رواية نبض الفهد الفصل الثاني عشر 12 – بقلم الكاتبة نون
في الليلة التي يُقرّر فيها الفهد أن يُقاتل حتى الموت لا يزأر. بل يصمت. لأن الموت الحقيقي لا يحتاج إعلاناً
الساعة الثانية ظهراً.
فهد وقف في مركز القيادة المؤقّت الذي أنشأه في الطابق السفلي
— غرفة كانت مكتبة قديمة حوّلها في ساعتين إلى غرفة عمليات. ستّ شاشات مراقبة على الجدار تعرض كل زاوية في القصر وحوله
طاولة عليها خرائط مساحية للقصر والشوارع المحيطة. أسلحة مرصوصة بدقّة على منضدة جانبية. وأربعة رجال يرتدون سترات سوداء يقفون في انتظار الأوامر.
طارق كان بجانبه يتحدّث في سمّاعة أذن لاسلكية مع فريق المراقبة الخارجي.
— موكب كوستا عدّى مدخل القاهرة من خمس دقايق. أربع سيارات سوداء. زجاج فاميه. السرعة ثابتة. الاتجاه واضح
فهد لم يرفع عينيه عن الخريطة المساحية. إصبعه يتتبّع الطرق المحيطة بالقصر — يحسب المسافات والزوايا ونقاط الدخول المحتملة.
— ناصر المليجي ورجالته فين؟
— العميد بيقول فريق الأمن
اتنشر في تلات نقاط حوالين القصر.
نقطة على الطريق الرئيسي ونقطة ورا المدرسة اللي في الشارع الموازي ونقطة على السطح بتاع العمارة اللي قصاد البوّابة. قنّاصة ووحدة تدخّل سريع.
— والأوامر؟
— الأوامر: محدش يتحرّك غير لمّا يسمع إشارة منك شخصيّاً أو لمّا يحصل إطلاق نار من جوّه القصر.
أومأ فهد برأسه. ثم رفع عينيه لشاشة المراقبة التي تعرض الجناح العلوي. رأى باب غرفة كيان مغلقاً. وأمامه حارسان مسلّحان يقفان كتمثالين.
— كيان عارفة حاجة؟
— لأ يا باشا. الهانم في أوضتها من الصبح. أكلت . والخادمة بتقول إنها قاعدة بترسم على ورق.
بترسم. في وسط كل هذا الجحيم — هي تجلس ترسم.
شيء في صدره تحرّك — ذلك النبض اللعين مرة أخرى.
— محدش يقولها أي حاجة. مهما حصل. مهما سمعت. هي تفضل في أوضتها ومتعرفش.
— أمرك.
في تلك اللحظة رنّ هاتفه. نظر للشاشة — رقم مجهول.
نظر لطارق. أشار له بالتسجيل. ثم أجاب.
— ألو.
الصوت الذي جاء من الطرف الآخر كان هادئاً بشكل مقزّز — هدوء الثعابين قبل النهش.
— فهد بيه. أخيراً بنتكلّم صوت لصوت. أنا إلياس كوستا. وأنا واقف على باب بيتك.
مشى فهد نحو شاشة الكاميرا الأمامية. رأى السيارات الأربع السوداء متوقّفة أمام بوّابة القصر.
من السيارة الثانية نزل رجل طويل أشقر بملامح أوروبية حادّة يرتدي بدلة بيضاء كأنه ذاهب لحفل كوكتيل لا لمواجهة.
خلفه نزل ستّة رجال بسترات جلدية سوداء — عضلاتهم ونظراتهم وطريقة وقوفهم تقول إنهم ليسوا حراساً عاديين بل جنود مرتزقة.
— وأنا مستنّيك يا كوستا.
— فهد بيه… أنا مش جاي أحارب. أنا راجل أعمال زيّك. جاي أتكلّم. عندي عرض عايزك تسمعه قبل ما حد فينا يعمل حاجة يندم عليها.
— العرض ده ممكن كان ينفع لو ماكنتش بعتلي درون بتصوّر مراتي وهي نايمة يا كوستا.
ضحك كوستا ضحكة قصيرة.
— كانت رسالة. وإنت فهمتها صح. بس الرسالة اللي معايا النهارده أكبر. ادّيني عشر دقايق من وقتك. أنا وإنت. بدون سلاح.
لو ماعجبكش كلامي أنا همشي. وعد.
فهد نظر لطارق. طارق هزّ رأسه بالنفي — لا تثق فيه.
