رواية حتى التقينا الفصل الخامس 5 – بقلم اروى
نزلت لشقتنا و فضلت ادور دوا لصداع و افتكرت ان ماما معاها واحد دخلت اوضتها و فضلت ادور عليه لحد ما لقيت إشاعة غريبة في درج المكتب
و مستوعبتش اللي فيها و عيني بدأت تدمع مسحت دموعي و نزلت لشقة جدو عند ماما و انا ماسكة الاشاعة و داخلة بيها للمطبخ
قولت و انا بحاول امسك اعصابي و دموعي
-اي دة؟
بصت للملف و بان عليها الأرتباك
حسيت ان مقدرتش اكتم دموعي اكتر من كدة و الكلام مش قدرة اقوله
-أنتِ هتسافري علشان دة…… ليه؟… ليه مقولتيش؟
-مش عايزاكي تقلقي… انا هروح و الدكتور قالي ان كل حاجة هتبقى تمام و الحالة هتستقر
مسكت ايدها
-أنتِ شايفة ان دي حاجة تستخبى
-عارفة يا شهد… بس مكنتش عايزة اقلقك عليا
سكت وانا بستوعب و حاسة ان الكلام طار من دماغي و محسيتش بنفسي غير وانا اترميت في حضنها
-انا هاجي معاكي
-مش هينفع…
رفعت راسي و مسحت دموعي
-اي هو اللي مش هينفع… قولت هاجي معاكي مش هستحمل ابقى بلقانة عليكي طول الوقت
مسكت وشي بحب وقالت
-و جودك هناك مش هيبقى ليه لازمة و غير كدة الدكتور
محضر ليا كل حاجة هناك هروح اعمل العملية و هبقى في المستشفى تحت الملاحظة شوية لحد ما ابقى تمام و هرجع تاني… لو روحتي معايا مش هتعرفي تشوفيني في المستشفى…. اسمعي الكلام لو سمحتي
قالت اخر كلامها و مسكت ايدي بحنان سكت و مش عارفة اعمل ايه طلعتها برة المطبخ و قولت ليها انا هعمل الاكل علشان ترتاح و هي رفضت بس اصريت
عملت الاكل و حطيتو على السفرة و شيلت اكل و عملتو ليحيى و طلعتو
وقفت قدام الباب و خبط فتح إبراهيم و اديت ليه الاكل و نزلت و مكنش هممني اي حاجة غير امي دلوقتي هعمل ايه يعني ايه مش هينفع اروح معاها
نزلت اكلت و رجعت لشقتنا غسلت وشي و طلعت فوق للسطح الدنيا بدأت انها تليل و الهوا كان هادي قربت من السور و سندت ايدي عليه و بصيت للسما و بفكر اي اعمل لماما و بيجي في بالي اكتر من سيناريو في دماغي افرض حصلها حاجة هناك و هي تكون لوحدها افرض معرفتش تتفاهم مع الناس هناك
غمضت عيني و في ثانيا افتكرت كل لحظة عيشتها معاها. قعدت و سندت راسي على السور و بحاول افكر في حل مينفعش اسافر معاها لأن كل حاجة اترتبت و مينفعش امنعها لأن كدة هيكون خطر عليها
كل اللي بيخطر في بالي ازاي هفضل كل يوم استنى مكالمة بس تطمني مش عايزة اعيش الشعور دة
فضلت اقرقد في ظوافري و بفكر في كل حاجة و فتحت التلفون أبحث اكتر عن مرضها و ادرسو كويس و اعرف اعراضة ايه و علاجة و اي اسباب حدوثة
حاولت افهم على قد ما اقدر و ابص على الاشاعات والتقارير و أقرأها كويس لحد إلى نسبة ما فهمته شوية
محستش بالوقت و لقيت يوسف دخل السطح و معاه مكالمة في التلفون مسحت دموعي وو قفت
خلص مكالة و جه و قف جمبي
-مالك؟
رديت بهدوء
-مليش…. امتى جيت؟
-من شوية كدة جيت اطمن على يحيى
هزيت راسي بهدوء و كنت ساكتة و بص للورق اللي في الاشاعة و مسكو
