رواية رواسي الدهر الفصل الثالث عشر 13 – بقلم روح الدليمي
➰➰➰➰➰➰➰➰➰➰➰
كمت من مكاني و عطت بخوف..
رواسي:احجييي بنتي بيها شييي؟؟
_لا لا ردت انطيكم خبر انو بنتج تحسنت و تكدرون تجون تاخذوها
تنسفت ب ارتياح و حجيت..
رواسي:هسه جايه ما اتأخر
سديتها من عدها و اتصلت على غسان..
غسان:هلا رواسي
رواسي:وين رسيم؟؟
غسان:بعده نايم ليش؟
حجيت بفرح..
رواسي:بنتي تحسنت هسه خابروني من المستشفى، يردوني اروح اخذها
غسان:يارب الف الحمدلله، تردين اجي اخذج اني؟
رواسي:لا هسه اشوف محمد اذا موجود
غسان:لا قبل شوي اجه هسه اجيج اني
رواسي:تمام انتظرك
سديته من عنده و الفرحه غامرتني و اخيراً راح
اكدر اخذ بنتي بحضني و ابوسها.. انطيها حبي و حناني
و اداريها..
بدلت ملابسي بسرعه و طلعتلها ملابس الها و نزلت جوه.. لكيت البنات بالمطبخ يسون ريوك… رحت يمهن و حجيت بفرحه واضحه..
رواسي:بنااات بنتي تحسنتتت راح اروح اجيبها
رشا:يا الله الف الحمدلله
عذراء:الف الحمدلله حَبيبتي ربي يحفظها الكم
دخلت هيا للمطبخ و گالت ..
هيا:خير يا صباح خير شبيج تكمزين
رواسي:رسيم راح يذبحج و فرحانه حيل
هيا:شو حيل مصدكه روحج لججج رسيم يموت عليه خاف متعرفين
رواسي:اي صحيح اصلاً البارحه الليل كله يحجي وياج و يتغزل بيج و كلج راح اطلك رواسي و اطيح حظها
هيا:شكد متستحين تتسمعين علينه؟
ضحكت مستهزئه و عفتها واكفه و طلعت من المطبخ
دك عليه غسان رفضته و طلعتله بَره..
رأساً حرك و اتجه بينه للمستشفى نزلت من السياره
اركض ردت اوكع الا شوي.. صعدت للطابق الي بي الخدج و حجيت ويه الممرضه الموجوده
رواسي:الصبح خابرتوني علمود بنتي هيا رسيم
_اي هسه الدكتور يمها ديفحصها و بعدين تكدرون تاخذوها
باوعت لغسان و كتله..
رواسي:اريد اغير اسمها كوللهم
غسان:عفواً اختي بس نريد نغير اسم الطفله اذا بيها مجال
_اي هسه اجهزلكم اوراقها و بالبيان تحطون اسمها
تشكر منها و رحنه ننتظر، وكفت اباوع عليها من الجامه
و الدكتور شلون يفحص بيها.. شوي و طلع گال
_الحمدلله على سلامتها
رواسي:اكدر اخذها؟
_اي بس كملوا اوراقها و تكدرون تاخذوها وياكم
راح غسان يكمل الاوراق و اني انطيتهم ملابسها يبدلولها
شوي و جابوها الي رجفت ايدي مجرد ما اخذتها بحضني و دموعي نزلت حب و فرح..
قربت شفايفي على خدودها و طبعت بوسه هادئه
و همست..
رواسي:نورتي حياتي مسوكه ماما
اجه يمي غسان باوعلها و عيونه متجمعه بيها الدموع
و گال..
غسان:الحمدلله على سلامتها ربي يحفظها الكم
رواسي:يوم الي تشيل طفلك بحضنك و نفرح بيكم
غسان:الله يسمع منج
كمل البيان مال ولاده مالتها و غير الاسم
سميتها “مسك”.. صعدنا بالسياره ديرجعني للبيت
دك تلفوني باوعت “محمد” و انوب كامره عرفته رسيم
جاوبته گال..
