رواية صغيرة ولكن الفصل الحادي والخمسون 51 – بقلم الهام رفعت

صغيــره ولكــن …..

ــــــــــــــــــــــــ

قرر الإنتقـام منها والبعد عنها ، فهو يعرف مقدار حبها له ، ولكنه سيلقنها درسا فقد أضحت تجيد الأفكـار الشيطانيه ببراعه وعليه الحذر منها فلم تعد تلك الصغيره الســاذجه ، واعتزم عدم اظهــار ضعفه أمامهـا ، وقف زين امام المرآه ليهنـدم ملابسه متهيأ للذهاب للشركــه ، زائغا فيما فعلته معـه بالأمس ولكن اخرجــه من شروده صوت ضحكاتهـا المستفـزه التي تثير حنقه ، وجه زين بصره نحوها وحدجها بغيـظ شديد ، فتمايعت في حركاتهـا واردفت :

– أنتـي زعلانه مني يا بيضــه .

تنهد بقوه وسار للخـارج ، فركضت خلفه وبدأت في مشاكستـه ، فإنزعج منها ونظر لها بغضب ، ففرت هي من امامه وهبطت الدرج سريعا ، فاصطدمت بإبنه عمهــا التي هتفت بإنزعاج :

– ايه با بنتي بتجـري كده ليه 

ردت نور بمـرح : زيــن هيفتك بي 

سلمي غامـزه : أيـوه كده ..عيزاكي تجننيه ..

ثم توجه الإثنان الي طاوله الطعام ، وجلسوا سويا وسط غمزاتهم سويا ، فتسائلت مريم متعجبه :

– مالكوا كده …ماتشاركونا معاكوا 

سلمي بإبتسامه مصطنعه : حاجه كده خصوصي 

مريم لاويه شفتيها : طيب 

فاضل بجديه محدثا سلمي :

– خطيبك قالي يا سلمي انكم بعد الجواز هتقعدوا في شرم 

سلمي بتأكيد :

– ايوه يا بابا ..والفكره عجباني قوي …خصوصا انها قريبه من شغله .

مريم بخبث : أيوه ..علشان يبقي قريب منها 

اغتاظت منها سلمي ، فتشدق فاضل بهدوء :

– خلاص يا بنتي… زي ماتحبو 

تقدم زين منهم قائلا : صباح الخير 

الجميع : صباح النور 

جلس بهدوء ظاهري ، وكتمت نور ضحكاتها ، فحدجها بجمود وبدأ يتناول طعامه في صمت ، واردفت مريم مستفهمه :

– عمتو فين 

فاضل بثبات : نايمه ..اصلها كانت عند ميرا ورجعت متأخر 

نور بتأفف : يلا بقي علشان توصلني …هتأخر 

رد بجمود : يلا 

نهض من مقعده وتوجه للخارج وهي خلفه مباشره ، واستقل سويا السياره واردف في نفسه :

– ماشي يا نور …بتلعبي معايا 

ثم ادار سيارته متوجها لمدرستها ، واختلست اليه النظرات بين الحين والآخر وقررت محادثته :

– زين 

لم يجب عليها ، فزمت شفتيها وتنهدت بقوه وحاولت الحديث بأيه طريقه ، فقط يستمع لها ، بعد قليل وقف امام المدرسه وترجلت من السياره بعدما حدجته بغيظ شديد ، وشهقت حينما ذهب دون انتظارها لتدخل كما كان يفعل ، كزت نور علي اسنانها وولجت للداخل وهب عابسه الملامح ……..

_____________________

تقلب في قنوات التلفاز بفتور شديد ، مله من وضعها وتأففت بضيق ، انتبهت لبني لصوت والدتها وهي تهتف :

– يلا يا لبني …الأكل جاهز يا حبيبتي 

نهضت من مكانها بتكاسل وتقدمت نحو والدتها التي استطردت بإبتسامه محببه :

– تعالي يا بنتي اقعدي 

جلست لبني بجوارها وشرعت في تناول الطعام وتسائلت :

– اومال فين بابا 

عايده بتوضيح : زمانه جاي …اصله بيحب يصلي الصبح في الجامع 

اثنت ثغرها للجانب واستفهمت :

– هو حسام أتجوز ولا لسه 

عبست ملامح عايده وردت بضيق :

– إحنا مالنا وماله …اوعي يا بنتي تكوني بتفكري فيه …احنا ماصدقنا خلصنا من الموضوع ده …دا حتي خالتك مبقتش معايا زي الأول .

حركت راسها بفتور شديد وردت بضيق :

– يا ماما ..دا كان مجرد سؤال …حد قالك اني بموت فيه يعني 

ردت بلا مبالاه : لسه مدخلش …كتب كتابه بس 

لبني لاويه شفتيها : طيب 

ولج والدها من الخارج وحدثهم بصوت أجش : صباح الخير 

عايده بإبتسامه محببه : صباح الخير يا حاج 

جلس معهم وتنهد بقوه قائلا :

– مبسوطه بقعدتك معانا يا لبني 

لبني بإمتعاض : هو بمزاجي يا بابا ..ماهو اللي مد ايده عليا 

نظر لها بضيق وهتف :

– تلاقيكي طولتي لسانك عليه 

زمت شفتيها بضيق ، فحدجتها والدتها بنظرات ذات مغزي ، فاجبرت الأخيره نفسها علي الصمت واكملت تناول طعامه بهدوء زائف .