-اي دة؟
كنت ساكتة و مش سامعاه اصلا بسبب تفكيري فتح الورق و بص فيه
-دة دة… بجد؟
هزيت راسي بهدوء
-ليه مرات خالي مقلتش
-مكنتش عايزة تعرفني…. علشان مجيش معاها
سكت يوسف شوية و كملت كلامي
-انا مش عارفة حاجة… حاسة بعجز و مش عارفة اعمل حاجة….. فكرة اني ممكن لقدر الله ماما يحصل لها حاجة او تبعد عني او تسبني مش هستحملها
قولت كدة و مسحت دموعي
و فضل يوسف يهديني لحد ما نزلت لشقتنا و دخلت رميت نفسي على السرير و كنت عايزة اليوم دة يخلص
صحيت تاني يوم مرديتش اروح الشغل و اكتفيت اني اقعد مع ماما اليوم كله و يحيى اصر انه يروح الشغل رغم ان جدو و إبراهيم قالو ليه انهُ يرتاح بس هو راح
نزلت انا و ماما نقعد مع جدو و قولت لجدو ان ماما تعبانة و هو متصدمش علشان تقريبا كدة كنت انا المغفلة الوحيدة اللي موجودة حاولت مكبرش الموضوع و بمشي الدنيا علشان خاطرها و هي استغلت دة و فتحت موضوع يحيى تاني قدام جدو بس انا رفضت كالعادة و هي فضلت تزن عليا اليوم كله و بتقولي انه جواز على ورق بعد ما هي ترجع و بسبب زنها ليا و ضغط عليا هي و جدو قولت بنفاذ صبر
-موافقة
قولت كدة و هم فرحو
-بس بشرط…… لما ترجعي بالسلامة هنرجع اسكندرية
قولت كدة و بصو لبعض و بعدين وافقوا و اتفقو ان المأذون هياجي بكرة بليل علشان ماما هتسافر بعد بكرة الفجر
طلعت لأوضتي و قعدت اقلب في الموبايل بملل لحد ما روحت في النوم
صحيت تاني يوم و جهزت علشان اروح الشغل
-انتِ رايحة فين؟
-رايحة الشغل
-في حد يوم كتب كتابه يروح الشغل
ابتسمت بسخرية
-كتب كتابة…
-اة… انتِ نسيتي ولا ايه؟
-لا… بس انتِ عارفة اللي فيها يا ماما
قولت كدة و طلعت و قفلت الباب و لقيت يحيى نازل على السلم و بص عليا و بصيت عليه من بعيد لحد ما نزل و نزلت وراه ركب العربية بس كبريائي منعني اركب معاه و هو فضل و اقف بالعربية دقايق و لما شافني مركبتش داس على الدركسيون
قولت بلا مبلاه
-إبراهيم هيوصلني
قولت كدة و بان عليه الضيق و مشي فضلت واقفة مستنية إبراهيم لحد ما وصل ركبت معاه
-ليه مركبتيش مع يحيى و خلتيني اجي اوصلك؟
-مشوفتش اخر مرة عاملني ازاي….
-انتو متخانقين
-لا
-امال ايه
-معرفش…. هو بقى غريب و بيتعامل معايا مرة حلو ومرة لا
-اي الجو دة… على حد ما سمعت ان كتب كتابكم انهاردة
ابتسمت بسخرية و سندت ايدي على شباك العربية
-الخبر لحق ينتشر
-امال…. دي مرات خالي رنت عليا مخصوص ابقى شاهد
قال كدة و ضحك و كمل كلامه
-بس بصراحة انتو لايقين على بعض
فتحت بوقي و برقت بصدمة
-نعم؟…. لايقين على بعض ايه يا عم انت؟… دة جواز كدة و كدة.. قابلت عليه بس علشان لما ماما ترجع اسافر اسكندرية و مشوفش اشكالكم تاني
-مقبولة منِك…. بس لو مش و اخدة بالك انك في عربيتي و ممكن دلوقتي انزلك عادي زي الحيوان المتشرد و شوفي بقى مين هيلحقك
ابتسمت بخوف و قولت
-لا يا إبراهيم انت قلبك ابيض… متعملهاش
