رواية صغيرة ولكن الفصل الخامس والخمسون 55 – بقلم الهام رفعت

بعـد مــرور عــام …..

أفاقها من نومهــا ألم شديد تمالك منهـا ، فوضعت يدها عفويــا علي بطنها وأطلقـت أنينـا مسـموعا ، ضغطت مريم علي شفتيها متألمه ، وبدأت تلتقط أنفاسها رويدا رويدا للسيطره عليه ، ولكنه أزداد مره أخري فصرخت :

– آه …..ألحقني يا حسام بولد .

انتفض حسام من نومه مفزوعـا ، واستدار نحوها وحدق فيها بقلق ملحوظ ، بينما هي ظلت تطلق صراخاتها المتألمه ، فهتف هو بقلق :

– مالك يا مـريم .

كزت علي أسنانها بغيظ وصرخت فيه :

– دا سؤال ….مش شايف شكلي …انا بــولد … وديني المستشفي بسرعه …وكلم ماما …

وثب من علي الفراش ملتفتا حوله قائلا بحيره :

– حاضر يا حبيبتي هلبس واكلمهم .

مريم بألــم : بسرعه يا حسام مش قـادره .

ارتدي ملابسه علي عجاله ، ثم توجه لهاتفه لمحادثه والدته وإبلاغها بالأمر واتاه صوتها فهتف بلهفه بائنــه :

– ألحقيني يا ماما …مريــم بتولد .

فاطمه بصوت ناعس : طيب أهدي يا ابني …كله خيـر .

حسام بضيق : خير ايه يا ماما …دي تعبانه قوي .

مريم بصريـخ : ألحقني يا حسام…. الواد هينزل مني .

حسام بفزع : سامعه يا ماما .

فاطمه بتفهم : يا حبيبي دا عادي …هي بس علشان أول مره وكده .

حسام بنفاذ صبر : يعني أعمل ايه دلوقتي .

فاطمه بإستنكار : تعمل ايه !..خدها المستشفي طبعا… ولا هتولدها أنت …..روح وإحنا هنحصلك ..

استيقظ الراقد بجانبهـا ونظر اليها وأستفهم عابسا :

– بتكلمي مين يا فاطمه .

اغلقت هاتفها واجابته وهي تنهــض :

– قوم يا فاضل ….مريم بتولد .

انتصب فاضل قائلا بقلق جلي : يا حبيبتي يا بنتي ..بتولد .

فاطمه بتعقل : دا طبيعي …يلا نلبس ونروحلها .

نهض هو الآخر قائلا بمعـني :

– انا هتصل بزين علشان يحصـلنا ، ولم يتواني في إمساك هاتفه وهم بالإتصال به ، وأنتظر رده عليه .

أعلن هاتفـه عن إتصال ما ، فتَنَمُّل في نومته وفتح عينيه بتثاقل ، وانتبه لهاتفه ومد يده ليلتقطه من علي الكومود بجانب الفراش ، ثم أجاب زين بصوت ناعس :

– أيوه .

فاضل بلهفه وقلق : أصحي يا زين أختك بتولد .

زين بنعاس : أختي مين 

فاضل بإنزعاج : مريم يا زين …اصحي كده وفوق علشان تحصلنا

زين بتأفف : حاضر يا بابا …هكلم حسام وأشوفه فين .

فاضل بقلق : بسرعه يا زين …متسيبهوش لوحده .

