رواية رواسي الدهر الفصل الثاني عشر 12 – بقلم روح الدليمي
➰➰➰➰➰➰➰➰➰➰➰
بقيت اباوع بوجوههم كلهم امي تصرخ بخوف
ابويه واكف مصدوم، باوعت لرسيم و واگع بالگاع…
و الدم يجري من عنده..
صخاام بوجهج رواسي شسويتييي أنتِ!!!
دفعني ابويه من مكاني و نزل روحه على رسيم
يحاول يصحي.. امي اجت عليه تتفحص بيه تشوفني تأذيت او لا.. بعدتها عني و حجيت بتوتر و خوف..
رواسي:مااات؟؟ بااااباااا رسيييم ماااات؟؟
گال ب استعجال..
راشد:لا عايش بي نبض، تعاي ابقي ضاغطه على
الجرح بسرعهه
تقدمت كعدت يم رسيم سحبت شال امي من راسها
و صرت اضغط بي بكل قوتي حتى يوكف النزيف
بقيت اباوع عليه و حجيت..
رواسي:هاي ثاني طلقه تجيك مني رسيم، شنو تسوي بيه بعد ما الومك..
ابويه شايل تلفونه و يتصل ما اعرف على منو
بس واضح انو محد يرد عليه، رجع عليه و گال..
راشد:خابريييي اخوانهههه بسرعههه
باوعت حواليه متوتره و خايفه.. گلبي ينبض بقوه
اذا يصير بي شي كل حياتي تتدمر!!
حجيت بخوف و توتر..
رواسي:ت ت تلفوننييي وينههه
امي طلعت تلفوني و انطتني ياه، بقيت ضاغطه
على بطن رسيم بمكان الطلقه و بالايد الثانيه خابرت على غسان.. رأساً رد عليه و حجيت منهاره..
رواسي:تعال فدوه راح يموووت
جاوبني بخوف و تساؤل..
غسان:منوو وين أنتِ رواسي؟؟ رسيم وينه؟؟؟
رواسي:ببيت اهلي راح ناخذه للمستشفى تعالو هناك
شمرت التلفون بعيد عني و باوعت لرسيم، يفتح بعيونه
و يغمضها.. طبطبت على وجهه و حجيت بخوف..
رواسي:رسيممم حَبيبي تسمعني باوع عليه، افتححح عيونكك لتمووتتت رسيمممم.. اني لازم امووت مو أنتَ
اندك باب بيتنه بقوه ركض ابويه فتح الباب
و اجه عمي و ولده و من ضمنهم ادم.. بسرعه تعاونوا شالو رسيم و حطو بالسياره و اخذو
طلعت وراهم اركض بس ما لحكت عليهم، ركبت سياره رسيم و خابرت على ادم جاوبني گال..
ادم:بمستشفى الي تطبقين بيها تعالي هناك
حركت و رحت للمستشفى .. نزلت مثل المخبله ما اعرف شسوي و بس دموعي تنزل
دم رسيم بيدي و على ملابسي انهاريت بمكاني و كعدت بالگاع ابجي بصوت عالي.. ويه كل جرة نفس شهكه تخنكني..
التمو عليه العالم يردون يعرفون شبيه، تقدم عليه ولد شاب مدلي ايده كومني من مكاني و گال بهدوء..
_اهدئي تعالي فوتي جوه خلي اشوف شبيج
حجيت بقهر و توسل..
رواسي:هسه جابوا واحد متصاوب وينه اخذني عليه فدوه
ابتسم بوجهي و گال..
_لا لتخافين هسه اخذج اهله وياه
مشه كدامي و اني امشي وراه و كل شوي اعثر بخطواتي
عيوني مغوشه بسبب الدموع.. بس شفت ابويه ركضت عليه حضنته و انهديت بالبجي.. مسح على راسي بهدوء و گال
راشد:ان شاء الله مابي شي بنتي خلص اهدي
حجيت بصياح..
رواسي:انييي السببب اني موتته انيييي
مد ايده على حلكي يمنعني من الكلام و گال..
راشد:اششش لتحجين هيج ديري بالج رواسي، اخو گال چان ينظف بالسلاح و طلعت طلقه بالغلط
ابتعدت عنه و رحت لغسان و محمد واكفين على جهه
بعيد عن ابويه و عمي و ولده…
حجيت ب بحزن..
رواسي:مو قصدي والله ردت اضرب روحي اني
رفع ايده بوجهي و گال بنتر..
غسان:لخاطر رسيم بسس سكتتلج خلي يكوم بالسلامه و يصير خير، روحي منا و لتشوفينه وجهج بعد!