وقطع جلستهم صوت قرع احد ما علي الجرس فهمت عايده بالحديث :

– هقوم اشوف مين اللي جايلنا بدري ده 

ثم نهضت وتوجهت لفتح الباب ، شرعت في فتحه وتفاجئت به واردفت بإبتسامه فرحه :

– تعالي يا ايمن ….أتفضل يا ابني 

تركت لبني ما بيدها ونهضت من مقعدها قائله بصدمه :

– أيمن ………

____________________

جلس مالك بغرفته مختليا بنفسه ، يفكر في مدي علاقتها به ، ومن كومه الحقد التي تنبت بداخله فور رؤيتها معه بمكان واحد ، واستشعر الأمر عن قرب حينما مكث معهم وظل مرابطا لأفعالهم سويا وتوددها اليه وقربها الشديد منه ، ومدي تأثيره عليها ، فدائما ما يحظي بإهتمامها رغم ما يفعله بها ، وما يريحه حتي الآن عدم اقترابه الفعلي منها حتي الآن ، نظر مالك أمامه بخبث سافر وانتوي علي الإيقاع بينهم وإقناعها بالسفر معه ، وإبعادها عن تأثيره الحتمي عليها ، وتبقي معه بمفرده محاوله منه للتقرب منها ، اثني ثغره بابتسامه شيطانيه لفرض اولي مخططاته في راسها ، واضحت الفكره مسيطره عليها ، وتنهد مالك بإرتياح محدثا نفسه :

– الصبر يا زينو …وهتلاقيني بعدها عنك خالص ……

______________________

سمح لها والدها بالجلوس مع زوجها لحل مشاكلهم بمفردهم ، وارضخت لبني لطلبه وولجت لغرفتها بصحبته ، وما ان اوصدت الباب خلفها حتي حدجته بغضب وهتفت من بين اسنانها :

– جاي ليه …جاي تضربني تاني 

رد ايمن بهدوء زائف : انتي اللي استفزتيني يا لبني 

أبتسمت بسخريه فتابع هو موضحا موقفه :

– لبني انا حاسس اني بتحسن ..بس ضغطك عليا موترني …خصوصا كلامك ليا 

لبني بضيق : عملتلك كل حاجه ..لبس ولبست ..قلع وقلعت ..اعمل ايه تاني 

امسك يدها علي غير رضي منها واردف بإبتسامه محببه :

– لبني انا بحبك …وحاسس اني اتعودت عليكي ..ومش هقبل بأي حد غيرك في حياتي …بس انتي اصبري عليا .

نكست راسها زائغه في حديثه ، فرفع أيمن كفيها علي فمه وقبلهما بحب بائن واستطرد :

– ارجعي معايا يا لبني….وأسف لو مديت ايدي عليكي …ولو عملتها تاني انتي حره بعد كده .

وجهت بصرها نحوه فابتسم لها مكملا بمغزي :

– مش عارف وانتي بعيده عني ..وحشتيني قوي وحاسس اني عايزك .

بدا عليها التوتر واقترب منها ملثما شفتيها بقبله عاشقه ، تسارعت ضربات قلبها علي إثرها ، وابعدها قليلا واردفت هي بحب :

– انا بحبك يا ايمن ..انا زي اي ست …لازم تحس بيا 

ايمن بتمني : ان شاء الله يا حبيبتي ايامنا الجايه هتبقي حلوه..

_________________________

في مقهي ما…

وضع الجالس معها المشروب الذي بيده وبدا عليه الضيق واردف بثبات :

– أهدي يا ريم ..هشوفلك له حل …اخليه يندم انه عمل معاكي كده.

ريم بنبره غاضبه : دا بهدلني …انا عايزه انتقم منه وآخد حقي 

شريف بجديه : مش عايزك تشيلي الهم وانا موجود 

ريم بحقد : المدام حامل والبيه مبسوط …عايزه انكد عليهم بأي شكل بسبب اللي عمله فيا ، تابعت بغيظ :

– عايزه خطه محترمه كده ..اعرف اجيب رجله بيها .

شريف بخبث شديد :

– هوقعلك بينهم يا ريمو متقلقيش …..

______________________

اعتلي وجهه سعاده بائنه عندما قررا سويا الإرتباط ، وابداء ابنها موافقته كليا بشأن ذلك الأمر واردف فايز بإرتياح :

– صحيح يا ثريا ..يعني مالك وافق 

ثريا بتاكيد : أه طبعا وافق 

فايز بجديه : يبقي نتجوز بقي ومنضيعش وقت 

ثريا بخجل مصطنع : اوكيه اللي تشوفه 

فايز بمغزي : متعرفيش انا مبسوط قد ايه 

ابتسمت هي واستطرد بمعني :

– أحنا نتجوز في بيت لوحدينا ونسيب الفيلا للولاد علشان يقعدوا براحتهم .

