رواية لن احررك الفصل التاسع 9 – بقلم دهب عطيه
الفصل التاسع
تنزل على السلالم ترتدي بنطال جينز وسترة علوية ذات أكمام قصيرة تكشف نصف ذراعها. كان البنطال باللون الأبيض والسترة باللون الوردي والأبيض…
تربط شعرها على شكل ذيل حصان وتحمل حقيبتها الصغيرة بين يديها وعيناها تُغيمان في شرود حزين من القادم وراء هذه الزيجة……
دلفت إلى غرفة الطعام بعد أن أخبرتها الخادمة أن جواد ينتظرها هناك على الإفطار……
“صباح الخير…..”
وقفت بجانبه بعد أن قالت جملتها بصوت أنثوي شبه حزين…..
كان يأكل بهدوء وفور دخولها عليه غمرته رائحة عطرها المميز رفع عينيه ورد عليها بنبرة شبه ثابتة….
“صباح النور….. اقعدي عشان تاكلي قبل ما نمشي…”
قالت بسمة برفض….
“لا شكرًا أنا ماليش نفس…. أنا هقول لأم إيمان تحضرلي نسكافيه أشربه على ما تخلص فطارك…”
كادت أن تذهب من جانبه لكنه اوقفها حين
مد كفه مطبق على يدها بلطف……
نظرت إلى يده الموضوعة على يدها ومن ثم حدقت في عينيه باستغراب…..
تنحنح جواد من حركته المباغتة لها وقال بحرج….
“مش هاينفع تشربي قهوة على الصبح….. يعني إفطاري الأول وبعدين اشربي اللي تحبيه…..”
قطبت جبينها وهي تحدق به بغرابة….
“تمام….. بس ممكن تسيب إيدي…..”
نظر جواد إلى موضع يده ومن ثم أزالها بحرج مخفي عن عيني بسمة التي جلست بجانبه وبدأت تأكل على مضض
فهي لا تريد التحدث معه تحت أي ظرف حتى لا تنظر إلى تلك العيون المخيفة…..
بعد مدة كانت تصعد إلى سيارته في المقعد الخلفي.
دخل جواد وهو يتحدث في الهاتف ظنًّا منه أن بسمة ما زالت بداخل المنزل….
“أيوه يا نجي….. لا هقابلك أول ما أبقى فاضي….. خلاص بقى مش عايز صداع….. وبلاش ترني كل شوية.”
أغلق الخط وهو يزفر بضيق. أتت عيناه في مرآة السيارة من الداخل ليجدها تجلس في الخلف وتنظر من نافذة السيارة بصمت مريب……
“تعالي اقعدي جمبي يا بسمة…..”
نظرت نحو المرآة لتقابل عيني جواد سألت بدهشة….
“نعم……”
مشط شعره بكف يده أمام المرآة حتى يراقبها دون أن تلاحظ مراقبته وكأنه منشغل بالنظر إلى نفسه عبر تلك المرآة الصغيرة……
“اللي سمعتيه…. أظن إني قريب أوي هبقى جوزك مش السواق بتاع سيادتك…..”
امتعض وجهها بازدراء وهي تطلع عليه ردت بعناد….
“أنا مش متعودة أقعد جمب راجل غريب في العربية…..”
“أولًا إنتِ عملتيها قبل كده ثانيًا أنا مش غريب أنا هبقى جوزك…..”
زفرت بغضب وقالت بتهكم….
“كانت الظروف غير الظروف وياريت تبطل كلمة جوزك جوزك….. مانا وإنتَ عارفين اللي فيها…..”
تلاقت عينا جواد بعينيها عبر المرآة فقال بتشدق ساخر….
“ما عشان أنا وإنتِ عارفين اللي فيها بقولك تعالي اقعدي جمبي وستهدي بالله…..”
“لا أنا مرتاحة كده…..”
عقدت ساعديها وهي تجيبه بتبرم وقالت بضجر….
“ياريت بس تسوق براحة لحسن شكل السكة دي مليانة كعبله…..”
نظر جواد من نافذة السيارة مثلما حدج تلك العنيدة لتعلو جانب فمه ابتسامة ساخرة….
“براحتك…..”
لم يرد على جملتها الأخيرة بل رد على حديثها العنيد… ازدردت ريقها بتوجس من امتثال جواد لم ترد منه أن يمتثل بتلك السهولة المريبة……
حرك محرك السيارة وبدأ بالانطلاق بها…..
كان يقود السيارة بسرعة رهيبة وتتخطى السيارة المطبات العالية والطريق المتهالك……
كان جسدها يتحرك بقوة صعودًا وهبوطًا في ذلك المقعد الخلفي زفرت بغضب وهي تتحدث إلى جواد….
“ممكن تهدي السرعة شوية لحد ما تطلع على الطريق السريع…..”
لم يرد عليها بل ظل كما هو على تلك السرعة الرهيبة وكأنه بمفرده في السيارة…..