القي هاتفه بجانبه ونهض من علي الفراش بفتور ، وتوجه لإرتداء ملابسه وهو يزفر بضيق ….

~~~~~~~

وصل حسام بزوجته إلي أحدي المستشفيات الخاصه وهو حاملها بين ذراعيه ، وتقدم نحو الداخل بها وهتف عاليا :

– ألحقوني بسرعه …مراتي بتولد .

توجه نحوها المسعفون وقاموا بوضعها بحذر علي السرير النقال وولجوا بها مسرعين نحو غرفه العمليات ..

ثم التقط حسام هاتفه الذي يهتز داخل جيب بنطاله واجاب بلهفه:

– زين تعالي …مريم بتولد 

زين بهدوء : اهدي يا حسام …قولي بس انت فين .

املي عليه حسام عنوان المشفي وتوجه الأخير صوبها وهو يتمتم ببعض الكلمات المتأففه …

ظل حسام مرابطا امام غرفه العمليات آخذا الردهه أمامها ذهابا وإيابا وهي يردد :

– يارب تقوم بالسلامه يارب ….يارب ولد يارب …….

بعد قليل وصل زين وولج داخل المشفي وتوجه علي الفور لصديقه الجالس ومنكسا رأسه ويبدو عليه القلق واقترب منه وحدثه بهدوء :

– حسام ..

رفع حسام رأسه نحوه ورد بإرتياح :

– زين …الحمد لله انك وصلت ….الدكتور لسه بيولدها .

جلس زين بجواره بلا مبالاه جليه واردف ببرود :

– عادي يا حسام ….كله بيولد .

لم يتعجب حسام بروده وتفهم ضيقه من اخته وما فعلته معه ، فمنذ ان سافرت زوجته وهو يتحاشي الحديث معها ولم يتناسي ما حدث ، رغم محاولاته الكثيره للتقريب بينهم ..

وصل فاضل وفاطمه للمشفي وادار زين رأسه تجاههم ونهض علي الفور لإستقبال والده ، وانزعج من قدومه قائلا :

– كنت خليك يا بابا …انت تعبان .

فاضل بقلق وهو يجلس : لازم اطمن عليها يا زين …اصلا مكنش هيجيلي نوم ولا هرتاح .

فأقترب حسام من والدته قائلا بقلق :

– انا خايف يا ماما …كان شكلها تعبان قوي 

فاطمه وهي تربت علي ذراعه :

– متقلقش يا ابني …دلوقتي الدكتور يطلع ويطمنا .

بعد قليل خرج الدكتور ، فهرع حسام نحوه وتشبث به قائلا :

– واد صح .

فاطمه بشهقه لائمه : واد ايه يا ابني …مش نطمن عليها 

حسام بتلعثم : قصدي .هي عامله ايه .

الدكتور بجديه :

– الحمد لله ولدت والبيبي بخير …وكمان شويه هيطلعوه دلوقتي .

فاضل متنهدا بإرتياح : الحمد لله يارب …بقيت جد وبقي عندي حفيد .

فاطمه بابتسامه فرحه : وانا كمان بقيت جده .

نظر لهم حسام بتهكم من افعالهم الصبيانيه ، ثم وجه بصره لزين قائلا :

– عقبال ما أشوفك أب يا زين .

ابتسم له زين بتصنع ، بينما حدثه فاضل بتمني :

– عقبال ما أشوف ولادك يا ابني …هيبقوا الأغلي عندي .

حسام بغيظ : هيبقوا الأغلي عندك …طب انا هقول لمريم .

فاضل بضحك : لا والنبي………..

______________________

علمت بولاده أختها ، فذهبت لزوجها كي يفيق من نومه الثقيل ، وقامت بخبطه بقوه علي ظهره ، فأستيقظ الأخير وعلامات الإنزعاج باديه عليه وهتف بعبوس :

– فيه ايه يا سلمي …انتي مش عارفه اني جاي متأخر .

ردت بضيق : قوم …مريم أختي ولدت 

معتز بإنزعاج شديد : ما تولد …وانا أعملها ايه .

سلمي بشهقه مغتاظه : قوم وديني ليها …عايزه اطمن عليها وأشوفها …يلا قوم .

اعتدل في الفراش وتأفف قائلا بضيق :

– ببطنك دي ….انتي مش عارفه انك قربتي تولدي انتي كمان.

سلمي بإصرار : انا كويسه ومش تعبانه ….قوم عايزه أطمن عليها .

نفض الفراش بعنف ونهض وهو يتمتم ببعض الكلمات المنزعجه ويلعن يومه ، وتتبعته بعدم فهم واستفهمت :