ثريا بموافقه : فكره حلوه …احسن برضه 

فايز غامزا : وأحنا كمان ناخد راحتنا 

نكست راسها بخجل شديد ولم ترد……….

____________________

ولج الغرفه وجدها متسطحه علي الأرضيه وممسكه بأحدي كتبها  فادارت راسها نحوه وابتسمت بتشفي ، لم يبالي بها وولج غرفه الملابس لتبديل ثيابه ، فتعقبته بضيق وذهبت خلفه ؛ وجدته يشلح ملابسه ، فأقتربت منه وحاوطته من الخلف بذراعيها وهمست : بحبك  ، تابعت بمعني :

– حبيت أعرفك انك كمان بتحبني …ومتقدرش تستغني عني 

امسك كلتا يديها وابعدهم واستدار لها قائلا بجمود :

– مفرقتش …سيبيني لوحدي …ممكن 

اقتربت أكثر منه وردت بعند :

– لأ مش ممكن …انا بحبك ..وانت بتعمل كله ده علشان هسافر ..بس انا حابه كده يا زين .

رد بنفاذ صبر : انتي حره ..اعملي اللي انتي عوزاه ..حياتك وانتي حره فيها ..وحتي لو سيبتيني ..ميهمنيش 

نور بثقه : لأ يهمك 

اقتربت منه وقامت بتقبيله بقوه ، شعر بسخونه طاغيه علي جسده وسرعان ما جذبها اليه متعمقا في تقبيله ، وبعد وقت ابعدها قائلا :

– بحبك …بحبك قوي 

ابتسمت بفرحه وردت بمغزي : يعني بتحبني ، ابتسم لها فتابعت بحب بائن  : 

– زين انا بحبك قوي ..ومش عايزاك تسيبيني 

رد بجديه : مش هبعد ..انتي اللي عاوزه تبعدي عني …فكري تاني يا نور .

نور زاممه شفتيها :

– هحاول ..بس مش وعد……..

_____________________ 

ذهبت إلي ابنتها فور ابلاغها بمرضها مره آخري ، وتوجست ثريا خيفه من إصابتها بمكروه ما ، وحدثتها بقلق :

– ميرا …حاسه بأيه يا بنتي ..ايه اللي تعبك تاني .

ميرا بتعب : بطني بتوجعني يا ماما ..وعايزه ارجع علي طول

ثريا بتفهم : دا عادي يا ميرا ..وكل حمل بيحصل فيه كده ..المهم انتي تخلي بالك من نفسك وتسمعي كلام الدكتوره .

ميرا بطاعه : حاضر يا ماما ، استانفت بتساؤل :

– شكلك مش مريحني يا ماما ..هو حصل حاجه 

ثريا بضيق : مالك اخوكي حاله مش عاجبني 

ميرا بتفهم : نور برضه 

ثريا بتأكيد : بيحبها قوي يا ميرا ..دا حتي صورها في اوضته ..شوفتهم بالصدفه 

ميرا بإستنكار : كنت فكراه عيل وبيقول كلام ..طلع بيحبها بجد

ثريا بقله حيله :

– مش عارفه اعمله ايه ..خايفه عليه من زين …خصوصا انه بيحبها قوي ..وهي كمان 

ميرا بنفاذ صبر :

– هنعمل ايه في الولد ده ..أكيد مش طبيعي 

ثريا بتمني :

– ربنا يهديه ان شاء الله ..يمكن لما يكبر ..يعقل ويفهم ان اللي بيعمله ده غلط وميصحش…….

_____________________

سعدت لإقتراحه للذهاب للعوامه سويا لتناول الغذاء هناك ، وابدت نور فرحتها لوجودها معه ، بعد قليل وصلا امامها وترجل الإثنان للأعلي صاعدين عليها ، وهتفت نور بفرحه :

– يلا ننزل الميه سوا 

زين بإستنكار : مش هينفع ..هننزل ازاي 

نور بلا مبالاه : بهدومنا يلا 

زين بعدم إقتناع : نور مش هينفع ..ازاي ننزل بهدومنا 

نور بتأفف : مش انت عندك هدوم هنا ، اوما برأسه فتابعت بخبث :

– يبقي تسلفني هدومك ألبسها 

ضحك زين عليها وابدي موافقته ، فسحبته هي من يده ووقفت قباله الحاجز الحديدي للعوامه وهتفت :

– يلا ننط

لم تمنحه الفرصه للرد حتي قفزت واسرع بالقفز خلفها كونها لا تجيد السباحه جيدا ، واقترب منها قائلا :

– يا مجنونه ازاي تنطي كده ..انتي مجنونه …انتي مبتعرفيش تعومي .

