رواية كارثه في العسكر الفصل الثاني 2 – بقلم صباح عبد الله
تاني يوم الصبح بدري. في ساحة التدريب…زياد نايم على الكرسي. قدامه زينه قاعدة على الأرض بطريقة مضحكة وهي حاضنة البندقية ونايمة مستندة عليه. إيهاب يطلع وهو بيتاوب. يشوفهم، يبص لزينه وهو بيقول:
إيهاب:
يخربيتك يا زياد هتموت البت وهنروح في داهية بسببك!
إيهاب يروح عندهم، يبص لزياد بخبث وبعدين يقول بصوت عالي:
إيهاب:
انتبااااااااه يا عسكرييييي!
زياد يقوم مفزوع… زينه تقوم بسرعة وهي رافعة البندقية على إيهاب، وهي بتقول من غير وعي. إيهاب يجري يستخبى ورا زياد.
زينه:
والله لا اطخك عيارين وخلص عليك أنت والعسكري في يوم واحد!
إيهاب بخوف:
الحقنا يا زياد، بنت لمجنونة دي تعمل فيّا حاجة!
زياد بغيظ:
مش إنت اللي جاي عاملها الشويش عطيه اشرب بقى. على الله تطخك عيار ونخلص من جنانك أنت وهي.
زينه وهي بتبص لإيهاب بغضب ونعاس:
زينه:
اطخ يا باشا…
زياد يبص للساعة في إيده وهو بيقول بزهق:
زياد:
معاكي خمس دقايق تكوني — قصدي تكوني جاهزة علشان التدريب. وسبكم من شغل العيال ده علشان ما أطخكوش أنا إنتوا الاتنين وخلص منكم.
زياد يسبهم ويدخل مكتبه. إيهاب يبص لزينه بزعل. زينه تضحك بنعاس وهي بتقول:
زينه:
هههه، بيقولك خمس دقايق وتكون جاهز ياض، يلا روح شوف انت رايح على فين؟
زينه تقع على الأرض وتنام بعنق.. إيهاب يجري عليها وهو بيقول:
إيهاب بقلق:
يا لطيف! هي ماتت ولا إيه دي؟! منك لله يا زياد، ربنا على الظالم والمفتري.
ــــــــــــــــــــــــــــــــ
في الحمامات
زينه تدخل وهي شايلة فوطة وفرشة ومعجون.. بتتسحب وبتبص حواليها، تفتح عين وتقفل التانية، ما تلاقيش حد، تنفخ براحة وتقفل الباب وهي بتقول:
زينه:
أوووف الحمد لله الكل غار في داهية.
زينه تدخل حمام.. فجأة من حمام تاني يطلع زياد لافف جسمه بفوطة وشعره بينقط ميّه. يقف قدام المراية يبص لنفسه… فجأة زينه تطلع، شعرها مفرود ومبلول، لافّة جسمها كله بفوطة.. الاتنين يبصوا لبعض بصدمة.
زينه بصوت:
آآآآآآه الحقوني يا ناااااس، الحقني يا شوييييش!
زياد بسرعة يمسكها ويحط إيده على بوقها وهو بيقول بغضب:
زياد:
هووووس! فضحتينا يخربتك، اسكتي!
زينه تعضه جامد… وتجري بعيد عنه.
زياد بوجع وغضب:
آه يا بت المجنونة، والله لأربيكي!
زينه تبص له بغضب:
وأنا هفضحك! وهقول للظابط إيهاب إنك دخلت الحمّام ورايا وهفضحك يا معفن إنت!
زياد يشم تحت باطه وهو بيقول باستغراب:
زياد:
أنا معفن؟
وبعدين يبص لها بغضب وهو بيقول:
زياد:
خدي يا بت هنا! هو مين ده اللي دخل وراكي الحمّام؟ إنتِ مجنونة يا بت إنتِ ولا إيه؟
زينه تحط إيديها في وسطها:
أمال اللي واقف قدامي ده إيه؟ عفريتك؟
زياد:
لا، استني! إنتِ فاهمة غلط، أنا داخل قبلك يعني إنتِ اللي داخلة ورايا.
يبص للباب بخبث وهو بيقول:
وكمان قفلتي الباب، يعني المفروض أنا اللي أخاف على نفسي مش إنتِ.
زينه بصدمة:
نعم يا خويا! وأنا هدخل وراك ليه إن شاء الله؟ من جمالك ولا من جمالك؟ ده إنت معفن!
زياد يبص لها بغضب، وقبل ما يقول حاجة الباب يخبط من برّه وصوت عسكري بيقول:
العسكري (من برّه):
مين جوّه؟ افتح يا اللي جوّه، عاوز أدخل الحمّام!
زينه تجري بخوف وتستخبى ورا زياد وهي بتقول:
زينه:
أنا في حمايتك ياض!
زياد يبتسم بسخرية وهو بيقول:
زياد:
والله مجنونة وهتجننّي.
وبعدين يقول بغضب:
عدّي، غوري! ادخلي الحمّام اللي طلعتي منه وما تطلعيش غير لما أقولك، انتي فاهمة؟
زينه تجري تدخل الحمّام، وزياد يروح يفتح للعسكري. العسكري أول ما يشوفه يقف مستقيم وهو بيقول:
العسكري:
صباح الخير يا فندم، آسف يا فندم، ما كنتش أعرف إن حضرتك اللي جوّه.
زياد ببرود:
حصل خير يا عسكري، روح شوف إنت هتعمل إيه، خلّص.
زياد يطلع والعسكري يدخل، وزينه تفضل في الحمّام.
