رواية ما لا يحكى الفصل الثالث 3 – بقلم دنيا شعبان
_ إنتِ أي اللي جابك هنا؟ مش قادرة تسيبيه يفرح شوية بدل النكد اللي معيشاه فيه؟
بتهز رجليها بتوتر وعينها متثبتة على الساعة، بقت تعد الثواني، وكل دقيقة بتعدي كان خوفها عليه بيكبر أكتر. رجعت مسكت التليفون، بس قبل ما ترن عليه سمعت صوت المفتاح في الباب، حطت إيدها على قلبها بارتياح وخدت نفسها وطلعته بهدوء، وقفت وقربت منه أول ما دخل والقلق كان باين عليها.
_ اتأخرت ليه يا حبيبي؟ أنا قلقت عليك.
قلع الجاكت وحطه على كرسي السفرة، ورجع بصلها تاني وقال بهدوء:
_ معلش يا حبيبتي، بس كان عندي ضغط في الشغل النهارده.
_ شغل شغل إيه اللي يفضل لغاية الساعة 2 بليل؟
_ شغل عادي، هو أنا بشتغل إيه يعني؟
_ إنت بتكلمني كده ليه؟ أنا غلطانة إني خوفت عليك؟
_ لا يا ستي، أنا الغلطان، ارتاحتي؟
حاولت تهدأ عشان ما يتخانقوش زي كل ليلة.
_ طيب غير هدومك وأنا هجهز السفرة على طول.
_ لا لا، أنا أكلت مع أصحابي في الشغل.
_ برضو؟ هو كل يوم تأكل معاهم وأنا أفضل مستنياك عشان نأكل سوا، وفي الآخر تسيبني أستناك على الفاضي؟
_ وأنا قولتلك بعد كده ما تستننيش، يعني هتفضلي كل يوم على كده؟
_ ليه؟ هو إنت هتفضل ترجع متأخر كده كتير؟
_ الشغل هو اللي بيحكم بده، ولا عايزاني أفضل قاعد معاكي في البيت؟
_ لا، بس لازم تفهم إن فيه إنسانة ليها حقوق عليك، ومن أبسط حقوقها تشوف جوزها وتقعد معاه شوية.
_ وهو إنتِ كده مش شايفاني؟
_ لا بجد، ده على أساس إنك مش هتدخل تنام دلوقتي وتسيبني زي كل يوم؟
_ طيب ما ده الطبيعي، وهو أنا معنديش شغل غيرك ولا إيه؟ وبعدين إيه شغل العيال ده؟ ناقص تقوليلي تعالى ننزل نتمشى شوية.
_ ياريت بجد، أنا بجد زهقت.
_ إيه شغل المراهقين ده؟ إحنا خلاص بقينا متجوزين، الكلام ده تسيبيه للمخطوبين.
_ مين قال إن الخروجات بس بتبقى في فترة الخطوبة؟ وإن بعد الجواز المفروض نعيش مدفونين في الحياة؟
_ أنا داخل أنام عشان شكلك ناوية تقلبيها خناقة زي كل ليلة.
سابها بكل برود، ولا كأن فيه إنسانة مسؤولة منه وليها حقوق عليه. حست إنها مجرد تمثال قاعد بين أربع حيطان، مستنية أمر منه يحركها وقت ما يحب، ويركنها طول ما هو مش محتاج ليها.
فضلت طول الليل صاحية، قاعدة مكانها من ساعة ما سابها ودخل نام، ولا حاسس بمشاعرها. طول الليل بتسأل نفسها سؤال واحد بس: هو أنا بطلب منه حاجة مستحيلة؟ ولا أنا اللي مكبرة الموضوع والمفروض أستحمل كل ده لوحدي؟ بس أنا بجد تعبت، حاسة إني بقيت عايشة لوحدي، وهو كأنه عايش في لوكاندة، ييجي وقت النوم ويخرج الصبح، وأنا ولا كأني في حياته. كل سؤال من دول كان بيدور في دماغها، مش عارفة تتصرف إزاي.
خرجت من دوامة أفكارها على صوته، كان واقف جنبها وباين عليه إنه لسه صاحي.
_ بتكلمني؟
_ يااه، لسه حاسة بيا دلوقتي؟ سرحانة في إيه كده؟
_ لا أبدًا ولا حاجة، هقوم أجهزلك الفطار عقبال ما تجهز للشغل.
_ بس أنا مش رايح النهارده الشغل.