ردت وهي تنهج : مش خايفه وانا معاك 

زين بإبتسامه : طيب يلا يا حبيبتي … انتي كده ممكن تبردي 

أحتضنته بقوه وردت بحب : خليك جمبي علي طول …اوعي تتخلي عني ..عايزه ابقي مراتك انت 

ابتسم زين بشده ورد بتعقل : والأحسن نخرج من الميه ، اومات براسها وهمت بالصعود معه .

ولجوا للداخل ، فجابت نور المكان ببصرها واردفت :

– كنت بتجيب البنت دي هنا ، ثم وجهت بصرها اليه وتابعت مستفهمه :

– كنت بتعمل ايه معاها 

زين بتوتر داخلي : نور انتي صغيره ..مينفعش تتكلمي كده 

نور بضيق : بتبوسها زيي 

زين بتوتر اشد : قولتلك انتي صغيره ومتكلميش كده تاني ..ويلا علشان تغيري هدومك

نور بإنزعاج : لأ مش صغيره ..انت ليه بتبعد عني وبتروحلها ، تابعت بحزن :

– انا بحس بحاجه غريبه لما بتقرب مني ..وانت بتبعد عني..انا بحبك قوي يا زين 

ضمها اليه بقوه رابطا عليها بذراعيه واردف بحب :

– وانا كمان بحبك ..وببقي مبسوط معاكي ، ثم طبع قبله علي جبينها متابعا :

– مش يلا بقي علشان ناكل سوا …وانتي كده هتبردي ..تعالي معايا اجبلك هدوم .

اومأت برأسها وذهبت معه……………………..

ــــــــــــــــــــــــــ

بعــد مرور شهــر….

تقـدمت نور لإمتحانات الثانــوية العامة وابدت سعادتها فور الإنتهـاء منها ومرورها بســلام ، وفي ساحه المدرسـه اجتمعن الفتيات في الجلوس كونها آخر سنه لهن سويا ، وتعالات اصوات ثرثرتهم المعتاده ولم يبخلن بتوديع بعضهم نظرا للصداقه الناشبه بينهم ، وتشدقت ملك بحزن :

– خلاص يا بنات ..دي آخر سنه هنشوف بعض فيها وكل واحد هيروح جامعه تانيه .

سـاره بإستنكار : ونبعد ليه …احنا نتفق نكلـم بعض علي طول ، احنا أصحاب عمر .

نـور بضيق : يا بختكم ..انا هسافر ..مش هشوفكم بس هكلمكم علي طول 

سـاره بإستياء : خليكي معانا يا نور ..هتوحشينا قــوي .

نــور بنفاذ صبر :

– احنا لسه هنتكلم في الموضوع ده ..انا خلاص الفكره عجباني ..وحابه اجربهـا 

ساره مستفهمه : وطيب وزين مش هيزعل .

نــور زاممه شفتيها : مش عارفه ..بس هو بيحبني ..واكيد مش هيزعل مني .

ساره بحذر : هتسافري انتي ومالك .

نـور بلامبالاه : وانا مالي وماله ..انا رايحه ادرس وبس ….

___________________

داخل إحـدي القاعات الكبري التي سيقام فيهـا العرس ، جلس كل من مريم وحسام علي طاوله ما بداخلها لمناقشه امور زواجهم وتحدث بصوت هـائم :

– أنا مش مصدق اني خلاص هتجـوز بقي 

مريم بخجل : خلاص بقي يا حسام …انت مزودها قوي .

حسام بنبرته الهائمه : اصلك مش حاسه بيا ..اصلي بحبك قوي .

مريم بابتسامه : وأنا كمـان 

ضيق حسام عينيه وتحدث بنبره حـاسده :

– الواد معتـز هيقعد في شرم ابن اللذينه …الجو رايق هناك .. وهياكل سمك وجمبـري وهيشع . 

مريم بإمتعاض : ايه يا ابني كفايه قر ..ليحصله حاجه 

حسـام بتافف : ميحصله …هو ده اصلا بيحصله حاجه ..ما صحته زي البومب اهي …..

علي طاوله أخري بنفس القاعه جلس كل من معتـز وسلمي ، وإذ تفاجـأ معتز بسعـال عنيف يغزو صدره واحمر وجهه غير قادرا علي التنفس وهتفت سلمي بقلق جلي :

– مالك يا معتز 

معتز وهو يسعل : باين حد بيجيب في سيرتي 

سلمي بخوف : براحه بس وخد نفسك 

هدأ معتز قليلا ورد بهيام : خوفتي عليا يا حبيبتي 

سلمي بضيق : دا وقته …دا انتي كنت هتموت من شويه 

معتز غامزا : بعد الشر عليا …ان شاالله الواد حسام 

سلمي بإنزعاج : انتي بتدعي عليه ..دا لسه مدخلش دنيا…

في الناحيه الآخري ارتعدت مريم وتسائلت بقلق :

– مالك يا حسام 

حسام وهو يلتقط انفاسه : مش عارف آخد نفسي …حاسس انه بيتسحب مني 

مريم بقلق : طيب خد نفسك 

حسام بغيظ : انا شاكك في الواد معتز ..تلاقيه بيجيب في سيرتي .

