه وقفت قصادها و بحده و عصبيه بالعربي و هي بتشاور ب إيديها بالجنون: إنتي إتجننتي و لا إتهبلتي و لا جرا ف عقلك حاجه… إنتي بتستهبلي؟؟؟

سيلينا رجعت خطوتين تلاته ورا بخوف… و هي بتبص ل وائل و مراته… و وائل بتكشيره و غضب بس بهدوء وهو بيمسك إيد مراته عشان ما تتهورش و تنقض عليها: خلاص يا نهي…. يلا بينا….

نهي مركزتش مع جوزها نهائي و قالت ل سيلينا بالإنجليزي بصوت حاد: أبعدي عن جوزي أحسن لك… عشان إنتي ما تعرفيش أنا ممكن أعمل فيكي إيه…. نهي ب صوت عالي و حده و غيظ وهي بتبرقلها بعنيها: هوريكي شغل الجنان على أصوله…. سامعه؟؟؟

سيلينا لسه زي ما هي مرعوبه و كاشه ف نفسها و نهي بصت لجوزها بحده و غضب و نرفزه و توعد: أتفضل أمشي قدامي بدل ما أخلي ليلتك سوده… و أطلع عليك العرق الصعيدي… قدامي…

وائل ب يحاول يحتوي الموقف… ف قالها بهزار وهو مبتسم شويه وهو بيمشي قدامها: الله…. و أنا مالي يا لمبي….

نهي و هي خلاااااااص جابت آخرها: مالك!!!! طب أنا هوريك الوش التاني يا وائل…. قدامي….

وائل مشي قدامها وهو بيضحك و هي هتفرقع من كتر الغيظ….

سيلينا أخدت نفس جامد وخرجته بالراحه وهي ما صدقت إنهم مشيوا… لحظات و طلعت من البدروم على فوق و خرجت ف الجنينه مع كلبها و هي عنيها عليهم ب غل و غيظ….

نهي أول ما دخلت البيت قلعت حجابها و بتقوله بحده و عصبيه: مش أنا قولتلك إن تفكيرها شمال ماصدقتنيش… تفتكر هتخيل عليا الحركات ال نص كم دي… نهي و خلاص فقدت السيطره على نفسها و هدوئها: من هنا ورايح هتسيبني أنا إللي أتعامل مع الأشكال دي… سامع؟؟؟ ما أنا مش ناقصه كل يوم و التاني واحده تنطلي و تتحججلي ب أي حاجه عشان تتكلم مع سيادتك…

وائل بجديه بس بهدوء: هو إنتي شايفاني سهل أوي كده…. و أي واحده تشاورلي أروحلها؟؟؟

نهي إنتبهت ل كلامه…  و بلعت ريقها بتوتر و هي متبرجله و متلخبطه و بهدوء شويه: أنا قصدي…

وائل قرب منها بهدوء وهو بيحط إيديه الاتنين على دراعاتها، و بإبتسامه هاديه و هو بيبصلها ب نظرة إحتواء: حقك إنك تغيري على جوزك…. لكن مش من حقك إنك تسيئي الظن بيه و تفضلي تحطي أوهام ف دماغك و تزوديها و تعيشي فيها و تكبريها و تتهميه إنه يروح ورا أي واحده تشاورله أو تتكلم معاه….

نهي بلعت ريقها بضيقه و هي بتبصله بتكشيره حزن: مش قصدي إللي أنت فهمته يا وائل… أنا مكنش قصدي أتهمك ب حاجه…

وائل إبتسم بحب وهو بياخدها ف حضنه و بيضمها أوي… وهي ضمته أوي و هي بتستخبي ف حضنه و كأنها خايفه ل يسيبها و يروح لغيرها: غصب عني يا وائل…. عارفه و متأكده إنك مش خاين وإنك بتخاف من ربنا سبحانه و تعالي… بس مش قادره أنكر غيرتي عليك….

