رواية رواسي الدهر الفصل السابع 7 – بقلم روح الدليمي
➰➰➰➰➰➰➰➰➰➰➰
انفتح باب الغرفه بطريقه همجيه، رفعت راسي
شفته رسيم.. زفرت نفسي متنرفزه و عطت بي
رواسي:أنتَ متستحييي؟؟ شعندك باقي هنا!!
رسيم:ما اتحرك خطوه وحده اذا متمشين ويايه!
رواسي:والله يا رسيم اذا متروح منا اطيح حظك و اشتكي عليك
دخل ادم للغرفه سحبه من ايده و ضربه بوكس
بقو واحد يضرب بالثاني و اني اتفرج عليهم
عفتهم ثنينهم يتضاربون و طلعت من الغرفه
فتحت تلفوني و اتصلت على عمي..
اول ما جاوبني گلت
رواسي:عمووو تعااال بسرعه فدوه
سالم:شبيج بنتي شكوو
رواسي:رسيم هنا و هوَ و ادم واحد خله دم الثاني بطوله
سالم:جاييي جاااييي
سديته من عنده و كعدت على القنفه، و همَّ بس اصواتهم
طالعه.. واحد يصيح و يفشر على الثاني
واحد يكول للثاني أنتَ اخذتها مني
ضحكت عليهم كل عقلهم ديتعاركون علمودي
ماكو دقايق و تفلش الباب من قوه الدك
كمت فتحته صار بوجهي عمي و ولده اخوان ادم
سالم:وينهم؟
رواسي:بالغرفه
دفعوني و دخلوا ركض عليهم، مشيت وراهم
عجبتني المسرحيه الي دتصير اريد اعرف نهايتها شنو حتكون!
اخوان ادم تجمعو عليهم بعدوهم عن بعض
و عمي وگف بنصهم و عاط بيهم
سالم:مخابيييل انتووو!! شواربكم تارسه وجوهكم و تتعاركون علمود مره؟
حجيت من يمي مستهزئه
رواسي:والله عمو عادي حتى الصرصور عنده شوارب
رسيم:لججج و تالي وياج!!! تأدبييي رواسي
سالم:مالكككك حجي وياها، عندك حجي تحجي ويايه اني
اني مسؤول عنها!
رسيم:اريد اخذ مرتي ليش متنطوهاااا
سالم:مرت ابني هاااي منين اجت و صارت مرتك
ادم:مو مرتي يابه
سالم:تضحكووون عليه انتو، مو عقدت عليها و جبتها هنااا
رسيم:رواسي حامل ب ابنييي زواجها من ابنك باطل
انصدم من كلام رسيم اندار عليه و خزرني
و عاط بيه..
سالم:روااااسيييييي، شيمضرططط هذااا
نزلت راسي خجلت منه ما عرفت شنو اجاوبه
ادم گال
ادم:اي رواسي من تزوجتها جانت حامل
تخبل عمي علينه و صار يسب بيه و يغلط
رسيم فلت روحه من اخوان ادم و هجم على عمي
يريد يضربه، ركضت عليه وكفت كدامه و حجيت بجديه
رواسي:تأدب و امشييي اطلع منااا، ترفع ايدك على عميي؟؟؟
سحبني من ايدي و بلحظه وحده حط سلاحه براسي
فرني عليهم صار ظهري على صدره و عاط
رسيم:الي يخطييي خطوه وحد بس او يجي ورايه، اموتها و اموت روحي وراها
سالم:مينلام ابوها لما رفضك على همجيتك هاي
حسيت على مغص قوي ببطني، حضنت بطني بيدي
و عطت ب الم…
رواسي:يممههه بطنييي
رأساً نزل سلاحه عن راسي و فرني عليه
صار يباوع عليه بخوف وقلق گال
رسيم:باباتي شبيج؟؟
رواسي:ولكممم بطنييي رااح اموووت
كعدت بالگاع و صرت اعصر ببطني، تگطعت تگطع
من الوجع.. حاروا بيه و اختصبوا خبص
رسيم شالني و راد يطلع عاط بي عمي
سالم:ويييين ماخذهاا
رسيم:اعمى أنتَ متشوف حالتها؟؟؟
طلع بيه بدون ميسمع منهم و اخذني للمستشفى
الدنيا ليل و ماكو دكاتره.. رأساً دخلوني للطوارئ