باوعت لمحمد ما رفع عينه عليه ابد و حجيت..
رواسي:محمد فدوه لا تتجاهلوني و تحجون هيج ويايه
اني احب رسيم والله ما اتحمل يتأذه
لزمني من ايدي بقوه حجه بصوت خافت و بنبرة تهديد..
محمد:اذا متروحين منااا اني اشتكي عليج والله
تقدم ابويه علينه و گال بعصبيه..
راشد:ايدك عن بنتي لا اكسرها الك و اعلگها برگبتك
عاف ايدي محمد بعد ما غسان سحبه و راحو بعيد، اندار عليه ابويه و گال..
راشد:رجعي للبيت متبقين هنا
رواسي:ما اعوفه ابد مستحيل
نتر بيه بصوت خافت..
راشد:امشي رواسييي ما اريد امد ايدي عليج، رسيم يموتج بس يصحى والله يموتججج
مسحت دموعي و حجيت بتأكيد..
رواسي:ميسويها رسيم روحه من الدنيا اني، اني اريد ابقى هنا و ما اروح اذا رسيم ميتحسن و ارجع وياه لبيتنه
عفته و طلعت بَره انتظر محد يريدني موجوده، بس ما اكدر اعوفه مستحيل اعوفه.. كعدت بباب المستشفى
حسيت عيوني دتتغوش شوي شوي، غمضتهن بقوه
و رجعت فتحتهن الدنيا صارت تفتر بيه.. سمعت صوت غسان قريب مني ينادي ب اسمي بس على غفله اختفى الصوت و الدنيا صارت سوده بعيني و ما حسيت على اي شي…
حسيت على شي بارد يمشي بوريدي، فتحت عيوني
باوعت حواليه نايمه على سرير و مغذي بيدي
وجهت نظراتي على القنفه الموجوده.. ابويه و ادم كاعدين ..
نهضت روحي و حجيت بتعب..
رواسي:رسيم طلع من العمليه؟
كاموا ابويه و ادم اجو يمي كل واحد وكف من جهه
نزل راسه عليه باسني من راسي و گال..
راشد:شلون صرتي حَبيبتي بشنو تحسين
رواسي:كولولي رسيم وينه طلع من العمليه لو بعد؟؟
راشد:عار ميصيرله شي نقلوا لغرفته
ادم:انتبهي على نفسج رواسي صار عندج انهيار عصبي
رفعت الغطه عن جسمي ردت اكوم لزمني ادم ثبتني
و گال..
ادم:وين رايحه مو زين ترجعين تدوخين
رواسي:اريد اشوف رسيم عوفني
راشد:مابي شي اخوانه و نسوانهم و مرته يمه ميحتاجج
بعدت ادم عني و مديت ايدي شلت الصونده مال مغذي
و كمت بدون ما اسمع منهم و حجيت..
رواسي:اني السبب بحالته هاي و لازم اكون يمه
مشيت على كيفي راسي مسطور سطر، اجه ابويه
سندني و اخذني لوحده من الغرف الي بالطابق
وكفت يم الباب و گلت ..
رواسي:اني ادخل روح أنتَ
راشد:لا وياج اريد اشوف نسيبي العار
رواسي:بابا ابوس ايدك خليني براحتي
هز راسه و بقه واكف يم الباب، دكيت الباب و دخلت
هيا بس شافتني كامن من مكانه هجمت عليه تريد تضربني.. سحبها غسان من ايدها و نتر بيها..
غسان:اذا تمدين ايدج عليها اكسرها والله
هيا:هيَ الي رادت تموت اخوووك و بعدك تدافعلها؟؟؟؟
غسان:وحققق الله اذا مترجعين بمكانج ارجعج للبيت
تجاهلتهم و مشيت لرسيم.. نزلت راسي عليه بسته من كصته و حجيت بهدوء..
رواسي:حَبيبي تسمعني؟ اني اجيت و ما اعوفك بعد
فتح عيونه ببطئ صار يباوعلي، و گال بتعب..
رسيم:تقتلين القتيل و تمشين بجنازته روسيه
رواسي:لتحجي هيج تعرف اني ما ردت اضربك الك
كله بسببك صار هالشي
مد ايده على ايدي لزمها قربها من شفايفه طبع بوسه
عليها و گال بصوت مسموع..
