رواية في عشقها هلاكي الفصل السابع والعشرون 27 – بقلم زهرة الربيع

غانم هو اللي قتل والدتك…حطلها ماده سممتها في العلاج بتاعها في المستشفى ..عزيز حكالنا على كل حاجه

حمزه اتجمد مكانه وهو مش مصدق اي كلمه من اللي بيسمعه  وقال بغضب ….انتي بتخرفي تقولي ايه…ايه الهطل ده

وبص لمختار وقال بذهول..وصلت بيك الحقاره لكده…علشان تبرأ نفسك تشوه سمعت راجل برئ وغلبان

مختار قال بقلق عليه..حمزه …..حمزه ارتاح وخد نفسك لتتعب …نسيم هاتيله ميه بعد اذنك

نسيم جريت تجبله ميه ومختار لسه هيمسك ايده يقعده وبيقول ..اهدى الاول ارجوك

بس حمزه دفع ايده ورجع خطوات لورا وقال بزعيق…متعملش نفسك قلقان عليا …امي ماتت بسببك مش بسبب حد تاني …كل حاجه حصلت قدام عيوني متفتريش على الناس

مختار مردش على كلامه كان المهم عنده يهديه اخد الميه من نسيم وقال…اشرب الاول وهنتفاهم

بس حمزه دفع الكبايه من ايده وقعها على الارض وقال بغضب…ابعد عني…انت اللي قولتلها الكلام ده…انت اللي بتتهمه علشان بتكرهه مش كده ….كل ده علشان فاكر انه طمعان في فلوسنا… كل حاجه بالنسبالك فلوس فلوس لحد ما ضعت وضيعتنا معاك ..وحتى امك ماتت بسبب طمعك وحبك للفلوس

مختار لسه هيتكلم روعه قالت بسرعه وغضب…كفايه بقى كفايه انا سمعت كل حاجه بوداني …اخوك معملش حاجه علشان يبقى السبب مكانش بيتاجر اصلا في السم اللي اتلقى في عربيته …الزفت اللي انت بدافه عنه هو اللي حطهوله.. افهم متقفلش دماغك

حمزه قال بغضب…الزفت اللي انتي بتتكلمي عنه ده هو اللي رباني ….هو اللي خد باله ليا وهو اللي وقف جنبي وكان يسال عني…هو ضهري اللي اتسندت عليه في اصعب اوقاتي…. في الوقت اللي عيلتي كلهم مكانوش جنبي فيه….مستحيل اصدق كلام وسخ زي ده عنه سامعين كلكم

ولسه هيمشي روعه قالت بصوت عالي ….انا عندي الدليل …تحب تسمعه ولا خايف وهتهرب كمان

عند غانم كان رايح جاي في البيت بقلق وهيتجنن وبيقول…كل ده ومتصلش عليا مش معقول عمره ما عملها..حتى اخوه المجنون مش باين…. ليكون حصله حاجه ….ياترى انت فين يا حمزه

منى نفخت بخنقه وقالت…حمزه حمزه ماخلاص يابابا …هو انت خلفته ونسيته …ده بدل ما تفكر مختار راح فين هو والعقربه اللي معاه 

غانم بصلها بحده فقالت بخوف…..يابابا انا قصدي لاحسن يعملنا مصيبه ولا يكون بيخطط لحاجه يعني

غانم اتنهد وقال…انا هطلع اروح الشركه اشوف لو لاقيت اللي اسمه شاكر اساله يمكن يعرف حاجه

 ولسه هيخرج اتصدم برامي داخل البيت

غانم قال بصدمه…..رامي بيه….انت…انت ايه الللي جابك

رامي ابتسم ببرود وقال…ده سؤال برده ياراجل..ده بدل ما ترحب بيا

واتخطاه وقرب من منى وبصلها بتقييم وقال…دي بنتك يا غانم 

غانم قال بتوتر..احم. ايوه…ايوه يا باشا….ادخلي جوه يا منى

منى بصتلهم باستغراب وقالت..حاضر يابابا

ودخلت اوضتها

غانم قال بسرعه…خير ياباشا ..ايه الامر المهم اللي يخليك تيجي هنا….بص احنا نطلع نتكلم بره في اي مكان اضمن لاحسن مختار يرجع هو ولا اخوه ويشوفك بلاش مشاكل

رامي ضحك وقال باريحيه …هو لو مختار ممكن يرجع هو ولا اخوه انا كنت جيت هنا

غانم قال بقلق…قصدك ايه ..حمزه حصله حاجه 

رامي ابتسم بسخربه وقال…مختار عرف كل حاجه عنك….كل حاجه ….واكيد هيقول لاخوه…ومن باب الاخوه جيت احذرك اختفي لانه مش هيرحمك