مريم بسخط : مين اللي كان بيتكلم علي التاني من شويه .

حسام بضيق : يلا نقوم من هنا احسن ما روحي تطلع …….

________________________

قررت ريم تنفيذ حيلتها الشيطانيه للإيقاع به ، علي ان تدعي احتياجها الجارف للمال كونها مصابه بمرض ما ولا تملك من المال ما يكفي تلقيها العلاج ، ولم تجد غيره ليساندها في محنتها بعدما تخلي عنها من كانت برفقته ، وقامت بمهاتفته  واستسمحته ريم بأن يصفح عنها طالبه مساعدته لوعكتها الزائفه ، فتافف الاخير من توسولاتها الملحه وانفعل وليد قائلا :

– دلوقتي جايه تعتذري ..ما كنتي باصه لفلوسي وعايزه تسرقيني انتي والحيوان اللي كان معاكي .

ردت ريم مدعيه البكاء : 

– سامحني يا وليد ..ضحك عليا ..ودلوقتي سابني لما لقاني عيانه .

نظر وليد امامه ورق قلبه لوجود شخص مريض يستنجد به ، والزم نفسه بمساعدتها واردف بتأفف :

– وأنتي فين 

ردت بشبح ابتسامه غزا محياها : في شقتي يا حبيبي 

وليد ساخطا : بلاش حبيبي دي ، تابع بضيق :

– انا هجبلك فلوس ..بس علشان طيبه قلبي ..بس انتي واحده متستهليش 

ريم بحقد سافر : طول عمرك طيب القلب يا وليد 

اغلق وليد معه الهاتف موافقا علي مضص في مساعدتها وأعتبرها كشخص غريب يطلب مساعدته ، بينما اختلف الأمر لريم الحادقه امامها بخبث والمنتويه شرا له رغم ما ارتكبته في حقه اولا ، ولم تحمل نفسها الذنب وارادت الإنتقام لدوافعها الخبيثه وفطرتها الشيطانيه ……..

_____________________

استلقت نور علي فراشها حادقه للأعلي وزائغا فيما ستنتويه في خطوتها القادمه بعد إنتهاء دراستها ، وقطع ذلك الشرود مالك بدخوله المباغت عليها والذي اعتاده في الفتره الآخيره وبات يزعج نور رغم تحذيراتها له ولم يستمع اليها ، فاعتدلت في نومتها علي الفراش وعنفته بنبره منفعله :

– قولتلك قبل كده زين لو شافك هيتضايق ..ومش هيحصل كويس ..اتفضل اطلع بره يا مالك 

مالك مستنكرا بضيق :

– اعمل ايه يعني ..اتكلم مع مين بس ..احنا عايشين في مكان واحد ونبقي بعيد عن بعض ..علشان الأستاذ زين ميضايقش

نور بنفاذ صبر : قول يا مالك عاوز ايه وخلصنا 

ابتسم بتصنع واقترب قائلا بخبث دفين :

– كنت جاي اتكلم معاكي بخصوص سفرنا سوا …علشان ندرس بره …الفكره تجنن يا نانو ..وهتخرجي وهتشوفي الناس بره عايشين ازاي .

نور بإقتناع : انا خلاص موافقه علي الفكره وهسافر .

مالك بإبتسامه غزت هيئته : ايوه كده يا نانو ، ثم جلس امامها علي الفراش مستطردا بحب :

– انا مبسوط قوي ان احنا هنبقي مع بعض ، وجه بصره الي شفتيها واقترب منها بضربات قلب متسارعه متيما لتذوقهما وارتجف قليلا مجرد قربه منها ، دنا مالك منها ببطء وتعجبت نور فيما يريده منها ، ثم فطنت سريعا رغبته في تقبيلها وقبل ان تبعده عنها سبقها صوته المهتاج والناظر لهما بغضب :

– ابعد عنها يا حيوان انت 

انتبهت له نور وادارت راسها نحوه وحدجته بزعر جلي علي ملامح وجهها وتوتر قاتل استحوذ عليها ، بينما نهض مالك ووقف مضطربا وحدجه بحقد لقدومه في تلك اللحظه ، فاقترب منه زين ونظر له بضيق وتحدث محاولا ضبط انفعالاته :

– باين عليك عيل ، وعيل و…..كمان …ازاي تقرب منها كده ..انتي ناسي انها مراتي يا حيوان انت .

تلعثم مالك في حديثه : انا..أ أ

هتف زين بحده : أمشي أطلع بره ..أصل العيب مش عليك 

هرول مالك للخارج ، فوجه زين بصره اليها وهمت مبرره ما حدث بتوتر بائن :

– انا اتفاجئت بيه يا زين ..ومقربش مني ..دا كان بعيد ..وفهمت ان عايز يبوسني ..وكنت هبعده ..بس انت جيت .

زين بنبره ساخره : لا واضح انك اتفاجئتي …شكلك بتحبي البوس قوي ..وسيباله نفسك …اي حد يبوسك عادي .