و اجت دكتوره فحصتني و گالت
_عندج تقلصات قويه كلش و هالشي ابد مو زين
رواسي:الطفل مابي شي؟؟
_حالياً لا بس كثرت التقلصات تأثر على حملج و ممكن يصير عندج اسقاط، راح انطيج مثبتات و من يصير عندج اي الم تاخذين حبوب للتقلصات
اندارت على رسيم و گالت
_حضرتك زوجها؟
رسيم:اي
_راح انطيها مسكن هسه و بس يخلص تكدر تطلعها، بس حاول تخليها ترتاح و بدون جهد.. و اي زعل او عصبيه ابعدها عنهن
رسيم:المهم هيَ بخير الطفل يجي غيره
_مابيها شي، الحمدلله على سلامتها
راحت الدكتوره و اجت الممرضه حطتلي
الكانونه و بطل مغذي… شوي شوي صار يخف الوجع عندي و حسيت بنعس مو طبيعي
رفعت عيني على رسيم و گلت
رواسي:لشوكت تبقى تعذبني رسيم؟
رسيم:يا راحتي أنتِ، ارجعيلي اريدج اني
رواسي:بس اني ما اريدك
مد ايده على راسي و صار يمسح عليه بهدوء و گال
رسيم:تريديني روسيه، متكدرين بدوني أنتِ
رواسي:منكدر نرجع، عرفت كلشي اني
ضحك بكسره و گال
رسيم:صدكيني احبج مستحيل أاذيج بعد، الانتقام عمى عيوني و اذيتج في سبيل اجبر ابوج يعترف على روحه و ينسجن
رواسي:اني ضحيه حالي حال امك، و أنتَ و ابويه
الي جنيتوا علينه
رسيم:ارتاحي هسه ما اتحمل يصير بيج شي والله، و بعدين نتفاهم و نحل كلشي
غمضت عيوني و استسلمت للنوم.. ما حسيت للصبح
فتحت عيوني اني بغرفتي ببيت اهلي
نهضت روحي من الفراش و صرت اباوع حواليه
جنطتي و اغراضي كلهن بالغرفه
شلون اجيت لهنا و شوكت ما اعرف
كمت من فراشي و طلعت من الغرفه نزلت جوه
شفت ابويه گاعد ويه عمي و ادم يسولفون
بس شافوني سكتو… تقدمت عليهم و حجيت
رواسي:كملو ليش سكتو
راشد:ليش ما كلتي أنتِ حامل ؟
رواسي:ميخصك هذا الشي
ملامحه تدل على عصبيته بس كلامه كله ببرود
راشد:أنتِ بنتي و كل شي يخصج يخصني اني
رواسي:ماعندي اب مجرم مثلك
راشد:و عادي يكون لطفلج اب مجرم مثل رسيم!
رواسي:ليش رسيم ذبح احد؟ احد مات على ايده؟؟
بقه ساكت و يباوعلي بنفس نظرات الغضب، اردفت..
رواسي:اذاً لتحجي ابد
سالم:رواسي تردين ترجعين لرسيم؟
باوعت لابويه عاط بيه..
راشد:اذا ترجع اذبحهااا والله
رواسي:اي عمو اريد ارجع
كام عليه يريد يضربني بس صار بوجهه ادم گال
ادم:لهنااا وحدك عميييي رواسي متنضرب ابد
رواسي:عادي هوَ ايده ملطخه بالدم ميهمه اذا موتني او لا لان عنده تجربه سابقه
اندار عليه ادم و عاط بيه..
ادم:سكتيييي أنتِ تراا اني اضربجج مو ابوج
كمت من مكاني و گلت
رواسي:اريد ارجع لرسيم و غصب عن الكل، اذا مترجعوني اله ارجع انهزم وياه مره ثانيه و بكيفكم بعد
عفتهم و رجعت لغرفتي، اهلي الي جنت اشوفهم احسن ناس انصدمت بيهم… ابويه طلع قاتل و امي متستره عليه
كرهتهم و حقدت عليهم.. قرار رجعتي لرسيم فقط حتى احرك گلبهم
مرت ساعه كامله و اني بغرفتي و همَّ اصواتهم عاليه
يتعاركون.. اندكت باب غرفتي و دخلت امي
درت وجهي عنها ما اريد اشوفها.. احسهم كلهم مشتركين بموتت امه لرسيم!