وائل إبتسامته زادت عن الأول وهو بيضمها أكتر من الأول وهو بيطمنها: عارف يا قلبي…. عارف إنك ماتقصديش أي حاجه وحشه…. و أنا مش زعلان منك ولا متضايق…. وائل بعدها عنه عشان يشوف عنيها: بس مش عايزك تتأثري بتصرف أي واحده هنا… و مش معني إن وقفت إتكلمت مع أي واحده…. يبقي لازم تفكيرها يبقا شمال… وائل بهدوء: ما تنسيش إننا دلوقتي ف بلد أجنبيه…. و ده الأبتلاء و الأختبار الحقيقي لينا…

نهي هزت راسها ب تمام… وهو بيغير الموضوع ب هزار: مش يلا بقا ناكل… البت دي هتسد نفسنا ولا إيه….

نهي بسرعه: لأ طبعا… تسد نفسنا إيه…. نهي بهزار وهي بتطبطب علي كتفه: لا عاش ولا كان حد يسد نفسك يا سيد الرجاله…. يا بعلي…

وائل بضحك: ههههه… بعلك…. ماشي يا بعلولتي…. وائل بحب: يلا نحضر الأكل مع بعض….

فعلا وائل بدأ يساعد نهي ف تحضير الأكل…. و فجأة خطر علي بال نهي سؤال مهم….

نهي سابت إللي ف إيديها و بجديه: وائل…. عايزه أسألك على حاجه مهمه….

وائل بإبتسامه هاديه وهو بيقطع الكابوتشا: أسأل يا جميل….

نهي بجديه: ليه الرجاله بعد ما بيكبروا عنيهم بتزوغ ورا أي واحده؟؟؟ ده طبع فيهم ولا إيه الحكايه؟؟؟؟

وائل ساب إللي ف إيده و لف وشه ليها بهدوء: قبل ما أجاوبك هسألك على حاجه…

نهي بهدوء: أسأل…

وائل بجديه: بتسألي بشكل عام…. ولا بتلمحي لحاجه كده أو كده؟؟؟

نهي بتكشيره و غيظ: بشكل عام يا وائل… أنا لو قصداك أنت هسألك بشكل مباشر…

وائل إبتسم بهدوء، و نهي بجديه: معرفش ليه السؤال ده خطر علي بالي حالآ دلوقتي… عشان كده سألته من غير ما أفكر فيه….

وائل قرب منها بإبتسامه هاديه و مسك إيديها و قعدها على أقرب كرسي ف المطبخ و قالها بإهتمام: بصي يا حبيبتي… الحكايه و مافيها إن مش كل الرجاله عنيها بتزوغ بعد ما بيكبروا… في حاجه إسمها الطبع غلاب…. يعني بيبقي كده من قبل الجواز… و في إللي ربنا ب يهديه و يبطل… و في إللي أصلا مالوش ف كده… ف أول حاجه بيبقي طبع…

نهي بإهتمام: طب و حبه ل مراته…. راح فين؟؟؟

وائل بهدوء: الحب يا نهي مش دايما ثابت… بيقل أو يزيد حسب المشاكل أو الحاله النفسيه….

نهي قامت وقفت و بعصبيه: إزاي يعني يا وائل؟؟؟ يعني إيه على حسب الحاله النفسيه؟؟؟ يعني مثلا أنا و أنت إتخانقنا مع بعض على أي حاجه… تبقي خلاص كرهتني و مابقتش تحبني عشان حصلت ما بينا مشكله؟؟؟ وائل بصلها بتتنيحه، و هي بتكمل كلامها بنرفزه أكتر من الأول: معلش بقا بس ده يعتبر تلكيكه عشان تسيبني و تروح تشتكي ل أي واحده بره إن مشاعرك ناحية مراتك خلصت و إنتهت و مبقاش في أي نوع من أنواع التفاهم و تروح بقا للي تفهمك و تشيل عنك همومك و النكد إللي معيشاك فيه…