نور بحزن : لا يا زين مش كده ..انا معرفش كان عاوز مني ايه ..وقالي كلام كده ولقيته بيقرب مني ، تابعت موضحه :

– مش انت شوفته بعيد عني وملمسنيش ..لأني مكنتش هسمحله .

نظر لها بغضب ثم سار للخارج ، فتتبعته نور بحزن بائن ولم تجد حلا سوا البكاء لتخرج ضيقها لما حدث به……

______________________

ولج مالك غرفته فرحا مقهقها بصوت عالي ، ارتمي علي الفراش بفرحه كست ملامحه ، واخرج تنهيده حاره معبرا عن سعادته فيما حدث ورؤيته له معها ، ولجت ثريا عليه غرفته بعد إدراكها لما حدث رغم عدم معرفتها بتفاصيل الأمر ، واستنبطت بحدسها مكره في الإيقاع بينهم ، وتقدمت منه بملامح متجهمه ورآت فرحته بما انجزه وهتفت بغضب :

– لحد امتي يا مالك عمايلك دي .

وعي لوجدها بغرفته ورفع راسه ناظرا اليها ، ثم نهض من علي الفراش مستفهما بعدم فهم :

– خير يا ماما …تقصدي إيه 

ثريا بإنفعال واضح :

– مالك ومال نور…بتتدخل في حياتها ليه …انت عارف انها متجوزه …ومش متجوزه اي حد ..دا ابن خالك .

مالك ساخرا :

– وايه يعني ..انا بحبها اكتر منه ..وهي هتسافر معايا …هو بس مأثر عليها ..ولما تبعد عنه هخليها تنساه وتبقي معايا انا 

ثريا بحزن : 

– ليه كده يا مالك عاوز تزعل الكل منك ..واولهم خالك ، ثم اقتربت منه واستطردت بترجي :

– سيبها يا مالك في حياتها ..هي حره فيها ..خليك بعيد عنها

اشاح بوجهه بلامبالاه ورد بتافف :

– ان شاء الله يا ماما هحاول ..

ثريا بتمني : ربنا يهديك يا ابني…………….

______________________

ركضت للخارج فور إبلاغها بوجود زوجها في إحدي الشقق بصحبه فتاه ما ، تشنجت تعابير وجه ميرا مجرد رجوعه لما كان يفعله ، استقلت سيارتها وقادتها بسرعه جنونيه غير عابئه بحملها ، وبذلك التعب المستحوذ عليها ، وشعرت بإرتجافه يدها وإرتعاش شفتيها كمن تهوي من مكان مرتفع ، وصلت ميرا لذلك العنوان المدون وترجلت سريعا نحو الداخل .

القي عليها النقود واشعرها بدونيتها ، ونظرات الإحتقار في عينيه قائلا بإشمئزاز :

– الفلوس أهي …ومش عايز أشوف وشك تاني .

ريم بمياعه متعمده إظهارها :

– كده برضه يا وليد …دا انا بحبك ، واخذت تقترب منه وتعجب من تغيرها المفاجئ وابتعد قائلا بإستنكار :

– ايه اللي بتعمليه ده …دا شكل واحده تعبانه ، ثم مرر بصره علي ملابسها وتابع بإحتقار :

– وايه اللبس اللي انتي لبساه ده 

احست ريم بإقترابها فارتمت في احضانه علي حين غره ، وتصلبت انظار ميرا عليهم فقط عرفت هويتها علي الفور ، فكل ما تعرفه تركه لها ، وربما تكون خدعه منهما لخداعها ، وانتبه وليد لوجودها وتفهم خدعه تلك العاهره ، لم تتمالك ميرا نفسها حتي همت بترك المكان وهرعت للخارج ، ولكنه لم يتواني في تركها هكذا واسرع خلفها بعدما توعد بالإنتقام لتلك الحقيره التي ابتسمت بتشفي قائله :

– أشرب يا بيبي..

لم تنتظر ميرا قدوم المصعد وأضطرت لهبوط الدرج متناسيه حملها ومرضها فشاغلها ذلك الألم الغائر في قلبها ، وزاد ألمها وشعرت بمغص يفتك أسفل بطنها وأستندت بيدها لا إراديا بذلك الدرابزين وبيدها الأخري اسفل بطنها صارخه بألم ، وكادت ان تفقد توازنها ، ولكنه كان الأسرع في إلتقافها ومحاوطتها مانعها من السقوط واردف بقلق شديد :

– ميرا يا حبيبتي انتي كويسه 

نظرت اليه بأعين شبه متيقظه ووجه شاحب ، فانتفض قلبه فزعا عليها وما جعله يتجمد موضعه تلك الدماء المتساقطه علي ساقيها فإرتعد وليد وصرخ :

– ميـــرا ………….