وقفت مرة واحدة وقالت بفرحة وحماس:
_ بجد؟ يعني هتقعد معايا النهارده؟ بص أنا بفكر نتفرج سوا على فيلم، وأعمل فشار ونطلب بيتزا…
قاطعها وقال:
_ أنا مش رايح الشغل، بس ورايا كام مشوار مهمين، يعني مش هبقى فاضي خالص أقعد معاكي.
اختفت ابتسامتها مرة واحدة، حست بحزن على نفسها، إن حتى الفرحة فرحتها على الفاضي.
_ طيب وفيها إيه لو تأجل مشوارك وتقعد معايا؟ إنت واحشني أوي، ومش بتقعد معايا خالص.
_ معلش يا حبيبتي، تتعوض إن شاء الله، بس ده مشوار مهم وما ينفعش يتأجل.
_ يووووه، أنا زهقت وتعبت، هو إنت كل حاجة عندك شغل شغل، وأنا إيه؟ مش في حساباتك خالص؟
_ إنتِ هتفضلي نكدية طول عمرك؟ نفسي ترحميني، أنا بقيت حاسس إني عايش في سجن.
_ سجن؟ أمال أنا أبقى إيه؟ اللي قاعدة بين أربع حيطان، وإنت اللي بتخرج كل يوم؟ حرام عليك، إنت مش حاسس بيا ليه؟
_ ولما أقعد معاكي مين اللي هيصرف على البيت وعلينا؟
_ بس أنا ليا حق عليك، وبعدين أنا ما بطلبش منك المستحيل، كل اللي طلبته يوم تقعد معايا فيه، حتى ما قولتش خرجني.
_ احمدي ربنا على اللي إنتِ فيه، أي واحدة مكانك تتمنى اللي إنتِ عايشة فيه.
_ على إيه بقى إن شاء الله؟ خليها تيجي وتشوف الهنا اللي أنا فيه.
_ هتيجي، ما تقلقيش، وبكرة تندمي على كل كلمة قولتيها دلوقتي.
سابها ودخل غير هدومه وخرج من غير ما يبص عليها حتى.
كلامه فضل يدور في دماغها: ياترى هو يقصد إيه لما قال هتيجي؟ أنا مش فاهمة حاجة. وفجأة صوت إشعار رسالة ظهر على شاشة تليفونها، بصت عليها باستغراب لأنها جاية من رقم غريب، فتحتها واتصدمت أول ما شافت الصورة.
كان هو وجنبه واحدة، وباين عليهم بيختاروا الشبكة.
وقرأت الرسالة المبعوتة مع الصورة:
“مش هتقولي مبروك لجوزك خطوبته النهارده عليّا؟”
فضلت باصة للصورة بصدمة، مفيش ثانية وكان اللوكيشن اتبعت ليها. فضلت باصة عليه وخدت نفس عميق بعد ما أخدت قرارها، دخلت غيرت هدومها وخرجت من شقتها وركبت تاكسي وطلعت على اللوكيشن.
كان صوت الزغاريط وصلها من قبل ما تدخل المحل، دخلت وشافته وهو قاعد جنب عروسته، وفيه ابتسامة عريضة على وشه عمرها ما شافتها وهي معاه. حاولت تمسك دموعها، وكلمة واحدة فضلت ترددها في دماغها: “ما يستاهلش”.
_ ألف مبروك يا جوزي.
بص لمصدر الصوت، اتصدم أول ما شافها قدامه، ما كانش عارف يقول إيه ولا يبرر إزاي في الموقف ده.
_ مالك يا حبيبي؟ الكلام مش قادر تطلعه ولا إيه؟
أمه: إنتِ ايه اللي جابك هنا؟ مش قادرة تسيبيه يفرح شوية بدل النكد اللي معيشاه فيه؟
ردت عليها بكل برود رغم قسوة كلامها:
_ نكد؟ تؤ تؤ، أخس عليك يا حبيبي، بقى مفهم مامتك إني نكدية؟ أنا زعلت منك.
حاول يجمع كلام يقوله:
_ إنتِ جيتي هنا إزاي؟ وإزاي تخرجي من غير إذني؟
_ خرجت من الباب طبعًا يا حبيبي، وجيت إزاي بقى دي تسأل الصفرا بتاعتك… قصدي خطيبتك يعني.
بصلها وهي قاعدة قدامه، فركت في إيدها بتوتر وقالت:
_ مالك بتبصلي كده ليه؟ ما أنا من الأول عرفتك إن مستحيل حاجة تتم من غير ما مراتك تعرف، بس إنت اللي كنت رافض.
