رواية كارثه في العسكر الفصل الخامس 5 – بقلم صباح عبد الله
في الحمّامات زينة داخلة بتتوجّع جامد وهي بتسند على الحيطة.
زينة
آه…اه ياني.. آه يا جسمك يابا، اللهم ييجي لك شلل في بطنك ومصرينك يا زياد الكلب، روح منك لله، كان يوم أسود يوم ما شوفتك ويوم ما الحمار اللي سجلني اشتغل..
تسكت فجأة لما تسمع صوت واحد بيتكلم من داخل الحمّام.
الشخص
أنا زي ما وعدك هخلّصك منه، بس أهم حاجة تخف إيدك شوية وتحول اللي اتفقنا عليه.
صمت، بعدين نفس الصوت يقول.
الشخص
لا ما تقلقش، زياد بيثق فيّا ومستحيل يشك في حاجة، وهنخلص عليه من غير حتى ما يحس بحاجة.
زينة تحط إيدها على بوقها بصدمة وهي بتقول.
زينة
يا لهوي، إيه اللي بسمعه ده؟ ومين ده اللي عايز يقتل التور ده؟
زينة تسكت فجأة وبعدين تقول بحنق.
زينة
طيب ما يغور في داهية، أنا مال أهلي، حتى هنرتاح من جحش زيه..
تسكت شوية وبعدين تقول بزعل.
زينة
بس حرام، الجدع هيروح فطيس زي الكتكوت، وحتى لو هو تور أكيد عنده أم وأب وأخ، وممكن متجوز وعنده عياله..
تسكت شوية وبعدين تقول بحيرة.
زينة
طيب ما أنا ممكن أودّي نفسي في مصيبة وأروح فطيس في الرجلين، أنا أحسن حاجة أحط جزمة في بوقي وأسكت، مش هعمل فيها المفتش كرومبة ولا الديستي، أنا ما سمعتش حاجة..
فجأة تسمع صوت الباب بيتفتح، تجري تستخبى ورا باب الحمّام وتمد راسها علشان تشوف مين اللي هيطلع.. فجأة يطلع إيهاب من حمّام.. زينة تبرق بصدمة.
زينة
أحييه، صاحبه اللي عايز يقتله، يا لهوي..
فجأة ظابط (سعيد) يطلع وهو بيبص حواليه يتأكد إن مافيش حد شايفه، ويطلع من غير ما زينة تشوفه.. زينة واقفة في الحمّام بتكلم نفسها.
زينة
يا لهوي، أنا لو فتحت بوقي بكلمة ده هيقتلني، والتور مستحيل يصدق إن صاحبه عايز يخلص عليه..
تسكت شويه وبعدين تكمل كلامها بحيرة
زينة
أعمل إيه دلوقتي؟ أريح دماغي ولا كأني سمعت حاجة، ولا أريح ضميري وأعرّفه، واللي يحصل يحصل وخلاص.
تفضل واقفة بتفكر بحيرة وخوف.
————-
في مكتب زياد
قاعد زياد بيكتب حاجة في ورقة…. وإيهاب معاه.
إيهاب
حرام عليك والله يا زياد على اللي إنت بتعمله في البت دي.
زياد بغيظ
تستاهل علشان تحترم نفسها وتقصر لسانها شوية.. ثم أنا مش أول مرة أعلّق حد وأجلده، إنت إيه اللي مزعلك مش فاهم؟
إيهاب بتوتر
هااا.. لا عادي مافيش حاجة، دي بس علشان بنت وكده مش هتستحمل وممكن يحصل لها حاجة مش أكتر..
زياد يبص له بشك.. وقبل ما يرد الباب يخبط ويدخل سعيد.
سعيد
زيزوا حبيبي؟ إيه الأخبار؟
زياد باستغراب
سعيد… إنت رجعت من إجازتك إمتى؟
سعيد يقعد على الكرسي..
سعيد
لسه طابب، مش مكمّل نص ساعة بس قلت أجي أطمن على حبيب قلبي اللي وحشاني.
إيهاب بقرف
نفسي مرة تتكلم عدل وأحس إنك راجل زي باقي الرجالة.
سعيد
إيه ده؟ هوبه، حبيبي إنت هنا والله وما خدتش بالي..
إيهاب بزهق
ليه؟ اللوح الشفاف قدامك؟.. ولا إنت اللي داخل مش شايف غير مصلحتك؟
سعيد
الله، مالك يا عم إيهاب منفوخ علينا ليه كده؟ ما تهدي اللعب شوية، ما خدتش بالي، إيه لازمة الكلام والتلقيح ده؟
زياد بصوت عالي
باااااس! إنتُم الاتنين صدّعتونا، يا تقعدوا زي الناس، يا كل واحد يقوم يشوف شغله وتسيبوني أشوف شغلي.