“يا أخي إنتَ مش سامعني….. آه براحه هو إحنا في حرب… الله! إيه؟! آآآآه طالما حضرتك ما بتعرفش تركب عربيتك بتسوق ليه؟! آه براحه بقى… ضهري اتكسر…..”
صاحت بقوة وتأوهت بصوت عالٍ…..
شعر أنه تمادى في عقابها فأوقف السيارة فجأة ونظر لها عبر المرآة فوجدها تدلك ظهرها بكف يدها بتعب وهي تتأوه بصوت مكتوم…..
نزل من السيارة وفتح الباب ناحية جلوسها وانحنى عليها برأسه وقال….
“إنتِ كويسة؟ ضهرك حصله حاجة؟”
“لا أبدًا ضهري حديد مش بيتكسر من سواقة سيادتك…..”
نظرت له باستهزاء…..
“هو إنتِ لسه فيكي حيل تقوحي معايا؟”
تجهم وجهها وهي ترد عليه بنزق….
“دي ميزة المحاماة يا….. يا ابن الغمري…..”
“طيب…..”
مال على جسدها ليحملها على ذراعه.
أصابتها الدهشة وهي تسأله بذهول….
“إنت بتعمل إيه؟”
نظر لها بطرف عينيه وقال ببرود….
“دي ميزة الإجرام يا بنت الرفاعي…..”
فغرت فمها بعدم فهم….
“هاا؟”
رد عليها بطرف عينيه….
“ميزة الإجرام بالـ….. بالعافية!”
القوة
ألقاها على مقعد السيارة بجانبه بالقوة….
“بالعافية تنفذي كلامي وبالعافية تبطلي عناد…..”
جلس بجانبها اتسعت مقلتاها وكادت أن تنهال عليه بالكلمات ولكن أسرع جواد بالقول بتحذير صارم….
“أنا مش عايز أسمع صوتك لحد ما أروحك….. وكفاية كلام بقى عشان مصدع…..”
عضت على شفتيها بغيظ فهو يعاملها كطفلة…..
“بطلي عض على شفيفك هتعوريها.”
احمر وجهها بحرج لتهتف بانزعاج حاد….
“وإنتَ مالك؟ سوق وإنتَ ساكت….. إيه ده!”
نظرت عبر نافذة السيارة بضيق من وقاحته معها.
رفع حاجبه بخبث وهو يرى خجل الفتيات على وجه تلك العنيدة صاحبة أكبر روح مغامرة……
وصلت السيارة بعد ساعات أمام باب منزلها…..
نزلت من السيارة دون أن تتفوه بكلمة طوال الطريق، وحتى وهي تنوي المغادرة الآن منها…..
مسك جواد كف يدها قبل أن تترجل من سيارته.
نظرت له وهي تسأله بعينيها….
“في إيه؟ ماسك إيدي كده ليه؟”
تحدث جواد بجدية واضحةوعيناه ثاقبتان عليها….
“زي ما اتفقنا يا بسمة عشان محدش عندكم يشك في حاجة…..”
اكتفت بإيماءة بسيطة وهي تقول….
“حاضر….. ممكن بقى تسيب إيدي؟”
“خدي بالك من نفسك…..”
قال جواد جملته وهو يترك كف يدها. حدجت بسمة به بتمعن تريد أن تتلمس صدق كلماته ولكن قطع هذا التدقيق والدهشة على وجهها صوت جواد وهو يقول بنزق….
“يلا انزلي عشان اتأخرت…..”
عضت على شفتها السفلية بحرج وهي تترجل من السيارة لم تنطلق السيارة بعد خروجها بل ظلت واقفة حتى اختفت داخل مبنى ما…..
خرج جواد من سيارته وفتح صندوق السيارة من الخلف وأخرج منه حقيبة سفر كبيرة تطلع حوله بترقب فوجد بعض الأطفال يلعبون كرة القدم. أشار إلى اثنين منهم…..
“أيوه يا كابتن عايز إيه؟”
مال جواد قليلًا على الولد وهو يسأله….
“تعرف بيت بسمة الرفاعي المحامية؟”
أشار الصغير إلى المبنى أمامهم وقال….
“أهوه يا أبو الكابتن الشقة اللي في الدور التالت…..”
تقوس فم جواد جانبًا وهو يقول….
“طب يا كابتن منك ليه أنا عايزكم توصلوا الشنطة دي ليها….. ودي حاجة بسيطة لزوم الخدمة يعني…..”
أخرج مبلغًا بسيطًا بالنسبة له ولكنه باهظٍ في عيون تلك الصغار…..
ابتسم الولد وهو يرد عليه بسعادة مفرطة….
“عنينا للباشا…..”
حملوا الحقيبة الكبيرة معًا أمام عيني جواد الذي كان يراقبهم. وبعد أن ولج الولدان إلى داخل المبنى صعد جواد إلى سيارته وانطلق بها……
في داخل المبنى…..
