رواية نبض الفهد الفصل الثالث عشر 13 – بقلم الكاتبة نون
مرّت ثلاثة أيام على ليلة الرصاصة.
لكن الأيام الثلاثة لم تكن عسلاً فهد السيوفي ليس رجلاً يتحوّل بين ليلة وضحاها
اليوم الأول بعد الرصاصة.
فهد رفض أن يبقى في السرير.
الدكتور هشام أمره بالراحة أسبوعين على الأقل — كتف مكسور وعضلة ممزّقة ورصاصة أُخرجت أي إنسان طبيعي لن يتحرّك لشهر
فهد ليس إنساناً طبيعياً
في السابعة صباحاً سمعت كيان صوت خطوات فتحت بابها لتجده يمشي نحو الدرج
بذراعه المُثبّتة في الحمّالة وقميصه مفتوح الأزرار لأنه لم يستطع إغلاقها بيد واحدة ووجهه يحمل تعبيراً يقول
لو حد قالي ارجع السرير هكسر حاجة
— إنت رايح فين؟
التفت نحوها رآها واقفة في باب غرفتها بملابس النوم وشعرها مبعثر وعيناها ناعستان وغاضبتان في آنٍ واحد.
بدت كقطّة صغيرة استيقظت على صوت مزعج.
— نازل المكتب. عندي شغل.
— شغل؟ إنت مجروح يا فهد. الدكتور قال أسبوعين راحة.
— الدكتور مش بيدير شركة فيها ألفين موظّف.
— وإنت مش سوبر مان عشان تشتغل وكتفك كده
اقتربت منه بخطوات سريعة ووقفت أمامه تسدّ عليه الطريق.
فارق الطول بينهما جعلها تبدو كسدّ صغير أمام نهر هادر لكنها وقفت بثبات يليق .
— ارجع السرير.
— كيان ابعدي من الطريق.
— لأ.
— كيان…
— قولت لأ. ولو حاولت تعدّيني هزقّك على الأرض ودماغك الناشفة دي هتشوف النجوم.
إيدك ومكسوره. يعني أقدر عليك دلوقتي.
نظر لها. عيناها عنيدتان تلمعان بإصرار حقيقي
وقف أمامها ثانيتين ثلاث خمس — يفكّر هل يتجاوزها بالقوّة أم يرضخ.
لو كان أي شخص آخر على وجه الأرض لكان دفعه بيد واحدة ومشى.
لكنها ليست أي شخص.
تنهّد بضيق — تنهيدة رجل لم يعتد أن يرضخ لأحد ويكتشف أن الرضوخ أصعب من القتال.
— ساعة.
— إيه؟
— هرجع السرير ساعة. وبعدها هنزل سواء إنتي واقفة هنا ولّا مش واقفة.
— ساعتين.
— ساعة ونص.
— تلات ساعات.
— كيان
— ثلاثة ولّا بنده الدكتور هشام يحقنك منوّم.
ضيّق عينيه ونظر لها بنظرة كانت في السابق كافية لإخراس أي إنسان
لم تتأثّر. ابتسمت حتى — ابتسامة صغيرة خبيثة مشعّة.
— الابتسامة دي مش هتفيدك.
— ثلاث ساعات يا فهد ولّا الدكتور؟
استدار بعنف — قدر ما يستطيع رجل بكتف مكسور — ومشى عائداً لغرفته وهو يتمتم بكلمات غاضبة لم تسمعها.
ابتسمت ابتسامة أعرض وتبعته.
—
في غرفته أجلسته على السرير. ثم وقفت أمامه ونظرت لقميصه المفتوح.
أزراره الخمسة متروكة لأنه لم يستطع إغلاقها بيده اليمنى وحدها.
— تعال أزرّرلك.
تصلّب.
— هقدر لوحدي.
— إنت حاولت خمس دقايق وماقدرتش. شوفتك من الباب وإنت بتحاول وبتشتم نفسك. تعال.