كعدت يمي على الجربايه و گالت
جميله:روسيه بنتي
رواسي:قندره على راسي، شتريدون مني ؟؟
جميله:بس اجيت اگلج السيد جوه و رسيم هم
رواسي:يعني؟؟
جميله:مو تردين ترجعيله؟ السيد اجه حتى تعقدون من جديد
باوعتلها بنظرات حزن و حجيت بقهر..
رواسي:شلون كدرتي تبقين ساكته؟ ما انبج ضميرج؟ وينها جميله الي متسكت على الظلم حتى لو على گص رگبتها؟ شلون تسترتي على جريمه قتل!!
جميله:ابوج هذا شلون افرط بي فهميني رواسي شلووون؟
أنتِ من رادو يسجنون رسيم مو غيرتي كل افادتج و كذبتي عليهم؟؟ اني سويت نفسج لان احبه
رواسي:رسيمممم ما قتل احد، و بعدين ابويه خانججج و أنتِ دافعتي عنه وين كرامتججج امي وينهاااا
جميله:كرامتي ويه كرامتج، أنتِ شلون قبلتي تتزوجين الشخص الي خطفج و اذاج و دمر حياتج
رواسي:مو نفس الشي امي مو نفس الشي!
جميله:لا نفس الشي
رواسي:رسيم اذاني اني، ما اذه احد ثاني و حرك گلبه
كامت من مكانها و گالت ..
جميله:اذيتج اذيتنا كلنا، كلنا احتركت روحنه بعذابج.. بس الحجي ميفيد بعد اني نازله تعالي ورايه أنتِ
عافتني و طلعت من الغرفه كمت من مكاني
بدلت ملابسي و نزلت.. كارهه كلشي بهاي الدنيا
يارب اخذ روحي و خلصني من هذا العذاب
حطيت شال على راسي و دخلت يمهم سلمت
و كعدت يم ابويه.. عقدلنا السيد من جديد و راح
باوعلي رسيم و گال
رسيم:لمي غراضج و امشي نروح بالگوه متحمل روحي گاعد هنا
هزيتله راسي و طلعت من يمهم رجعت لغرفتي
طلعت باقي اغراضي حطيتهم بجنطه ثانيه لان جانو حاطيهن ب اكياس.. طلعت الجنط اسحب بيهم
اول ما شافني صعدلي بسرعه اخذ الجنط من ايدي و نزلهم و گال
رسيم:انتظرج بالسياره
رواسي:تمام
راح هوَ و نزلت اني رحت يم ابويه وكفت
كدامه و گلت..
رواسي:جبرتوني ارجعله بس حتى احرك گلبكم، راح اساعده و اخلي يحرگكم بنار انتقامه
راشد:لتصيرين أنتِ و الدنيا ضدي، وداعت عيونج كلشي صار بالغلط ما جنت متقصد اموتها
رواسي:و رسيم مجان متقصد يأذيني بس بسببك صارت كل اذيتي..
تقدمت عليه حضنته بكل قوتي و بجيت بحضنه
هوَ صار يبجي و يايه و يعتذر.. قسيت بكلامي وياه
بس لازم اخلي يتخلص من ذنبه، قتل النفس حراام و هوَ قتلها و ضمضم على عملته…
ابتعدت عنه و حضنت امي بستها و ابتعدت عنهم
و طلعت من البيت بدون ما احجي شي، رسيم بس شافني نزل من السياره
و اجه عليه فتحلي باب السياره صعدت و رجع هوَ صعد و حرك بينه..
صرت اباوع للشارع و مركزه بالطريق
لزم ايدي فزيت من صفنتي گال..