وصلت بسمة أمام شقتها…
كانت تعلم أن الوقت مبكر وأن الجميع في عملهم وكريم في المدرسة أخرجت مفتاح الشقة من حقيبتها الصغيرة ودلفت إلى الداخل…..
أغلقت الباب وهي تنظر إلى كل ركن في تلك الشقة التي شهدت سنوات الطفولة والمراهقة والآن ستشهد على زيجتها البائسة من ذلك الغمري…..
تنهدت بصوت مسموع وهي تهم بالدخول إلى غرفتها لتغير ملابسها بأخرى مريحة.
صدح جرس باب الشقة.
نظرت بسمة إلى ساعة الحائط المعلقة باستغراب فالوقت ما زال مبكرًا على عودة أمجد ودعاء من العمل…..
فتحت باب الشقة بترقب لتقابل هذين الولدين أمامها…..
“في حاجة يا أسامة؟”
تحدث الصغير بسرعة وحماس….
“أيوه يا ابله بسمة في واحد لابس بدلة حلوة وراكب عربية مرسيدس بعتلك الشنطة دي وقال لنا نوصلها ليكي…..”
“واحد مين؟”
سألتهم بتوجس….
“معرفش اسمه….. يلا سلام يا ابله بسمة…..”
نزل الولدان وهما ينظران إلى المال الذي ربحاه من ذلك الرجل السخي……
حملتها إلى الداخل وأغلقت الباب وبدأت في فتح سحّاب الحقيبة لترى محتوياتها…..
“إيه ده؟!”
وجدت ملابسها التي كانت ترتديها في قلب بيت المزرعة الخاص بجواد وتلك الثياب الجديدة التي أحضرها جواد لها… وجدت ورقة بيضاء مطوية على سطح الملابس ففتحتها….
((ما ينفعش تنسي حاجة تخصك ولا إيه؟!….))
أغمضت مقلتيها من برودة رسالته وسؤاله المباغت لها……
زفرت وهي تتمتم باسمه….
“جواد….. إنت طلعتلي منين؟!…..”
ولن أحرركِ. ستظل تراود أحلامك وأحلامي دومًا فأنا الصياد الماهر وأنتِ الفريسة القوية !!…..
………………………………………………………..
“خلاص يا رنا شوية وجاية مش هتأخر….. خلاص بقى يا رنا بطلي زن….. باي…..”
أغلقت أسيل الهاتف وهي تهم بالخروج من باب حديقة الفيلا فقابلت أحد حرس خالها (زهران)…..
“لو سمحت يا فتحي ينفع تشوفلي أي تاكسي؟”
أومأ لها الرجل مفتول العضلات ذو الحلة السوداء الرسمية….
“أوامرك يا هانم…..”
“خليك يا فتحي مكانك…..”
استدارت أسيل إلى مصدر الصوت بيقين.
تطلعت بضيق إلى سيف الذي يقف مرتديا طاقم شبابي عبارة عن بنطال أسود وتيشيرت أبيض اللون وممشط شعره إلى الخلف بجاذبية معتادة… وسيم وله هالة طاغية
على أي مكان يقف به……
ابتعدت أسيل بتشنج عن المكان بأكمله نحو الطريق السريع للبحث عن سيارة أجرة…..
“أسيل….. أسيل….. إنتِ يا بت…..”
عضت على شفتيها بغضب وهي تكمل سيرها وهتفت داخلها بكبرياء….
“بــت طب تبقى ترد البت عليك…..”
سار سيف خلفها بسرعة للحاق بها…
انزعج من تصرفها الطفولي معه فمسك معصمها بقوة واستدارت له بسرعة لتصطدم بصدره العريض شهقت أسيل من قوة جذبه لها….
“براحة يا سيف في إيه؟ وإيه الطريقة دي؟”
ترك سيف يدها وقال بعصبية مفرطة….
“هو أنا مش بنادي عليكي يا هانم؟ مش بتردي ليه؟ عليه ليه اطرشتي؟!”
لوحت بسبابتها بتحذير….
“لسانك يا سيف أنا مش بحب الطريقة دي
في الكلام…..”
مسح على وجهه بقوة وقال بتمهل….
“ماشي يا بنت عمتي…كنتِ رايحة فين بقى؟”
عقدت ساعديها وهي ترد عليه بإيجاز….
“رايحة المعرض عندي شغل أي أسئلة تانية يا ابن خالي؟”
نظرت له بازدراء…..
تنهد بضيق من طريقتها ليرد عليها وهو يمسك يدها….
“طب يلا عشان أوصلك بما إن عربيتك في الصيانة…..”
صاحت باعتراض….
“مش عاوزة أركب معاك هاخد تاكسي سيب إيدي بقى…..”
رد عليها بحزم….
“بلاش عناد يا سيل إحنا اتكلمنا في الموضوع ده قبل كده…..”
“اتكلمت أنت فيه لكن أنا لا وهقولها لك تاني أنت مش ولي أمري يا سيف وأنا مش صغيرة…..”