اقتربت ومدّت يديها نحو أول زرّ. أصابعها لمست صدره وارتعش جسده بالكامل.
توقّفت.
رفعت عينيها. وجدت عينيه مغمضتين وفكّه مقبوضاً بقوّة وعروق رقبته بارزة.
— فهد؟ إنت كويس؟
— كمّلي بسرعة.
صوته خرج خشناً مبحوحاً — ليس من الألم.
أدركت ما يحدث وصعد الدم لوجنتيها. لكنها لم تتراجع.
أغلقت الأزرار واحداً تلو الآخر بأصابع ثابتة — أثبت مما توقّعت — بينما تحاول ألّا تنظر لوجهه القريب جداً منها.
الزرّ الأخير كان عند رقبته. أصابعها لامست حلقه وأحسّت بنبضه سريع. ..أسرع من المعتاد بكثير.
— خلصتي؟
— خلصت.
فتح عينيه. نظر لها رائحة الياسمين تملأ رئتيه.
عيناها البندقية تنظران لأعلى نحوه بمزيج من الحياء والتحدّي الذي يميّزها وحدها.
— كيان.
— أيوه.
— اطلعي من أوضتي.
— ليه؟
— لأني لو فضلتي واقفة قدّامي كده ثانية واحدة كمان… ايدي المكسورة مش هتفرق معايا.
فهمت. احمرّ وجهها بالكامل. استدارت ومشت نحو الباب بخطوات سريعة. ؟
خرجت وأغلقت الباب. وفي الممرّ وضعت يديها على خدّيها الملتهبتين وابتسمت ابتسامة لم تستطع إيقافها.
—
اليوم الثاني بعد الرصاصة.
عمر جاء للقصر بعد الظهر.
جلس مع فهد في المكتب يُطلعه على المستجدّات. كيان أعدّت القهوة — سوداء بدون سكّر وأحضرتها بنفسها على صينية.
حين دخلت المكتب وضعت الصينية على المكتب وقالت بهدوء
— قهوتك يا فهد. وياريت تاكل الساندوتش اللي جنبها.
ثم التفتت لعمر
— تشرب حاجة؟
عمر نظر لها ثم نظر لفهد ثم عاد لها بعينين واسعتين.
— شاي لو تكرمي يا هانم.
خرجت.
عمر ظلّ يحدّق في الباب ثوانى بعد خروجها.
— فهد.
— أيوه.
— أنا باحلم ولّا كيان جابتلك قهوة وقالتلك ياريت تاكل؟
— عمر.
— والساندوتش ده مين عمله؟ الخادمة ولّا هي؟
— عمر.
— يعني أنا خمستاشر سنة بشتغل معاك ولا مرّة جبتلى كوباية ميّه وهي في أسبوعين بتجيبلك قهوة وأكل وبتزرّرلك القميص ولسّه بتقولي مفيش حاجة؟
— مين قالك إنها بتزرّرلي القميص؟
— فهد. أنا مش أعمى. إنت لسّه القميص ده نفسه اللي كان مفتوح امبارح والنهارده مقفول.
ودي مش معجزة إلهية — دي إيد واحدة.
أخذ فهد رشفة من قهوته. لم يردّ. لكن زاوية فمه ارتعشت — وعمر التقطها.
— يا ابني. أنا صاحبك من قبل الفلوس والقصور والبدل. ومن حقّي أقولك
البنت دي أحسن حاجة حصلتلك في حياتك. ومش عشان جميلة ومش عشان ابنة محمود الدمنهوري.
عشان هي الوحيدة اللي بتقف قدامك وماتخافش. والراجل اللي زيّك — اللي كل الناس بتخاف منه — أكتر واحد محتاج حد ميخافش منه.
صمت فهد طويلاً. نظر لفنجان القهوة في يده. لأول مرة لاحظ أنها وضعت بجانبه وردة صغيرة بيضاء في كوب ماء — لم يعرف من أين أحضرتها لأن حديقة القصر ليس فيها ورد أبيض.