– انت بتقول ايه …مش سامعه .

معتز بنفاذ صبر : بقول ايه يعني ….حضري الموغات …….

______________________

وقف ملازما للممرضه ويتابعها بسعاده جليه حتي وضعت طفله في مضجعه ، وما ان دلفت للخارج حتي اسرع نحوه وقام بحمله بين احضانه ، فحدثته والدته بتعقل :

– براحه يا حسام …دا لسه صغير .

حسام وهو يتفرس ملامحه : 

– حاضر يا ماما ….يا جمالو يا جمالو ..

فاضل ماددا ذراعيه : اديني اشوفه يا حسام 

حسام علي مضص : طيب …براحه عليه 

فاضل بضيق : هات يالا .

التقطه فاضل وقبله بحنان ، ونظر لوجهه قائلا :

– حفيدي حبيبي ….شبه زين بالظبط 

نظر له حسام بضيق قائلا : دا ابني انا .

فاضل بلا مبالاه : ايوه ابنك ….بس كله زين .

حسام بإعتراض : لا دا ابني ….وشبهي انا 

زين بضحك : خلاص يا حسام عرفنا 

حسام بإنزعاج : ما هو يتقولو شبهي …يا هولع في المستشفي دي .

فاضل وفاطمه بنبره سريعه : شبهك ………

____________________

في فــرنســا …….

ارتدت ملابسها وقامت بوضع بعص مساحيـق التجميل التي باتت تجيد وضعهـا ، ثم تركت لشعرها العنان وانسدل مغطيا ظهرهـا  بأكمله ، ثم التقطت حقيبتهـا وسارت للخارج بخطوات رشيقـه .

انتظرها كعادته اسفل المبني التي تقطن فيه ورآها قادمه فركض نحوها قائلا بلهفه :

– ايه يا نانو …أتأخرتي كده ليه 

ارتدت نظارتها الشمسيه وردت بتأفف :

– هنقف نتكلم كده …هنتأخر .

اومأ مالك برأسه وزم شفتيه متذمرا من معاملتها معه ، فمنذ ان خطت قدامهم هنا ولم تعيره إهتمام ، رغم ما يفعله كي تشعر به ، وقطع تفكيره صوتها :

– ايه يا ابني انت …علي طول سرحان كده …هنتأخر علي الكورس .

مالك متأففا بضيق : انا مش عارف احنا دلوقتي في أجازه …المفروض نخرج ونتفسح ونرتاح …دا إحنا تعبانين طول السنه …تيجي سيادتك وعايزه تاخدي كورس فرنساوي .

لوت ثغرها للجانب في تهكم وردت :

– خلصت الإسطوانه اللي حفظتها دي .

مالك بإنزعاج :

– عايزين نتفسح يا نانو …احنا تقريبا مش بنخرج ابدا 

نور بلا مبالاه : اوكيه هنبقي نخرج …يلا علشان منتأخرش .

مالك علي مضض : طيب ….

_______________________

ولج الممرضون بمريم الغرفه وهي محموله علي السرير النقال ، فتقدم حسام منها قائلا بسعاده :

– براحه علي ام الواد الله يكرمكم 

مريم بابتسامه : خايف عليا يا حبيبي 

حسام بسعاده : طبعا يا روحي ….أومال مين اللي هيرضع الواد

حدجته بسخط ، ثم وجهت بصرها لأخيها قائله بابتسامه محببه :

– انا مبسوطه قوي يا زين انك جيت .

رد ببرود : عادي …دا واجب عليا .

اومأت برأسها وعبست بوجهها قائله : ميرسي .

فاطمه بابتسامه فرحه : حمدالله علي السلامه يا بنتي ..يتربي في عزكم .

فاضل بنبره حانيه وهو يقبل جبينها : حمدالله علي سلامتك يا حبيبتي ..

مريم بابتسامه باهته : ميرسي قوي 

حسام وهو يعطيها الولد : خدي يا حبيبتي رضعيه .

مريم بتعجب : علي طول كده .

حسام مؤكدا : طبعا..دا أفضل وقت ترضعي فيه ،رضعي رضعي وانا هداري عليكي ، مش هخلي زين يشوف .

مريم بفرحه : بتغير عليا حتي من أخويا 

حسام بنفي : لا طبعا ….دا ممكن يحسد ابني وهو بيرضع .

نظرت له شزرا وردت بضيق : هاته عايزه اشوفه .

زين بهدوء وهو ينهض :

– انا همشي بقي يا حسام ….عايز حاجه .

فاضل بتعجب : لسه بدري يا زين …علي طول كده .