وائل أتصدم و تنح أكتر من الأول من كلامها… و عدت لحظات سكوت وهو بيحاول يستوعب كل إللي بتقوله… لحظات و بدأ يفوق من صدمته وقالها وهو مزبهل: نهار أزرق… لأ…. أزرق إيه… قولي كحلي…. قولي رمادي…. إيه ده…. هو إنتي لحقتي تألفي قصه و روايه و سيناريو ف لحظه…. إيه يا بنتي…. دي دماغك لسعت منك ع الآخر…. هو القعاد قدام التليفزيون و الفرجه على المسلسلات التركي قلبت دماغك…

نهي بصتله بغل و غيظ و حده: ماتغيرش الموضوع و رد عليا…

وائل بيضحك وهو بيضرب كف على كف: ههههه…. لا حول ولا قوة إلا بالله العلي العظيم …. لأ بصي… أنا لازم أشوفلك موضوع الشغل ده ف أقرب وقت… ده قعادك ف البيت خطر قومي علي البشريه كلها…. ده إنتي شويه و هتبقي شبه المفتش كورمبو…

نهي بحده و عصبيه: أنا شبه المفتش كورمبوا!!!!

وائل قرب منها بهدوء وهو بيضمها و بيضحك عليها ف نفس الوقت… وهي بتحاول تبعد إيده عنها، بس ما مكنهاش من ده… و خدها ف حضنه غصب عنها: هههه…. يا مجنونه…. ممكن تهدي بقا شويه…. نهي بصتله بغضب… وهو بإبتسامه هاديه: بصي…. أنا عايز نهي بتاعه مصر…. ها…. بتاعه المعادي…. مش نهي بتاعه أمريكا…. ماشي….

نهي بغيظ: بطل غتاته بقا….

وائل بتنهيده تعب: يا نهي أفهميني صح…. كل إللي إنتي قولتيه ده غلط…. نهي ساكته و بتسمعه ب إهتمام… وهو بيكمل كلامه بهدوء: عارفه ليه القلب إتسمي قلب؟؟؟؟

نهي بهدوء: لأ معرفش…

وائل بجديه: عشان متقلب…. القلوب كلها بيد الله سبحانه و تعالى يقلبها كيفما يشاء… ممكن حد يزعل من حد ف حاجه شايفها صغيره و مايستهلش إنه يزعل أو يضايق منها…. بس إللي مايعرفهوش إن ممكن يكون الزعل بسبب تصرفات و حاجات قديمه متراكمه جواه، ف قللت إحساسه العاطفي ناحيته ف مبقاش يستحمل منه أي حاجه ولا متقبلها منه حتي لو كانت صغيره أو تافه…

نهي لسه زي ما هي و بتسمعه بمنتهي الهدوء… وهو بيكمل كلامه: ده بالنسبه للأصدقاء أو الصحاب…. لكن بالنسبه ف الجواز الوضع مختلف شويتين تلاته….

نهي بهدوء: عروستي….

وائل بإبتسامه هاديه وحب: إللي بيربط كل إتنين متجوزين بعد مده من الوقت هي الموده و الرحمه و السكينه و العشره و التفاهم  دول بقا بيبقوا أقوي من الحب… نهي بصتله بحيره، و هو بيكمل بهدوء: الحب موجود مانتهاش بس مابيبقاش ف نفس قوتهم… وائل بجديه: ده مش كلامي علي فكره… ده كلام ربنا سبحانه وتعالي…

نهي بهدوء: إزاي يا وائل؟؟؟

وائل بإبتسامه هاديه و حب: ربنا قال في كتابه العزيز، بسم الله الرحمن الرحيم ” و من آياته أن خلق لكم من أنفسكم أزواجآ لتسكنوا إليها و جعل بينكم مودة و رحمه إن في ذلك لآيات لقوم يتفكرون” صدق الله العظيم [ الآيه ٢١ من سورة الروم ]…