رسيم:اطلعوا عوفونه وحدنه
كلهم طلعوا بدون كلام الا هيا بقت گاعده بمكانه
باوعلها و گال بنتر…
رسيم:متسمعين أنتِ؟ گلت اطلعوا يلا
كامت طلعت و هيَ تدردم.. رجع يباوع بعيوني و گال
رسيم:تهون عليج نفسج روسيه؟ شلون تفكرين تسوين هيج شي؟؟؟
رواسي:بسببك رسيم كله بسببك، امك الله يرحمها و السالفه صارلها سنين طويله مو شي جديد.. اذا اهل امك ما اشتكوا على ابويه ليش أنتَ تريد تشتكي و تدمر حياتنه؟
رسيم:لعد هوَ من دمر حياتنه عادي و احنه ٣ اطفال جنه ماعدنه سند غيرها بهاي الدنيا
بسته من راسه و حجيت..
رواسي:لخاطري رسيم انسى الموضوع، صعب عليك اعرف بس هوَ مو قصده يموتها هذا يومها لو الله مكاتبلها تموت بهذاك اليوم چان هسه هيَ بيناتنه بس كلشي قضاء و قدر
رسيم:كل ما اشوف ابوج اتذكر لما رجعنه من المدرسه و لكيناها غرگانه بدمها كبرنا و احنه نعرف امي داخت و وكعت انضرب راسها و بساعتها ماتت لحد ما خطبتج
رواسي:طلكني و خلينا نطلع من حياتكم ليش تبقى تتعذب و تعذبني وياك
مد ايده على وجهي مسح دموعي و گال..
رسيم:اذا ترجعين يمي مستعد انسى كلشي لخاطرج روسيه
رواسي:ما اعوفك رسيم مستحيل اعوفك، الا بحالتين
اذا تبقى هيا على ذمتك و اذا ترجع تأذيني او تأذي احد من اهلي بنفس اللحظه ادوس على گلبي و روحي بالقندره و اعوفك و لو تطلع براسك نخله هم ما ارجعلك بعد
رسيم:عوفي هيا انسيها خطيه والله
بعدت روحي عنه و حجيت..
رواسي:بكيفك رسيم الي عندي كلته اني
اندكت باب الغرفه و دخل نفس الدكتور الي ساعدني
اول ما اجيت للمستشفى ابتسملي و گال
_شلون صرتي رواسي؟
رواسي:الحمدلله زينه
رسيم:حَبيبتي انطيني مي
باوعتله و ابتسمت بخفه، شلون يخزر بالدكتور
صبيتله مي بكلاص و ساعدته حتى يشرب
لزم ايدي باسها و گال بهمس
رسيم:احبج روسيه
رواسي:بعدين بعدين
تقرب عليه الدكتور و قاسله الضغط و السكر
و گال..
_اذا تحتاجون اي شي بس دزوا عليه اسمي دِلهَام
رسيم:شكراً الك متقصر بس منحتاج شي
خفيت ضحكتي و گلت..
رواسي:شوكت نكدر نطلعه؟
دِلهَام:فد يومين يلا
رسيم:لا باجر اطلع عندي ممرضتي هيَ تداريني
وجه نظراته الي و اردف..
رسيم:مو باباتي؟
رواسي:اي اني اداري اذا طلع
دِلهَام:جرحك عميق كلش لان من مسافه قريبه الافضل تبقى كم يوم نتطمن على صحتك
رسيم:ما اتحمل ابقى هنا اذا تطلعوني هسه يكون افضل دكتور
بقه الدكتور يحجي وياه و يشرحله عن حالته بس هوَ قفل
يريد الا يرجع للبيت.. طلع بعد ما مل من عنده و دخلوا
الولد و وياهم ابويه تقرب على رسيم و گال..
راشد:الحمدلله على سلامتك اجر و عافيه يارب
رسيم:منين تجيني العافيه و أنتَ بخلقتي
عطت بي..
رواسي:رسيممم اروح والله!
مسح على لحيته و گال..
رسيم:حبيب گلبي عمي الغالي الله يعافيك و يخليك و يبارك بيك
ضحك ابويه و باوعلي و گال..
راشد:يلا بنتي خلي نروح
رسيم:خير وين تاخذها؟؟
راشد:شعدها باقيه بالمستشفى اخوانك يمك
غسان:رسيم خليها تروح و من تطلع تجيك للبيت، مترهم تبقى هنا اذا احد اجه عيب
رسيم:محد يجي و رواسي متروح تبقى يمي
لزمت ايده بستها و حجيت بهدوء..
رواسي:اروح لبيته هم ابدل ملابسي و ارتاح حتى اكدر اداريك لما تطلع و باجر هم اجي اول و تالي دوامي هنا
رسيم:دتروحين على بنتج تشوفيها؟
رواسي:اكيد كل يوم بعد دوامي اروحلها دتتحسن شوي شوي كلها فتره و ناخذها بحضنه، بس انيييي اسميها مو أنتَ خووش؟؟
ضحك و گال..