_____________________

علمت ثريــا بما حدث لإبنتها ، فأصطحبها حما ابنتها للمشفي المستقره فيها ، وتقدم بها نحو الداخل فوجدت زوج ابنتهــا في حاله لا يرثي لها فهرولت نحوه قائله بقلق مستطير :

– ميرا بنتي حصلها إيه يا وليـد 

فايز بإنزعـاج جلي : أنطق عملتلها ايه 

مسح عبراته بكفي يده ، ورد بصوت مبحــوح :

– انا معملتش حاجه ..دي كانت خطه 

ثريا بإنزعاج وقلق ملحوظ : احكي بسرعه حصل ايه علشان بنتي يحصلها كــده .

قام وليد بسرد ما حدث لهما بدايه بمعرفته بتلك الفتاه مختصرا في بعض التفاصيل فاجهشت ثريا بالبكاء ، بينما عنفه فايز :

– دي آخره المشي الو……اللي ياما حذرتك منه.

طأطأ وليد رأسه في خزي منكسرا ، وتفهم فايز حاله ابنه فقد وقع صديقه المقرب منصور فيه من قبل ، وتروي قائلا بنبره متعقله :

– حتي لو انت مظلـوم …سيبها دلوقتي لما نطمن عليها والدكتور يطلع من عندهــا .

ثريا ببكـاء شديد : انا خايفه يحصلها حاجه ..دول غابوا عندها قــوي .

فايز مهدئا إياهــا :

– إهدي يا ثريا ..ان شاء الله خير ..واللي ربنا عايزه هيكـون .

خرج الطبيب فهرع الجميع اليه وهتف وليد بلهفــه بائنه :

– خير يا دكتور ..مراتي فيهـا ايه 

الدكتور بجـديه : عايزكم تطمنوا ..هي كويسه والحمد لله قدرنا ننقـذ الجنيـن ..ودا كان مجرد نزيف مش أكتر .

ثريا بفرحه : يعني هي كويسه ..نقدر نشوفها 

الطبيب بعمليه : ايوه طبعا ..ولازم تبعدوا عنها اي حاجه تضايقها ، علشان ميحصلش مضاعفات احنا في غني عنها .

ثريا بطاعه : حاضر يا دكتور 

ذهب الطبيب فوجه فايز بصره لوليد محدثا إياه بجديه : روح انت يا وليد واحنا هندخلها ونطمن عليها .

وليد بحزن : انا كنت عايز اشوفها واطمن عليها 

فايز بتفهم : الدكتور طمنا عليها ..وانت سمعته بيقول نبعد عنها اي حاجه تضايقها علشان ميحصلهاش مضاعفات .

اومأ رأسه واجبر وليد نفسه علي الذهاب خوفا عليها …..

بعد مرور عده ايام …

قضتهم نور في أستعطاف زين بعد ما حدث مؤخرا مبديه جهلها بما حدث ، ولم يستمع اليها خاصه بعد تلك الفكره التي تربصت في ذهنها للبعد عنه ، وهيأ نفسه من الآن علي بعدها ، ولم تمل هي من التقرب منه لتوضيح الأمر له …..

في يوم الزفاف …

أمتلئت القاعه بالمدعوين ، وتوافد الحضور من كل مكان لحضور زفاف ابنتي فاضل السمري ، ووقف زين ووالده مرحبين بالجميع ولكن شعر زين بالضجر من وقفته وحدث والده بعبوس:

– بابا انا تعبت من الوقفه ..هروح اشرب حاجه 

فاضل بحنان : روح يا حبيبي

بحثت عنه بين الحضور منزعجه من إهماله لها الفتره الماضيه ، ولابد له من الإنصات اليها ، ادارت نور راسها عفويا وجدته يسير للخارج فأسرعت بالذهاب خلفه ، رآها مالك أيضا وركض خلفها وتقدم بحذر حينما وجدها معه وأخذ يتسمع للحديث الدارج بينهم.

وقفت نور خلفه مناديه : زين 

استدار بجسده نحوها فتابعت بملامح حزينه :

– عايزه أتكلم معاك

رد زين بجمود : وأنا مش عايز اتكلم …سيبيني لوحدي 

نور بإنفعال : لأ..لازم تسمعني ..انت ازاي تتهمني بكده ..انا معملتش حاجه لكل ده .

امسك زين ذراعها بقوه وهتف بضيق :

– واضح أنك عيله ..وعايزه تتربي علي اللي عملتيه..وانا هعرفك ازاي تعملي كده …باين عايزه تبقي معاه. 

حدجته بإنزعاج شديد وافلتت يدها منه بقوه واردفت بغيظ :

– مش هتقدر تعملي حاجه …وعلشان ترتاح خالص ..انا هسافر معاه .

نظر لها زين مصدوما ، فتابعت بتحدي :

– وانت ملكش دعوه بيا .