صعدت إلى السيارة وهي تتحدث باعتراض. انطلق سيف بالسيارة من أمام الفيلا
فصاحت أسيل بانزعاج….
“سيف نز لني أنا مش عاوزة أركب عربيتك نزلني يا سيف…..”
“أنا آسف…..”
اتسعت مقلتاها فور اعتذاره المفاجئ…..
التفت بوجهه ناحية أسيل التي قطبت جبينها بدهشة وعيناه تحكيان عن صدمة كلمته….
“أنا عارف إني اتمديت معاكي…بس إنتِ كمان غلطانه مش أخلاقك يا أسيل إنك تروحي بيت واحد أعزب حتى لو كنتِ بتحبيه وواثقة فيه برده غلط… وأنا اتعصبت عشان أنا بعتبرك زي أختي ولو أسماء كانت مكانك كنت كسرت دماغها مش زعقتلها بس…..”
نظرت أمامها وهي تدلك ذراعها قائلة بسخرية….
“أنت فعلًا كنت هتكسر دراعي مش دماغي…..”
أوقف السيارة فجأة ملتقطًا ذراعها من بين كف يدها الأخرى بسرعة وقال بحنان وهو يتفحص ذراعها….
“هو لسه وجعك؟….. أنا شكلي اتغبيت عليه…..”
ارتعش جسدها فور لمسة يده على ذراعها الذي كان منكشفًا نصفه بسبب تلك السترة الصيفية….
“خلاص يا سيف أنا كويسة…..”
سحبت يدها بسرعة وبحرج وهي تكمل حديثها بوجوم….
“أنا مش زعلانة منك أنا عارفة إنك عملت كده عشان خايف عليا… بس لازم تثق فيا أكتر من كده أنا لسه بنت عمتك اللي تعرف تفرق ما بين الصح والغلط…..”
وضع كف يده على وجهها بلطف وقال بصوت أجش….
“عارف يا اسيل تفتكري لو شاكك في حاجة زي دي ليه هاجي أعتذر منك وأصالحك؟”
أبعدت وجهها بتوتر فسيف يتعامل معها تعامل الأخوة لبعضهم لكن لمسة يده عليها تخترق أصولها من الداخل وتهدم أي حصان وضعته من قبل تلك المشاعر المباغتة من جنس آدم…..
تكلمت أسيل بمزاح لتمحو هذا الحرج الجلي عليها….
“أنا لسه مش مسامحة…..”
“طب ليه؟”
قطب جبينه ينتظر باقي الحديث منها…..
“يعني أنا عاوزة أتغدى برة البيت النهاردة وعلى حسابك ده لو عاوزني أسامحك…..”
نظر سيف أمامه بتفكير دقيق ومضحك جعلها تكركر من طريقته وتلاشى الحرج وزوبعة الأسئلة والمشاعر الغريبة عليها فور حركته…..
نظر لها بطرف عينيه وهو يقول بمزاح….
“يعني أتقل جيبي…..”
“على الآخر أنا ناوية آكل جمل عشان تبطل تزعلني…..”
حرك وقود السيارة وهو ينظر إلى جسدها وقال بلؤم….
“مش باين عليكي إنك بتاعت جمل بس ماشي يمكن ده أوبش البنات القصيرة…..”
لكزته في كتفه وهي تهتف بحنق….
“قصيرة في عينك ده….. ده أنا حتى قمر…..”
ابتسم بجاذبية وهو يقول بغزل خفي….
“آه طبعًا ما كل القصيرين حلوين وإنتِ أولهم…..”
صاحت باسمه بغيظ….
“ســـيــــف……”
ضحك أكثر لتتزايد وسامته أضعافًا مضاعفة أمام عيني أسيل التي خفق قلبها الأبله داخلها بقوة مفرطة…..
وصل بها بعد مدة أمام هذا المعرض الصغير الذي تعمل به وتشارك فيه مع بعض الأصدقاء أصحاب ذات المهنة والهواية المشتركة (الرسم)…..
“شكرًا على التوصيلة…..”
ترجلت أسيل من سيارة سيف ولحق بها سيف من الناحية الأخرى وقال بابتسامة حانية….
“هتخلصي إمتى عشان الجمل قرب يستوي؟”
غمز لها بمداعبة طفيفة…..
حكت في شعرها بتفكير ومن ثم ردت عليه بإيجاز….
“كمان أربع ساعات كده… لو مش فاضي نأجلها…..”
“والجمل مين ياكلوه؟”
كاد أن يدخل إلى سيارته ولكن سمع صوتًا مألوفًا له….
“إيه يا سيل اتأخرتي ليه؟ مدام ألفت بتسأل عليكِ… معجبة باللوحة الـ*** جدًا وعجبها تناسق الألوان جدًا….. إيه ده معقول سيف هنا؟!”
نظرت رنا صديقة أسيل وأحد الأصدقاء المشاركين في ذلك المعرض الصغير إلى سيف…..