لكن فهد كان يفكّر في شيء آخر. كوستا جاء بنفسه. لم يرسل رجاله ولم يتسلّل من الخلف.
جاء من الباب الأمامي هذا يعني أنه إمّا واثق بشكل جنوني وإمّا عنده ورقة لم يكشفها بعد.
في كلتا الحالتين فهد يحتاج أن يعرف ما هي تلك الورقة.
— عشر دقايق يا كوستا. إنت لوحدك. رجالتك يفضلوا برّه السور. أي حركة غريبة منهم وأنا شخصيّاً هطلع أجيبك من وسطهم.
— متّفقين.
أغلق فهد الخط. التفت لطارق.
— القنّاصة على السطح المقابل يكونوا جاهزين. لو أي حد من رجالة كوستا حرّك إيده ناحية السور أو البوّابة — نار.
— وإنت يا باشا؟
سحب فهد مسدّسه وفحصه وأعاده لحافظة خصره. ثم ارتدى سترة واقية رفيعة تحت قميصه الأسود.
— أنا هنزل أقابله في الحديقة الأمامية. مكان مفتوح. الكاميرات شغّالة والصوت مُسجّل.
— فهد…
— أمر يا طارق. نفّذ.
—
الساعة الثانية والنصف.
في حديقة القصر الأمامية
— مساحة خضراء واسعة بنوافير رخامية وأشجار وقف الرجلان وجهاً لوجه.
فهد السيوفي
إلياس كوستا
فهد قول اللي عندك. يا كوستا
ابتسم كوستا وجلس على أحد الكراسي بهدوء مدروس. مدّ ساقيه وشبك أصابعه أمامه.
— خلاص. من غير مقدّمات. الأرض اللي في التجمع — اللي باسم مراتك — أنا مش عايزها.
رفع فهد حاجبيه بمقدار مليمتر واحد — أقصى ما يُظهره من مفاجأة.
— مش عايزها؟
— لأ. خلاص. الأرض قيمتها إيه؟ عشرين تلاتين مليون؟ أنا عندي أصول بتساوي أضعاف ده.
الأرض كانت مدخل — مش هدف. كانت الباب اللي هدخل منه للسوق المصري. بس دلوقتي لقيت باب أحسن.
— وإيه الباب الأحسن ده يا كوستا؟
أمال كوستا رأسه وابتسم ابتسامة جعلت فهد يشعر بغريزة القتل تتحرّك في أحشائه.
— إنت.
صمت.
— أنا.
— أيوه إنت يا فهد بيه. إنت عندك إمبراطورية مقاولات واستثمار عقاري بتتعامل مع بنوك في خمس دول.
عندك مشاريع في السعودية والإمارات وقطر. عندك شركة شحن بتنقل مواد بناء عبر البحر المتوسّط.
أنا مش محتاج حتّة أرض في التجمع — أنا محتاج شريك. شريك مصري بيفهم السوق وعنده غطاء قانوني. وإنت أحسن مرشّح.
— شريك في إيه بالظبط يا كوستا؟
— شريك في كل حاجة. فلوسي تتغسل من خلال مشاريعك العقارية.
شحناتي تعدّي من خلال سفنك. وأنا في المقابل بفتحلك السوق الأوروبي بالكامل — اللي إنت بتحاول تدخله من خمس سنين ومحدش بيفتحلك الباب.
فهد لم يتحرّك. لم تتغيّر ملامحه. لكن تحت سطح الجليد كانت تدور حسابات بسرعة مذهلة.
كوستا لا يعرض صفقة — يعرض شراكة إجرامية. غسيل أموال وتهريب تحت غطاء شركات فهد الشرعية.
لو وافق فهد سيربح المليارات. ولو رفض… فالتهديد واضح حتى بدون أن يُنطق.
— وكيان؟
— كيان؟
— أيوه. كيان. مراتي. اللي بعتلي رسالة على درون إن الأرض مقابل روحها. اللي كان عاصم هيسلّمها ليك في عقد زواج. فاكر ولّا نسيت؟
ابتسم كوستا وهزّ كتفيه بلا مبالاة مصطنعة.
— كيان كانت ضمان. عشان أضمن ولاء عاصم. بس دلوقتي الموقف اختلف — أنا مش محتاج عاصم ومش محتاج كيان.
محتاجك إنت. لو إنت وافقت على الشراكة… كيان تفضل مراتك وأنا مش هقرب منها ولا من شعرة فيها. كلمة شرف.