أمه: ولا يهمك يا حبيبتي، وبعدين ما هو كان رافض عشان عارفها نكدية، ولو عرفت هتبوظ علينا فرحتنا زي ما عملت دلوقتي.
تجاهلت كل كلام أمه وبصت للعروسة وقالت:
_ بصراحة، إنتِ صعبانة عليا أوي، يعني خسارة شبابك تحبسيه بين أربع حيطان.
ردت عليها العروسة باستغراب:
_ يعني إيه؟
وقبل ما ترد عليها كان راحلها ومسكها من إيديها جامد وشدها بعيد عن الكل وهمس ليها:
_ إنتِ إيه اللي جابك هنا؟ يلا امشي روحي البيت، وحسابي معاكي بعدين.
بس هي شدت إيدها ورجعت قربت عليهم وقالت بصوت عالي خلّى كل اللي في المحل يسمع:
_ أمشي؟ أمشي إزاي بس؟ ده حتى تبقى عيبة في حقي، يعني جوزي خطوبته النهارده وأمشي؟ بس عندك حق، أنا لازم أمشي عشان تاخد راحتك مع خطيبتك، بس مش على البيت، تؤ تؤ، على المحامي على طول. آه صح، شكلي نسيت أقولك إني هرفع عليك قضية خلع، وده أقل واجب يتعمل معاك. بقى يا راجل معيشني بين أربع حيطان زي الخدامة عندك وأنا راضية، وكل ليلة ترجعلي متأخر، واتاريك بتجهز لخطوبتك، والمغفلة اللي مرزوعة في البيت ولا معبرها. ده إنت شككتني في نفسي، وفي الآخر تقولي إنتِ عايشة في نعمة وغيرك يتمناها؟ اديني سايباهالك، وخلي النعمة للحلوة بتاعتك دي، لو استحملتك يوم واحد تبقى بطل.
ــــــــــــــــــــــــــــــــــــــــ…♡
الحلقة 2
فضلت واقفة قدامه لثواني، وملامحها كلها قوة وابتسامة عريضة على وجهها، بتحاول تداري بيهم وجع قلبها وحزنها. أول ما خرجت من المحل، كل ده اختفى، كانت عاملة زي الطفلة التايهة، ماشية بس عقلها مش معاها. سمحت لدموعها تنزل لدرجة إنها ماكنتش شايفة الطريق بوضوح بسبب دموعها، ومحستش بنفسها إمتى وإزاي وصلت لشقتها بعد مشي كتير. أول ما دخلت، فضلت تبص لكل ركن في الشقة وكأنها بتعيد ذكرياتها اللي كانت بتحاول تعملها بنفسها، حست إن كل الذكريات كانت هي بس اللي موجودة فيها، وهو كأنه كان خيال عايش معاها طول السنين اللي عدت.
حطت شنطتها على أول كرسي قابلها، وأول حاجة بصت عليها البلكونة، أكتر مكان بتحبه في البيت كله، وأكتر مكان كانت بتقضي فيه الوقت مع كتابها المفضل وكوب النسكافية. دخلت وقربت من السور، وقبضت بإيديها عليه بقوة وغمضت عيونها بقوة وهي بتحاول تمنع دموعها إنها تنزل. فضلت تحاول تاخد نفس، وفي كل مرة كانت بتطلعه بقوة كأنها بتحاول تتخلص من كل الوجع اللي في قلبها، بس كان صعب عليها.
بدأت تفتح عينها بهدوء، رفعت إيدها ومشيتها على الزرع بكل حب وكأنها بتودعه.
وقالت بهمس لنفسها: “يمكن إنت أكتر حاجة هتوحشني بجد.”
رجعت بنظرها على كل ركن في البلكونة بحزن إنها هتسيبها. “بعض الأشياء الصغيرة تُمنحك السعادة أكثر مما يعطيه الإنسان.”
بعد ما فضلت واقفة في البلكونة ما لا يقل عن ساعة، خرجت منها واتجهت إلى غرفتها. أول ما دخلتها، حست بخنقة غريبة كأن الأكسجين اتسحب من الأوضة.