— هي… جابت الوردة دي منين؟
— يا أخي إنت لسّه في الوردة؟ أنا بكلّمك في مستقبل حياتك.
— عمر. الوردة دي جابتها منين؟
تنهّد عمر.
— مش عارف يا فهد. ممكن تسألها.
لم يسألها. لكنه أخذ الوردة بعد خروج عمر ووضعها في الدرج العلوي لمكتبه — الدرج الذي يفتحه كل يوم.
—
اليوم الثالث بعد الرصاصة فى الصباح.
حدث شيء غيّر كل شيء.
كيان كانت في المكتبة تعمل على مشروع تخرّجها حين رنّ هاتفها الجديد.
الرقم مجهول. تردّدت ثم أجابت لأن فهد أخبرها أن الخطّ مشفّر ولا يمكن لأحد الوصول إليه.
— ألو؟
— كيان الدمنهوري؟
صوت نسائي. ناعم… بلكنة مصرية ممزوجة بشيء أجنبي.
— مين حضرتك؟
— اسمي نادين. ومش مهم مين أنا.
المهم إني أقولك معلومة محتاجة تعرفيها عن جوزك الغالي.
تسارع قلب كيان. شيء في نبرة الصوت جعل أصابعها تبرد.
— مش فاهمة. إنتي مين وبتكلّمينى إزاي على الرقم ده؟
— يا حبيبتي. أنا كنت مكان اللي إنتي فيه قبل كده.
فهد السيوفي مش أول مرة يعمل كده. مش أول مرة يستخدم واحدة عشان يوصل لهدف.
— بتقولي إيه؟
— بقولك إن قبلك بأربع سنين كان في واحدة اسمها سارة. بنت تاجر أراضي في الساحل.
فهد عمل نفس اللعبة — اشترى ديون أبوها واتجوزها عشان ياخد أرض في مارينا.
وبعد ما أخد اللي هو عايزه… طلّقها. سارة دلوقتي عايشة في شقّة في فيصل بعد ما كانت ساكنة في قصر
ومحدش سأل فيها.
يد كيان التي تمسك الهاتف بدأت ترتجف.
— ده كلام فاضي. فهد اتجوزنى عشان…
— عشان يحميكي؟ أيوه. سارة كمان قالها كده. وصدّقته.
لحد ما صحيت لقت نفسها بره الباب ومعاها ورقة طلاق وشنطة هدوم.
هسألك سؤال يا كيان: هو نقل الأرض باسمه ولّا لسّه؟
— لأ. الأرض لسّه باسمي.
— طب استنّي. لمّا ينقلها… هتعرفي اللي أنا بقوله ده صح ولّا غلط.
انقطع الخطّ.
جلست كيان ساكنة. الهاتف في يدها والمكتبة حولها ساكنة والكتب على الأرفف تحدّق فيها بلا حياة.
عقلها يعمل بسرعة مرعبة. تفكّر. تحلّل. تفكّك الكلمات وتعيد تركيبها.
جزء منها يقول ده فخّ
كوستا اتقبض عليه بس ناسه لسّه بره. حد بيحاول يفرّقك عنه
وجزء آخر — جزء أقدم وأعمق. الجزء الذي خانها عمّها وباعها وعلّمها ألّا تثق في أحد
— يقول وإذا كان صحيح؟ إذا كنتي بس فصل جديد في نفس اللعبة؟
نظرت ليدها. اليد التي أمسكت بيده. اليد التي ضغطت على جرحه. اليد التي زرّرت قميصه.
وللمرة الأولى منذ ليلة الرصاصة… شعرت بالبرد.
—
حين نزل فهد من مكتبه الساعة السادسة مساءً — بعد أن قضى اليوم في مكالمات مع المحامين والأمن
رغم كتفه المكسور — وجد كيان جالسة في غرفة الطعام.