“كلمة شرف” من رجل يتاجر في البشر.
فهد أمال رأسه ونظر لكوستا بنظرة لم يرها الأخير من قبل — نظرة الفهد الحقيقي.
ليس الغاضب ولا البارد بل الفهد الذي قرّر أين سينقضّ بالضبط وينتظر فقط اللحظة المناسبة.
— عشر دقايق خلصوا يا كوستا. وأنا هردّ عليك بكلمة واحدة.
وقف. مدّ يده في جيبه وأخرج شيئاً صغيراً وضعه على الطاولة
جهاز التسجيل المُصغّر الذي وُجد في بطانة سترة عاصم.
ثم أخرج هاتفه وضغط على زرّ. من السمّاعة خرج صوت كوستا نفسه في مكالمته مع عاصم الليلة الماضية
“هبعت هدية لعروسة الفهد… هدية مش هينساها.”
وجه كوستا تغيّر للمرة الأولى. الابتسامة اختفت. عيناه الرماديّتان ضاقتا.
— الكلمة الواحدة اللي هقولهالك يا كوستا:
لأ.
لأ مش هبقى شريكك. لأ مش هغسّل فلوسك. لأ مش هفتحلك باب.
وكيان — مراتي — مش هتبقى ضمان ولا ورقة ولا بند في أي عقد. كيان اسمها مش يطلع من بقّك تانى أصلاً.
وقف فهد بكامل هيبته. الشمس خلفه تجعل ظلّه يسقط على كوستا الجالس.
— ودلوقتي يا كوستا… إنت قدّام خيارين. يا تقوم من على الكرسي ده وتطلع من بوّابة قصري بهدوء وتركب عربيتك وترجع إسكندرية وتنسى اسمي واسم مراتي واسم مصر كلّها. يا…
أشار بعينيه نحو سطح العمارة المقابلة. كوستا التفت — ورأى لمعة عدسة قنّاص تعكس الشمس.
ثم أشار فهد نحو الشارع الموازي. سيارتان سوداوان بلا لوحات — سيارات الأمن — توقّفتا خلف موكب كوستا.
— الخيار التاني: تقعد على الكرسي ده وتستنّى رجالة الأمن يقبضوا عليك وعلى رجالتك. عندهم ملف عليك يا كوستا — ملف مش بتاع الأرض ومش بتاع عاصم.
ملف بتاع شحنة ميناء دمياط اللي دخّلت سلاح من سنتين. وملف بتاع ست حالات اتجار بالبشر في أوروبا.
وملف بتاع غسيل أموال في تلات قارّات. كل ده وصل للأمن الوطني المصري من امبارح بالليل. بالتفاصيل والأدلة.
تحوّل وجه كوستا. الهدوء المصطنع تبخّر وظهر تحته وجه آخر — وجه الحيوان المحاصر.
— إنت عملت إيه يا فهد؟
— عملت اللي بعمله دايماً يا كوستا. لعبت شطرنج. والفرق بيني وبينك… إني كنت شايف الرقعة كلّها وإنت كنت بتبصّ على قطعة واحدة بس.
نهض كوستا بعنف. الكرسي وقع خلفه.
في تلك اللحظة بالضبط — حدث كل شيء في وقت واحد.
—
يد كوستا اندفعت تحت سترته البيضاء وأخرجت مسدّساً صغيراً فضيّ اللون كان مُخبّأً في حافظة كاحله — لم يُفتّش لأن فهد سمح له بالدخول بدون تفتيش.
خطأ فهد الوحيد.
صرخ طارق في السمّاعة: “نار! نار! نار!”
وأمام بوّابة القصر تحرّكت سيارات الأمن بسرعة نحو موكب كوستا وبدأ رجاله بسحب أسلحتهم.
لكن كل ذلك كان في الخلفية.
في المقدّمة — على بُعد مترين — كان كوستا يرفع مسدّسه نحو صدر فهد.
والوقت تباطأ.
فهد رأى فوّهة المسدّس وبريق العيون الرمادية الباردة وإصبع كوستا يضغط على الزناد
. في جزء من الثانية أدرك أن السترة الواقية تحت قميصه ستوقف الرصاصة لو أصابت صدره — لكن كوستا لم يكن يُصوّب على صدره.
كان يُصوّب على رأسه.
تحرّك فهد.
للأمام.