ــــــــــــــــــــــــــــــــــــــــــــــ
في ساحة التدريب…
إيهاب واقف بيدرّب العساكر، الكل موجود ما عدا زينه..
زياد ييجي ويبص للعساكر باستغراب وهو بيقول:
زياد:
أمال فين باقي العساكر؟ مش شايفهم.
إيهاب:
قصدك فين زينه؟ مش شايفها.
زياد بزهق:
اخلّص، هي فين؟
إيهاب ببرود:
شكلها طفشت من وشّك.
زياد بغضب:
إيهاب، أنا مش ناقص خفّة دم علي الصبح! رد عليّ قد السؤال.
إيهاب ببرود:
ماعرفش.
زياد بحنق:
ما تعرفش إيه؟
إيهاب ببرود:
مش إنت بتقول رد على قد السؤال؟ بقولك ماعرفش.. ماعرفش هي فين.
زياد يحط إيده على وشه بزهق وهو بيقول بفارغ الصبر:
يا رب صبر أيوب يا رب!
زياد يعقد حواجبه باستغراب، ويفتكر زينه لما سبها في الحمّام، وبعدين يبص لإيهاب وهو بيقول:
زياد:
هو آخر مرة حد شافها كانت فين؟
إيهاب بتفكير:
مش عارف، بس في واحد من العساكر قال شافها داخلة الحمّام.
زياد بشك:
وما طلعتش منه تاني؟
إيهاب باستغراب:
مش عارف.. إنت بتسأل أسئلة غريبة كده ليه؟
زياد يكلم نفسه بزهق:
أكيد المجنونة لسه في الحمّام… هي المصيبة دي طلعتلي منين بس يا رب!
ـــــــــــــــــــــــــــــ
في الحمامات
زياد يدخل، يسمع صوت زينه بتقول وهي قاعدة في الحمّام:
زينه بزهق:
يا باشا يا بوشبب، هو العسكر بيعمل إيه ده كله؟ ده لو كان بيني في الحمامات كان زمانه خلّص.
زياد ينفخ بزهق ويقول بغضب:
زياد:
إنتِ يا زفتة إيه اللي مقعدك عندك لحد دلوقتي؟
زينه بغضب:
زفتة في عينك! مش إنت اللي قلتلي ما تطلعش إلا لما أقولك؟
زياد بزهق:
وأنتِ من إمتى بتسمعي الكلام يعني؟ جاية في الغيبة وتمسكي فيها. عدّي اطلعي، مفيش حد.
إيهاب يدخل جاري وهو يقول بقلق:
إيهاب باستغراب:
في إيه؟ إنتِ بتعملي إيه هنا؟
يفتح بوقها بصدمة لما زينه تطلع من الحمام. زينه تبص لزياد بغضب وهي بتقول:
زينه:
إنت مش قلت مفيش حد يا جدع إنت ولا عاوزني فرجة لك وللحبايب؟
زياد يبص لها بغضب. إيهاب يبص لزياد بقرف وهو يقول:
إيهاب بشك:
هو إيه اللي بيحصل هنا ده؟ ممكن أفهم؟
زينه بغباء:
أنا هحكيلك يا بوس.
زياد بغضب:
بس اسكتي إنتِ وروحي البسي هدومك، غوري.
زينه:
خايف صح خايف تتفضح مش كده؟
إيهاب يبص لزياد بشك وهو يقول:
إيهاب:
هو حصل إيه يا زينه؟ احكي.
زياد بزهق:
ما حصلش حاجة يا إيهاب، أنا عارف انت بتفكر في إيه دلوقتي، بس مفيش حاجة من اللي في دماغك دي حصلت.
زينه بغباء:
لا حصل، وحصل كتير كمان. أنا هقولك يا حضرت الظابط الجدع ده دخل ورايا الحمّام.
زياد بغضب يضربها بالقلم وهو يقول بصوت عالي:
زياد:
اسكتي بقى، قرفتيني. إنتِ حمّارة مش عارفة بتقولي إيه.
زينه تبص له والدموع في عيونها وتسبهم وتجري على برّه. إيهاب يبص لزياد بغضب ويقول:
إيهاب:
حقيقي والله أنا مصدوم فيك يا زياد. وعامل فيها أبو شرف. كنت فاكرك راجل محترم، بس للأسف طلع كله مظاهر.
زياد بغضب:
إيهاب، احترم نفسك، وشوف انت بتكلم مع مين. أنا ساكت علشان إنت إيهاب والعيش والملح اللي بينا، وعيب عليك. إنت مش أول مرة تعرف مين هو زياد.
إيهاب بزعل:
ما هو أنا مصدوم فيك عشان مش أول مرة أعرف مين هو زياد. شكلي كنت مخدوع فيك طول السنين دي.
زياد بغضب مكتوم:
إيهاب انت مش فاهم حاجة. أقسم بالله ما تاخدش على كلام البت دي، دي مجنونة مش عارفة بتقول إيه.
إيهاب يبص له وهو بيهز رأسه بأسف ويسيبه ويمشي. زياد يفتكر لما ضرب زينه بالقلم، يحط إيده على راسه وهو بيقول بزهق:
زياد:
أوف، ده اللي كان ناقص. أنا عارف إنها غبية، بتتكلم من غير ما تفهم معنى الكلام، بس ماكنش ينفع أرفع إيدي عليها. أوف، أعمل إيه دلوقتي؟ من ناحية إيهاب فاهم الموضوع غلط، ومن ناحية المصيبة اللي اسمها زينه—مش معقولة يوم واحد في الكتيبة تقلب الدنيا كده. لازم ألاقي لها حل قبل ما المصيبها تكبر.
•تابع الفصل التالي “رواية كارثه في العسكر” اضغط على اسم الرواية