رواية كارثه في العسكر الفصل السابع 7 – بقلم صباح عبد الله
في مكتب زياد.. إيهاب نايم على الكنبة حاطط رجل على رجل، يحط إيده على بطنه.
إيهاب
أوووف، أنا ميت من الجوع. (يقوم)أما أروح أشوفهم غيبوا ليه كده.
لسه هيقوم، الباب يخبط.
إيهاب
ادخل يا زياد، هو مكتب أهلي علشان تخط.
زينة واقفة قدّام الباب شايلة صينية الأكل.
زينة
أنا زين يا باشا، جايبة الطُّفح قصدي العِشا لحضرتكم.
إيهاب يقوم بسرعة وهو بيقول.
إيهاب
طيب ادخلي يا زفتة، الواحد مصرانه بتاكل في بعضها.
زينة تدخل تبص في المكتب باستغراب وهي بتقول.
زينة
أمال فين التور التاني، قصدي زياد باشا؟
إيهاب ياخد الأكل منها ويقعد يأكل.
إيهاب
بياخد دوش وجاي.
زينة تجري تاخد الأكل تاني من إيهاب وهي بتقول بغيظ.
زينة
طيب سيب الأكل يا طفس، هتنفخ بسببك
إيهاب ياخد الأكل منها تاني وهو بيقول.
إيهاب
بت إنتي مجنونة ولا إيه؟ الأكل ده بتاعي أصلًا، يلا روحي شوفي هتعملي إيه، ما تخافيش زياد مش هيعملك حاجة.
زينة
طيب أنا جيبت الأكل، ماليش دعوة، لو اتنفخت بسببك هنفخك إنت، فاهم؟
إيهاب بزهق
طيب غوري في داهية من هنا، يلا.
زينة تبص لإيهاب بغيظ.. وتسيبه وتطلع، وإيهاب يقعد يأكل.
———-
قدّام الحمّامات
زينة ماشية وهي حاطة إيديها على بطنها.
زينة
آه… آه… يا نّي، شكل الزفت زياد مش مسامحلي في حتة الحمام اللي طفحتها.
لسه هتدخل الحمّام، فجأة زياد يطلع لافف وسطه بفوطة، وصدره عاري.. يخبطوا في بعض.
زينة
إيه يا تور؟ إنت ما تفتح وتشوف اللي قدّامك!
تاخد بالها من زياد، تحط إيديها على وشّها بكسوف.
زينة
إيه يا عم، إنت ما تاخد بالك إن معاكم نِسوان في الحتة الله؟ ولا انتم عاوزين تشيلوا الوحيد ذنوب وخلاص.
زياد بابتسامة
طيب معلش يا نِسوان، ما نعرفش إنك لسه صاحية وهتجي على الحمّام. ثم ما إنتِ بتتكسفي زي البنات أهو، أمال مصدّرة لنا جعفر ليه؟
زينة بكسوف
طيب غور يا خويا، استر عضلاتك دي، الله يسترك.
زياد بخبث
ليه؟ عضلاتي تخصّك في حاجة؟
زينة تبص له بكسوف وتبلع ريقها وهي بتقول.
زينة
يخربيت جمال أمّك… نسيت أنا كنت جاية ليه.
زياد يضحك
عادي، أفكّرك أنا…والله يا زينة إنتِ قمر، بس خسارة جمالك رايح في طولة لسانك.
زينة بحنق
طيب يا خويا وسّع من قدّامي، وآه صحيح، أنا وديتلك الأكل، أجري ألحقلك حتّة حمام قبل ما المفجوع صاحبك يخلّصه.
زياد يضحك، وبعدين يسكت، وبعدين يقول.
زياد
أنا نفسي مرّة واحدة تتكلمي من غير ما تقلّي أدبك.
زينة بحنق
حاضر، في عزاك إن شاء الله يا خويا.
زياد بغيظ
وهتعيطي عليّا ولا إيه؟
زينة
مين ضاحك عليك؟ ده أنا هوزّع الشربات.
زياد
من قلبك؟
زينة بوجع
ما توسّع من قدّامي يا خويا، لا الريحة تقلّب قلبك وإنت واقف.
زياد يبص لها بقرف
ربنا يقرفك، غوري من وشي يادك داهية، سدّتي نفسي.
زياد يسيبها ويمشي، زينة تدخل الحمّام جري.
———
في مكتب زياد
زياد داخل المكتب وهو بيفكر في زينة ويبتسم.. يبص بصدمة لإيهاب اللي نايم على الأرض، الدم طالع من بوقه. زياد يجري.
زياد بصدمة
إيهااااب!
يقعد جنب إيهاب يهزه، وهو بيقول بصوت عالي.
زياد
إيهاب.. إيهاب، مالك يا صاحبي؟ رد عليّا.. إيهااااب، رد عليّا!