رسيم:طلعتوها؟
رواسي:اي هياتها شوفها
وجهت الكامره عليها اباوع عليه شلون ملامحه تغيرت
كلها و عيونه تجمع بيها الدموع.. گال..
رسيم:جيبيها اريد اخذها بحضني
رواسي:لا مستحيل طفله بعدها من تطلع للبيت تشوفها
صار يغلط على الدكتور و گال
رسيم:ابن الخوش مره ميقبل يطلعني طككك گلبي عليها روسيه
رواسي:باجر تطلع تحمل بس هاليوم
اندكت باب الغرفه يمه و دخلوا زلم مبين
مجموعه لان اصوات هوايه صارت.. باوعلي و گال
رسيم:بعدين اخابر ديروا بالكم عليها
سده مني قبل لا اجاوبه التفتت على غسان و گلت..
رواسي:غسان ممكن سؤال؟
غسان:گولي
رواسي:رسيم شنو يشتغل؟
غسان:عنده مكتب عقارات
رفعت حاجبي مستغربه و حجيت..
رواسي:لعد ليش ابويه گال شغله خطر؟ وين الخطوره بالموضوع؟
باوعلي و رجع دار وجهه على الطريق و گال..
غسان:اذا يعرف حجيت يذبحني اني هم والله
رواسي:مافيا؟؟؟
هز راسه و بقه ساكت.. عطت بي..
رواسي:شلووون يعنييي؟!!! فهمني!!
غسان:مو مافيا بالضبط بس هيج شي يعني
غمضت عيوني اريد استوعب سحبت نفس و زفرته بهدوء و حجيت..
رواسي:احجي غسان اجر الحجايه منك جر ! يعني هوَ يتشغل وياهم؟
غسان:وياهم وضدهم ما اكدر احجي اكثر
فتحت عيوني مصدومه و گلت..
رواسي:بسلااا..
قاطعني و گال…
غسان:اي اي، بس ديري بالج تحجين محد يعرف بالموضوع غير اني و محمد و هسه أنتِ و ابوج هم طلع يعرف
رواسي:لعد شلوون نسجن؟؟
غسان:ما انسجن بس حققوا وياه و لما عرفوا شغله شنو طلعوا
هزيت راسي و بقيت ساكته.. ليش ما حجالي يعني؟
متزوجه شخص كلشي ما اعرف عن حياته
حرفياً ما اعرف اي شي..
وصلنا للبيت نزلت و هوَ راح، بحضني مسك غطيت وجهها بيدي احجب عنها الشمس.. دكيت الباب
فتحتلي هيا دفعتها و دخلت للبيت
استقبلوني البنات بالهلاهل و اجو يركضون
يردون يشوفوها.. اخذتها من ايدي رشا و گالت ..
رشا:اللهم صلِ على محمد، تخبل رواسي ما شاء الله عليها الله يحفظها الج
انطتها لعذراء باستها شمت ريحتها و گالت ..
عذراء:ادعيلنه الله يرزقنا بالذريه، ربي يحفظها الكم حَبيبتي و يفرحكم بيها
رواسي:يارب ميخلص هالشهر الا و ثنينجن حوامل و نفرح بيكم و بجهالكم
ثنينهن كالن بصوت واحد..
_امييين
انطتني ياها اخذتها و كعدت و حجيت..
رواسي:شلووون نسوه هاي
عذراء:شنو نسيتي
رواسي:نسيت اجيبلها حليب و مميات ماعدها!
رشا:هسه اروح اجيبلج و اجي ما اتأخر
كامت من مكانها صعدت فوك شوي و نزلت لابسه
عبايتها و شالها راحت هيَ و اني اخذت مسك و گلت..
رواسي:راح اخذها انومها بمكانها و اجي
عذراء:روحي حبي اخذي راحتج
باوعت حواليه و گلت..
رواسي:لعد الحيه وينها؟ فتحتلي الباب و اختفت
ضحكت و گالت ..