نظرت أسيل باستغراب لصديقتها التي تقدمت من سيف ودهشة تعلو وجهها. راقبت أسيل الحديث دون تدخل….
“مش مصدقة إني أشوفك بعد السنين دي كلها….. يعني من ساعة الحادثة وتعبك ولما روحتلك المستشفى قالوا إن حالتك صعبة و…..”
قاطعها سيف بوجه محتقن بسبب ذكريات الماضي….
“إزيك يا رنا؟ عاملة إيه؟”
ردت عليه بابتسامة حانية….
“أنا كويسة يا سيف إنتَ أخبارك إيه؟ بقيت أحسن دلوقتي؟”
اكتفى بهز رأسه وهو يقول بإيجاز….
“الحمد لله تمام….. بعد إذنكم ورايا مشوار مهم…..”
ثم نظر إلى أسيل وقال بفتور….
“كمان أربع ساعات هتلاقيني عندك….. سلام…..”
ارتدى نظارته السوداء ليخفي الألم الجليّ من عينيه ذاتي البني الداكن…..
بعد أن اختفت السيارة نظرت رنا باتجاه أسيل الشاردة وهي تسألها بتعجب….
“هو إنتِ تعرفي سيف الغمري يا سيل؟”
أومأت لها بهدوء….
“آه سيف يبقى ابن خالي إنتِ بقى تعرفيه منين؟”
“ده كان حــبــيـ…..”
“إنتوا هتبطلوا رغي إمتى؟ ألفت الشاذلي مستنياكي جوا يا اسيل مش هتستنى كتير يعني…..”
تحدث رفيقهم الثالث علاء بعجلة وسرعة…..
خبطت رنا على جبهتها بضيق….
“أوبس نسيت….. طب يلا بينا يا سوو عشان اتأخرنا فعلًا…..”
سارت معهم أسيل وهي تقول بنبرة عادية….
“أوك…..”
……………………………………………………….
دلفت دعاء بصحبة أمجد وابنهم كريم إلى داخل الشقة لتغمرهم رائحة الطعام الشهي…..
“إيه ده؟ مين هنا؟”
قالت دعاء جملتها وهي تضع حقيبة يدها على الطاولة…..
ابتسم أمجد بيقين وقال بمزاح….
“أكيد بسمة أصل أحلى مكرونة بشاميل بتتعمل من إيد بسمة…..”
اتسعت مقلتا دعاء بصدمة….
“بسمة؟ مش معقول…..”
ركضت إلى المطبخ سريعًا…
ترك كريم حقيبة الدراسة وهو يصيح بحماس وراء والدته….
“بسومة يا بسوم يا خالتو إنتِ هنا بجد؟!”
خرجت بسمة لهم قبل أن يدلفوا إليها وقوست فمها قائلة بحذر زائف….
“رايحين على فين يا كتاكيت؟ لسه المكرونة في الفرن…..”
“بسمة….. وحشتيني يا ندلة…..”
عانقتها دعاء بقوة بادلتها بسمة العناق وهي ترد عليها بلطف….
“إنتِ أكتر يا دودو…..”
ابتعدت عنها دعاء وهي تسألها بعتاب….
“ليه قافلة تلفونك يا بسمة؟ كل شوية بتصل عليكي تلفونك مغلق. إيه اللي حصل؟”
توترت وهي تجيب شقيقتها….
“ولا حاجة….. يعني اا….. الخط اتحرق…..”
“اتحرق؟ وإزاي حصل كده؟”
“اللي حصل يا دعاء خلاص بقى كفاية أسئلة. خليني أسلم على كرملة…..”
نزلت لمستوى ابن شقيقتها كريم تعانقه باشتياق…
“عامل إيه يا كرملة؟ وحشتني…..”
داعبت طرف أنفه بإصبعها…..
عبس وجه كريم قليلًا ولكنه رد باشتياق طفولي….
“مع إني مش بحب دلعك ده بس مش مهم المهم إنك وحشتيني أكتر يا بسومة…..”
داعبت شعره الغزير بيدها وهي تبتسم بسعادة….
“إنت أكتر يا كرملة…..”
تطلعت خلفهم ناظرة إلى أمجد زوج شقيقتها الذي بمثابة الأب الصغير والشقيق الأكبر لها….
“إزيك يا أمجد؟”
“تعالي سلمي عليه زيهم ولا أنا ماليش من الحب جانب؟”
تقدمت بسمة منه ومدت يديها له وهي تبتسم في وجهه بمزاح….
“عامل إيه يا جوز أختي؟ من غيري أكيد الأسبوع اللي غبته كان الجو شاعري…..”
ابتسم وهو يرد عليها بمزاح….
“كان شاعري على الآخر أختك كانت مقضية الأسبوع عياط ونكد طول اليوم…..”
قاطعه كريم وقال بمزاح….