-لا اعملها عادي
قولت بصوت واطي
-عارفة انك ندل و تعملها بس بصبر نفسي
-سمعتك على فكرة
قال كدة و ضحك و ركزت في الطريق لحد ما وصلنا
نزلت من العربية و كنت همشي بس و قفني صوت إبراهيم
-اعملي حسابك مش هقدر ارجعك انهاردة
-امال مين هيوصلني
-عندك يحيى… و لو مش عاجبك.. تعالي مشي احسن
قال كدة و اتحرك بالعربية وفضلت ابرطم بصوت عالي
لفيت و سمعت صوت ضحك عمر قرب مني بهدوء و قال
-ازيك يا بشمهندسه
ابتسمت على كلمته وقولت بهدوء
-تمام…. و انت
-الحمدلله…. يا ترى عرفتي حلمك الحقيقي؟
هزيت راسي بنفي
-انشغلت بشوية حاجات الفترة الاخيرة و معرفتش افكر…. مبقتش فارقة اصلا…. دة واقعي و مش هقدر اغيرة
-اي الكلام الكبير دة؟
اتنهدت بهدوء و شوفت يحيى اللي كان قاعد مع السكرتيرة بتاعته و بيتلكمو طبيعي و محستش بنفسي و انا بقول بضيق
-بيتكلم معاها عادي و انا مصدرلي الوش الخشب
رد عمر بعدم فهم
-ايه؟
-لا ولا حاجة
قولت كدة و سبتو و دخلت للموقع اشوف شغلي و طلعت جبت قهوة و بصيت للمكان اللي بنقعد فيه انا و يحيى و لقيتو لسا قاعد مع ملك
اخدت شفطة من القهوة و قولت
-بيعملو ايه كل دة
-قصدك ملك؟
بصيت ليه بخضة
-خلعتني يا بني…. انت بتطلع ليا مرة واحدة
-مش قصدي… بس تقريباً كنتي بتكلمي عن استاذ يحيى و ملك مظبوط
هزيت راسي بهدوء
-هما دايما كدة تحسيهم قريبن من بعض اوي
هزيت راسي بخفة و بصيت ليه
-قريبين من بعض؟
-اة… تعتبر ملك اليد اليمين لأستاذ يحيى….. و لما اتعينت جديد للشركة كانو ساعات بيطلعو عليهم اشاعة انهم هيتخطبو و كدة….
قاطعتة بعصبية
-كفاية….. انت هتجيبلي شريط حياتها من ساعة ما اتولدت مش عايزة اعرف حاجة
قولت كدة و ضحك بخفة
-بتضحك على ايه؟
-مش باين عليكي انك مش عايزة تعرفي اصل من ساعة ما حضرتك و صلتي و انتِ عينك منزلتش من عليهم
-انت مراقبني بقى؟
-لا مش قصدي بس انتِ اللي باين عليكي
قال كدة و كملت شرب القهوة و رجعت كملت شغلي تاني لحد ما جات الساعة خمسة و يحيى نادى عليا علشان نروح ركبت معاه العربية من غير كلام و لا هو كمان كان بيتكلم لحد ما وقف عند محل دهب
-انزلي
-هاا؟
-انزلي
قال كدة و نزل و انا نزلت وراه و دخلنا للمحل
-نقي اللي عايزاه
قال كدة و بصيت بهدوء و لقيت دبلة هادية و شكلها حلو شاورت عليها و الراجل جبها و لبستها و رفعت ايدي قدام وشي و ابتسمت تحت نظرات يحيى
-هتاخدي حاجة تاني
هزيت راسي بنفي
-اظن دي كفاية
قولت كدة و حاسب يحيى و ركبنا العربية و فضلت ابص كل شوية على الدبلة اللي في ايدي و ابتسم لحد ما وصلنا للبيت نزلت واتجهت لشقتنا و فتحت الباب لقيت ماما قاعدة مع جنى و روان سلمت عليهم و دخلت اوضتي لقيت فستان ساك طويل لونو ابيض و دخلو جنى و روان و ماما وراهم
قالت روان
-اي رأيك؟
فضلت باصة للفتسان من غير اي تعابير في وشي
-معجبكيش؟…. يحيى قالي اجيبو على زوقك
اتنهدت بهدوء
-مكنش لي لزوم… كنت هلبس اي حاجة
ردت جنى