رفعت شنطة هدومها على السرير، وفتحت الدولاب وبدأت تلم كل هدومها فيها. في وسط هدومها كان فيه تيشرت ليه، مسكته وضغط عليه جامد عليه وكأنها بتتخيله هو قدامها، وقالت بصوت مليء بالخذلان:
_ إزاي فيه إنسان يقدر يخدع شخص للدرجة دي؟ إزاي دايمًا يطلع فيه كل العيوب لمجرد إنه يشككه في نفسه ويطلع نفسه المظلوم؟ قدر يقنعني بسهولة إنه كده بيبني مستقبلنا، كل الفترة دي مفهمني إنه بيعمل كل حاجة عشان نعيش كويس بعد كده، وهو طلع عايش لنفسه وبس، إنسان أناني وحقير. إزاي قدر يضحك عليا باسم الحب؟ طب ليه؟ ليه اتجوزني من الأول؟ ليه؟ ليه؟ وكملت بسخرية:
_ قال بيحبني. وقالت بحسرة:
_ هتفضل أكبر كذبة في حياتي.
سابت التيشرت على السرير وقفلت شنطتها حلو، رفعتها من على السرير ونزلتها على الأرض ببطء.
أول ما فتحت باب الأوضة، في نفس اللحظة باب الشقة اتفتح. دخل، وأول ما شافته قدامها فضلت مكانها لغاية ما الصدمة نزلت عليها. أول ما شافت داليا دخلت الشقة، وقفل هو الباب وراها.
(داليا اللي المفروض بقت خطيبته)
أول ما شافتها، حست إن الدنيا بقت بتلف بيها. للدرجادي جايبها لغاية عندي؟ ما عملش أي حساب ليا ولا لي رد فعلي هيكون إيه، ولا خاف حتى على مشاعري.
مشاعري؟ أنا غبية أوي بجد، يعني هو كان خاف عليا قبل كده عشان يخاف دلوقتي؟ طلع شخص أناني وأنا ماكنتش واخدة بالي، أو يمكن أنا اللي كنت مصرة أعمل نفسي مش واخدة بالي.
فضل عاصم باصص على نور، وهو شايف شنطة هدومها جنبها، فهم هي ناوية على إيه.
فاقت من سرحانها على صوته اللي بقى أكتر حاجة بتكره تسمعها:
_ إنتي رايحة فين يا هانم؟
داليا كانت بتبصلها بشماتة وغرور.
لاحظت نور نظراتها الحقيرة وقالت بقوة، وصوتها كان حاد:
_ وإنت مالك؟
رد بعصبية:
_ مالي؟ إنتي اتجننتي ولا إيه؟
داليا مسكت إيده وقالت بغيظ عشان تضايق نور، متعرفش إنها كانت قرفانة منها أصلًا:
_ متعصبش نفسك يا حبيبي عشان واحدة متستاهلش.
ردت نور بانفعال:
_ خلي واحدة غيرك تقول كده، إنتي أكتر إنسانة حقيرة ومتستاهليش، بس أقول إيه؟ ما الطيور على أشكالها تقع.
_ شايف يا حبيبي بتكلمني إزاي؟ نفسي أعرف كان عاجبك فيها إيه، ده كفاية أسلوبها.
نظراته لنور كانت حادة، مفهاش أي ذرة حنان ولا حب.
_ نور، اتكلمي عدل أحسنلك بدل ما تشوفي الوش التاني.
ردت عليه بسخرية شديدة:
_ قول وش تالت، خامس، عاشر. هو أنا كنت أعرفك أصلًا؟ لا، أنا اكتشفت إن عمري ما كنت أعرفك يا عاصم. عايشة معاك تحت نفس السقف، بس ماكنتش أعرف إنك واحد كداب وخاين ومتستاهلش الحب اللي حبيتهولك.
_ هو إنتي مكبرة الموضوع ليه كل ده؟ عشان خطبت وهتجوز؟ هو ده مش حقي؟
_ حقك؟ أنا بجد مش مصدقة البجاحة اللي بتتكلم بيها. اللي يشوفك يقول يا عيني دي ظالمة، بس الحقيقة إنك أكتر واحد ظالم ومعندكش ضمير ولا رحمة.
_ نور، آخر مرة أحذرك، احترمي نفسك وإنتي بتتكلمي معايا، وبلاش تنسي إني أبقى جوزك وواجب عليكي تحترميني.
داليا:
_ وهي تفهم إيه عن احترام الزوج وتقديره؟ وكويس إنك اكتشفتها على حقيقتها يا حبيبي، والمفروض متخليهاش على ذمتك دقيقة واحدة بعد اللي قالته.