ثم تركته غير منتظره ردا منه ، وتعقبها زين مصدوما ، بينما تهللت اسارير مالك وهو يستمع لحديثها في رغبتها في البقاء معه ، تنهد بإرتياح واردف بخبث :

– كده أحلوت قوي…………

_______________

ولجت غرفه بنات عمها وارتمت علي المقعد بملامح غاضبه ، وبدأت تتسارع انفاسها وتفرك يدها بعصبيه من اتهامه لها ، تعجبت منها سلمي وسألتها مستفهمه :

– نور يا حبيبتي …فيه حد زعلك 

بدأت في البكاء فدنت منها سلمي وملست علي رأسها متابعه بحنان :

– نور احكيلي حصل ايه …مش انا سلمي حبيبتك 

ردت بصوت باكي : اتخانقت انا وزين 

سلمي بتساؤل : ليه ؟

روت لها نور ماحدث بالتفصيل مرورا بما حدث منذ قليل ، فتفهمت سلمي وعاتبتها :

– أزاي فعلا تعملي كده …اللي عملتيه عيب وميصحش ابدا .

نور بنحيب : انا معملتش حاجه ..انا اتفاجئت بمالك بيقرب مني ..وهو كان بعيد يا سلمي مكنش قريب مني ..وملمسنيش .

سلمي بتفهم : طيب اهدي انتي بس ..ولازم تبقي كويسه مع زين علشان بيحبك …وهو اكيد مش ده اللي مزعله ، تابعت موضحه :

– هو تلاقيه مضايق انك هتسيبيه وهتسافري معاه ..علشان كده بيقول ان بينكم حاجه .

نور متسائله بحيره :

– هو انتي لما تتجوزي معتز ..هيعاملك زي زين ما بيعاملني 

ازدردت سلمي ريقها في توتر ، فتقدمت مريم منهم قائله :

– مش وقته الكلام ده يا نور ..أحنا في حفله دلوقتي ..وهنتجوز كمان شويه ..بعدين نقعد ونتكلم .

اومأت نور رأسها بطاعه ، وضمتها سلمي اليها مقبله وجنتها بحنان…….

______________________

أصرت علي حضور الحفل رغم تعبها ، فظلت ماكثه في الايام الماضيه عند والدتها وزوجها ، متحاشيه الحديث معه رغم محاولاته الكثيره لرؤيتها ، وتأففت فجأه من رؤيته واقفا أمامها ، جلس وليد بجوارها وحدثها بحزن :

– ميرا انا عاوز أتكلم معاكي 

اشاحت وجهها للناحيه الآخري ، فتابع بإصرار :

– ميرا مش همشي غير لما اتكلم معاكي 

حدقت فيه بضيق وهتفت : عاوز ايه …مش كفايه اللي حصل بسببك .

نهض قائلا بجديه : تعالي معايا ..مش هنعرف نتكلم هنا 

ثم امسك يدها لتنهض معه وسحبها خلفه فتحدثت بإنزعاج :

– وليد انا حامل ولسه تعبانه 

توقف فجأه  واستدار نحوها وانحني بجسده واضعا يده خلف ظهرها والآخري أسفل ركبتيها وهم بحملها ، فشهقت ميرا واردف وليد بضيق :

– لازم تعرفي اني بحبك انتي ..واللي حصل ده لعبه اتعملت علينا ..وانا خلاص خدت حقي منها..

ميرا متسائله : طيب انت موديني فين .

وليد بحب : حجزت جناح لينا هنا ..

ميرا بخجل : بس انا تعبانه و….

وليد غامزا : مش مهم …المهم تبقي في حضني………

____________________

هبطن العرائس الدرج سويا ، وانتظر حسام ومعتز نزولهم متأهبين لرؤيتهم ، وأعتلت وجوههم سعاده بائنه ، واقترب كل منهم نحو عروسه وتبادلا النظرات سويا ، ثم توجهوا الي المنصه حيث سيجلسون .

وقف زين مسلط بصره عليهم ويعلو ثغره ابتسامه رضي لإطمئنانه علي إختيه بزواج كل منهن لأعز اصدقاءه .

ولم تشيح نور ايضا بصرها عنه مما ازعج مالك الذي عارض ما تفوهت به منذ وقت ، رآها زين ناظره اليه ويقف بجانبها هذا الأحمق ، فادار راسه ولم يعيرها اهتمام ، فحدقت فيه بنظرات قاسيه متحديه ، واقترب منها مالك قائلا :

– سيبك منه يا نور …اللي بتعمليه ده هو الصح ….

_____________________

توافد الجميع لمباركه العرائس ، وتقدم امير بصحبه خطيبته نحو اخيه لمباركته ، وما لم يكن في الحسبان هو وجود ماجد في الحفل ، فتعجب حسام من وجوده وبدأت تثاوره الأفكار ، فتقدم ماجد منه قائلا بابتسامه زائفه :

– مبروك يا استاذ حسام 

حسام بجمود : الله يبارك فيك 

ثم وجه ماجد بصره لمريم قائلا : مبروك يا مريم .

انزعج حسام من نطقه لإسم زوجته بدون القاب ، وردت مريم عليه بتوتر : الله يبارك فيك 

ما ان ذهب حتي بادر حسام بالحديث :

– ودا ايه اللي جابه ده 

مريم بإمتعاض :

– تاني يا حسام ….هنرجع للموضوع ده….