نهي بهدوء: صدق الله العظيم…

وائل بإبتسامه هاديه وحب: يعني الأصل ف الجواز يا نهي هو السكينه و الموده والرحمه بين الطرفين… وائل بجديه: و بالنسبة للحب برده موجود بس ساعات من كتر المشاكل و الخناق و العصبيه بين الطرفين و عدم سماع كل طرف منهم للطرف التاني بيخلي الحب ضعيف و هش و مع مرور الوقت بيحصل فتور ف علاقتهم و بيحصل ما يسمي بالخرس الزوجي…

نهي بصدمه و تتنيحه: خرس زوجي؟؟؟

وائل بهدوء: آه… خرس زوجي…

نهي بتعجب: يعني إيه بقا؟؟؟

وائل بجديه: يعني كل واحد منهم يبطل يتكلم مع التاني عن حياته و إللي بيحصل فيها… مش بيشاركوا بعض ف حياتهم اليوميه…. كلامهم بيبقي مقتصر بس على طلبات البيت و الأولاد و إحتياجاتهم… لكن المشاركة ف حد ذاتها ك مشاركه لأ.. بتبقي خلاص خلصت و إنتهت…

نهي بصدمه أكتر من الأول: إزاي يعني؟؟؟

وائل بتنهيده: يعني مثلا الراجل هيبطل يتكلم مع مراته عن أحلامه و طموحاته… هيبطل يحكيلها عن يومه… هيبقي كلامه مختصر معاها… الجواب علي قد السؤال… و مراته بالمثل….

نهي بتتنيحه: يانهار أزرق…. معقول؟؟؟

وائل بجديه: ده للأسف موجود ف حياتنا…

نهي بخوف: وائل… هو ممكن ف يوم من الأيام يحصل كده ما بينا؟؟؟

وائل بسرعه وهو بياخدها ف حضنه جامد و بيطمنها: لأ طبعا يا حبيبتي… إزاي تقولي كده… وائل بعدها عنه عشان يشوف عنيها إتفاجئ ب لمعة عنيها إللي بتهدد بنزول دموعها ف بسرعه مسح دموعها ب إيده وهو مكشر شويه: يا نهي مفيش داعي ل خوفك ده… أنا لسه قايلك إيه… إن التراكمات و عدم سماع كل واحد للتاني بيخلي في فتور… و إحنا الحمد لله رب العالمين مش ب نعمل كده….

نهي و هي بتبلع ريقها بوجع: بس إنت كمان قولت إن كتر المشاكل بيوصل للمرحله دي…

وائل بإبتسامه هاديه: عشان كده قولتلك إن أصل الجواز الموده والرحمه و السكينه و لازم كل إتنين يتكلموا مع بعض بكل صراحه و أريحيه من غير خوف من رد فعل الطرف الثاني… و ف نفس الوقت يعذره و يقدر غيرته عليه و علي بيته… و يحاول يفهمه الصح من الغلط… و يحط نفسه مكانه ف الموقف ده… هل هيتقبل حاجه زي دي  ولا لأ….

نهي غمضت عنيها و إبتسمت أوي وهي بتترمي ف حضنه بحب: بحبك أوي يا وائل…. أوي…

وائل بإبتسامه هاديه وهو بيبوس راسها بحنيه وحب وهو بيضمها أوي جو ضلوعه: متخافيش يا قلبي…. أنا ماحبتش ولا بحب ولا هحب حد غيرك… دخلتي جوه قلبي من سنين ولا حد يقدر يخرجك من جوايا أبدآ…

نهي فرحت و إبتسمت أوي لحظات و بعدت عن حضنه و بصت ف عنيه و قالتله بغلاسه: علي فكره…. كلهم بيقولوا كده ف الأول و الكلام الحلو بيتحول… [ من أغنيه – عمرو دياب –  ” كلهم بيقولوا كده ف الأول ” ]….