-ازاي يعني؟…. تلبسي اي حاجة دة كتب كتابك
-يلا بقى….. علشان انتِ جيتي متأخر
اخدت الفستان و دخلت اخد شاور و لبستو و قفت قدام المراية و بدأت البس الطرحة و حطيت ميكأب خفيف و حاولت اعيش مع الجو حتى لو مش جوازة حقيقية و قفت امي جمبي و حضنتي من ظهري
-قمر…
بصيت ليها بحب
-بجد؟
مسكت وشي بلطف
-عندك شك في كدة…. بنتي دايما قمر
ابتسمت و بصيت لنفسي في المراية و كملت كلامها
-مش عايزاكي تزعلي مني لو غصبت عليكي الموضوع بس مش هقدر امشي و انا ابقى خايفة عليكي دة هيكون شاغل بالي و مش هعرف اعمل حاجة طول ما انا قلقانة عليكي و واثقة في يحيى انهُ اكتر شخص هيخلي بالو منِك
حبيت اغير الموضوع… علشان عيني بدأت تدمع
-انتِ هتخليني اعيط ولا ايه؟
مسكت تلفوني و قولت بحب
-تعالي نتصور
قولت كدة و رفعت شاشة الفون و فضلت اتصور معاها و شاركتنا روان و جنى لحد ما دخل جدو و باس راسي و قال ليا ان المأذون وصل مسكني من ايدي لحد ما وصلنا للسطح اللي انبهرت بيه لانهم ظبتو و حطو كراسي و بالرغم ان كان كتب الكتاب في ناس بسيطة و مش كتير بس كنت فرحانة من قلبي اني و سطهم
قعدت و قعد يحيى اللي كان لابس قميص ابيض و بنطلون رصاصي و جدو و المأذون
يصيت على ماما و الفرحة اللي باينة عليها و قطعني صوت الماذون و هو بيقول
-امضي يا عروسة
اتنهدت بهدوء و بصيت لماما و مسكت القلم و مضيت على الورق و بعدين يحيى و بعديها تعالت الزغاريد
مشي المأذون و كتب الكتاب اتحول لقعدة عائلية كنا كلنا بنتكلم مع بعض لحد ما نروح نوصل ماما للمطار
عدة الوقت و ماما ودعت جدو و روحت معاها انا و يحيى نوصلها لحد المطار خلص يحيى اجراءات المطار و انا كنت قاعدة مع ماما بحاول امسك دموعي على قد ما اقدر
-عايزاكي تبقي قوية و تستجيبي بسرعة علشان ترجعيلي في اسرع وقت
ابتسمت ماما و هزت راسها بحب
-حاضر… و انتِ خلي بالك من نفسك و من يحيى انتو بقيتو مسؤولين من بعض دلوقتي
-بطلي الكلام دة….. انا متجوزاه علشان هيسليني بس في غيابك
ضربتني بخفة في كتفي
-اي هيسليكي دي…. افتكري انك دلوقتي بتكلمي على جوزك
ابتسمت و سكتت ثواني و بعدين طبطبت عليا بهدوء
-ان شاءلله الله ارجع و اشوف فرحك اللي هيبقى كبير و اشوف احفادي
-ان شاءلله
قولت كدة و حضنتها بقوة و كان نفسي الزمن يوقف شوية علشان اقعد معاها اكتر مدة مش مستوعبة لحد دلوقتي اني مش هشوفها سنة. قرب يحيى و قال بهدوء
-خلصت كل الاجراءات مفضلش غير ان حضرتك تركبي
ابتسمت امي ليه و مسكت كتفه و بصت عليا
-خلي بالك عليها يا يحيى
ابتسم و رد بهدوء
-اكيد…. متقلقيش عليها
حضنتة و كانت ماسكة ايدي بقوة لحد ما فلتتها و ابتسمت لينا و لفت علشان تركب الطيارة فضلت كل شوية تبص علينا لحد ما اختفت من قدامي حسيت ان كل القوة اللي كنت بمثلها اختفت اول ما هي اختفت من قدام عينيا و عيني دمعت مع اني مكنتش عايزة اعيط بس كتمت صوتي و اكتفيت اني اعيط من غير صوت.