رسيم:صار ساعه احجي وين صافنه؟
رواسي:اكرهك رسيم، لتفكر رجعتلك لسواد عيونك
رسيم:ميخالف اكرهيني المهم أنتِ يمي و ببيتي
سحبت ايدي منه و رجعت اباوع من الجامه
انتبهت مو نفس طريق البيت الي جنه بي بس غلست
و ما حجيت شي.. بعد مده وصلنا وكف سيارته
بكراج بيت جبير كلش و تصميمه فخم بناء جديد
نزلت من السياره و هوَ نزل اغراضي
و دخل قبلي للبيت، صاح بصوت عالي
رسيم:وينكممم يا قووووم
اجانه صوت رجال طلع من المطبخ، اجه يمنه
حضن رسيم بكل قوته و يطبطب على ظهره
گال..
_شوكت طلعت من السجن!!
رسيم:رأساً طلعت، بس سافرت و قبل يومين رجعت
اندار عليه و گال
رسيم:روسيه هذا اخويه الجبير و عضيدي غسان
رواسي:اهلاً اني رواسي
انتبه غسان لوجودي و رفع حاجبه مستغرب و گال
غسان:شلون انطوها؟؟
رسيم:سالفه طويله، يلا باباتي تعاي نفوت جوه
سحب الجنط و دخل يمشي ويه اخو و يحجون گال
رسيم:لعد البقيه وينهم؟
غسان:محمد بالدوام و رشا و عذراء كل وحده يم امها بس هيا موجوده بغرفتها
ترك الجنط على جهه و كعد بمكانه و گال
رسيم:شبيج واكفه حَبيبي تعاي كعدي
رحت كعدت يمه متوتره ما اعرف احد بيهم و لا اعرف اي شي عنه و عن عائلته.. بقو يسولفون و غسان گال
غسان:وين سافرت بدون حتى متحجي!
رسيم:رحت عمره طهرت روحي من كل شي لخاطرها
باوعتله و گلت مستغربه
رواسي:أنتَ رحت عمره؟ ليش أنتَ تعرف شي عن الله و دين محمد
ضحك غسان و گال
غسان:بهاي حقج، طايح حظ مسربت ليل نهار بالشوارع و مرته المسكينه تبقى تنتظر بي للصبح
وسعت عيوني مصدومه، شنو مرته شنو تنتظره؟
رفع عيونه عليه يباوعلي و بقه ساكت بدون ميحجي شي
غورگت عيوني و حجيت بهدوء احاول اسيطر على روحي
رواسي:بس اريد اغسل وين الحمام؟
رسيم:امشي اخذج للغرفه هناك موجود حمام
كام من مكانه و كمت وراه تمنيت اذبحه بيدي
شلون متزوج و محجالي!!! صعدنا فوك و دخل لوحده من الغرف دخل الجنط و گال
رسيم:هاي غرفتنا روسيه اخذي راحتج
راد يطلع من الغرفه لزمته من ايده منعته
يطلع و حجيت بغصه..
رواسي:أنتَ متزوج؟
رسيم:على وشك الطلاق
رواسي:شكد جذاااب أنتَ دخيل ربك! و كلامك وينه لعد؟؟ منو الي كلي اقرف من كل بنيه بس أنتِ لا؟؟؟
رسيم:اي صح ما جذبت عليج بشي
رواسي:لعد شلون متزووووج!!! و فوكاها ما كتليييي
رسيم:زواجي منها مثل زواجج من ادم
رواسي:شلون يعني؟
رسيم:كل واحد بغرفه و ما عليه بيها ابد
دفعته و تعديته رحت كعدت على الجربايه
اجه كعد يمي لزم ايدي نترتها منه، رجع سحبها و لزمها بقوه و گال..
رسيم:تغارين عليه؟
رواسي:لا ليش اغار
رسيم:اممم حلو جيد
رواسي:كوم من يمي لا والله بال..
قاطعني و گال بعصبيه
رسيم:گولي بالقندره حتى تجيج القندره عدل على حلگج
رواسي:روح لمرتك شعندك يمي
رسيم:أنتِ مرتي
رواسي:لتفكر ابد اكدر اتقبلك ك زوج الي مستحييل، و فوكاها جايبني ضره لمرته شكد متستحي
اندكت الباب و دخلت بنيه شابه تطلع اصغر مني، باوعتلي و رجعت نظراتها لرسيم و گالت بفرح..