زين بجديه : معلش يا بابا …انا عندي شغل كتير .

حسام بود : سيبه يا عمي …متشكر قوي يا زين …طول عمري لما بعوز حاجه بلاقيك .

زين بهدوء : عن إذنكم .

دلف للخارج فهمت مريم قائله بضيق :

– هيفضل زعلان مني كده علي طول .

حسام بضيق : ياما حذرتك يا مريم ….بس انتي مسمعتيش كلامي .

مريم مبرره : انا عملت كده علشان مش عيزاهم يندموا بعد كده.

ولجت سلمي عليهم قائله بمرح :

– حمدالله علي السلامه يا مريوم .

مريم بابتسامه واسعه : لوما حبيبتي .

احتصنتها بشده وتابعت بفرحه :

– جيتي علشان تشوفيني …ربنا ما يحرمني منك .

سلمي بابتسامه محببه : اومال هاجي لمين يا قمر .

معتز غامزا : مبروك يا حس …هتسموه ايه بقي ؟.

مريم بجديه : زين طبعا .

سلمي بإعتراض : شوفي أسم تاني …علشان لو جبت ولد هسميه زين .

مريم بضيق : مش الدكتوره قالتلك بنت .

سلمي زاممه شفتيها : برضه ..يمكن تغلط ويطلع ولد .

مريم بإصرار : انا وحسام اتفقنا خلاص …هنسميه زين .

حسام بصوت خفيض للغايه :

– ايوه يااختي سمي زين ..وابوكي يقول شبهه ..متكتبوه بإسمه بالمره .

معتز متدخلا : خلاص يا سلمي …الدكتوره اكدت انها بنت .

سلمي بغيظ : أهو انا بقي نفسي تطلع بنت علشان اسميها نور وأخليها تطلع عين أبنك ..زي ما نور مطلعه عين زين وتعباه كده .صمتت مريم وتجهمت ملامحها ، فأحست سلمي لما تفوهت به واستطردت بندم :

– انا مقصدش يا مريم ..انا…..

قاطعتها مريم بضيق : خلاص يا سلمي….مكنتش أعرف اني قاسيه كده .

حسام متدخلا لتهدأه الأجواء :

– ليه النكد ده بقي …لما تجيبي ولد ابقوا سموه حسام علي وزن حمام …..

_____________________

طرق مكتب ابنه ، وتفاجئ الأخير به ونهض مرحبا :

– معقول يا بابا جاي بنفسك ….كنت قولي وأنا آجي لحضرتك .

فاضل بهدوء ظاهري : مفرقتش يا حبيبي …أقعد عايز اتكلم معاك .

جلس زين فتابع فاضل بعتاب :

– هتفضل لحد امتي يا زين تعامل أختك كده .

تنهد زين بقوه ، فأستطرد فاضل موضحا :

– مريم كانت بتدور علي مصلحتها و…..

قاطعه زين بضيق بائن : مصلحتها انها عوزاها تبعد عني 

فاضل بتفهم موضحا أكثر :

– دا برضه يا زين علشان مصلحتها ومستقبلها …ومش عايز حد يقول اني حرمتها من حاجه …انت عارف ان عمك موصيني عليها وعلي املاكها .

زين بجديه : لو سمحت يا بابا ..الموضوع ده انا تعبت منه ..ومش عايز أتكلم فيه تاني .

فاضل ساخرا :

– الموضوع ده انت ليل ونهار بتفكر فيه …حتي مافيش بنت بتقربلها …والعوامه اللي غيرت كل حاجه فيها ، ثم مد يده ليمسك بذلك الإطار الصغير الموضوع بداخله صور لها وابتسم له قائلا :

– مجنناك يا زين

زين بثبات زائف : عاوز ايه مني دلوقتي يا بابا .

أبتسم فاضل وحدجه بخبث قائلا :

– هي حلوه …وبتسألني عليك علي طول …وزعلانه إنك مش بتكلمها .

اعتلي وجهه ابتسامه هادئه ، فأستأنف فاضل لائما :

– ليه بقي مش بتكلمها ..لما هتتجنن عليها كده .

زين بهدوء زائف : هي خلصت السنه دي .

اومأ فاضل برأسه قائلا : ايوه  ، تابع بتساؤل :

– بعتلها فلوس .

زين مؤكدا : آه بعتلها  .

فاضل بترجي :

– ابقي كلم مراتك يا زين …دا حتي مبسوطه قوي انك لحد دلوقتي متجوزتش .

زين ساخرا : هبقي أتجوز علشان تتبسط أكتر …………

___________________

في المستشفي……

تنهدت مريم بإرتياح حين غادر زوجها وزوج اختها وتركوهم سويا ، لتتحدث معها بأريحيه ، فأردفت مريم بمعني :