عذراء:صعدت فوك معصبه و مشتعله من الغيره
رواسي:بس خلي تكفيني شرها كلشي ما اريد منها
صعدت فوك دخلت لغرفتي ردت احط مسك بفراشها
و شفت شي اصفر مرشوش على الفراش مالتها
تراجعت ليوره و حضنتها بقوه على صدري
ردت اخليها على جربايتنه و نفس الشي صاير
بفراشي.. ردت اطلع من الغرفه بس استوقفني
مي معبي الارضيه كلها يم الجربايه..
باوعت للكاع و تصرگعت لما شفت دم بالگاع..
عطت بصوت عالي على اثر عيطتي مسك صارت تبجي
و تصرخ هيَ هم.. اجت عذراء تركض و تصنمت بمكانها لما شافت حال الغرفه..
و عاطت بخوف..
عذراء:هاااييي شنووو يممهههه
تقربت عليه اخذت مني مسك تسكت بيها، جمدت بمكاني بعد ما بيه اتحرك او اخطي اي خطوه..
رفعت عيوني على الباب شفت هيا واكفه و تبتسم بخبث
عطت بيها..
رواسي:ياااا قندرهههه شسوييييتييي!!
عدلت ملامح وجهها لما عذراء التفتت عليها
و گالت و هيَ تتصنع البراءه
هيا:ما سويت شي اني، هاي شصاير بالغرفه
هجمت عليها ضربتها ملختها تملخ و هيَ تعيط
و تستنجد تريد احد يوخرني عنها.. سحبتها من شعرها
و دفعتها بالگاع وكعت على الدم الموجود و عطت بيها..
رواسي:***** شسويتييييي بالغرفه شنووو حطيتي بيهاااا احجيي!!
ضحكت بطريقه مستفزه و گالت ..
هيا:الطريقه الوحيده الي تخلي رسيم يعوفج و يرجعلي
دفرتها برجلي على بطنها و رجعت اضرب بيها
انفتح باب الغرفه و دخل محمد سحبني منها و عاط بينه..
محمد:شبييكمممم تخبلتووووا
رواسي:شوووف حااال الغرفه كلههه منها هيَ مسويه هيج
هيا:جذاااابه لتصدكهااا تريد تبليني
التفت الها و گال بهدوء..
محمد:سمعت كلشي بس الي تحجي بيجن حرف واحد و حققق الله اطيح حظها
رواسي:شلوووون تريدني اسككتتت و هيَ مسويه سحر ما اعرف شنو الي و لرسيم
محمد:رسيم تعبان و ما بي حيل هاي السوالف، يصير زين و اني بيدي اخذلج حقج منها
اندار على هيا عاط بيها..
محمد:تمشيييين كدامي تفوتين غرفتج اذا اشوفج طالعه منها ارجعجج للمزبله الي جنتي بيها فاااهمهه لو لا!!
كامت من مكانها و طلعت بسرعه من الغرفه
تبجي.. راسي انسطر ردت اكعد على الجربايه
سحبني محمد من ايدي و گال..
محمد:لتكعدين و لتطخين شي ديري بالج
رواسي:ليش؟
محمد:اذا سحر ف بس تكعدين او تنامين بالفراش يبلش مفعوله عليكم، انتظري اغيرلكم كلشي
شال تلفونه اتصل على شخص و طلع يحجي وياه
بَره، دخلت للحمام غسلت وجهي و طلعت نزلت جوه
لكيت البنات كاعدات و علامات التوتر واضحه عليهم..
رشا شايله مسك و ترضع بيها
كعدت يمهم و حطيت ايدي على راسي اضغط
عليه بقوه.. عذراء گالت ..
عذراء:رواسي انصحج تروحين لبيت اهلج، علما يتحسن رسيم
وخرت ايدي عن راسي و گلت..
رواسي:مستحيل وعدت رسيم اني ما اخلف بوعدي اله
مر اليوم بتوتر و هوسه.. محمد جاب عمال شالو اخشاب الغرفه كامله.. و بنفس اليوم بليل جابو غرفه جديده
من اختياري، دزلي صور هوايه و اختاريت وحده
شدوها كلها و مشتري سرير جديد لمسك و فراش جديد
بقينه اني و البنات ننظف و نرتب بالغرفه لوقت متأخر..