نور:
_ إنتي تعرفي إيه عن الاحترام؟ إنتي آخر واحدة تتكلمي عنه. وبعدين يا محترمة، إزاي تيجي شقة خطيبك لوحدك، واللي هو المفروض بيتي؟ ولا ماما مقدرتش تطلع معاكي السلم؟
داليا:
_ آه، قولي إنك غيرانة مني عشان فضلني عليكي. تؤ تؤ يا حرام، متعمليش في نفسك. ومتخافيش، أنا اتكلمت مع عاصم إنه ما يطلقكيش ويرميكي في الشارع، شوفتي أنا حنونة إزاي؟ ولو على مجيئي هنا، ف ده طبيعي، هو مش لازم العروسة تيجي بنفسها عشان تشوف شقتها؟ أصل عصومي قالي إن مكانك هيبقى جنب المطبخ في أوضة الخدامين.
كانت بتسمع كلامها، وفيه سكاكين بتقطع في قلبها، مش قادرة تستوعب إن كل السنين اللي عاشتهم معاه مقدرتش تشوف وشه الحقيقي. كانت حابسة دموعها بالعافية، مستحيل تنزل دمعة واحدة على واحد زي ده، مستحيل. ده الكلام اللي كانت بتردده في سرها.
عاصم:
_ نور، اعقلي كده ودخلي شنطة هدومك جوه يا بنت الناس، ولمي الدور. أنا مش أول ولا آخر واحد يتجوز على مراته.
داليا:
_ قصدك طبعًا يا حبيبي تدخلها أوضة الخدم، مش أوضتنا. وبصت عليها بشماتة واضحة على ملامحها.
هز رأسه بهدوء، بتأكيد على كلامها.
نور بصتله بكره حقيقي من كل قلبها، ولأول مرة ما تبقاش طايقة المكان اللي هو فيه، ولا قادرة تشوف وشه. كانت بتتمنى بس يوم يقعد معاها فيه، ودلوقتي مش قادرة تشوف وشه ثانية واحدة.
مسكت شنطتها ومشيت بيها اتجاه الباب، وقبل ما تطلع كان ماسك إيدها وقال بحدة:
ـ إنتي مسمعتيش أنا قولت إيه؟
بصت على إيده وهو ماسك إيدها، سابت الشنطة على الأرض ورجعت بصتله، ومرة واحدة نزلت قلم على وشه رنّ في الشقة كلها.
حط إيده مكان ضربتها وهو بيبصلها بصدمة وذهول، وكأنه مش مصدق.
بصت في عينيه بكل قوة وقالت:
_ طلقني.
مسكت شنطتها وخرجت بسرعة، وهو لسه واقف مكانه من الصدمة.
وداليا حاطة إيدها على بوقها من صدمتها في نور، ما توقعتش تبقى قوية كده، وتوقعت إن أي ست تانية هتقعد تعيط وتترجاه ما يسبهاش ولا يتجوز عليها، بس هي فجأتها بردة فعلها.
ــــــــــــــــــــــــــــــــــــــــ…♡
الحلقة 3
فضل واقف مكانه، نظراته لسه متثبتة مكان أثرها، وكأنه بيعيد كل اللي حصل قدامه من أول وجديد، كل كلمة وكل نظرة، كأنها بتتكرر جواه للمرة الألف.
داليا استغربت صمته، قربت منه وهزت كتفه بهدوء وهي بتقول بقلق مصطنع:
ـ عاصم أنت كويس؟
هز رأسه بهدوء من غير حتى ما يبصلها.
خافت يكون بيفكر يرجع في كلامه بعد اللي حصل، وكل الأحلام اللي رسمتها في خيالها تنهار في لحظة، لكن بسرعة رسمت ابتسامة خبيثة على وشها وقالت بحزن مزيف:
ـ أنا عارفة يا حبيبي أنت بتفكر في إيه دلوقتي… أكيد زعلت من نور وما توقعتش تتصرف معاك كده صح؟ بس هي اللي هتندم صدقني… يعني أنك تتجوز تاني لا عيب ولا حرام، وبعدين ما أنت أكيد كنت هتعدل بينا وكنا هنفضل عايشين سوا عيلة مع بعض… بس هي اللي هتندم لما تخسرك.
كانت قاصدة كل كلمة بتقولها، وعارفة تأثيرها على عاصم هيبقى عامل إزاي، مستحيل يسمح لأي مخلوق إنه يكسره أو يطلع منه خسران.