لكنها لم تكن كيان التي تركها في الصباح.
ظهرها مستقيم بشكل مبالغ. عيناها جافّتان وباردتان. يداها متشابكتان أمامها على الطاولة بإحكام
الطريقة التي يجلس بها شخص يمنع نفسه من الانفجار.
لاحظ فهد من اللحظة الأولى. عيناه التي تقرأ الناس كما تقرأ الأرقام التقطت التغيير كله في ثانية.
جلس مقابلها ببطء. لم يتكلّم. انتظر.
الصمت مدّ جسوره بينهما
جسور من حديد .
— في حاجة يا كيان؟
— مين سارة؟
الاسم وقع عليه كقنبلة.
لم يتغيّر وجه فهد. لم ترمش عيناه. لم يتحرّك عضل في فكّه.
لكن يده اليمنى — اليد السليمة الموضوعة على الطاولة — انقبضت ببطء
— مين كلّمك عن سارة؟
— مش مهم مين.
— كيان. مين كلّمك؟
— رقم مجهول على موبايلي.
بنت اسمها نادين. قالتلي إنك عملت نفس اللعبة قبل كده. ديون وأرض وجواز. وبعدين طلاق. هل ده صحيح يا فهد؟
نظر في عينيها.
رأى فيهما شيئاً أخافه أكثر من رصاصة كوستا — رأى فيهما شكّ.
الثقة الهشّة التي بدأت تنمو بينهما — تلك الزهرة الرقيقة التي نبتت من وسط الأنقاض — يراها الآن تذبل أمام عينيه.
— سارة موجودة فعلاً
ارتجفت كيان. حاولت ألا تُظهر ذلك لكنه رآه.
— وإنت اتجوزتها؟
— أيوه.
— عشان أرض؟
— لأ.
— لأ؟
— القصة أعقد من كده يا كيان.
— طيّب بسّطها. عشان أنا بنت بسيطة وفهمي على قدّي.
هل اتجوزت سارة وطلّقتها بعد ما أخدت اللي إنت عايزه؟
ضرب فهد الطاولة بيده السليمة. الأطباق اهتزّت وانسكب كوب الماء.
كيان ارتعشت لكنها لم تتحرّك من مكانها — عيناها ثابتتان عليه.
— أنا ماخدتش حاجة من سارة سارة كانت غلطة
— غلطة؟
نهض ومشى في الغرفة بخطوات عصبية.
يده المكسورة في الحمّالة ويده السليمة تمرّ على شعره بعنف.
— سارة… كانت قبل أربع سنين.
أبوها كان بيتعامل معايا في صفقة أرض في الساحل. عرض عليا يجوزنى بنته عشان يقوّي العلاقة التجارية بينّا.
أنا وقتها كنت في مرحلة مختلفة — مكنتش بفكّر. مكنتش بحسّ. كنت ماشي على خط واحد: فلوس وسلطة وبس. فقبلت. .. اتجوزها
— وبعدين؟
توقّف عند النافذة. ظهره لها.
— سارة كانت بنت كويسة. بس أنا مكنتش راجل كويس ليها.
مكنتش بروّح البيت ومكنتش بتكلّم ومكنتش بحسّ بيها وهي موجودة ولا وهي مش موجودة.
عشان ببساطة يا كيان… مكانش عندي حاجة أديهالها.
مكانش عندي قلب أحطّها فيه. بعد سنة هي اللي طلبت الطلاق. وأنا وافقت. وأدّيتها كل حقوقها وأكتر.
— هي اللي طلبت الطلاق؟
— أيوه.
— والأرض؟
— الأرض فضلت باسم أبوها. ماخدتش منها حاجة.
التفت نحوها. مشى حتى وقف أمام الطاولة من الجهة الأخرى. وضع يده السليمة على سطح الطاولة ومال للأمام ونظر في عينيها مباشرة.
— وهقولك حاجة تانية يا كيان.