رسيم:خوشين بابا
بسته من راسه و طلعت اجه ورايه غسان
صاح ب اسمي انداريت عليه گال..
غسان:ممكن نحجي شوي؟
باوعت لابويه و گلت..
رواسي:روح حَبيبي هسه اجيك
طلع ابويه قبلي و اردفت..
رواسي:خير غسان، بقه كلام ما سمعتني ياه؟
نزل راسه و گال ب اسف..
غسان:اسف رواسي حجيت هيج من خوفي و حركة گلبي على اخويه
رواسي:الي صار مو بقصد والله اني ردت اضرب روحي لما حاول ياخذ مني المسدس اجت الطلقه بي
مو عن قصد ابد
غسان:لتشيلين بگلبج عليه والله بلحظه عصبيه و خوف على اخويه حجيت هيج، اعرف تحبي و مستحيل تأذي
رواسي:مصار شي عيوني لتشغل بالك
ترخصت منه و طلعت على ابويه چان ينتظرني بالسياره
صعدت وياه و گلت..
رواسي:اخذني لبيت رسيم
راشد:متأكده رواسي؟؟
رواسي:اي متأكده ما اكدر اعوف رسيم و هوَ محتاجني
دار وجهه عليه و ركز نظراته عليه و گال بهدوء..
راشد:تحبي روسيه؟
رواسي:اي احبه هوايه ما اعرف شلون حبيته بس الله زرع حبه بگلبي بدون سابق انذار
راشد:رسيم خوش رسيم ترا بس خرب كلشي بخطفه الج
من قبل چان يجيني للمحل و يشتري من عندي، و مره شافج و أنتِ يمي و رأساً طلبج من عندي
رواسي:ليش رفضته لعد؟
راشد:خفت عليج اذا عرف اني الي قتلت امه جنت متأكد يأذيج أنتِ، و چان خوفي بمحله
رواسي:بابا رسيم شنو يشتغل؟ أنتَ كتلي مافيا بس هوَ يكول ماله علاقه بيهم
راشد:الي اكدر اكوله شي واحد بس، رسيم شغله خطر
رفعت حاجبي مستغربه و حجيت..
رواسي:شنو يعني؟
راشد:ما اكدر احجي اني اذا يريد هوَ يحجيلج
سكتت و ساق ب اتجاه بيتنه.. بعد مده وصلنا تقربت عليه بسته من خده و نزلت.. دكيت الباب و انتظرت احد يفتحه
شوي و صارت بوجهي هيا.. رادت تطبك الباب بس منعتها دفعته و دخلت، لزمتني من ايدي تسحب بيه تريد تطلعني و تصيح..
هيا:شجاااابجججج شرجعججج امشييي ولييي مناااا
نترت ايدي منها و حجيت بتهديد..
رواسي:اذا تردين حالج يصير مثل رسيم، رجعي مدي ايدج عليه و شوفي اذا ما احط طلقه براسج افلشههه
هيا:تهدديني؟؟؟ صبريلي اني اعلمج الا اگول لرسيم عليج
دفعتها عن طريقي و دخلت شفت البنات
كاعدات بس شافوني كامو عليه سلمت و كعدنا سوه
عذراء:رواسي صدك أنتِ ضربتي رسيم؟؟ شلووون!
رفعت عيوني على هيا و حجيت..
رواسي:اذا تحبون اشوفكم شلون عدنه شخص يستاهل نجرب عليه!
هيا:أنتِ مجرمه مكانج بالسجن مو هنااا
رشا:رجال و مرته شعليج أنتِ؟ تذبحه يذبحها معليج لتتدخلين
هيا:بس اني مرته الاولى و الاخيره
كعدت و حطت رجل على رجل و اردفت…
هيا:اني و رسيم اتفقنا يتزوجها بس حتى تخلف من عنده لان اني ما اريد احمل و كلها فتره و يطلكها و نخلص منها
قبضت ايدي بقوه و تنفست بهدوء اريد اهدي روحي..
و حجيت ببرود..
رواسي:يااا صدككك؟ شكد نذلين ليش ما حجيتولي؟ قناااادر تتراگع عليكم
هيا:شنو ممصدكتني ؟ عندي دليل ترا!
رواسي:ترديني اصدكج يعني؟ شوفيني بالله
فتحت تلفونها و طلعت صورة لمحادثه
اخذت التلفون من ايدها كعدت اقره، رفعت حاجبي
معاجبني الكلام ابد..
