رواية رواسي الدهر الفصل الثامن 8 – بقلم روح الدليمي
➰➰➰➰➰➰➰➰➰➰➰
رفعت عيوني عليه ملامحه يلي تدل على صدمته من طلبها، وجهت نظراتي على البقيه كلهم نفس الشي مصدومين من كلامها، رشا گالت..
رشا: هااا عيني بلشتي تبثين سمج؟
هيا: ليش ابث سمي؟ اني احب رسيم و اريد ابقى ويا ما نتطلك
محمد: هيا انتو من البدايه متفقين زواجكم فترة وبس
لحد ما تنحل مشكلتج لو شفتي تزوج و اشتغلت الغيرة
كمت من مكاني اريد اروح بس سرعان ما وقفني صوت رسيم: روسيه لتروحين
التفتت عليه وعقجت وجهي
رواسي: اريد احظر محاظراتي مال باجر، اليوم ما داومت هم
غسان: كعدي رواسي خلي نفتهم
– رفعت حاجبي ببرود
رواسي: ماكو شي نفهمه البنية متريد تطلك تجبروها يعني؟
عذراء: عادي عندج تكون عندج ضرة؟؟
رواسي: اكيد لا مو عادي و لو جنت اعرف هوَّ متزوج مجان تزوجته، اني ارجع لاهلي و خليهم همَّ يكملون حياتهم سوه
وكف رسيم بصدمة
رسيم: شنو تروحين لاهلج؟
رواسي: مثل ما سمعت اني الطرف الثالث بعلاقتكم و ما اقبل هذا الشي على روحي ابد..
عفتهم يحجون ويصيحون علية و صعدت فوك دخلت
للغرفة و دورت للمفتاح ما لكيته گلبت المجرات كلها و هم ما لكيته، انفتح باب الغرفة التفتت شفته رسيم عطت بعصبية اني وافتح بالمجرات الي يم راسه
رواسي: وينن مفتااااح الباب؟؟
رسيم: يمج بس شتسوين بي
فتحت المجر الاخير لكيته بيها، جذب نظري صوره
محطوطه بدفتر بس طرفها طالع.. شلت الدفتر بيدي
و فتحته انصدمت لما شفت صورتي موجوده بداخلة
وهوَّ بس انتبه اجه عليه بسرعة سحب الدفتر من ايدي بقوه
رسيم: خلينه نحجي رواسي
رواسي: ماكو شي نحجي بي، اطلع من الغرفة اريد ادرس
رسيم: روسيه حَبيبتي ما ابقى وياها والله
عطت بخنگة مكتومه
رواسي: ميهمني گتلك اريد ادرس اطلع بَره
سحبني لحضنه و مجرد ما راسي صار على صدره
انفجرت بالبجي صرت اشهك بصوت عالي
وهوَ حار بيه يريدني بس اهدئ بس ما اكدر ما اكدر
شكد احاول ابين روحي قوية و ما اضعف بس
ماعندي اي قوة..
سحبني كعدني على الجربايه و كعد يمي گال
رسيم: هسه اطلگها والله هسه بس لتبجين
شهگت بصوت و حجيت
رواسي: عوفني الله يخليك عوفني، من البدايه علاقتنه غلط بغلط
رسيم: ماكو شي غلط وداعتج، احبج اني روسيه
رواسي: أنتَ متحبني أنتَ تحب تأذيني
حضن وجهي بيده و قرب روحه اكثر
صار يطبع بوساته على وجهي و يعتذر مني، بعدته عني
رواسي: طلكني رسيم ما اريدك اني
رسيم: حلم ابليس بالجنه و أنتِ حلمج اطلگج
رواسي: لو اني لو هيَ تبقى وياك
رسيم: اعترفيلي بحبج الي ليش ظامه مشاعرج عني و أنتِ مفضوحه
– ضربته على صدره بقهر وعطت
رواسي: احبك يا انذل شخص شفته بحياتي
رسيم: حتى اعترافج بي مسبات
خزرته و كلت
رواسي: لان أنتَ نذل
دفعني على ظهري و صار فوكايه، نزل راسه
يشم بعطري، توترت من قربنه كلش اعرف هذا القرب نهايته شنو..