يجي سعيد وزكريا والعساكر جاريين على صوت زياد.. زياد يحضن إيهاب اللي مات ويفضل يعيط. سعيد يكلم نفسه.
سعيد بصدمة
يا ليلته سودة، إيهاب مات، وزياد لسه عايش… أنا أكيد هروح في داهية.
يبص حواليه يدور على زينة، وهو بيقول.
سعيد
هي فين الزفتة دي؟ لو فتحت بوقها بكلمة هروح في مصيبة… لازم أتصرف وأعمل حاجة.
سعيد يتسحب ويرجع لورى من غير ما حد ياخد باله.. والكل يفضل واقف يبص لإيهاب بزعل.
—————
في الحمامات
زينة طلعه من الحمام حاطة ايديها علي بطنها وهي بتقول بوجع
زينة
دي أخرت الطفاسة واللي يكلي مال حرام.. اه اه ياني مصريني بتتقطع يابا..
فجاة سعيد يطلع من حمام تاني من ورها ويحط مسدس علي رأسها وهو بيقول بغيظ.
سعيد
اعمل ايه فيكي دلوقتي انا منك لله وتديني في ستين داهيه يغبائك.
زينة ترفع ايديها لفوق وهي بتقول بقلق.
زينة
طيب ما تروق كده وتقولي انا عملت ايه ولا انت مين وعايز مني اي وخد بالك في حضن الحكومة وبقيت واحد منهم يعني ايه رصاصة تطلع كده ولا كده هتروح فيها.
سعيد بغضب
انتي عارفه لو فتحتي حنك بكلمة ولا حد عرف اني اللي تديتك الاكل لزياد هعمل فيكي اي؟
زينة تبص ورها بشك وبعدين تقول باستغراب.
زينة
مالك يا عم سعيد باشا اي لازمة اللي في ايدك ده ما انا كده كده مش هقول لحد انت عاوزني اتنفخ يعني ولا ايه؟
سعيد بزهق
ما هو انتي كده كده منفوخة بس المره دي النيابة اللي هتنفخك نفخة مظبوطة…
زينة باستغراب
وانا علشان اكلت حتة حمام معفنة هتوصلوني لحبل المشنقه ولا ايه؟
سعيد بزهق
حمام وزفت اي الله يخرب بيت أم غباء اهلك ايهاب مات يا حيوان بسببك انا مديكي الاكل مسموا لزياد تروحي تديها لأيهاب. انا كنت عايز زياد اللي يكلي منه مش ايهاب.
زينة بابتسامة هبله
ده انت هتتنفخ زي الخروف زي الخروف قبل ما تتسلخ.
سعيد بغضب يضربها بالقلم يوقعها علي الارض.
سعيد
اتظبطي معايا يا روح أمك انا مش زياد تستعبطي عليه.
زينة بحنق
روح اللهم يجي لك شلل يابعيد روح ده زياد هينفخك بس اصبر علي رزقك.
سعيد باستغراب
قصدك ايه يعني مش فاهم.
زينة بسخرية
روح افتح الباب كده وانت هتفهم كل حاجه لوحدك يا سعودة.
سعيد يبص لها بشك ويبلع ريقه بخوف ويروح ويفتح الباب يبرق بصدمة لما يشوف زياد وايهاب وقفين قدامه.. زياد يحط ايده في جيب بنطلونة وهو بيقول.
زياد
مساء الفل يا سيد الكل.
ايهاب
طول عمري وانا مش برتاح لك بس ما تخيلتش انك واطي كده.
سعيد يرجع بخوف وهو بيقول باستغراب.
سعيد
انت… انت.. انت لسه عايش ازاي مش… مش كنت موت.
ايهاب بسخرية
يعني بالعقل كده واحد ميت هيقف قدامك ازاي.
فجاة زياد يضرب سعيد بالبوكس وهو بيقول بغضب.
زياد
بقي انا يا كلب عايز تقتلني ده انت عايش من خيري يا ندل.
زينة بحنق
اديله كمان واحد الواطي ضربني بالقلم وقع ليا سناني.
زياد يبص لسعيد بغضب جامد
زياد
وحياة أمك لا انا كاسرك ايدك اللي اتمددة عليها.
زياد يمسك ايد سعيد جامد ويكسرها.. سعيد يصرخ بوجع وزينة تصفر وتصقف.
زينة
الله عليك يا زيزو يا جامد انت.
ايهاب بيأس
ماحبكتش الرومانسيه والشهام دلوقتي ياعم زياد خلصنا.
سعيد يبص لأيهاب وهو قاعد علي الارض ماسك ايده ويقول بوجع.
سعيد
انا من حقي اعرف انت ازاي لسه عايش انا متاكده انك اكلت من الاكل المسموم.