من التعب نومت مسكه و رأساً نمت.. كعدت الصبح
على صوت مسك تبجي اخذتها بحضني بستها و همست..
رواسي:صباح الخير مسوكتي الحلوه، تعالي ابدلج
بابا اليوم يجي
نومتها على الجربايه بهدوء و كمت طلعتلها ملابس
و بدلتلها و سويتلها ممه شربتها و نامت.. كمت من مكاني فتت سبحت و بدلت.. و نزلت جوه
رواسي:گود مورننگ گيرلز
رشا:صباح الخير تعالي تريكي
رواسي:لا تأخرت اني لازم اروح، بس مسك شلون بيها؟
عذراء:شنو احنه مو بعينج يعني؟
رواسي:بنص عيني والله بس اخاف من هيا خاف تسويلها شي، شفتوا البارحه شسوت
رشا:محمد موجود و اصلاً قفل عليها باب الغرفه حتى متطلع منها، روحي لشغلج أنتِ
رواسي:عينكم عليها فدوه و غرفتي قفلتها هذا المفتاح
انطيت مفتاح الغرفه لرشا و اردفت..
رواسي:اذا بجت حليبها و كلشي بالغرفه، ميجي من گلبي اعوفها بس اريد اخلص ما بقه شي و اخلص
عذراء:روحي حَبيبتي و ليظل بالج احنه يمها، اهتمي بدراستج و شغلج و معليج بالباقي
رحت عليهن بستهن و حضنتهن ثنينهن سوه و گلت
رواسي:اني ماعندي اخوان و لا خوات و احس ربي عوضني بيكم
رشا:بلا مشاعر يلا روحي راح تتأخرين
طلعت من البيت لكيت محمد گاعد بالسياره ينتظرني
رحت يمه فتح الجامه و گال..
محمد:اصعدي اني اوصلج
صعدت و اخذني للمستشفى و رجع للبيت، رحت بصمت
و بدلت ملابسي لبست سكارب و طلعت
رحت لغرفه رسيم دكيت الباب و دخلت..
غسان:جيتي و جابج الله تعالي شوفي خبصني يريدج
رحت يمه بسته من راسه گال..
رسيم:وينج تأخرتي؟
رواسي:هستوني اجيت
باوع عليه و گال بعصبيه..
رسيم:شلابسه رواسييي؟؟
باوعت على ملابسي و حجيت..
رواسي:سكارب شبي؟
رسيم:روحي لبسي غير شي لو لبسي الروب فوكاه
رواسي:حاااره رسيم
رسيم:نار جهنم احر حَبيبتي ستري روحج
رواسي:تشتعل بنار جهنم يارب
خزرني و نترر بيه..
رسيم:اريد اعرف نهايتج شنو ويه الغلط؟؟
رواسي:والله مو عليك اقصد هيا النذله، اذا أنتَ تروح لجهنم لعد اني منو يكون ويايه بالجنه؟
رسيم:لا واثقه كلش
رواسي:بس لا أنتَ خليك بجهنم احسن بالجنه اكو حوريات و اني اغار عليك
رسيم:حسستيني عزرائل واكف يريد يقبض روحي
ضكت و التفتت على غسان گلت..
رواسي:گال الدكتور شوكت يطلع؟
غسان:سواله تحاليل و فحوصات بس تطلع النتيجه يطلع
رواسي:تمام اني اروح لشغلي و هم احجي ويه الدكتور
بلكي يعفيني من المناوبات
رسيم:شوفي شغلج حَبيبتي حتى لو عندج مناوبه ابقي
رواسي:لا ما اكدر مسكه يم البنات عفتها
رسيم:كلها كم شهر و تخلصين خلصيهن و بعدين اهتمي بيها البنات ميقصرون بغيابج
رواسي:ما اعرف اشوف وضعي شنو
طلعت من غرفه رسيم و رحت لبست روب
فوك ملابسي و رحت لغرفه الدكتور المسؤول علينه
دكيت الباب و دخلت..
_هلا رواسي تعالي
كعدت على الكرسي مقابيله و حجيت..