– الحمد لله انهم مشيوا .

حدجتها سلمي بإستغراب قائله : ليه بقي عايزاهم يمشوا .

ابتسمت مريم بخبث وردت : عايزه أخلي نور تنزل مصر .

سلمي غامزه بعينها : عايزه تصلحي غلطك اللي عملتيه .

تنهدت الأخيره بقوه قائله :

– زين صعبان عليا قوي …مكنتش أعرف ان قسيت عليه من غير ماخد بالي …محستش بيه …كنت فكراه شايفها زي اي بنت .

سلمي بعبوس : كان بيحبها قوي يا مريم …وكان باين عليه .

مريم بإنزعاج  : وبحس نور هي كمان زعلانه مني .

سلمي بإستنكار : لا ما أظنش …نور عمرها ما تزعل مننا .

مريم بحماس : انا فكرت في خطه كده علشان نقدر نخليها ترجع مصر .

– خطه ايه دي .

قالها حسام وهو يولج الغرفه ومظلما عينيه نحوها بخبث .

شهقت مريم وردت : مافيش .

ولج معتز هو الآخر قائلا بمغزي :

– أحنا سمعنا كل حاجه …أعترفوا أحسن .

مريم متأففه بنفاذ صبر :

– بفكر اخلي نور وزين يرجعوا لبعض …ولازم تنزل مصر الأول.

حسام محدثا معتز بإعجاب :

– برافو عليك يا معتز …خليتها تقر وتعترف .

مريم بضيق : يعني انتو مسمعتوش حاجه وإحنا بنتكلم .

حرك معتز رأسه نفيا ورد :

– لأ ..دي حيله بنستخدمها علشان المجرم يعترف .

سلمي بسخط : مجرم …شايفنا عصابه .

حسام متدخلا بجديه : احنا عايزين خطه محبوكه علشان نعرف ننزلها  .

سلمي بمعني : علي فكره ..نور مش حابه قوي هناك …كل مره بكلمها فيها زي ما تكون عايزه حد يقولها انزلي وتعالي.. 

حسام بجديه : كويس قوي …يعني مش هنتعب في اننا نخليها تنزل .

سلمي مؤكده : نور ما هتصدق تنزل علشان تشوف زين …خصوصا انه مش بيكلمها .

معتز بتساؤل : طيب هتعملوا ايه علشان تنزل .

مريم بخبث : انا خططت خلاص…وهقولكم علي الخطه ..

سلمي ..معتز ..حسام ..بإنصات : هي ايه ؟……..

________________

في فرنســـا …

انتهي الإثنان من الكورس الخاص بتعلم اللغه الفرنسيه ، ودلفوا للخارج وكعادتها معه غير عابئه لثرثرته معها ، فإنزعج منها مالك ، لأنه لم يستطع ان ينسيها حبه رغم بعدها عنه ، وقف الإثنان أمام السياره وتشدق مالك بضيق :

– معاملتك معايا بقت وحشه قوي يا نــور …احنا لما كنا في مصر كنتي بتعمليني احسن من كده .

نور بلا مبالاه : مش فاهمه …يعني عاوزني اعملك ايه .

مالك بإنزعاج : نخرج شويه مع بعض …نتفسح ..نعمل اي حاجه …بحسك دايما بعيده عني ومش حاسه بيا خالص .

نور بتأفف شديد :

– مالك انا جيت هنا علشان ادرس ….مش علشان أخرج مع سيادتك وأتفسح .

مالك بإستنكار:

– بس احنا دلوقتي في أجازه يا نور …ومن حقنا نخرج شويه مع بعض ، تأففت نور فأستطرد بحب وهو يقترب منها :

– نور انا بحبك قوي .

رفع أصبعها محذره في وجهه :

– اوعي تقربلي….انا مش صغيره علشان اسمح لحد يعملي حاجه …وقلتلك قبل كده انا حبيبي واحد بس….وهو زين .

حدجها بغصب شديد ورد بحزن في نبره صوته :

– وانا يا نور …انا بحبك أكتر منه ..وهو اصلا مش…

قاطعته بجديه :

– عايز تقول انه مش بيحبني …عادي قوي …انا بحبه وهو مش بيحبني ، تابعت ساخره :

– ما أنت بتحبني وأنا مش بحبك .

ثم تركه يشتغل غيظا وحقدا علي مدي حبها الجارف له ، واردف في نفسه بعتاب :

– ليه كده يا نور …انا بعدتك عنه وانتي لسه بتفكري فيه .

اخرجه من شروده صوتها :

– أركب علشان نمشي ……..