اندفع نحو كوستا كثور هائج. كتفه الأيسر اصطدم بذراع كوستا الممدودة وانحرف المسدّس لأعلى.
الرصاصة انطلقت واستقرّت في جذع شجرة خلف فهد.
لكن الرصاصة الثانية كانت أسرع.
في الثانية التي تلت انحراف الذراع سحب كوستا يده وأطلق رصاصة ثانية. هذه المرة من مسافة صفر.
أصابت فهد في كتفه الأيسر
— فوق حافّة السترة الواقية مباشرة. الموضع الوحيد المكشوف.
ألم مسعور اخترق جسده لكنه لم يتوقّف.
يده اليمنى أمسكت بمعصم كوستا وكسرته بحركة واحدة .
صرخ كوستا وسقط مسدّسه.
دفعه فهد للأرض بكامل وزنه وجسده فوقه ويده اليمنى — السليمة تقبض على حلقه.
دماء فهد بدأت تسيل من كتفه
نظر فهد في عيني كوستا من فوقه. المسافة بينهما أقلّ من شبر. أنفاسهما تتلاحق. والغضب في عيني فهد لم يكن بشريّاً — كان شيئاً أخطر.
— قولتلك… كيان اسمها مش يطلع من بقّك.
ضغط على حلقه أكثر. وجه كوستا بدأ يتحوّل للأزرق.
— فهد! فهد! كفاية!
صوت طارق من خلفه. يركض نحوه ورجال الأمن خلفه.
— فهد باشا! سيبه! خلاص! الراجل اتقبض عليه!
لم يسمع. أصابعه تضغط أكثر.
الدنيا حوله تتلاشى — لا يرى إلا عيني كوستا ولا يسمع إلا صوتاً واحداً في رأسه: “هبعت هدية لعروسة الفهد.”
— فهد!
يد على كتفه الجريح. ألم مسعور أعاده للواقع. أفلت حلق كوستا وتراجع وهو يلهث
. دماؤه تسيل بغزارة الآن ووجهه شاحب لكن عينيه لا تزالان مشتعلتين.
رجال الأمن اندفعوا وقيّدوا كوستا الملقى على الأرض يسعل ويلهث.
في الخلفية كان صوت إطلاق النار عند البوّابة قد توقّف — رجال كوستا استسلموا أو سقطوا.
طارق أمسك بفهد وأسنده. نظر لكتفه.
— الرصاصة لسّه جوّه يا باشا. لازم مستشفى.
— مش دلوقتي.
— فهد!
— قولت مش دلوقتي. كيان فين؟
— في أوضتها. الحراسة عليها سليمة ومحصلهاش حاجة.
— عاصم؟
تردّد طارق.
— عاصم… اختفى يا باشا.
تجمّد فهد.
— إيه؟
— الكاميرا بتاعت أوضته بتقول إنه خرج من خمس دقايق لمّا سمع صوت الرصاص.
بس مش موجود في أي مكان في الطابق الأرضي. والباب الخلفي…
— الكود.
— عاصم كان صوّر لوحة الكود. ممكن يكون حفظه أو بعته لحد. الباب الخلفي مفتوح يا باشا.
ومعنى “الباب الخلفي مفتوح” واحد فقط: الطريق بين الحديقة الخلفية والجناح العلوي — جناح كيان — أصبح بلا حماية.
ركض فهد.
كتفه ينزف ورأسه يدور والألم يحرق عصبه لكن ساقيه تحملانه بقوّة الأدرينالين والرعب — رعب حقيقي لأول مرة في حياته.
صعد الدرج الدائري درجتين درجتين. الممرّ العلوي كان فارغاً — الحارسان اللذان كانا أمام باب كيان نزلا حين سمعا إطلاق النار في الحديقة. خطأ ثانٍ.
باب كيان مفتوح.
دماغه توقّف عن التفكير. جسده تحوّل لآلة صرفة. سحب مسدّسه بيده اليمنى رغم أن يده اليسرى لا تعمل واندفع داخل الغرفة.
ما رآه جعل دمه يتجمّد ويغلي في نفس اللحظة.
عاصم واقف في منتصف الغرفة. وجهه مبلّل بالعرق والدموع. في يده المرتعشة مسدّس صغير يُصوّبه نحو… لا شيء.
وكيان واقفة خلفه. حيّة سليمة. في يدها قاعدة مصباح رخامية ثقيلة مرفوعة فوق رأسها مستعدّة لتحطيم جمجمته.