_و اخيراً اخذتها و صارت حلالك
رسيم:دعائج الي سهلها عليه
رواسي:اختك؟؟
ضحك و كال
رسيم:لا ضرتج
بقيت بصدمتي معقوله هاي صدك تحجي؟
اجت تقربت عليه حضنتني و بوستني و گالت
_الف مبرووك حَبيبتي الله يسعدكم و يديمكم لبعض
ابتعدت عني باوعتلها و حجيت مستغربه..
رواسي:متأكده أنتِ ضرتي ؟ لو شنو الموضوع؟
ضحكت و گالت هيَ تباوع لرسيم..
_بس بالاسم مرته ترا مابيناتنه اي شي، رسيم اشوفه مثل اخويه
رفعت حواجبي و سويت حركه بشفتي تدل على
استغرابي، حاسه كلشي ديصير كمين الي
رسيم:هيا عيوني سويلنه شي ناكله من البارحه بدون اكل
هيا:تدلل حَبيبي
طلعت من الغرفه و الابتسامه على وجهها
كمت من مكاني فتحت جنطتي طلعت ملابس الي
اريد ابدل… تخصرت و باوعت لرسيم تمدد على الجربايه و عيونه عليه
رواسي:شعندك باقي هنا؟؟
رسيم:غرفتي هم تطرديني منها؟
رواسي:ماكو غرفه تجمعنا سوه روح لهيا روح يمها
رسيم:و لا مره نمت يمها كله هنا بغرفتي
رواسي:اي بس صارت غرفتي هاي شوفلك غرفه ثانيه
لو روح لمرتك نام يمها اني شعليه بيك
كام من مكانه و اجه ب اتجاهي، رجعت خطوتين بعد
ما لزك روحه بيه و انفاسنه اختلطت.. رجع سحبني من خصري و نزل راسه طبع بوسه على شفتي و گال
رسيم:يجي من گلبج وحده ثانيه تشاركج بيه؟
رواسي:عيوني ترا اني الثانيه مو هيَ يعني اني الي دا اشاركها بيك
رسيم:متغارين !
رواسي:لا عادي ليش اغار منو أنتَ حتى اغار عليك بلا زحمه؟
بقيت اباوع بعيونه بكل ثقه اريد اخفي غيرتي
الي شعلتني شعل و على لحظه اموته بيدي هوَ وياها
بلحظه شالني عطت بي…
رواسي:نزلننيييي شبيكككك والله اكطع عليك
قاطعني و هوَ يبوسني و گال
رسيم:ملكة القنادر رواسي راشد، طحت بغرامج و ذبت بتفاصيلج
توترت من قربنه عبالك اول مره يكون
قريب مني بهذا القرب… غمضت عيوني بقوه لما
نزلني على الجربايه و رجعتلي ذكرياتي لاول يوم خطفني بي
فتحت عيوني و دفعته عني بخوف و عطت
رواسي:وخررر عني لتلمسننييي وخررر
ركز عيونه بعيوني جانت نظراتي كلها
خوف من عنده، برغم حبي اله بس بعدني اخاف من قربه
مسح على خدي ب اصبعه و گال بهدوء..
رسيم:ليش الخوف باباتي
رواسي:وخر عني فدوه
تمدد على ظهره و سحبني لحضنه
انفاسه سريعه و مو منتظمه ابد.. باوعتله مغمض
عيونه بقوه سحبت روحي من حضنه و كمت بهدوء
اخذت ملابسي گال
رسيم:وين؟
رواسي:ابدل بالحمام
رجع غمض عيونه و اني دخلت للحمام
بدلت ملابسي و طلعت سحبت جنطتي و فتحت الكنتور
مليان ملابسه، باوعتله و رجعت باوعت للكنتور
و گلت..