اللي اتصلت بيكي — نادين
اسمها نادين بدوي. كانت صاحبة سارة وأنا فصلتها من شركتي من سنتين بتهمة اختلاس
ومن ساعتها وهي بتحاول تأذيني بأي طريقة
والرقم ده وصلت لموبايلك المشفّر يعني في تسريب من جوّه. وده هتعامل معاه
سكت لحظة ثم أكمل بصوت أنعم — أنعم بكثير
— بس اللي بيوجعني مش كلام نادين
اللي بيوجعني إنك صدّقتي.
ارتعشت كيان
— أنا ماصدّقتش. أنا سألت.
— لأ يا كيان.
إنتي لو ماكنتيش صدّقتي مكنتيش هتسألي بالشكل ده.
عينيكي مش بتعرف تكدب. ومن ساعة ما قعدت على الكرسي ده وإنتي مش بتبصّيلي زي ماكنتي بتبصّيلي من يومين.
بتبصّيلي بنفس النظرة بتاعت أول يوم دخلتي فيه القصر. النظرة اللي بتقول إنت عدوّي وأنا فكرت الأيام دي إننا عدّينا المرحلة دي.
دمعة سقطت من عينها. مسحتها بعنف.
— أنا… أنا عمّي باعني يا فهد. أقرب إنسان ليّا خاني.
إنت عايزني أثق فيك مية بالمية بعد أسبوعين؟
أنا بحاول. بحاول بكل اللي فيّا. بس كل ما أبدأ أحسّ بأمان بيجيلي صوت من جوّايا بيقول
متأمنّيش… هيخونك زي ما عمّك خانك
— أنا مش عمّك.
— عارفة.
— وأنا مش هخونك.
— مش عارفة أصدّق.
وقف الاثنان في مواجهة بعضهما.
فهد مشى حول الطاولة. ببطء. خطوة خطوة. حتى وقف بجوارها. مدّ يده اليمنى وجذب كرسيّها ليستدير نحوه. ثم جلس على الارض امامها.
فهد السيوفي جلس أمامها.
الرجل الذي لا ينحني — الذي ترتعش أمامه إمبراطوريّات
— جلس على ركبته الواحدة أمام فتاة في الثانية والعشرين وعيناه في مستوى عينيها.
— فهد…
— اسمعيني.
أمسك يدها بيده السليمة. لف أصابعه حول أصابعها.
— أنا عمري ما قعدت كده لحد. إنتي الوحيدة اللي تستاهل أشوفها من تحت مش من فوق.
دموعها تسيل بلا توقّف.
— أنا مش كامل يا كيان. وأنا فعلاً كنت وحش قبل ما أعرفك.
اتجوزت سارة واتعاملت معاها كأنها قطعة أثاث.
وطلّقتها لأني مكنتش بني آدم. ودي حقيقة مش هخبّيها عنّك.
بس اللي حصل معاكي مختلف. إنتي مش صفقة ومش ورقة ومش حتّة أرض.
إنتي بنت الراجل الوحيد اللي شافني إنسان لمّا كل الدنيا شافتني صفر. وإنتي…
بلع بصعوبة.
— وإنتي الوحيدة اللي لمّا بتبصّيلي بلاقي نفسي. مش فهد السيوفي رجل الأعمال.
مش الفهد. أنا. الواد اللي كان بيشيل حديد وبينام في مخزن وبيحلم يبقى حد.
— فهد…
— سيبيني أخلّص. أنا مش بعرف أقول اللي بحسّ بيه.
دي أول مرة بحاول. وممكن أبوّظ كل حاجة وأنا بتكلّم. بس اللي أعرفه… إن من يوم ما دخلتي الصالون ده وإنتي بترتعشي وبصّيتيلي بعينيكي البندقية دي…
حاجة جوّايا اتحرّكت. حاجة أنا فكرتها ميتة بقالها ولمّا وقعتي وأنا مسكتيك…
عرفت إن الحاجة دي مش ميتة. كانت بتستنّى.