— فهد!
صرخت كيان حين رأته. رأت الدم على كتفه ووجهه الشاحب ومسدّسه الموجّه.
— كيان. ابعدي عنه.
— أنا كويسة. هو اللي مش كويس.
نظر فهد لعاصم. الرجل كان يبكي. مسدّسه ليس موجّهاً لكيان — لم يكن موجّهاً لأحد. يده ترتعش بعنف ودموعه تسيل والمسدّس يتدلّى من أصابعه كأنه لا يعرف كيف وصل ليده.
— عاصم.
صوت فهد كان مختلفاً. ليس صوت الفهد ولا صوت رجل الأعمال. صوت رجل متعب ينزف ويقف على حافّة الانهيار لكنه يرفض أن يسقط.
— نزّل السلاح يا عاصم.
— أنا… أنا مكنتش… هو قالي… كوستا بعتلي واحد قالي لو مجبتلوش كيان هيقتل…
— نزّل السلاح.
— مكنتش عايز أأذيها والله يا فهد. والله العظيم. أنا جيت أهرّبها مش أأذيها. كنت هاخدها من الباب الخلفي وأبعدها عن القصر قبل ما…
— عاصم!
صرخ فهد. صوته هزّ الغرفة. وعاصم ارتعش بالكامل وسقط المسدّس من يده وارتطم بالأرض.
اندفعت كيان بعيداً عن عمّها واتّجهت نحو فهد. توقّفت أمامه ورأت الدم — الكثير من الدم يسيل من كتفه ويُبلّل قميصه
— إنت… إنت مجروح
— مش مهم.
— مش مهم؟! إنت بتنزف يا فهد
مدّت يديها ولمست كتفه بلطف. ارتعش جسده بالكامل — من لمستها على جرحه. كأنها لمست شيئاً أعمق
— كيان… إنتي كويسة؟
— أنا كويسة. إنت اللي مش كويس. تعال اقعد. لازم نوقف الدم. طارق! طارق فين!
بدأ فهد يترنّح. فقدان الدم والأدرينالين المنسحب والإرهاق — كلها ضربته في لحظة واحدة.
أمسكته كيان. ذراعاها الصغيرتان التفّتا حول خصره وسندته بكلّ ما فيها من قوّة. .
أجلسته على حافّة سريرها.
بصّلي يا فهد. بصّلي. متقفلش عينيك.
نظر لها. عيناها البندقية فوقه مباشرة واسعتان بالرعب والدموع وشيء آخر — شيء يراه فيهما لأول مرة بهذا الوضوح.
شفتاها ترتجفان ويداها ملطّختان بدمائه لكنها لا تترك الضغط على جرحه.
— كيان…
— اسكت. متتكلّمش.
— كيان… لو أنا…
— قولت اسكت
صرخت فيه ودموعها تسقط على وجهه. يده اليمنى ارتفعت ببطء ومسحت دمعة على خدّها — نفس الحركة التي فعلها في أول ليلة في القصر.
— متعيّطيش.
— اسكت يا فهد.
— متعيّطيش عليا يا كيان. أنا…
— لو كمّلت الجملة دي أقسم بالله هضربك.
ابتسم. ابتسامة حقيقية. أول ابتسامة كاملة تراها منه أضاءت ملامحه القاسية بشكل غيّر وجهه بالكامل.
للحظة واحدة رأت فيه الشاب الذي كان في السادسة عشرة يشيل حديد في الحرّ قبل أن يبني أسوار قلعته.
— عارفه يا كيان…
— اسكت!
— إنتي أحلى حاجة شوفتها في حياتي. من أول ما دخلتي الصالون وإنتي بترتعشي وعينيكي بتقول “أنا هكسرك”… وأنا ماقدرتش أشيل عينيّا عنّك.
— فهد…
— سيبيني أكمّل. لو حصلى حاجه عايزك تعرفي.
— مش هيحصلك حاجه مش هسمحلك!
اندفعت نحو الباب وصرخت في الممرّ بصوت مزّق حلقها
— حد ينده الدكتور! طارق! عمر! أي حد!
خطوات متسارعة على الدرج. طارق ظهر ومعه اثنان من رجال الأمن. رأوا فهد على السرير يده اليمنى مسترخية وعيناه نصف مغمضتين وكيان تضغط على جرحه بيديها .
— الدكتور في طريقه
بقيت كيان تضغط بكفّيها وتتكلّم معه بلا توقّف عشان يفضل صاحي.