“لا يا بابا استنى أنا بعرف أقلد ماما كويس….. أول يوم بسمة اتصلت وكلمتها بس قلقت برده عليها وفقرة عياط بقى وما أوصفلكيش بقى يا بسومة لما تليفونك اتقفل الفقرة بقت تلات مرات في اليوم… مرة الصبح ومرة آخر النهار ومرة بليل والفقرة مكونة من جملتين أهئ….. أهئ….. يا ترى إنتِ فين يا جهاد؟! أقصد يا بسمة يا ختي…..”
اكفهر وجه دعاء وهي تقول بتهديد….
“أنا كنت بقول جهاد… طب محروم من المصروف أسبوع بحاله يا كريم عشان تبطل هزار…..”
حمل حقيبة المدرسة على كتف واحد وهو يقول بلا مبالاة….
“عادي بسومة جت وهاستكردها…..”
اتسعت أعين بسمة بصدمة….
“يعني إنت بتستكردني يا كريم؟!”
دخل إلى غرفته وهو يرد بفتور مازح….
“ياااه من أيام ما كانت الكفولة بنص جنيه…”
“يا سافل….. ابنك ده…..”
أشارت بسمة إلى أمجد وهي تسأل….
ضحك أمجد وهو يرد عليها بمزاح….
“آه بس للأسف تربيتك…..”
كادت أن ترد ولكن عضت على شفتيها بقوة وهي تقول بتبرم….
“تصدق عندك حق دي تربيتي فعلًا…..”
تذكرت جواد حين اتكأت على شفتها وجملته لها زين ثغرها بابتسامة حانية وهي شاردة…..
وضعت دعاء يدها على كتف بسمة قائلة بلطف….
“مالك يا بسمة؟ رحتي فين؟”
“ها؟….. لا أنا هدخل أشوف المكرونة…..”
دلفت إلى المطبخ وتبادل أمجد وزوجته النظرات بعدم فهم……
بعد طعام الغداء ومزاح بسمة مع الجميع وكريم أكثرهم الذي ينال الدلال والحب منها…..
عائلة بسيطة وطموحها أبسط ولكن للقدر حكاية أخرى لا تنم عن تلك البساطة التي نراها الآن…..
………………………………………………………..
“بتقولي إيه يا بسمة؟ جواد الغمري اللي ضرب عليكي نار وكان عايز يموتك….. إزاي يبقى جوزك؟ ها؟ إزاي؟!”
ترددت بسمة وهي تحاول إقناعها برغبتها الكاذبة….
“مانا لسه قايلة يا دعاء جواد مش هو اللي ضرب عليا نار وأنا مرتاحة له وحابة أكمل معاه…..”
زفر أمجد الجالس معهم بصمت ليسأل
بشك….
“ومن إمتى الكلام ده يا بسمة؟ من إمتى بتنـزلي للمستوى ده؟ معقول هتربطي حياتك بمجرم لمجرد إنه مهددك بحياتك أو بحياتنا؟!”
توترت بسمة من إدراك أمجد سبب تلك الزيجة في هذا الوقت. حاولت التحدث بثبات….
“الكلام ده مش صح يا أمجد جواد مش مجرم وأنا ظلمته في الأول بس هو أثبت عكس كده و…..”
قاطعها أمجد بصرامة….
“مفيهاش وِ يا بسمة… إنتِ مش صغيرة في اختيار حياتك ولا أنا قادر أرفض رغبتك في الجواز منه ومش هقف أنا ودعاء قدام جوازتك
بس لازم تعرفي إن إحنا مش راضيين عن الجوازة دي وياريت تفكري أكتر من كده في الجواز من الشخص ده للمرة الأخيرة قبل ما ترجعي تندمي…..”
أولته بسمة ظهرها وأغمضت عينيها بقوة وهي ترد عليه بصعوبة….
“أنا مش لسه هفكر يا أمجد أنا مقتنعة بجواد وياريت تحترم قراري…..”
أخرجت ما بصدرها بعذاب حقيقي…..
قالت دعاء باعتراض….
“بس يا بسمة جواد ده مـ…..”
تحدث أمجد بحزم لزوجته….
“خلاص يا دعاء بسمة مش صغيرة وأكيد عارفة مصلحتها فين…..”
استدارت بسمة لهم نظر لها أمجد بعتاب وحزن من إخفاء حقيقة تلك الزيجة المفاجئة عنهم واختلاق تلك الأكاذيب عليهم……
خرجوا من الغرفة وتركوها تجلس على حافة الفراش تفكر في القادم منه بعد تلك الخطوة التي قامت بها…..
………………………………………………………
يجلسون على سفرة العشاء الكبيرة والجميع متجمع عليها واليوم مختلف فقد عاد جواد بعد غياب طال أكثر من أسبوع……
“العشا النهاردة ليه طعم تاني عشان جواد معانا مش كده يا ولاد؟”
قالت أنعام حديثها بلطف وهي تطلع على الجميع الذين هزوا رؤوسهم بإيجاب…..
ابتسمت لميس بمكر وهي تنظر إلى جواد قائلة بنعومة تصيب النفور….