رواسي:هسه اني وين احط ملابسي استاذ؟؟
رسيم:طلعي ملابسي و خلي ملابسج
رواسي:وين اخليهن اذا طلعتهن؟؟
رسيم:بكنتور هيا
رواسي:اهاا حلو حلو
تقربت على الكنتور و صرت اطلع ملابسه
و اشمرهم بالكاع عاط بيه
رسيم:مو بالكاااع ولججج
رواسي:خلي هيا تاخذهم يمها تحطهن على راسها مو بس بكنتورها
رسيم:صاحيه أنتِ؟
رواسي:لا مدمنه مخدرات اني عقلي طگه ونص
فرك وجهه بقوه و كام من مكانه صار
يشيل بالملابس من الگاع و يعدل بيهن على الجربايه
خلاهن كلهن على الجربايه و طلع من الغرفه
كعدت ارتب بملابسي بكنتوره و اغلط عليه
بصوت مسموع
رواسي:نذل حقير ممكتفي بوحده طايح حظ مال قندره و دكك على راسه يصحى على روحه لا والله مو قندره وحده قناااادر و نعووول
تبسمرت بمكاني لما گال
رسيم:كملي بعد روحي كملي جلدج يحكج أنتِ
رواسي:ما حجيت شي اني سمعت غلط
رسيم:اي اي صحيح، امشي نتغده يلا
رواسي:ما اريد شكراً
رسيم:دمشي بلا كلام زايد
رواسي:ما عندي ثقه بيكم خاف هم ترجعون تنطوني مخدرات
راد يحجي بس دك تلفونه جاوب
رسيم:هاا باباتي؟ اي هسه نازلين صبي الاكل
سده و اجه يمي باوعتله و گلت
رواسي:منو؟
رسيم:هيا
رواسي:و أنتَ ما شاء الله عليك صاير بابا للكل، بعد اذا تكولها الي اطيح حظك
هز راسه و صار يستغفر، سحبني من ايدي
طلعني من الغرفه و گال
رسيم:اذا تقللين من احترامي كدام اي شخص اني اطيح حظج خوش باباتي؟
رواسي:لككك أنتَ مو ابويه لتكولها ابددد
رسيم:بنيتي أنتِ
رواسي:ااوووععع
رسيم:وتالي رواسي؟
بقيت ساكته ما حجيت شي، نزلنا سوه
شفتهم كلهم كاعدين داير مداير السفره بالگاع
و هيا و وياها بنيه ثانيه ينقلون بالاكل
كامو البنات سلمو عليه و باركولنا و الولد نفس الشي
كلهم عرفوني على اسمائهم و منو همَّ
رجعنا كلنا كعدنا كعدنا اني و رسيم بصف بعضنا
اجت هيا كعدت يم رسيم من الجهه الثانيه
قربت روحي من رسيم و همستله بعصبيه..
رواسي:اذا تبقى گاعد يمها اسوي شي ميعجبك والله
رسيم:مو متغارين و عادي؟
رواسي:اذا متكوم اني اكوم و تحلم بعد اكعد وياكم ب اي مكان
هز راسه و گال بصوت مسموع..
رسيم:روسيه تعاي بمكاني أنتِ اني اكعد بمكانج
انظار الكل توجهت علينه مستغربين الوضع
كمت من مكاني و هوَ كعد بي و اني كعدت بمكانه صرت
اني يم هيا و رسيم يم اخو محمد
كملنا اكلنا و همَّ يسولفون ويه رسيم و كل واحد
يحجيله عن شغله و شلون ماشي
الكل يحجي بس اني ساكته و استمع الهم بكل هدوء
دك تلفوني تجاهلته لما هيا گالت لرسيم
هيا:رسيم عندي الك مفاجئه
رسيم:احب مفاجئاتج گولي شنو
هيا:نجحتت من السادس بمعدل ٩٨
الابتسامه انرمست على وجهه و گال بفرح
رسيم:عفيه عليج بابا ما خيبتي ظني بيج
هيا:أنتَ وعدتني اذا اطلع معدل عالي الي حق اطلب منك اي شي و تنفذ
رسيم:و بعدني كد وعدي گولي عيوني الج
رجع دك تلفوني ترخصت منهم و جاوبت قبل
لا اگوم
رواسي:هلا ادووم
ادم:شلونج رواسي؟ خوما رجع اذاج بشي؟
صعدت فوك و اني احجي
رواسي:لا عيوني ليظل بالك ابد ما سوالي شي
ادم:اي شي تحتاجي اني موجود بمكالمه وحده منج تلكيني مزروع يمكم
رواسي:متقصر حَبيبي
سديته من عنده و درت روحي اريد اطلع
شفت رسيم واكف بباب الغرفه و يخزر بيه
سويت روحي ما مهتمه و مشيت اريد اطلع، بس دفعني
لداخل الغرفه و عاط بيه..