سعيد وإيهاب يبصّوا لبعض بغيظ، وسعيد يقوم وهو بيقول.
سعيد
طيب أنا همشي دلوقتي وأبقى أعدّي عليك في وقت تاني يا زيزوا..
سعيد يسيبهم ويطلع وهو بيقول بغيظ.
سعيد
أنا لازم أعمل حاجة أخلص من الزفت إيهاب ده، مش هعرف أعمل حاجة من اللي في دماغي طول ما هو قريب من زياد كده..
بعد ما سعيد يطلع، إيهاب يبص لزياد وهو بيقول.
إيهاب بشك
خد بالك يا زياد من الواد ده، أنا مش برتاح له ولا لكلامه، مش عارف ليه.
زياد
إيه يا عم إيهاب؟ إنت مش طايق الراجل بجد ولا إيه؟
إيهاب
أنا فعلاً والله مش بطيقه لله كده ولا بينزل ليا من الزور، أنا عليّا حذّرتك وإنت حر.
إيهاب يقوم وهو بيقول.
إيهاب
أنا همشي دلوقتي علشان سايب الدفع في ساحة التدريب، وإنت خد بالك من نفسك.
إيهاب يسيبه ويمشي، وزياد يهز راسه بيأس.
زياد
أنا والله مش عارف الاتنين دول مولدين على راس بعض ولا إيه الحكاية؟
يسكت شوية، وفجأة تيجي زينة على باله، يبتسم وهو بيقول.
زياد
أقسم بالله البت دي كارثة بكل المقاييس وربنا ابتلني بيها.
———
برّه المكتب
زينة ماشية بتتسحب على طرطيف رجليها وهي بتبص حواليها بخوف زي الحرامية.. في نفس الوقت سعيد ماشي سرحان.. ومن غير قصد الاتنين يخبطوا في بعض، زينة تقع على ظهرها.
زينة بوجع وغضب
ما تفتح يا عم الحمار إنت، بدل ما إنت ماشي تشطح في خلق الله كده.
سعيد يبص لها باستغراب
سعيد
إنتِ بتعملي إيه هنا يا شاطرة؟
زينة بغيظ
جاية ألعب، تحب تلعب معايا؟
سعيد يغمز لها
والله حد يشوف القمر ويقول له لا؟ بس تحبي نلعب فين وأنا تحت أمرك.
زينة تبص له بقرف.
زينة
اللعب في حواجبك، يمكن خلقتك دي تتعدل شوية.
سعيد
ليه بس كده يا قمر؟ خلقتي مزعلاكي في إيه؟
زينة
روح بص في مراية وإنت تعرف، ما تقرفناش.
زينة تبرق بخوف أول ما تشوف إيهاب جاي عليهم.
زينة بخوف
طيب أنا همشي دلوقتي، سلام.
زينة تسيبه وتمشي، وسعيد يبص لها باستغراب وهو بيقول.
سعيد
مالها دي؟ شافت عفريت ولا إيه… بس يا لهوي، البت حتة
صاروخ.
إيهاب جاي من وراه يسمع كلامه.
إيهاب باستغراب
هي مين دي اللي صاروخ؟
سعيد
إنتُم أندال تصدق؟ يعني تستغلوا غيابي وتجيبوا قمر في الكتيبة من ورايا ينفع؟
إيهاب باستغراب
إنت قصدك على إيه؟ مش فاهم. ثم لو إنت وسخ مش لازم الكل يكون زيك؟
سعيد بغيظ
ما هو واضح إنكم نضاف، ومن النضافة قربت تنور.. بس
قولي، القمر اللي أنا لسه شايفه ده تبع مين؟
إيهاب بشك
إنت قصدك على زينة؟
سعيد بابتسامة
هي اسمها زينة، وهي زينة فعلاً، بس تبع مين برضه وبتعمل إيه هنا؟
إيهاب بقرف
محكوم عليها تقضي جيش بسبب غلطة في الاسم. بس يكون أحسن لك تخليك بعيد عنها، أنا بقولك أهو.
سعيد بسخرية
ليه، هو القمر يخصك في حاجة؟
إيهاب بحنق
طالما في دفعتي تبقى تخصني يا فالح، وأنا حذّرتك وإنت حر.
سعيد يسكت شوية وبعدين يقول باستغراب..
سعيد
دفعتك يعني مع زياد بس… زياد قبلها إزاي دي؟ ده يشوف العمى وما يشوفش واحدة ست قدامه.
إيهاب بزهق
أهو قدامك، روح اسأله وما تقرفش أهلي على المسا..
إيهاب يسيبه ويمشي، وسعيد يبص ناحيته بخبث وهو بيقول.
سعيد
والله شكلك في اعدادات موتك أيامك بقت معدودة يا هوبة.
•تابع الفصل التالي “رواية كارثه في العسكر” اضغط على اسم الرواية