رواسي:دكتور تعرف وضعي شنو، و بنتي البارحه طلعتها من المستشفى و تحتاج رعايه
_المطلوب؟
رواسي:ما اريد اداوم مناوبه اذا ممكن
باوعلي بنظرات ماعرف افسرها بس واضح
نظراته تنظرلي بقذاره.. كام من مكانه اجه يمي مد ايده
على شعري.. كمت مذعوره من مكاني و عطت بخوف..
رواسي:لتطخنننييييي وخررر
_شبيج خلينه نتونس و محد يعرف و اعفيج من كامل المناوبات
رواسي:ننذلللل حيواااان اذا تخطيي خطوه وحده تجاهي
اطيح حظك ادبسز
ضحك بطريقه مقرفه و گال..
_شبيج هواي غيرج سويت وياهن نفس الشي
عطت بصوت عالي لما تقرب و خطه ب اتجاهي
انفتح الباب بقوه و دخل دِلهَام.. باوعلي و گال متسائل
دِلهَام:شبيج رواسي
رواسي:اطيح حظك اصبرلي الا اشتكي عليك
دِلهَام:سوالججج شيي؟؟ احجي رواسي
هزيت راسي “لا” و طلعت من الغرفه ارجف
طلعت تلفوني من جيبي و اتصلت على ابويه..
جاوبني بجيت و حجيت بخوف..
رواسي:بابا تعال اخذني مناا
جاوبني بقلق..
راشد:شبيج رواسي رسيم سوالج شي؟؟؟
رواسي:تعال بسرعه اخذني منااا فدوه
راشد:جاييجج وين أنتِ
رواسي:بالمستشفى
سده من عندي اخذت اغراضي و طلعت
انتظره بَره… اجه دِلهَام يمي حط ايده على كتفي
فزيت و تراجعت ليوره، رفع ايده و گال بهدوء
دِلهَام:اهدي و احجيلي شسوالج
رواسي:ما سوه شي
دِلهَام:لعد ليش جنت تعيطين و واكفه بزاويه غرفته؟
رواسي:عوفني دِلهَام ما اريد احجي
ابتعدت عنه و بقيت انتظر ابويه عشر دقايق تقريباً
و صارت سيارته كدامي، ركضت عليه و صعدت بالسياره اخذني بحضنه و صرت ابجي
و هوَ يحاول يهديني يريد يفهم، بالكوه هديت و حجيتله الي صار حرك سيارته و گال
راشد:هينه يصير خير، هسه نروح نشتكي عليه
رواسي:النذل ابن القندره شايب رجله بالكبر و يدور هيج سوالف
راشد:اهدي حَبيبتي، للاسف اكو هوايه مثله و ما لاگين الي يوكفهم …
اخذني للمركز نزلنا من السياره اخذ ايدي بيده، سأل على اسم واحد من الضباط يصير صديقه، خلونه ننتظر شوي و بعدين دخلنا سلم على ابويه و كعدنا
ابويه صار يحجيله كلشي حجيته، باوعلي و گال
_تعالي وقعي و هسه ادز دوريه تشحطه من داخل المستشفى
كمت وقعت اخذ الاوراق و طلع.. شوي و رجع گال
_تكدرون تروحون احنه نشوف شغلنه
اخذ ايدي بيده و طلعنا صعدنا السياره باوعتله وحجيت..
رواسي:رجعني للمستشفى
راشد:رواااسي دوام بالمستشفى ماكو بعد فهمتي لو لا؟
رواسي:اني شعليه!
راشد:اخاف عليج بنتي
رواسي:لتخاف عليه، اريد اشوف منظره من ينشحط كدام الدكاتره و المراجعين
اخذني للمستشفى و نزل ويايه دقايق بس و وصلت الدوريه و دخلوا يسئلون على الدكتور، وكفتني وحده من الممرضات و سئلتني..
_شنو السالفه؟
رواسي:واحد متحرش و نذل يستحق السجن
وسعت عيونها مصدومه و حطت ايدها على حلكها و گالت بهمس..
_ أنتِ هم تحارش بيج؟؟
درت وجهي عليها و حجيت..