واتأكدت من مفعول كلامها أول ما شافت نظراته اللي اتحولت تمامًا بعد كلامها، وقالت بتمثيل متقن وهي تقرب منه أكتر:
ـ عاصم أنت عارف إني وافقت أتجوزك رغم إنك راجل متجوز، بس عشان بحبك ومتأكدة إنك بتحبني… غير كده عمري ما كنت أفكر أدخل بينك وبين مراتك، لكن يا حبيبي لو وجودي هيدمر علاقتك بمراتك أنا ممكن أنسحب…
مسك إيدها فجأة وضغط عليها بقوة، ونظراته كانت حادة وقوية وهو بيبصلها:
— فرحنا الأسبوع الجاي… ولازم تعرفي إن عاصم إبراهيم لما بيقول كلمة بيبقى قدها… وهي اللي هتندم، مش أنا.
ابتسمت بتصنع وهي بتحاول تداري فرحتها:
ـ فعلًا يا حبيبي… هتخسر حد قلبه كبير زيك.
وبصت حواليها في كل ركن في الشقة بخطفة سريعة، قبل ما ترجع تبصله تاني وتقول بدلال:
ـ بس يا حبيبي محتاجين نجدد عفش البيت كله… يعني يرضيك أبقى لسه عروسة جديدة وأتجوز على عفش مستعمل؟
— لا طبعًا، بكرة ننزل سوا، وكل اللي تختاريه اعتبريه بقى عندك.
داليا حست بفرحة ضخمة أول ما سمعت كلامه، وبدأ إحساس الانتصار يتمكن منها أكتر، كلها أيام وعاصم يبقى تحت أمرها في كل حاجة… وده بالظبط اللي كانت عايزاه من البداية.
ـــــــــــــــــــــــــــــــــــــــــــ♡…
فضلت واقفة قدام باب الشقة، مسحت دموعها كويس عشان أمها ما تخافش عليها أول ما تشوفها، حاولت تاخد نفس طبيعي رغم إن صدرها كان مكتوم وكأن في جبل فوق قلبها، وبعدها رنت الجرس.
أول ما فتحت صفاء الباب وشافتها، وشافت شنطة هدومها جنبها، قلبها انقبض جامد وكأنها حست إن في مصيبة مستخبية ورا نظرات بنتها.
— نور مالك يا حبيبتي؟ فيه إيه؟ أنتِ كويسة؟ وعاصم فين؟ أنتوا اتخانقتوا؟
نور فضلت واقفة، مش عارفة تقول إيه، خايفة تقول الحقيقة، وفي نفس الوقت مش قادرة تشيل كل الوجع ده لوحدها أكتر من كده.
حاولت تبتسم واتكلمت بهدوء وهي بتحاول تطمنها:
ـ مالك بس يا حبيبتي؟ اهدي… أنا جاية أطمن عليكي وأقعد معاكي كام يوم، ولا خلاص بقى ماليش مكان؟
صفاء حطت إيدها على قلبها وأخدت نفس طويل خرج مع تنهيدة مرتعشة:
ـ يا حبيبتي ده بيتك… إيه بس اللي بتقوليه ده؟ تعالي.
وقربت منها بسرعة وخدتها في حضنها:
ـ حبيبتي يا بنتي… وحشاني أوي يا عيوني، كل الفترة دي متسأليش عليا بردو يا نور؟
خرجت نور من حضنها وهي بتضحك ضحكة خفيفة باهتة:
ـ والله،اممم مين اللي بتكلم معاه كل يوم فيديو وفون؟ ده أنا قولت أكيد زهقتي مني.
ـ أنا؟ أنا عمري ما أزهق منك… وبعدين اه وحشاني، إيه يعني كلام التليفون ده؟ طيب لما أحضنك أحضن التليفون؟
ضحكت نور بخفة:
ـ خلاص يا ستي ولا تزعلي نفسك، أهو جيت… لما أشوف هتزهقي مني ولا لا، ويلا بقى ندخل يا ماما، هنفضل كتير كده واقفين على السلم؟ أنا رجلي ورمت من كتر الوقفة.
ـ يوووه نسيت خالص، يلا تعالي.
ومسكت معاها الشنطة ودخلوا.