وائل بصلها بغيظ بس بحب: تصدقي يا نهي…. إنتي طلعتي فصيله…. أمشي بقا من هنا بدل ما أرش مياه… أمشي…

نهي بضحك و هي بتدفن راسها ف حضنه بحب زي العيال الصغيره: تؤتؤ…. قاعده علي قلبك غصب عنك…

وائل بإبتسامه حب وهو بيضمها أوي: علي قلبي زي العسل… بعشقك يا مجنونه….

ف شركة يوسف…

ماجي أتصلت ب يوسف فوق ال ٦ مرات بس مكنش بيرد و ف المره ال ٧ رد عليها: أيوه يا ماجي…. 

ماجي ب ضيقه و تأفف: هفف… آخيرآ رديت مستر چو…. أنت أتأخرت أوي…. فاضل نص ساعه ع الإجتماع…. 

يوسف أخد نفس جامد وخرجه بوجع و حزن و زعل وهو بيبص من ورا نظارته الشمس على ندي إللى واقفه تضحك و تهزر مع صحابها ف الكليه و هي مش شايفاه و لا واخده بالها من وجوده أصلآ و لا حتي كلفت نفسها و خاطرها إنها ترد علي رسالته إمبارح…. يوسف قال ل ماجي بوجع: ماشي يا ماجي…. مسافة السكه و أكون عندك…. سلام….

يوسف قفل مع ماجي و عينه أصلآ على ندي إللي ماتشالتش من ساعة ما خرجت من باب السيكشن لغاية وقوفها مع صحابها… حس بنغزه وجع ف قلبه و غصه ف زوره و كأنها خدت منه الجزء الحلو إللي فيه و سابته و مشيت من غير ما تصون عشره أو ود…. لحظات و إبتسم بهدوء لما لقاها بتضحك من قلبها و تهزر بصوت عالي و هي بتضرب بالكف مع واحده صاحبتها…. إفتكر لما قالها إنها لازم تتغير و تعيش حياتها و تبدأ حياه جديدة مع صحاب جداد…. و بالرغم من وجعه و حزنه من معاملتها ليه إللي إتغيرت فجأة بدون سابق إنذار أو معرفة ل سبب التغير ده…. إلا إنه فرح لها إنها سمعت كلامه و بدأت حياة جديدة…. آه هو مابقاش موجود فيها بس المهم إنها حطت رجليها على أول الطريق حتي لو من غيره أو بعيده عنه…

قرر بينه و بين نفسه إنه مش هيضايقها ولا هيزعجها تاني لا بمكالمات و لا ب أي وسيله تانيه… و التعامل ما بينهم هيبقي ف أضيق الحدود حتي لما يشوفها مع أبوها و أمها هيبقي التعامل ع القد أو هيتجنب التعامل معاها خالص…..

لف وشه عشان يمشي…. و يادوب مشي خطوتين تلاته… غصب عنه رجع بص عليها وهو بيبلع ريقه بالعافيه من كتر الوجع إللي كاتمه جواه… لقاها قاعده جنب واحد زميلها و هما بيضحكوا جامد….

لف وشه و مشي بسرعه وهو بيتنفس بصعوبه و ف نفس الوقت بيحاول يكتم دموعه إللي خانته و نزلت منه غصب عنه…..

راح شركته و بدأ يشوف شغله بهدوء وهو بيحاول يطرد من عقله أي حاجه تخص ندي….

ف مصر….

زياد فضل طول الليل صاحي وهو بيبص على مراته إللي نايمه جنبه وهو مش قادر يتخيل ولا يستوعب إنها ممكن تسافر و تسيبه… و من غير ما يشعر بدأ تفكيره يروح ل أبعد ما يكون…. لدرجة إنه فجأة تنح و عينه وسعت وهو بيقول ل نفسه بصدمه و ذهول: هي ليليان ممكن ف يوم ت…..

يتبع…