“صحيح الفيلا كانت وحشة أوي من غير الجوكر….. إلا صحيح يا جواد إنت كنت
مسافر فين؟”
نظر جواد لها بطرف عينيه ليرد عليها ببرود..
“باريس سمعتي عنها يا….. يا مرات عمي؟”
اكفهر وجه لميس وهي ترى تقليل كلماته منها. قالت من تحت أسنانها بغيظ….
“أكيد أعرفها سفرتها كتير وكمان لبسي كله
من هناك…..”
رد ببرود مقاطعًا هذا الحديث….
“كويس…..”
نظرت أسيل إلى جواد وابتسمت بعذوبة قائلة بعفوية….
“طب وأنا بقى يا ابن خالي جبتلي إيه حلو من باريس؟”
نظرت لميس إلى أسيل بازدراء…..
ابتسم لها جواد بحنان فأسيل بالنسبة له هي أسماء الثانية قال بلطف….
“أكيد مش ناسيكي يا أسيل هديتك فوق شنطة بحالها فيها كل اللي بتحبيه…..”
اندهشت أسيل وصفقت بحماس….
“أحلى جوكر في الدنيا ربنا يخليك ليا يا رب…..”
عادت للطعام بشهية مفتوحة……
عض سيف على شفته بغيظ
ولا يعرف ما سبب غضبه من شقيقه الذي لم يغضب منه يومًا هل يغار عليها من جواد؟
لماذا؟
فجواد يعاملها بتلك الطريقة منذ الصغر وهو لم يغضب يومًا منه… أم أن الوضع اختلف وأصبحت تعني له الآن أكثر من السابق بمراحل متعددة؟
لكن ما السبب؟!…..
نظر زهران إلى جواد بخبث وتشدق بـ….
“وياترى ناوي تسافر باريس تاني يا ابن أخويا؟”
صوب الجميع أنظارهم إلى جواد بانتظار إجابته…..
رد جواد ببرود المعتاد….
“لا مش هسافر غير مع مراتي…..”
هتفت أنعام بذهول….
“مراتك؟ مراتك مين؟! إنت هتتجوز يا جواد؟!”
“آه وبكرة هروح أتقدم ليها وإنتوا معايا طبعًا…..”
حدج سيف في شقيقه بتعجب….
“أنا أول مرة أسمع منك موضوع الجواز ده
هو أنا أول من يعلم؟”
ربت جواد على كتف شقيقه بتأسف خفي….
“الموضوع جه بسرعة يا سيف وأنا لسه بقول أهو إني هروح أتقدملها وإنت أولهم طبعًا…..”
راقبته لميس الموقف وهي تهتف داخلها بمكر….
“دي حلوة أوي….. بس يا ترى إيه سر الجواز المفاجئ ده؟ ويا ترى هي البت المحامية ولا لأ؟”
سألت أنعام جواد بفضول….
“ومين العروسة يا جواد؟ حد نعرفه؟”
نهض زهران بعد جملة والدته بوجه متجهم وقال بصرامة….
“الجوازة دي تنساها نهائي يا جواد البت دي مش من توبك ولا…..”
نهض جواد مقاطعًا حديثه بحسم وتحدٍّ….
“الجواز هيتم يا زهران بيه والبت دي هتبقى مراتي واسمها بسمة الغمري وهي فعلًا مش من توبي بس إنت عارف ليه…..”
نظر له بتهكم واضح…..
نهض أيضًا سيف لتهدئة هذا الجو المتوتر….
“استنى بس يا عمي جواد ميقصدش….. وإنت يا جواد اسمع من عمي يمكن عمي شايف حاجة إنت مش شايفها…..”
أنهى جواد الحديث بحزم….
“أنا قررت ودي حياتي وأنا حر فيها. اللي عايز ييجي معايا أهلًا وسهلًا واللي مش عايز يقعد جنب زهران بيه يونسـه…..”
قال اسمه باحتقار وترك المكان وذهب بوجه مكفهر……
تابعت أنعام حديثهم الغامض بحزن من علاقة جواد وزهران التي دومًا شبه منعدمة بينهما وحين يأتي الحديث الذي يجمعهما ترى كره حفيدها الكبير لابنها الأصغر والوحيد سراج…..
“في إيه يا زهران؟… ومين البنت دي اللي تخليكم تزاعقوا لبعض بالشكل ده؟”
زفر زهران وهو يترك المكان بانزعاج من بدء أسئلة الجميع له عن تلك الفتاة الغبية التي وضعها جواد في طريقه مدى الحياة بعد هذه الزيجة….
تمتم داخله بشر وهو يصعد على السلالم….
“هقتلها يا جواد من قبل حتى ما تفكر تكمل جوازك منها….. هقتلها…..”
على السفرة نظرت أسيل بعينيها إلى سيف تسأله عن تفسير ما يحدث رد عليها بنظرة حيرة وعدم علم بما يدور حولهم…..
ابتسمت لميس بخبث داخلها….
“دي حلوت أوي لازم عزيز ياخد خبر باللي حصل هنا…..”