— فاكر أول يوم لمّا قولتلي “اسمي لوحده يخلّيكي توطّي راسك”؟ فاكر؟
أنا ساعتها اتمنّيت أكسر المكتب اللي ورا ضهرك على دماغك. وفاكر لمّا مسكت دقني وبصّيتلي؟
أنا قلبي كان هيوقف — مش من الخوف. من حاجة تانية مكنتش عارفاها وقتها.
— وعرفتيها دلوقتي؟
سؤاله جاء بصوت ضعيف لكنه كان واعياً. عيناه مفتوحتان تنظران لها.
نظرت في عينيه.
— أيوه. عرفتها.
وصل الدكتور الجرح خطير الكتف مكسور والعضلة ممزّقة لكن لا شرايين رئيسية تضرّرت
الليل.
القصر هدأ كوستا في قبضة الأمن . رجاله مقبوض عليهم. عاصم في حراسة مشدّدة ينتظر التحقيق. والعميد ناصر المليجي جالس في الصالون مع عمر يُنهي الأوراق الرسمية.
في غرفة فهد — لأول مرة ينام فهد في سريره وقت طبيعي.
كتفه الأيسر مُثبّت بضمادات ويده في حمّالة. وجهه شاحب لكنه مسترخٍ بفعل المسكّنات التي أُعطيت له.
وعلى الكرسي بجانب سريره نفس الكرسي الذي جلس هو عليه بجوارها حين أُغمي عليها جلست كيان.
لم تترك الغرفة منذ أن أخرج الدكتور الرصاصة.
فهد فتح عينيه ببطء. رآها جالسة هناك في نفس الفستان الرمادي الملطّخ بدمائه.
شعرها منسدل على كتفيها وعيناها محمرّتان من البكاء
لكنها لم تكن نائمة — كانت تراقبه.
— لسّه هنا؟
— لسّه هنا.
— مش محتاجة تقعدي. أنا كويس.
— اسكت يا فهد.
ابتسم رغم الألم.
— لسّه بتقوليلي اسكت؟
— هفضل أقولهالك لحد ما تتعلّم تسكت فعلاً.
مدّت يدها وأمسكت يده اليمنى اليد السليمة. شبكت أصابعها بأصابعه بإحكام وبلا تردّد ودون أن تُحوّل عينيها عن عينيه.
— فهد.
— أيوه.
— فاكر لمّا سألتني لو فتحتلي الباب هتمشي؟ وقولتلك مش عارفة؟
— فاكر.
— دلوقتي عارفة.
ضغط على أصابعها وقلبه يدقّ بعنف تحت الضمادات. — وإيه الإجابة يا كيان؟
نزلت من الكرسي وجلست على حافّة سريره.
انحنت حتى أصبح وجهها فوق وجهه مباشرة — كما فعل هو في أول ليلة في القصر حين حاصرها بين المكتب ونظراته. لكن هذه المرة المواقع انقلبت.
وضعت يدها على خدّه
— الإجابة: لأ يا فهد. مش همشي.
ثم انحنت أكثر ووضعت شفتيها على جبهته — قبلة طويلة بطيئة أغمضت فيها عينيها وأغمض فيها هو عينيه وشعر بالعالم بأكمله يتوقّف.
حين رفعت رأسها رأت عينيه — عينيه السوداوين اللتين أرعبتا إمبراطوريّات — تلمعان ببريق غريب.
كانت أقرب شيء للدموع رآه أحد في عينيه منذ عشرين عاماً.
— كيان.
— أيوه.
— أنا مش باعرف أحبّ.
— أنا عارفة.
— ومش هعرف أقولها.
— أنا عارفة.
— بس…
— بس إيه يا فهد؟
نظر لسقف غرفته. ثم لها. ثم ليدها في يده. وقال بصوت أجشّ بالكاد مسموع:
— بس إنتي النبض الوحيد اللي فاضل فيّا. ولو وقف… أنا هموت
ضمّت يده بكلتا يديها ووضعتها على خدّها وهمست:
— مش هيقف يا فهد. وعد.
والمطر بدأ يهطل مرة أخرى خارج نوافذ القصر كأن السماء نفسها تغسل دماء اليوم وتُعلن بداية شيء جديد.
شيء لا اسم له بعد.
لكن نبضه أقوى من أي شيء عرفاه.
•تابع الفصل التالي “رواية نبض الفهد” اضغط على اسم الرواية