بقلم…زهرة الربيع

غانم اتسعت عيونه بذهول وقال برعب…عرف…عرف ايه

رامي قال بضيق… قولتلك كل حاجه …كل حاجه من اول المخدرات اللي حطيتها في عربيته لحد وفاة امه

غانم حس رجليه مش شايلاه وقعد على الكرسي بصدمه ورفع عينه ليه بدموع وقال…ليه…ليه انت وعدتني

رامي ابتسم بسخريه وقال….اللي حصل….انا قولتله لاني كنت فاكر اننا هنخلص عليه ..بس قدر يهرب لان مفيش منك اي فايده…وقاعد زي قلتك….والبنت اللي بندور عليها كل الوقت ده كانت في قلب البيت معاه هنا وانت ولا في الدنيا ….ولانها تبع البوليس قدرت تهربه من ادينا

غانم قال بذهول …انت بتقول ايه.. انا مش فاهم حاجه

رامي قال بسخريه ولا هتفهم…انا جيت احذرك وانت حر بعد كده …سلام يا غنومه 

قال كده ومشي وغانم نزلت دموعه وقال….حمزه ….حمزه لو عرف هيعمل ايه….اكيد هيكرهني….عمره ما هيسامحني ابدا

عند حمزه كان واقف مصدوم لما روعه قالتله ان معاها دليل

وقال انتي قصدك ايه….دليل ايه اللي معاكي

روعه قالت ….معايا جهاز تعقب خفي من اول ما بدات المهمه علشان لو اختفيت يقدرو يلاقوني وبيسجل الصوت وكان معانا وقت ما عزيز خطفنا …دقيقه اوصله باللاب وتسمعه بنفسك

مختار اتصدم وقال….انتي بتسجلي كل اللي بيتقال من وقت ما دخلتي البيت عندنا 

روعه قالت ببساطه…لا….هو بيسجل لوحده مش انا اللي بسجلكم

مختار قعد وقال بيأس وذهول…اه كده معقوله شويه

روعه وصلت الجهاز وحمزه بقى يسمع كلام عزيز عن غانم وكلام ابنه واعترافهم بانه كان معاهم وحط المخدرات وقتل امهم

حس الارض بتدور بيه ومش قادر يشوف كويس

مختار جري عليه سنده وقال بقلق شديد….حمزه حمزه ارجوك اهدى…علشان خاطري انا مش باقيلي غيرك

حمزه بص لمختار لما قال كده ونزلت دموعه وحاول يتكلم بس مقدرش وفجأه وقع من طوله على الارض

نسيم صرخت باسمه وجريت عليه ومختار سنده وهو مرعوب وبمساعدة فايز اخده على الاوضه 

وروعه ونسيم جريو وراهم

بعد شويه كان حمزه نايم على السرير مش حاسس بالدنيا و كانو كلهم متجمعين حواليه 

نسيم دموعها كانت بتنزل بصمت ومختار حاطط اديه على دماغه وبيبص لاخوه بوجع

روعه قربت منه وقالت بحزن….هو حمزه عنده مشكله مرضيه

مختار قال بحزن….ضغطه دايما مش مظبوط وبيرتفع فجأه لما بيتوتر 

روعه قالت بحزن…انا اسفه…بس مش قادره استحمل اتهاماته ليك

مختار بصلها بحزن وقال بعتاب …..لكن انا بستحمل…بستحمل يتهمني ….بس مش بقدر  اشوفه كده ياروعه …انا قولتلك….

بس قطع كلامه لما حس بحد مسك ايده التفت بلهفه ولقاه حمزه بيبصله بدموع وقال باسف وصوته بالعافيه طالع….بس انا مستاهلش ابدا يا مختار

مختار ابتسم وسط دموعه ومسك ايده بقوه وقال….انت اخويا وحبيبي وكل اللي باقيلي …حقك عليا معرفتش احميك ابدا…وعمري ما كنت جنبك

هنا حمزه بكى بقوه لاول مره بعد موت امه وحضنه جامد هو بيقول ….انا اسف…اسف سامحني…. اسف 

وبقى يبكي بالم وندم على كل حرف كان يقولهوله وكل اتهام جرحه بيه

روعه ابتسمت بدموع وشاورت لهم وخرجو كلهم وسابوهم سوا 

مختار حاول يهدي حمزه وقال وهو بيضمه …..بس اهدى خلاص انا مسامحك والله مش زعلان ولا عمري زعلت منك ابدا اهدى علشان خاطري…ياض بس مفيش رجاله بتعيط 