زينة بسخرية
يا عم الاكل اللي انت اتدهولي مرمي في الزبالة ولله مش صعبان عليا غير الحماماتين اللي متحمرين في الزبدة.
سعيد باستغراب
وانتي اي عرفك ان الاكل كان مسموم.
زينة بابتسامة
ما انت اللي حمار اعملك اي.. انا كنت عارفه كل حاجه وانا اللي بلغت عنك اصلا… وانت عاملي فيها رشدي اباظة يادك نيلة.
زينة تسكت وتفتكر كل اللي حصل.
فلاش باك
زينة ماشيه بتكلم نفسها بقلق وخوف.
زينة
قلبي وجعني ومش قادره اكتم الكلمتين اللي سمعتهم دول اعمل اي حكني مش راضي يبل فولة.. احسن حاجه اروح وقول له وخلاص حتي لو مش صدقني يبقي هو حر وانا ريحت ضمير أهلي اللي مش عاوز يخلي في حاله ده.
في مكتب زياد
زياد قاعد علي الكرسي وزينة واقفة قدامه.. زياد يقوم فجاة وهو بيقول بغضب.
زياد
انتي بتخرفي بتقولي ايه يا بت انتي ايهاب مين ده اللي عايز يقتلني انتي هبله ولا ايه.
زينة بغيظ
ما هو الحق عليا اني جايه احذرك جيبت لنفسي التهزيق من اللي يسوي واللى ما يسواش.
زياد يبص لها بغضب وقبل ما يرد عليه ايهاب يدخل جري وهو بيقول.
ايهاب
زياد اللحق الزفت سعيد راجع وشكله ناوي علي مصيبة.
زياد بزهق
هو يوم المصايب والاتهمامة ولا ايه هات اللي عندك انت كمان.
ايهاب
سمعت الزفت بيتكلم في التليفون مع حد وبيقول له ما تقلقش هخلص لك عليه من غير ما يحس ولا يشك فى حاجه.
زياد يبص لزينة بشك وزينة بتقول بحنق.
زينة
لا يراجل ما ده نفس الكلام اللي سمعتك بتقوله في الحمام.
ايهاب باستغراب
كلام اي وانتي هنا من امتي.
زينة بحنق
من قبلك يا فالح وانا كشفك انت اللي عايز تقتل التور ده سمعت كل حاجه قولتها.
ايهاب يبص لزياد باستغراب وهو بيقول
زياد
هي بتخرف بتقول ايه دي مش فاهم.
زياد بتفكير
بس انا فهمت كل حاجه.
زياد يبص لزينة وهو بيقول.
زياد
اسمعي هقولك اي ولو غلطي في حرف هنفخك انتي فاهمه.
زينة وايهاب يبصوا لبعض باستغراب.
——
الحاضر
في الحمامات
زينة
ودي كل الحكاية من طقطق لسلام عليكم وانت وقعت زي الفار في المصيدة.
سعيد يبص لزياد بخوف وهو بيقول.
سعيد
انا ماليش دعوه عمك اللي كلمني وطلب مني اقتلك وكان هيدني مليون جنيه.
زياد بحنق
وانت وافقت تقتلني يا ندل علشان شوية ورق.
سعيد يوطي راسه بكسوف وزعل وزياد يقول بصوت عالي
زياد
خدوها من قدامي واسحبوا الملف بتاعه وبكره يترحل علي النيابة.
سعيد بصدمة
نيابة… نيابة اي.
يجري يقعد عند رجل زياد وهو بيقول برجاء.
سعيد
ابوس ايدك سامحني يا زياد غلط اقسم بالله ومش هتتقرر تاني علشان خاطري علشان خاطر العيش والملح اللي بينا حتى.
زياد بحنق
وانت كنت عملت خاطر للعيش والملح لما فكرت تقتلني علشان الفلوس. واسامحك علشان تحاول تقتلني تاني يا ندل.. خدوا من قدامي..
زكريا والعساكر يخدوا سعيد ويمشوا.. زياد يبص لزينة وهو بيقول..
زياد
شكراً يا زينة لولكي ما كنتش عارف اي اللي ممكن يحصل..
زينة تبتسم بفخر وقبل ما تقول حاجه زياد يسبهم ويمشي بحزن وايهاب يجري وراه.
زينة بحنق
اي الراجل ده حتي ما صبرش لما الواحد ينفخ نفسه شويه
النااس بتعمل خير وترمي في البحر وانا برمي للكلاب.
ايهاب بيجري وري زياد
ايهاب
استني يا زياد فهمني ناوي تعمل اي دلوقتي.
زياد بحزن
هصفي حسابتي يا ايهاب خليك انت هنا وانا هنزل اجازة يوم وهرجع.
ايهاب بقلق
طيب خد بالك من نفسك يا صاحبي.
زياد يحضنه جامد
شكراً يابو الصحاب..