قعدوا على الأريكة، وفضلت نور باصة لأمها بصمت طويل، قبل ما تقرب منها وتحط دماغها على رجليها وتفرد جسمها على الأريكة وقالت بصوت مليان تعب واحتياج:
ـ وحشتيني أوي يا ماما…
رفعت صفاء إيدها وبدأت تمررها على شعرها بحنان:
ـ وأنتِ كمان يا نور عيني وحشتيني أوي… عارفة؟ رغم إن كل يوم بنتكلم، بس بيبقى نفسي أخدك في حضني وأطبطب عليكي… لما تروحي بيتك ما تبقيش تنسيني يا قاسية وتيجي تشوفيني دايمًا.
نور همست لنفسها بصوت مكسور:
ـ خلاص… مبقاش بيتي يا ماما… هفضل قاعدة معاكي على طول.
ومسحت دمعة نزلت منها بسرعة قبل ما صفاء تشوفها، هي مش عايزة تخوفها أو تقلقها عليها.
اتعدلت في قعدتها بسرعة ورسمت ابتسامة مزيفة على وشها: ـ وهو أنا أقدر أبعد عنك يا صفصف بردو؟ دانتي اللي في القلب كله.
ـ ماشي يا ستي اضحكي عليا بكلمتين… لما تيجي صاحبتك خليها تشهد على كلامك ده.
ـ سارة هي فين؟ أنا قولت أول ما تسمع صوتي عندك هلاقيها نطت عندنا على طول.
ـ زمانها في الشغل دلوقتي، لما تيجي هتعدي عليا زي كل يوم.
ـ أوكي هقوم أنا بقى أنام شوية يا صفصف.
ـ نوم إيه دلوقتي؟ أنتِ جاية تقعدي معايا ولا تنامي؟
ـ يا ماما ما قاعدة معاكي على طول، مش هيفرق كتير بقى لو نمت دلوقتي ساعتين بس.
استغربت كلامها وقالت بقلق بدأ يزيد جواها:
ـ قاعدة معايا على طول إزاي يا نور؟ أنتِ متخانقة مع عاصم؟
نور اتوترت ومخدتش بالها من كلامها:
ـ لا يا ماما مفيش حاجة، متخافيش يا حبيبتي كله تمام.
وقبل ما صفاء ترد عليها، كملت بسرعة وهي بتحاول تهرب من أسئلتها:
ـ أنا داخلة أنام يا ماما، ابقي صحيني كمان ساعتين.
سابتها ودخلت أوضتها وقفلت على نفسها.
هي مش عايزة تنام، ولا أصلًا هتعرف تنام الليلة دي، بس كانت عايزة تهرب… تهرب من أسئلة أمها، ومن الحقيقة، ومن قرارها اللي لأول مرة تحسه تقيل بالشكل ده.
ـــــــــــــــــــــــــــــــــــــــــــ♡…
كل الموظفين متجمعين عند باب المكتب، والسكرتيرة مرعوبة تدخل من صوته العالي اللي هز أركان الشركة كلها.
الكل مستغرب… أول مرة حد يسمعهم بيتخانقوا بالشكل ده، خصوصًا إن معروف عنهم إنهم أعز أصحاب.
الفضول كان قاتلهم عشان يعرفوا إيه اللي ممكن يخلي يونس وأحمد يوصلوا للحالة دي.
داخل المكتب…
يونس كان ساند بإيديه الاتنين على المكتب، ورأسه بينهم، وكأن الغضب والضغط هيكسروا أعصابه في أي لحظة.
أما أحمد فكان واقف قدامه، والغضب واضح في عينيه بشكل مخيف.
أحمد بانفعال:
ـ يعني إيه نسيبه ياخد العميل مننا بكل بساطة؟
يونس وهو لسه على نفس وضعه:
— يعني عايزني أعمل إيه؟
ـ تعمل إيه؟ وإحنا في الحالات اللي زي دي بنتصرف إزاي يا يونس؟ هو أنا اللي هعرفك طريقة شغلنا؟
— العميل هو اللي المفروض يندم يا أحمد… مش إحنا.
ـ الكلام ده لو هو لغى الصفقة بمزاجه، مش واحد حقير زيه سرقها مننا.
رفع يونس رأسه ببطء، وسند بضهره لورا وهو بيبصله بنظرة غامضة:
— يعني إيه؟
ـ أنت فاهم قصدي كويس يا يونس… وفاهم أنا بتكلم على مين، عايز أعرف هنفضل لغاية إمتى نعدي اللي بيحصل ونسكت؟ كل ده ليه؟ عشان خايف على مشاعرها مثلًا؟
بدأ الغضب يظهر على ملامح يونس، مسك القلم اللي على الملف وضغط عليه بعنف لدرجة إن صوابعه ابيضت.