رسيم:گتلج اتزوجها بس تخلف فتره و اطلگها، مو تردين طفل أنتِ؟
هيا:اي اريد بس اغار رسيم ما اتحمل وجودها وياك
رسيم:وداعتج بس تجيب اطلگها ما ابقيها على ذمتي ابد
مديتلها التلفون و حجيت بثقه..
رواسي:عادي اني هم اكدر اسوي نفس هاي المحادثه، اذا ترديني اصدكج ف دخلي للمحادثه نفسها من الواتس
و خليني اشوف
سحبت تلفونها من ايدي و گالت بعصبيه..
هيا:ما مجبوره اخليج تقرين خصوصياتنه اني و رسيم، تردين تصدكين صدكي متردين بكيفج راح تشوفين شلون يطلگج و يشمرج لاهلج
باوعت للبنات و گلت..
رواسي:احفظوا كلامها عدل، حتى نشوف منو الي ينشمر على اهله اني لو هيَ؟
كمت من مكاني و صعدت فوك و عفتهم يحجون و يرزلون بهيا.. طلعتلي ملابس و فتت سبحت
طلعت بدلت تمددت بالفراش جسمي كله يأذيني
رواسي:تستاهلين رواسي، كلشي يصير بيج تستاهلي
احد كلج روحي حبي واحد مجرم مثل رسيم؟؟
لا، لعد انجبي و تحملي كلشي يصيرلج
دك تلفوني باوعت غسان ديتصل، رديت عليه
رواسي:هلا غسان
رسيم:المفروض تعرفيني اني الي متصل مو غسان
رواسي:حَبيبي شلون صرت؟
رسيم:مابيه شي مثل الحصان، قابل اول طلقه تجيني منج؟
ضحكت و كتله..
رواسي:ثنينهن مستاهلهن والله، بس لو حاركتك هم چان برد گلبي
رسيم:مجرمه سفاحه مو بيدج
رواسي:منك نتعلم رسييميي
رسيم:وين أنتِ؟
رواسي:بالغرفه اريد انام
رسيم:صوريلي اشوف
فتحت سبيكر و دخلت للواتس صورتله الغرفه
شافها و گال
رسيم:حافظ الغرفه روسيه اريد صوره الج
رواسي:عييييب تلفون اخوك شلون ادزلك صورتي
رسيم:دزي و اني امسحها مو غبي اني
رواسي:استاذ بالغباء أنتَ حَبيبي
رسيم:و تالي رواسي؟؟
رواسي:اني الغبيه اني مو أنتَ
رسيم:يلا دزيلي صوره
رواسي:لا عيب عليك متستحي، شنو ماعندك خوات؟؟
ضحك و گال بهدوء..
رسيم:لا والله ما استحي و ماعندي خوات
اجه ببالي كلام هيا عدلت كعدتي و حجيت بجديه..
رواسي:رسيم شنو معنى كلام هيا؟
رسيم:يا كلام؟
حجيت بعصبيه
رواسي:تكلي متفقين أنتَ وياها بس اجيب تطلكني و تاخذ بنتي الها
صار يضحك متألم و گال..
رسيم:شلون تريدني اجيها اطيح حظ حظها
رواسي:صير زين و اذا متطيح حظها اني اطيح حظكم أنتَ وياها
رسيم:صار كلشي و لا زعلج، اريد اشتغلها على البارد
رواسي:لا بارد و لا حار والله اموتك بيدي
رسيم:تموتيني اذا اموت
رواسي:يلا كافي روح خليني انام باجر عندي دوام من الصبح
رسيم:شايفه اذا شفتج واكفه ويه هذا دِلهَام شسوي بيج؟
رواسي:اشكر ميعجبني، اني احب الاسمر المجولح ممولح مثلك
رسيم:هسه هذا غزل لو تنمر؟
رواسي:منو يتنمر عليك هذا غزل خاص مخصص الك
من ابداعي اني
رسيم:اعتزلي باباتي لتتغزلين بعد
رواسي:كافي لطشت روح يلا
سديته من عنده حطيت تلفوني على الشحن و استسلمت للنوم… كعدت الصبح على صوت تلفوني يدك
فركت عيوني و اخذت التلفون بيدي رقم غريب..
جاوبت اجاني صوت بنيه گالت ..
_حضرتج رواسي ام هيا؟
رواسي:اي اني بنتي بيها شي؟؟
- يتبع الفصل التالي اضغط على (رواية رواسي الدهر) اسم الرواية