زياد يسيبه ويمشي
————————
تاني يوم في بيت أهل زياد
في مكتب سامي… قاعد يحي علي الكنبه.. وسامي رايح جايه وهو ماسك التلفون وبين علىه القلق والخوف.
سامي
رد يا زفت يخربيت اليوم اللي كلمتك فيه.
يحي
انت متاكد انه نفذ اللي اتفقتوا عليه.
سامي بحنق
ايوه يا خويا اتصل وعرفني انه هينفذ ومن امبارح مش بيرد عليا..
سامي يطلب رقم سعيد… فجاة يدخل زياد ماسك تليفون سعيد والتلفون بيرن.. سامي ويحي يبصوا له بصدمة ويحي يقوم.
يحي
زياد…
زياد بسخرية
معلش بقا يا عماه الخطة المرة دي فشلة تتعوض المره الجايه بقا.
سامي بخوف
خطة خطت اي يعنى مش فاهم بتقول ايه؟ وتليفون مين اللي معاك ده.
زياد
تليفون سعيد باشا اللي اجرته يقتلني.
سامي بخوف
انت بتخرف بتقول ايه وانا هقتلك ليا ثم انا ما عرفش حد بالاسم ده.
زياد
طيب استني كده نجرب نرن عليك ممكن الرقم غلط ولا حاجه.
سامي ويحي يبصوا لبعض بخوف وسامي يبلع ريقه لما زياد يرن علي تليفونه.. والتليفون يرن.
زياد بسخرية
الحمدلله الرقم ما طلعش غلط ولا حاجه.
يحي يشاور علي سامي وهو بيقول بخوف
يحي
زياد انا ماليش دعوه عمك اللي مخطط لكل حاجه. انا بس…
زياد يقاطعه بسخرية
انت بس كنت مستنيني اموت مش كده.
يحي يبلع ريقه بخوف وسامي يبص له بغيظ.. وزياد يقول.
زياد
ادخل يا حضرت الظابط.
يدخل الظابط ومعاه العساكر.
زياد
انا بتهم الاتنين دول حاولوا يقتلوني وأجروا واحد يحطلي سم في الاكل. واللى اجروا واحد صاحبي واعترف بكل حاجه..
سامي ويحي يبصوا له بعيظ والظابط والعساكر يقبضوا عليهم.
————- بعد تلات سنين.
في الكتيبه.
زينة واقفه مع العساكر اللي خالصوا جيش وخرجين وكل واحد جنبه شنطة هدومه.. زينة بتعيط زياد يبص لها باستغراب.
زياد
مالك بتعيطي ليه مش ده اليوم اللي كنتي بتحلمي بيه.
زينة بدموع
اصلا زكريا هيوحشني اوى.
زكريا
وانا هكسر وراكي زير علشان ما ترجعيش ليا تاني.
الكل يضحك وزينة تقول بحنق
زينة
خساره فيكي وحشتي يا معفن انت..
ايهاب يقرب من زياد وهو بيقول بصوت واطي.
ايهاب
انت مستني اي البت هتمشي اخلص.
زياد بحنق
مش سامع طلعت بتحب زكريا..
ايهاب بصدمة
بقي زينة تحب زكريا انت اهبل يابني..
زينة تبص بغيظ لزياد وهي بتقول بحنق.
زينة
انا همشي يارجاله ما حدش عاوز يقولي حاجه كده ولا كده قبل ما امشي.
يرد عليها واحد من العساكر
العساكر
انا بصراحه يعني كنت عايز اقولك اني معجب بيكي ممكن رقم الحج علشان اجي اتقدملك.
زينة
يا عم غور في داهيه وخلي عندك كرامة بقا انا رفضتك ولا الف مره انا بحب حمار والحمار مش عايز يتعتع.
ايهاب بضحك
ما هو الحمار واقع علي بوزه بس مش عارف رابط نفسه ليه.
زياد بغيظ
انا حمار يا زفت..
زينة
طيب كويس ان الحمير عارفه نفسها.
زياد بغيظ
بت انتي اقسم بالله همسك انفخك..
زينة بغرور
ولا تقدر تعمل حاجه انا خلاص خلصت جيش وخد المعفاء يابا وبقي اسمي العساكر زينة زين الزتونة.
زياد يبص لها بغيظ وهو بفك حزام البنطلون..
زياد
ده عند ام التيتي عارفها..
زينة تطلع تجري وزياد يجري ورها بابحزام وهو بيقول.
زياد
والله لا انفخك يازينة الكلب وهطلع التلات سينين دول علي جلدك…
زينة تجري وهي بتصوات زياد ورها الكل بيضحك عليهم.
النهاية
يتبع الفصل كاملا
•تابع الفصل التالي “رواية كارثه في العسكر” اضغط على اسم الرواية