~~~~~~~

بعد قليل وصلت للمسكن القاطنه فيه ، وترجلت صاعده للأعلي ولم تتفوه معه بكلمه ، وصلت نور لغرفتها ووضعت حقيبتها وعلي الفور أخرجت هاتفها وفتحته لتنظر الي صوره التي بحوزتها ، تطلعت نور عليه بمشاعر متلهفه للأقتراب منه ، وضعت الهاتف علي شفتيها مقبله صورته بحب واشتياق لرؤيته امامها ، واخرجت تنهيده متيمه معبره عن ما تشعر به ، وما يهون عليها عدم إرتباطه بإحداهن ولعنت اصرارها العنيد في البعد عنه .

أستلقت نور علي الفراش متذكره قربه منها وذلك التسجيل الصوتي لحديثه التي ارسلته لها ابنه عمها ، أعتلي وجهها فرحه عارمه كونه لم يتناسي حبها رغم تخليه عنها وتركه لها ، والزمت بعدم إخبار احد بأمر أنفصالها عنه ، حتي لا تمنح فرصه لأحدهم في التقرب منها …

قطع خلوتها رنين هاتفها الممسكه به واجابت علي الفور قائله :

– لوما حبيبتي …وحشتيني .

سلمي بنبره حزينه زائفه :

– وانتي يا نانو …وحشتيني قوي .

نور بإستغراب : انتي زعلانه ولا ايه .

ردت سلمي ببكاء مصطنع : مريم ولدت وتعبانه قوي يا نور .

نور بصدمه : ايه ..، تابعت بقلق :

– طيب وهي عامله ايه دلوقتي 

سلمي بحزن زائف : عايزه تشوفك يا نور …بتقول نور وحشتني وعايزه اشوفها .

نور بحيره : طب اعمل ايه …انزل يعني …انا عايزه اشوفها .