بص يحيى ليا و مسكني قعدني على الكرسي و فضل يهديني و شال ايدي من على بوقي بهدوء مسحت دموعي لحد ما هديت و ركبت العربية مع يحيى
فتحت الشباك و سندت راسي عليه و كنت بحاول افكر في اي موضوع إلا اني افكر حياتي هتمشي ازاي من غير ما امي تكون موجودة حاولت اصبر نفسي ان السنة هتمر بسرعة و ان زي كدة السنة الجاية ان شاءلله هكون جايبها من المطار غمضت عيني و روحت في النوم و بعد ساعتين صحاني يحيى قدام العمارة و كانت الشمس طلعت و مد ايدو ليا بالمفتاح و اخدتو بهدوء و قال
-روحي نامي…. انا هطلع للموقع
قال كدة و مكنتش قادرة اتكلم ف اكتفيت اني ابتسم و طلعت من العربية و اتجهت لشقة يحيى او المفروض تبقى شقتنا فتحت الباب و غسلت وشي و اتوضيت وصليت الفجر و اول اوضة قابلتني دخلت رميت نفسي على السرير من كتر التعب
صحيت بعد العصر و مكنتش حاسة بأي نشاط و لا قادرة اعمل حاجة قعدت في الصالة و فتحت التلفون و قلبت فيه بملل لحد ما سمعت صوت فتح الباب و دخل يحيى و كان باين عليه التعب بصلي و ابتسم و دخل الاوضة بتاعتة و قفل على نفسة لبست الاسدال و نزلت قعدت مع جدو لحد اذان العشاء صليت انا و هو و دخلت عملت العشا و حطيتو على السفرة و اتصلت ليحيى علشان ينزل ياكل بس مردش طلعت فوق و فتحت الباب و خبطت باب الاوضة لحد ما فتح و لما شافني طلع من الاوضة و قفل الباب.
مهتميتش وقولت بهدوء
-ليه مش بترد على التلفون؟
-عامله صامت علشان نايم
-اغسل وشك و تعالى كل
قولت كدة و سيبته و نزلت لجدو لحد ما نزل يحيى و اكلنا.
خصلنا اكل و دخلت اغسل المواعين و عملت لينا شاي و قعدنا كلنا في البلكونة لحد ما خلص اليوم و رجعنا انا و يحيى البيت. مكناش بنتكلم كتير او يعتبر مكناش بنتكلم اصلا دخلت للأوضة اللي نمت فيها و اعتبرت انها اوضتي خلاص وقفلت الباب و هو كمان دخل اوضتو وقفل الباب
قعدت على السرير و فتحت التلفون و رسايل الواتساب من بدري مفتحتوش و لقيت اكتر من رسالة من رنا كانت بتطمن فيهم عليا.
رديت و طمنتها عليا و لقيت روان منزلة ستوري انها العروسة الجاية
-العروسة الجاية ازاي بقى؟
-اممم نسيت اقولك ان إبراهيم هياجي يتقدم ليا بكرة
-هااا…. بتهزري؟
-هو دة في هزار
-وليه انا اخر من يعلم؟..
-كنت عايزة اقولك بس حسيت انك مش فاضية محبيتش اشغلك
-اي الكلام العبيط دة؟….
-اعملي حسابك هتيجي ليا بكرة هاا
-عينيا… بس مش هتفلتي من خناقة مني أنتِ و البارد اللي مقليش بردو
-متقوليش على قرة عيني كدة
قالت كدة و ضحكت و قفلت التلفون و نمت.
صحيت تاني يوم و اتوضيت و صليت و طلعت دريس بيج و طرحة بني خلصت و طلعت برة لقيت يحيى جهز نزلنا مع بعض و وصلنا للموقع نزل يحيى و نزلت معاه و اتجهنا للمكان اللي بنقعد فيه من غير اي كلام
قربت مننا ملك بأبتسامة و قالت بحب
-صباح الخير
رد يحيى بأبتسامة
-صباح النور يا ملك… عاملة ايه؟
-تمام
بصيت ليه لأنه مكلنيش… حتى مفكرش يصبح عليا
بصت عليا ملك و كملت بأبتسامتها
-صباح الخير يا بشمهندسه
شيلت نظارة و ابتسمت
-صباح النور
قولت كدة و رجعت بصت ليحيى
-مستر يحيى كنت عايزاك دقيقة
قالت كدة و اخدها يحيى و بعدو عني بشوية و فضلت توريلو حاجة في التابلت
فضلت اقلدها و قولت بسخرية
” مستر يحيى كنت عايزاك دقيقة”
قولت كدة و لقيت صوت ضحك جاي من ورايا بصيت ولقيت عمر
-يبني بقى…. هو انت بتطلع لازم تخوفني
-مش قصدي والله بس انتِ اللي بضحكيني… نفسي اعرف اي مشكلتك مع ملك
-مشكلة… مفيش مشكلة…. هي بس حساها عيلة مسهوكة مش اكتر
-والله انتِ ظلماها ملك بنت مؤدبة اوي و طموحة كمان
قال كدة و حسيت ان كل كلمة عمر بيقولها للبنت دي نسبة اني مش طايقاها بتزيد اكتر
رجعت اشعل نفسي بأي حاجة و فضلت اتمشى شوية
لحد ما بعدت شوية من مكانهم
سبتهم و وقفت في حتة و رديت على التلفون اللي كانت رنا صاحبتي بتتصل
-الوو
-الو يا شهد ايه يابنتي مسمعناش صوتك من ساعة ما وصلتي
-لا والله مش قصدي بس كنت بقعد مع جدو
-ايه صوت الدوشة دي
-علشان انا ف….