……………………………………………………….
يقف في شرفة غرفته ينفث سجارته بضيق يحرق بها نفسه دون رحمة…
نظر إلى الساحة الخضراء بشرود وهو يتذكر حديث أسر صديق المراهقة أو صديق جواد القديم لا الجوكر الحالي…..
((يوم ما جتلي إخبارية إنك معاك مخدرات في شنطتك ما صدقتش وكدبت الإخبارية….. لكن روحت وقبضت عليك والإخبارية طلعت صح…..
لكن الغريبة إن الحكم عليك كان مؤبد بس بعد خمس سنين جه اللي شال القضية مكانك وطلعك منها مظلوم….. يا ترى كان هدف عمك إيه من ده كله؟!))
ظل ينفث في سجارته بغضب فأحاديث أسر تثير الشك في عمه…
هل فعلًا هو من اختار له طريقه؟
وهو من دفعه لعالم الإجرام؟
هو من جعل قلبه بلا رحمة والدماء أصبحت الأقرب إليه من الهواء؟
وهل أصبح هكذا من فراغ؟
هل هو من اختار الموت في كل دقيقة يعيشها؟
لماذا يفكر الآن في الماضي والمستقبل من أجل صاحبة العيون العسلية…
يفكر؟!
لا بسمة لها وقت في حياته وستخرج ولن يسمح لنفسه بالوقوع للحظة واحدة أمام تلك المشاعر الخائنة……
أغمض عينيه بضيق ودلف إلى غرفته ليغير ثيابه واستلقى بعدها على الفراش بتعب واضح…
تقلب بجسده يمينًا ويسارًا على الفراش الوثير ولكن دون فائدة فقد جافاه النوم…..
زفر بضيق وهو يلتقط هاتفه من على المنضدة ويعبث فيه بملل… وجد يده تتكئ على زر الاتصال على رقم باسمها……
على الناحية الأخرى كانت تجلس على الفراش وتضم ركبتها إلى صدرها وتسند مرفقيها عليهما وتنظر إلى نقطة معينة بشرود حزين…..
صدح صوت هاتف ما برنين غريب…
نهضت ببطء تراقب تتابع رنين الصوت فهي لا تمتلك شريحة في هاتفها والهاتف الخاص بها مغلق وموضوع على سطح المنضدة بجانبها…..
اتجهت إلى الحقيبة التي أرسلها جواد لها مع أطفال الحارة… فتحت الحقيبة الكبيرة لتجد هاتفًا ذا ماركة مشهورة أضاءت شاشته باسم
((جواد الغمري))
حاولت السيطرة على ذهولها من أفعاله غير المتوقعة… فتحت الخط بعد الرنة الثانية…..
“ألو…..”
قال جواد عبر الهاتف بضيق….
“ساعة عشان تردي…..”
قالت بتلعثم….
“أصل اا….. إنت عايز إيه وبتـرن ليه عليا؟…..”
“عملتي إيه مع أهلك في موضوع جوازنا؟”
ردت بإيجاز حتى تنهي المكالمة سريعًا….
“زي ما اتفقنا وكمان بلغتهم إنك جاي بكرة….”
“كويس..وأنا هاجي أتقدملك رسمي بكرة…..”
زفرت بسمة بضيق وهي تحاول إنهاء المكالمة….
“تمام….. أنا هقفل بقى عشان عايزة أنام…..”
“بسمة أنا مخنوق خليكي على الخط شوية…..”
قالها وهو يغمض عينيه بقوة فالماضي يلاحقه بعنغ وفقدان عائلته ومستقبله يمر أمامه كالسيناريو قاتم لا يرحم…
وصوته الضعيف اليائس يحكي عن صدق كلماته لها…..
ارتجف جسدها وخفق قلبها لتحاول السيطرة على فرط مشاعرها وهي تسأله بهدوء….
“مالك يا جواد؟ إيه اللي حصل معاك؟”
رد عليها بنبرة ثابتة وشبه حزينة….
“مش عايز أتكلم خليكي معايا على الخط وبس…..”
عضت على شفتيها وهي تسأله ببراءة….
“طب المفروض أهَوِّن عليك إزاي؟”
“بأنفاسك…..”
فغرت شفتيها بعدم فهم….
“هاا؟”
“عاوز أحس إنك موجودة معايا وخلاص ومش لازم تتكلمي…..”
هزت رأسها بعدم فهم….
“أنا مش فاهمة حاجة…..”
“هششششش….. اسكتي…..”
كانت أنفاسها غير المنتظمة متوترة تريح قلبه. أغمض عينيه وهو يضع الهاتف على أذنه. هل وجودها يعني الراحة له؟
وهل أنفاسها تمحو من عقله وقلبه الغوص في الماضي؟
لا يعلم ولكن بسمة لها على الجوكر سحر خالص ولن أحرركِ حكاية من نوع آخر…
•تابع الفصل التالي “رواية لن احررك” اضغط على اسم الرواية