رسيم:منوو سمحلجج تتواصلين ويه *** هذا
رواسي:احترم نفسك و اعرف شلون تحجي، ما اسمحلك تقلل احترام اي شخص من اهلي فهمت لو لا؟؟
رسيم:رواسي لتختبرين صبري!!
رواسي:من تنفذ كلامي و تبعد روحك عن هيا و كلامك الي تحجي الي ممنوع ينحجي لغيري بذاك الوكت شتريد گول و اني انفذ، فهمتتت !!
رسيم:كتلجج هالفتره راح نتطلك!!
رواسي:من تطلكون عود تعال و باليوم الي تطلكها بي راح اصيرلك مره احبك و اصونك و احافظ عليك
عفته واكف و طلعت من الغرفه لكيت
هيا واكفه يم الباب و دمعتها بعينها، تعديتها اريد انزل
استوقفتني و گالت ..
هيا:رواسي اني احب رسيم لتجبري يعوفني
رواسي:ما اجبر احد اني اذا يريدج يبقيج يمه بس يطلكنيي لو جنت اعرف بي متزوج يحلم ارجع اتزوجه و اجي وياه
هيا:لتخلي يكرهني حرام عليج اني هم مرته!
رواسي:شوفي حَبيبتي لا أنتِ و لا رسيم تهموني، الي يهمني كرامتي الي هانها لما جابني لهنا ك زوجه اله و هوَ متزوج.. عنده خيارين ماكو غيرهم لو يطلكج و يبقى ويايه او يطلكني و يبقى وياج
عفتها و نزلت جوه كعدت وياهم اجت رشا
زوجه غسان بيدها صينيه استكانات جاي.. وزعت للكل وصلت يمي و گالت
رشا:تفضلي عروستنا
رواسي:بي شكر؟
رشا:اي اكيد
اخذته منها و كمت من مكاني گلت
رواسي:شكراً گلبي بس اني اشربه بدون شكر
اجه رسيم اخذه من ايدي و گال
رسيم:اني اشربه
هزيتله راسي و رحت للمطبخ صبيتلي
بكوب و رجعت كعدت يمهم مرت محمد گالت
عذراء:شلون تكدرين تشربي بدون شكر؟
رواسي:عودت روحي حتى اكدر احافظ على جسمي
كلشي بي شكر ما اكله و لا اشربه
رشا:عودينا وياج كلنا محتاجين
ضحكت و كلتلها..
رواسي:تدللون الف طلب مثل هل طلب
اجت هيا كعدت يم رسيم، شال تلفونه و كام
من مكانه.. شوي و رجع كعد على الكرسي المنفرد
باوعت لرسيم و گلت
رواسي:حَبيبي تلفوني القديم يمك؟
صار يباوعلي مستغرب اول مره اگول حَبيبي
بس ردت اقهر هيا.. گال
رسيم:موجود بالغرفه شتسوين بي
رواسي:اريد انقل صوري و ارقام صديقاتي بي
رسيم:ميخالف بليل اسويهن الج
عذراء:رواسي شنو تشتغلين أنتِ؟
رواسي:ادرس بعدني هاي اخر مرحله الي
رشا:ما شاء الله شنو تخصصج اي قسم؟
جاوبها رسيم و عيونه عليه
رسيم:ممرضتي هيَ
هيا:يعني تدرس تمريض؟
رواسي:اي
هيا:معدلي يدخلني تمريض مو؟
رسيم:ليش ميدخلج معدلج عالي و تكدرين تدخلين طب
رواسي:ما انصحج بي شوفي غير شي الج يناسبج اكثر
رسيم:ادخلي صيدله مو حلمج؟ ليش تغيري
هيا:هيج رأيك؟
رواسي:لتسمعين من احد أنتِ شنو حلمج اسعي اله
هيا:رسيم عادي اطلب هسه؟
رسيم:گولي و اني انفذ
هيا:ما اريدك تطلكني، اريد ابقى زوجتك و على اسمك..
يتبع…
- يتبع الفصل التالي اضغط على (رواية رواسي الدهر) اسم الرواية