رواسي:لازم شكو بنيه متحارش بيها تشتكي عليه حتى يطيحون حظه
_اني راد ياخذ شرفي هل بلا شرف
سحبتها من ايدها و گلت
رواسي:هسه تجين تحجين كلشي للضابط ممنوع تسكتين
هزت راسها و مشينه سوه ب اتجاه الضابط
وكفنه كدامه و گالت ..
_سيدي اني هم اريد اشتكي، مو بس اني هوايه بنات مسوي بيهن نفس الفعله الخايسه
البنات شوي شوي صاروا يتجمعون يمنه و كل وحده
صارت تحجي للضابط شنو سوالها اخذوا افادتهم بالمستشفى علمود ميروحون للمركز و طلعو من غرفته
يشحطون بي، وكفت كدامه و ضربته بكل قوتي على وجهه و تفلت عليه و حجيت بقرف..
رواسي:يااا متحرشش يا خايسس، خيس بالسجن ولو أنتَ تستحق اعدام على عمايلك القذره
_اندمججج رواسييي والله اندمجج
ضربه الضابط و اشرلهم ياخذوا، شحطوا شحط و طلعوا
من المستشفى.. كل وحده بيهم رجعت لشغلها و اني كذلك.. رحت شفت تحاليل رسيم طالعات
اخذتهن لدِلهَام و دخلنا لغرفه رسيم..
فتح ملف التحاليل و صار يدقق بيهن، رفع عيونه
على رسيم و گال..
دِلهَام:وضعك الصحي كلش زين و ماكو اي ضرر داخلي
الحمدلله على سلامتك.. تكدرون تكملون اوراق الخروج
و تطلعون
رسيم:الله يسلمك دكتور
باوعلي دِلهَام و گال..
دِلهَام:رواسي شيلي الكانونه و ضمديله جرحه و تعالي عدنا عمليه
رواسي:اني ادخل عمليه؟
دِلهَام:اي، تقييم الج استعجلي و لتتأخرين
ترخص و طلع، طلعت وراه جبت العده كامله
من ضماد و لاصق و غيرها.. و دخلت للغرفه طبكت الباب برجلي و رحت يم رسيم
يباوعلي و نظراته واضحه بيها الغيره.. ابتسمتله و حجيت بهدوء..
رواسي:الحمدلله على سلامتك حَبيبي
رسيم:الله يسلمج بابا
رواسي:لتكول بابا تحسسني واحد شايب ويحجي ويايه
رسيم:أنتِ بنتي
رواسي:لا اني بنت راشد مو بنتك
مديت ايدي على ايده شلت الكانونه و بقيت ضاغطه
عليها لحد ما وكف الدم، رفعت التيشيرت مالته
و فتحت الضماد عقمت الجرح و ضمدته من جديد
رواسي:خلصت اني تكدرون تروحون
رسيم:و أنتِ؟
رواسي:ما سمعت الدكتور شكال؟ عنده عمليه و لازم ادخل اني
رسيم:تعوفيني لهيا؟
رواسي:قندره عليها هل سزز هاي ام السحوره
رفع حاجبه مستغرب و گال
رسيم:شسوت؟؟
رواسي:ما سوت شي بس لقب جديد يلوكلها هل حيه
بقه ساكت و يباوعلي بشك.. ما ردت احجيله مثل ما طلب محمد و بقيت ساكته و بلعتها.. دخل غسان بيده اوراق و گال..
غسان:كملت كلشي نكدر نروح
رسيم:يلا كرهت روحي هنا
راح عليه ساعده يكوم و اني اخذت الاغراض و طلعت بَره، جهزت روحي للعمليه و دخلنا اني و زملائي
ويه دِلهَام.. برغم هوَ بعده شاب و واضح مصارله هوايه متخرج بس فهمان كلش و يشتغل بضمير..
كملنا العمليه بخير و طلعنا.. كملت كلشي و خلص دوامي
بدلت ملابسي و طلعت بعد ما خابرني محمد بلغني هوَ بَره.. صعدت بالسياره هلكانه اريد بس احط راسي و انام
يوم عن يوم يزيدون علينه بالتعب و ضغط الشغل و المرضى اشكال الوان… وصلنا البيت طبك سيارته بالگراج و فتح باب البيت و دخلنا..