بس قاطع كلامي لما شوفت يحيى كان بيجري عليا وبعدني من المكان اللي واقفة فيه لأن كان في خشبة كبيرة كانت هتوقع عليا قربني يحيى ليه بس الخشبة لمست ايديه و هو كان ماسكها بوجع
قفلت من رنا صاحبتي بسرعة و مسكت ايديه
-انت كويس يا يحيى
-انتِ ايه اللي وقفك في الحتة دي؟…. مش شايفة العمال فوقيكي بيشتغلو
-دة وقت خناق؟…. انت كويس ايديك واجعاك صح؟
تعالى اوديك المستشفى
-لا انا كويس بس ايدي…. تقريبا التواء
-لا لا…. ايديك احمرت اوي تعالى انا هوديك المستشفى
قولت كدة و مسكتة وركبته العربية
و ركبت انا علشان اسوق بس افتكرت اني عمري ما سوقت
بصلي يحي بأستغراب
-ما تتحركي
-انا مبعرفش اسوق
-طيب ليه خلتيني اقعد هنا؟…. قومي انا هسوق
-هتسوق ازاي و ايديك….
بس هو نزل و فتح الباب علشان انزل
بدلنا الاماكن و هو طلع على المستشفى روحنا للدكتور و عمل ليه اشاعة و قال ان دة شرخ و انه هيحطله جبيرة و قال هتقعد اسبوعين
رنيت على إبراهيم ياجي ياخدنا لأن يحيى مش هيعرف يسوق رجعنا البيت و جدو اطمن على يحيى و طلعنا لشقة و يحيى دخل اوضتو و انا نزلت عملت اكل و اتغدينا و يحيى اخد العلاج و نام
-معلش بقى يا عريس
ابتسم إبراهيم
-لا عادي كلو فدى يحيى
-وليه مقولتش بقى؟
-والله قولت لجدو يقولكم بس تقريباً نسى
-اممم هشوف الموضوع دة مع جدو
قولت كدة و لقيتو سحب نفسه ومشي و انا طلعت فوق نمت و صحيت بعدها بكام ساعة و طلعت دريس سماوي و طرحة بيضاء و طلعت لقيت يحيى لابس قميص اسود و بنطلون ابيض.
حبيت احسن علاقتي بيحيى زي ما كنا في الاول لأنه اتغير مرة واحدة اتجاهي و قولت انا و بهز راسي بنفي
-لا لا لا…
بصلي بأستغراب
-اي هو اللي لا
-لبسك مش لايق على لبسي معلش…
-نعم؟
-قولت لبسك مش لايق روح غير…. انا لابسة دريس سماوي انت كمان تلبس قميص سماوي
-دة ليه؟
ارتبكت من سؤالة شوية
-علشان… علشان… انا بشوف الناس بتعمل كدة.. مجتش عليا يعني…
-لا
-بطل غلاسة يا يحيى…
قولت كدة و جريت على اوضتة علشان اطلع ليه قميص سماوي فتحت الباب و دخلت بس الصدمة اني لقيت صوري انا و يحيى لما كنا صغيرين متعلقة في كل حتى في الاوضة
___________________________
•تابع الفصل التالي “رواية حتى التقينا ” اضغط على اسم الرواية