رفع يدها ووضعها على صدره فوق قلبه مباشرة.
— حسّي.
أحسّت. تحت أصابعها نبض سريع قوي فوضوي — نبض رجل يمشي على حافّة هاوية لكنه يرفض أن يقع.
— ده نبضك يا كيان. من يوم ما دخلتي حياتي وقلبي بينبض بشكل مختلف.
وأنا بسمّيكي في سرّي من أول يوم قلب الفهد. عشان من غيرك… أنا واقف بس مش عايش.
انهارت.
أنحنت من الكرسي ولفّت ذراعيها حول رقبته ودفنت وجهها في كتفه السليم.
بكاء حقيقي عميق اهتزّ منه جسدها بالكامل. وهو لفّ ذراعه اليمنى حولها وضمّها بقوّة رجل يمسك آخر شيء يملكه في الدنيا.
بقيا هكذا.
على أرضية غرفة الطعام. هو جالس وهي منحنية عليه. بينهما كتف مكسور ودموع ساخنة ورائحة ياسمين وسنوات من الوحدة تذوب ببطء.
ساعة.
ساعة كاملة لم يتحرّك أيّ منهما.
حين رفعت رأسها أخيراً كان وجهها متورّماً من البكاء وأنفها أحمر وشعرها ملتصق بخدّيها المبلّلين.
نظر لها وابتسم ابتسامة أذابت آخر جبل في صدره.
— شكلك وحش.
ضحكت من خلال دموعها. ضحكة مبلّلة صادقة مشرقة كأول شعاع شمس بعد عاصفة.
— وإنت شكلك أوحش. قاعد على الأرض بكتف مكسور.
— أيوه. ركبتي بتموّتني من ربع ساعة بس مكنتش هقوم.
— ليه؟
— لأنك كنتي محتاجاني.
ساعدته على الوقوف. استند عليها بثقل جسده — لأول مرة يستند على أحد بإرادته —
قالت
— فهد.
— أيوه.
— أنا هتصل بنادين.
تصلّب.
— وأقولها إن جوزي مش محتاج حد يدافع عنه. هو محتاج بس حد يفهمه. وأنا بدأت أفهمه.
نظر لها بعينين لمعتا ببريق غريب — ذلك البريق الذي رأته ليلة الرصاصة.
— وأنا هتّصل بسارة.
— ليه؟
— عشان أعتذرلها. متأخّر أربع سنين بس… إنتي علّمتيني إن الوقت عمره ما يكون متأخّر.
—
في تلك الليلة لم يقف فهد أمام بابها.
لم يحتج.
لأنه للمرة الأولى ترك باب غرفته مفتوحاً.
وفي الفجر — حين سقط ضوء الشمس كانت كيان جالسة على حافّة سريره
تقرأ كتاب هندسة بينما هو نائم بجوارها.
يده اليمنى ممدودة نحوها وأصابعه ملفوفة حول طرف فستانها — كأنه حتى في نومه يتأكّد أنها لم تمشي.
لم تمشي.
ولن تمشي.
والنبض بينهما لم يعد خافتاً ولا مرتعشاً ولا خائفاً.
أصبح نبضاً واحداً.
—
لكن في مكان ما في قلب القاهرة — في زنزانة مؤقّتة بمقرّ الأمن كان إلياس كوستا يجلس على أرضية باردة ومعصمه المكسور مُثبّت بجبيرة مؤقّتة.
ابتسم.
لم يكن يبتسم لأنه مهزوم. بل لأنه يعرف شيئاً لا يعرفه فهد بعد.
أخرج من جيبه الداخلي ورقة صغيرة مطوية
فتحها.
كان عليها رقم هاتف واحد وتحته كلمتان
الأخ الأكبر
ابتسم كوستا وأكل الورقة.
الفصل التالي اضغط هنا
•تابع الفصل التالي “رواية نبض الفهد” اضغط على اسم الرواية