طلعت هيا من المطبخ بيدها صينيه و مشت ب اتجاه
الدرج، عاط بيها محمد بصوت عالي..
محمد:تعاليييي وين رايحه؟؟؟
هيا:اخذ اكل لرسيم
محمد:رجعي منين ما اجيتي بسرعه يلا
هيا:بس هوَ ..
قاطعها و رجع عاط بيها..
محمد:گتلج رجعي لمكانج يلا
رحت للمطبخ كعدت افتش وراها شفت طوز مرشوش على الكاونتر مسحته بيدي و طلعت من المطبخ
رحت على محمد و حجيت..
رواسي:شوووف اكيد حاطتله شي بالاكل
مديتله ايدي صار يباوع عليها مصدوم من عمايلها
بدون خوف من اي شخص و لا تخاف من ربها…
رحت عليها ضربتها و گلبت صينيه الاكل بالگاع..
نزلت روحي شلت من الاكل بالخاشوكه و كمت عليها
عصرت فكها بقوه و عطت بيها…
رواسي:اكلييي يلاااا
هيا:عوفيني ولججج وخريييي
دخلت الخاشوكه بحلكها گوه و حجيت بتهديد..
رواسي:اكليييي الاكل يلااا اذا مترديني اگول لرسيم على عمايلج و اخلي يطلكج
صارت تبجي و ركضت للحمام، الحيوانه بعدها
بكد القندره و تطلع منها هيج سوالف لو تكبر اكثر شتسوي؟؟
محمد صعد كدامي و راح لرسيم.. رجعت للمطبخ اخذت
مكناسه و وصله لميت الاكل و الكزاز و مسحت الگاع
و رحت كعدت بالمطبخ..
حطيت راسي على الميز راح اتخبل بسببها هيَ و رسيم
الي ما اعرف شوكت يطلكها و يخلصنا منها.. اجت رشا يمي گالت..
رشا:دتشكيج لرسيم
رواسي:قندره عليها و على رسيم اذا يصدكها
ضحكت و كعدت يمي..
رشا:شنو ناويه تسوين؟
رواسي:ما اعرف راسي راح ينفجر
رشا:ابد مجانت هيج من شافتج تخبلت
رواسي:هوَ يا هو الي يشوفني يتخبل اول شي رسيم و هسه مرته الادبسز
كمت من مكاني و صعدت فوك وكفت يم الباب
لما سمعت صوتها تبجي جوه و تكول..
هيا:ترضاها عليه رسيم؟ مرتك الحقيره ضربتني و تهددني تخليك تطلكني شسويتلها اني
رسيم:لا ما ارضاها هسه تجي و اطيحلج حظها لتبجين
دخلت للغرفه بس شافتني طلعت تركض عود مظلومه سوده عليه، فتحت الكنتور طلعتلي ملابس و بدلت
رحت وكفت كدام المرايا امسح مكياجي رفعت عيوني على رسيم عيونه تتابعني بكل تركيز.. اشرلي اروح يمه و گال..
رسيم:تعالي روسيه
مسحت وجهي كله و اخذت كلينكس مرطب بيدي
كعدت على طرف الجربايه امسح اخر شي خاف باقي مكياج.. مد ايده تجاهي و گال
رسيم:تعالي هنا حَبيبتي
رحت تمددت يمه سحبني لحضنه رفعت وجهي
اباوع عليه، قرب وجهه من وجهي و طبع بوسه
على شفايفي و گال..
رسيم:عايفتني وحدي روسيتي
رواسي:عندك غيري تهتم بيك
رسيم:بس اني ما اريد غيرج
رواسي:اممم، لعد منو يكول لهيا اطيح حظها بس تجي
و خليتها تشوف نفسها عليه؟؟؟
رسيم:ولجج طفله عوفيها متعرف تتصرف
رواسي:والله محد غيرنا الاطفال
بعدت روحي عنه و كمت اريد اطلع گال..
رسيم:جيبيلي مسكه بعدني ما شفتها
هزيتله راسي و طلعت من الغرفه، رحت لغرفه غسان
دكيت الباب گال..