حمزه هدي شويه ونام على السرير ودموعه بتنزل وقال….بس انا مش هسامح نفسي انا اتهمتك في موت امي …واترميت في السجن ظلم ومزرتكش حتى مره واحده…غير الكلام السم اللي كنت اقولهولك مش قادر اتخيل اني كنت بعاملك بالقسوه دي وبعامل اللي قتل امي كانه ابويا 

وكمل بوجع وصوته بيترعش …..ومش قادر اتخيل انه عمل فيا كده ..ازاي ازاي قدر ..انا هموت

مختار اتنهد وقال…ارجوك يا حمزه خليك اقوى من كده …انا مليش غيرك …ولو على الحيوان اللي اسمه غانم انا مش هسيبه …وهرجع حق امي من عنيه انا زي زيك  عرفت  من عزيز انه سممها …لو كنت اعرف قبل كده مكنتش سبته عايش ومتهني

حمزه قال بوجع….طب..طب ليه….ازاي الناس تقدر تمثل كده…ده انا كنت فاكر ان محدش حبني قده….كنت فاكر ربنا عوضني بيه عن اهلي….قلبي واجعني قوي يا مختار

مختار اتنهد وقال…ولسه ياما هتشوف في الدنيا يا حمزه…. وهتتعلم  حاجه مهمه ….مفيش اي حد زي اهلك مهما كان قريب كل الناس هتحبك علشان اللي بيقدم السبت بيلاقي الاحد …الا اهلك حبوك من قبل ما تقدم اي حاجه

…انا هسيبك ترتاح دلوقت ومتقلقش انا هظبط كل الدنيا دي ريح دماغك انت بس

ووقف وغمز وقال …كمان لازم اخرج علشان فيه ناس بره يا حرام هيموتو ويطمنوا هما كمان

حمزه ابتسم بخفه وقال ودموعه بتلمع في عيونه….انت اكيد مش زعلان مني….انا لو مكانك بصراحه مكنتش هسامحك بسهوله

مختار ضحك بخفه  وقال….انت بتعتذرلي ولا بتحرضني …عموما انت عمرك ما هتكون مكاني متقلقش  

….ارتاح دلوقت وهاجيلك كمان شويه 

وميل باس جبينه وقال ….انت الدنيا كلها بالنسبالي

حمزه ابتسم بامتنان ومختار خرج وهو حاسس بسعادة الدنيا كلها لان اخوه رجعله اخيرا 

اول. ما خرج نسيم قالت بسرعه…. انا هطمن عليه

 ودخلتله فورا

ومختار قرب من روعه وقال بابتسامه….شكرا يا رائد…جمايلك مغرقانا والله

روعه هزت راسها بيأس منه وقالت….العفو يا سيدي …ادينا بنحاول نلم من وراك ولو ان الموضوع صعب

مختار رفع حاجبه وقال….لا والله…..عموما انا مبسوط انهارده وهعديلك

فايز حمحم وقال بصوت عالي …مختار تعالي فيه فلم حلو اسمعه معايا احسن من الوقفه عندك. . رجليك لتتعبك

مختار فهم انه مش عايزه يقف مع اخته ضحك وقال…ياسلام وادي واحد خايف على رجليا….اعمل ايه في محبة الناس اللي محوطاني مش عارف

وقال بصوت عالي …جايلك يا باشا حضر الفشار 

روعه ضحكت بخفه ومختار بقى يبصلها باعجاب شديد وقال ..ضحكتك 

روعه ابتسمت وقالت..مالها

قرب منها وقال وهو تايهه في عيونها…..بتونس قلبي

بقلم…زهرة الربيع

روعه نزلت عيونها بكسوف من نظراته ومختار اخد نفس عميق وقال …طب انا هروح لاخوكي اكتر من كده هيجيب التلفزيون ويجي هو 

قال كده و راح لفايز وبقى يتفرج معاه 

وروعه ابتسمت وبقت تبص عليهم من بعيد 

كان قاعد مع اخوها وبيتفرجوا على التلفزيون واخوها مش مبطل ضحك مش على الفيلم طبعا بس على كلام مختار اللي دايما بيفصل اي حد …خصوصا هو وفايز اتعودوا على بعض بسرعه وكان بينهم تفاهم وهزار كانهم يعرفو بعض من زمان

عند حمزه كان بيبص لنسيم اللي مش راضيه تسكت وبتيكي وقال بدهشه….يا بنتي ما انا قمت قدامك اهوه وبقيت زي القرد ..بتعيطي ليه هو انا مت