أحمد كان ملاحظ كل ده، وعارف إن كل كلمة بيقولها دلوقتي بتوجعه، بس لازم يفوقه قبل ما كلهم يغرقوا ويخسروا كل حاجة.
يونس بصله وهو بيحاول يسيطر على أعصابه:
— أحمد… أنا مش فاضي دلوقتي، ياريت نأجل الكلام في الموضوع ده.
أحمد كان متوقع رده، لكنه المرة دي قرر ميهربش زي كل مرة، حاجة واحدة بس كانت بتتكرر في دماغه: “كفاية خسارة لحد هنا.”
ورد عليه بصوت عالي مليان قهر على صاحبه:
ـ لأ لازم نتكلم يا يونس! ما هو مش كل مرة هنقفل الموضوع على نفس النقطة! كفاية لحد كده… كفاية! لحد إمتى هتفضل تسمح له ياخد العميل مننا بعد شغل وسهر وتعب شهور؟ وهو ييجي ياخد كل ده بسهولة؟
أنا عارفك كويس يا يونس… عمرك ما سمحت لحد يحط عينه على أي شغل يخصنا، بس بتيجي عنده وتقف! ليه؟ كل ده عشانها؟ للدرجة دي لسه بتحبها؟ فوق يا يونس! دي واحدة متجوزة يعني مستحيل تبقى ليك! ولا عشان فشلت إنك تخليها مراتك، تبقى تخسرنا في شغلنا كمان؟!
مرة واحدة، وقبل ما يكمّل كلامه، هبط يونس بكفه على المكتب بعنف مرعب، لدرجة إن كل اللي فوقه انتفض في الهوا للحظة قبل ما يقع مكانه من جديد، وصوت الخبطة دوّى في المكتب كله.
رفع عينيه ليه، وكانت نظراته مليانة غضب لأول مرة بالشكل ده:
— لآخر مرة بحذرك… أوعى تفكر تجيب سيرتها على لسانك، أنت فاهم؟
صدقني لو فتحت الموضوع ده تاني، مش هيبقى عندي أي تردد إني أخسرك للأبد… ومش هيشفع ليك لا صحبتنا ولا أي حاجة تانية.
ومتنساش مكانك… أنا هنا مديرك، وأنت تنفذ كلامي من غير اعتراض… فاهم؟
أحمد حس للحظة إنه ولا حاجة عنده.
كان عارف إن كلامه قاسي، بس عمره ما تخيل إن صاحب عمره ممكن بسهولة يهدده بالشكل ده عشان أي حد.
ضحك بسخرية، لكن السخرية كانت مخلوطة بوجع حقيقي:
ـ يبقى أنت اللي اخترت يا صاحبي… مش هتشوف وشي تاني،ومعلش… أنا فعلًا شكلي نسيت إنك تبقى مديري وبس.
مدالوش فرصة يرد، ولف عشان يخرج.
أول ما فتح الباب كانت سارة واقفة قدامه، وباين عليها إنها سمعت كل حاجة.
قالت بقلق وهي باصة لأحمد:
ـ أحمد استنى من فضلك… خلينا نقعد نتكلم، أنت عارف يونس لما بيزعل بيقول أي كلام وخلاص.
ـ خلاص يا سارة… الموضوع انتهى، وبعدين هو اللي اختار.
سابها وخرج.
وأول ما شاف الموظفين واقفين قال بزعيق:
ـ أنتي واقفين كده ليه؟ اتفضلوا… كل واحد على مكتبه.
وفي ثانية، الكل اختفى من قدامه.
يتبع♡…
نور هتفضل مخبية عن أمها اللي حصل فعلًا؟ ولا صفاء هتكتشف الحقيقة بنفسها؟
وعاصم… هل فعلًا بيتجوز داليا عشان بيحبها؟ ولا عشان يثبت لنفسه إنه ما اتكسرش؟
وداليا بتخطط لإيه بالظبط؟ وهل فعلًا حبها لعاصم حقيقي ولا وراه هدف تاني؟
أما يونس… إيه الحكاية اللي مخبيها جواه لحد دلوقتي؟ وإيه اللي حصل بينه وبين نور زمان وخلاه يوصل للحالة دي؟
وأحمد… هل فعلًا هيمشي من الشركة وينهي سنين الصداقة بسهولة؟
•تابع الفصل التالي “رواية ما لا يحكى” اضغط على اسم الرواية