غسان:تفضل
فتحت الباب مديت راسي و گلت..
رواسي:اجيت اخذ مسك لرسيم
عدل كعدته و گال
غسان:اي تعالي اخذيها
نزلت راسي و دخلت للغرفه شلت مسك و طلعت
و سديت الباب ورايه.. اخذتها لرسيم بس شافها
عدل كعدته و عقج و جهه متألم اخذتها خليتها بحضنه
قربها عليه اكثر و صار يبوس بيها و دموعه نزلت..
من شفت لهفته عليها تراجعت عن خطتي الي جنت
مخططتها، ما اكدر ابعده عنها و لا ابعدها عن ابوها
جنت مقرره بس اجيب اخذ بنتي و اسافر و اترك رسيم
لان ما اكدر اكمل وياه… بس شكلها الحياه تريد تغير مسار خططي..
تمددت بجهتي اخذتها من رسيم حطيتها بنصنه
دار وجهه يباوع عليها و گال..
رسيم:بصراحه يعني ما توقعت راح اكدر احبها او اتقبلها
رواسي:ليش؟
رسيم:ما احب الاطفال بس هسه تغير كلشي
رواسي:بنتك هاي شي اكيد راح تحبها
رفع عيونه يباوعلي و گال بهدوء..
رسيم:خايف عليكم رواسي
حجيت مستغربه..
رواسي:من شنو خايف؟
رسيم:اني شغلي كله ويه العصابات و المافيات كله خطر عليكم
عدلت كعدتي و صرنه وجه بوجه اخذت ايده
بيدي و حجيت بهدوء
رواسي:شنو شغلك أنتَ؟ ليش ما اعرف كلشي عنك؟
رسيم:شغلي خطر والله لو بيدي اعوفه بس ما اكدر
مجرد ما اعوف شغلي يصفوني اني و اهلي
رواسي:شنو شغلك بالضبط احجيلي !
رسيم:محد يعرف بشغلي و أنتِ هم لتعرفين احسن
شلت مسك من يمنه حطيتها بفراشها، و رجعت تمددت
بدون ما احجي او انطق اي حرف زايد..
مر كم يوم و وضع رسيم تحسن شوي و صار يكدر يتحرك براحته بدون ما احد بينه يسنده.. اني يومي
عباره عن مستشفى و رسيم و مسك.. و كم عركه ويه هيا الحيه..
بيوم رجعت من المناوبه هلكانه اريد بس انام، دخلت للبيت و فتت للمطبخ رشا واكفه تسوي الاكل و عذراء تسوي سلطه.. فركت عيوني الي بالگوه فاتحتهن و حجيت..
رواسي:شلونكم؟
عذراء:الله يساعدج حبي تعاي كعدي الاكل جاهز
بس نصب
رواسي:شنو الاكل؟
رشا:سويت مقلوبه تمووت من اللذاذه
رواسي:اريد انام تعبانه كلش من اكعد اكل بس عادي تبقون مسك يمكم لحد ما اكعد؟
عذراء:روحي ارتاحي احنه يمها
طلعت من المطبخ و صعدت فوك، اجت عيني على
غرفه هيا مفتوح بابها و صوت رسيم يمها.. تجاهلتهم
و دخلت لغرفتي تعبانه بس اكعد اطيح حظهم
فتت تمددت بالفراش بدون حتى ما ابدل و رأساً
نمت من التعب… حسيت بوقت متأخر كلش فتحت عيوني
و صفنت اريد استوعب اني وين و شصار و شوكت نمت
اخذت تلفوني باوعت للساعه “٢” بليل، كمت من مكاني
و طلعت من الغرفه نزلت جوه على كيفي… البيت هدوء الكل نايمين.. دورت لرسيم ما لكيته
رجعت صعدت فوك و فتحت باب غرفه هيا على كيفي
انصدمت بيهم لما شفتها نايمه بحضن رسيم و مسك يمهم على الجربايه…
يتبع…
- يتبع الفصل التالي اضغط على (رواية رواسي الدهر) اسم الرواية