نسيم قالت بدموع…بعيد الشر عنك…بس انا اتخضيت قوي ومش عارفه ابطل

حمزه ضحك وقال…طب ما اهو فيه احساس اهوه امال ليه مكانش شغال

نسيم قالت بغيظ..ده وقته يعني

حمزه ابتسم بحزن وقال….بجد انا كويس …انا بس مش قادر اتجاوز اللي حصل

نسيم قالت بحزن ….انا عارفه انه غالي عليك

حمزه قال بغضب شديد ووجع…..كان…كان غالي …بس مش٠٠ اغلى من امي اللي خسرتها واخويا اللي بهدلته ….ومش هعدي اللي حصل ولا هسيبه لمختار يتصرف فيه زي العاده…..وهيندم ندم عمره لانه عمل فيا كده

نسيم قالت بقلق عليه…لا يا حمزه …انت طول عمرك بتحسبها بالعقل…. ارجوك اهدي

حمزه قال بدموع…لو كنت حسبتها بالعقل لو مره واحده كنت صدقت مختار من الاول…انا مش قادر انسى الكلام اللي قولته في حقه ….انا حاسس اني اسوء اخ في الدنيا

نسيم ابتسمت ابتسامه صافيه جميله وقالت….انت احسن واطيب قلب في الدنيا…هيه الدنيا اللي مش على مقاس قلبك….كل حاجه هتتصلح صدقني

حمزه ابتسم بحب وقال…انا متاكد انها هتتصلح لانك معايا

من بعد اليوم ده كل حاجه كانت جميله جدا لدرجة ان الكل اتمنو الجمعه دي تدوم وميفترقوش

نسيم كانت بتخلي بالها من حمزه ودايما جنبه وهو كان مبسوط جدا بوقته معاها

ومختار  كان دايما يسعى انه يحسن علاقته مع فايز  علشان روعه والموضوع مخدش منه كتير وفعلا كسبه وبقم اصحاب جدا 

اما مختار مع روعته فكانو في منتهى التفاهم …..والحب بينهم واضح للكل….. وكان دايما يساعدها ويفكرو سوا في القضيه 

كانو الشباب يجتمعوا في اوضه ويفضلوا يهزروا ويضحكوا للصبح وكانت دي اجمل ايام عدت على مختار طول حياته لان حمزه رجع اخوه اللي بيحبه وبيتمنى دايما يبقى معاه

والبنات كانو يفضلوا سوا طول الوقت واتصاحبو جدا ونسيم كانت تطبخلهم اجمل اكل ومتخليش روعه تعمل حاجه علشان تقدر تفكر في القضيه

عدى الوقت عليهم محسوش بيه واتمنو يدوم بالشكل ده لان كل حاجه كانت مثاليه جدا 

وفي يوم كانو  قاعدين كلهم وبيشوفو ماتش كوره والجميع متحمس وبيشجع….الا روعه كانت مخنوقه وطلعت الجنينه تشم هوا

مختار طلع وراها وقال باستفهام…مالك يا روعه  ليه حاسس وشك متغير

روعه قالت بتفكير…مش عارفه يا مختار عمي كلمني امبارح بيقول ان عزيز طول الوقت ده متحركش ولا عمل اي محاوله علشان يلاقيني

مختار قال باستغراب..طب ما ده كويس

روعه قالت بضيق…لا طبعا مش كويس ….كلنا عارفين انه مش هينسى موضوع ابنه  ومش هيسكت عليه…يبقى ليه مبيعملش اي حاجه…اكيد بيخطط لحاجه كبيره

مختار قال بتفكير….هيه فعلا حاجه تحير

روعه لسه هتتكلم  قاطعها صوت تليفونها وقالت باستغراب…ده الظابط ماهر …غريبه ده المفروض يكلمني في الطوارئ

مختار قال بقلق…ردي وافتحي الاسبيكر

روعه ردت وفتحت السماعه وقالت…ايوه يا يا ماهر خير

ماهر قال بتوتر…مش خير ابدا سيادتك….حضرة اللواء عدلي بيه عمك

روعه قالت بقلق…ماله عمي

ماهر قال بارتباك شديد…اتخطف من قدام فيلته انهارده الصبح

روعه قالت بصدمه…ايه

وبصت لمختار وقالت برعب…..يا نهار اسود ….عمي اتخطف يا مختار

مختار قال بغيظ……سمعت….مش نبرتي فيها انتي وعمك وبتسألوا مبيتحركش ليه…..اهو اتحرك ياختي قابلي بقى ووووو