سلمي بإستنكار : اكيد طبعا لازم تنزلي …وبكره لو تقدري ..دي هتموت وتشوفك ..اصلها تعبانه ، ثم مثلت البكاء وتابعت بخبث دفين :

– هتيجي يا نور مش كده .

نور مؤكده : طبعا هاجي …بكره هكون عندكم .

تهللت اساريرها وتابعت بحزنها الزائف : بجد يا نور .

نور بجديه : ايوه بجد …اصلا انا متضايقه هنا وانتوا وحشتوني قوي .

سلمي بمعني : خلاص احجزي بكره ..بس متقوليش لمالك انك جايه .

نور بإنصياع : متخافيش مش هقوله ….خليه يعرف لوحده .

سلمي بابتسامه واسعه :

– خلاص يا نانو ..هخلي معتز يحجزلك من هنا ..وانتي كل اللي عليكي تيجي وبس ..وهيستناكي بنفسه في المطار .

نور بموافقه : اوكيه …كويس قوي .

انهت نور معها الإتصال وتنهدت بإرتياح وتسطحت علي الفراش واخرجت ضحكه فرحه كونها ستراه حتما في الغد ، وحمدت الله علي تلك الفرصه الذهبيه كما تسميها واردفت بنبره هائمه :

– بحبك قوي …ووحشتني ………

________________________

تركه والده زائغا في حياته السابقه معها ، ولمساته لها التي تثير مشاعر منكوده متغلغله لأعماق قلبه محفوره لها فقط ، نظر زين لصورتها الموضوع أمامه بحب عاشق ، ثم وملس بأصابع يده علي ذلك الزجاج الذي يعيق لمس صورتها ، وتنهد بإرتياح لإطمئنانه عليها وتمنيه السعاده لها ، ورغم بعدها عنه وتلهفه لرؤيته وتمنيها له فقط ترك لها حريه الإختيار ، وتعمد عدم الحديث معها لمنع تاثيره الزائف عليها كما يظن البعض ، خاصه اخته التي لم تشعر بمدي معاناته ، ولكنه اخذ موقفا معها وهو عدم الحديث معها كما السابق ..

ولج حسام عليه بمرحه واخرجه من شروده قائلا :

– اهلا بخال الواد .

زين بابتسامه : تعالي يا حس .

جلس حسام قبلته وتابع زين بتساؤل :

– جاي ليه وسايب مراتك .

حسام غامزا : جيت ابشرك 

زين بعدم فهم : تبشرني بأيه 

حسام بابتسامه بلهاء : سمينا زين .

زين بابتسامه عذبه : بجد ..

حسام بمغزي : مريم اصرت نسمي زين .

زين بضيق : اصرت…ليه ..انت مكنتش موافق .

حسام بإعتراض : انا كنت عايز اسمي حسام …بس لقيت مش هينفع ، تابع ببلاهه :

– كفايه عليكم واحد بس 

حدجه زين بسخط ، فاستأنف الأخير بمغزي :

– سيبك انت من الموضوع ده …وقولي …انت لسه مابتكلمش نور .

زين بتساؤل : بتسأل ليه ؟ .

حسام بخبث : موحشتكش .

زين بتأفف : حسام انا مش عايز أتكلم في الموضوع ده تاني .

حسام بمكر : كنت فاكرها وحشتك …بس طلع العكس …هخلي مريم تقولها بقي …اصل نور مفكره انك بتحبها .

حدجه زين بضيق ورد بإنفعال :

– ملكش دعوه انت ومراتك بأي حاجه …كفايه اللي عملته قبل كده .

حسام بتفهم : مريم بتحبك قوي يا زين …وكانت نيتها خير …وهي ندمانه علي تدخلها واللي هي عملته .

زين بنفاذ صبر : اللي حصل حصل وخلصنا …سبوني في حالي بقي ..

حسام مضيقا عينيه : افهم من كده انها وحشاك بقي 

لم يجبه زين فاستطرد بخبث :

– طيب لو قولتلك انها جايه …هتعمل ايه …

زين :………………………………..