دفعته عني بخفه و گلت ب استعجال
رواسي: رسيمم وخر وخر نسيييت شغله
ابتعد عني يباوعلي بتسائل
رسيم: شنو؟
رواسي: لازم اطلع اني ضروري
رسيم: وين!
باوعتلة و رديت بفهاوة
رواسي:هااا؟
رسيم: تردين تطلعين؟ كوليلي وين
رواسي: هاا، لا اقصد اطلع من الغرفه
درت وجهي عنه و مشيت بخطوات بطيئة بس بسرعه ركض عليه و سحبني عليه..
رسيم: ليش تبعديني عنج؟
رواسي: لان ممحتاجني أنتَ، عندك مره ثانيه روح الها
رسيم: امشي وياي امشي
سحبني من ايدي و طلع يسحب بيه، نزلنا جوه
كلهم كاعدين يسولفون كعدنا يمهم نستمع لحديثهم وهيا بس شافته كامت و دخلت
للمطبخ.. شوي و رجعت بيدها فنجان گهوه
حطته على الطبله
هيا:گهوتك رسيم
رسيم: شكراً بس اريد روسيه تسويلي
اشرت على روحي مستغربه
رواسي: انييي ؟؟
رسيم: اي ليش مستغربه؟
رواسي: بس اني ما اعرف اسوي گهوه بس جاي و بالگوه تعلمته
رسيم: عادي كومي سوي يلا اريدها ساده
كمت من مكاني بدون ما احجي شي، دخلت للمطبخ
و صرت ادور على الگهوه لكيتها و سويتله
حطيتها بصينيه صغيره و وياها كلاص مي
شفت على الكاونتر اكو نستله جلاكسي فتحتها اخذت قطعتين منها و حطيتهم بصف الفنجان و اخذتها اله
رجعت يمهم للصاله شفت هيا دتبجي و البنات يحجون
وياها، ما اهتميت حطيت الصينيه على الطبله يم رسيم
و كعدت بمكاني بقيت اباوع على رسيم انتظره يشربها
شال الفنجان بيده شرب شوي و عقج وجهه
اكيد مو طيبه بس يستاهل كتله ما اعرف اسوي
رجع يشرب بيها شوي شوي لحد ما خلص الفنجان كله
شال النستله اكلها و شرب المي
رسيم: عاشت ايدج تخبل شلون گهوه محروكه و مشتعل جدها
رواسي: أنتَ ردت ما جبرتك اني
ابتسم بحب و كال..
رسيم: لو تشربيني سم يعجبني لان من ايدج
وجه نظراته لهيا و گال
رسيم:يلا كافي بجي و روحي لمي اغراضج حتى ارجعج الاهلج
عاطت بصوت حاقدد
هيا:هجمتيييي بيتي الله يهجم بيتج يا رواسي الحيه
رواسي: ما سويت شي اني!!
غسان: ما عليها البنيه صار شكد هوَ كايلج نتطلك بس اجلها علمودج لان سادس
هيا: بس اني طلبت منه ميطلكني ما اريد اتطلك!
عذراء: راح تتطلكون و خلص كلنا نعرف رسيم ميحبج!
و لا أنتِ تحبي بس تحجين هيج علمود رواسي تعوفه
هيا: ابوهاااا كتل امه و بعده وياها ليش ما عافهاااا ليششش؟؟
شگت كلبي بكلامها راساً كمت عليها وضربتها من دون وعي و عطت بيها..
رواسي: ادبسزززز اذا تحجييين على اهلييي راسج اكسرههه
صاح بيه رسيم حتى ابتعد عنها، بسرعة ابتعدت وعفتهم وصعدت للغرفة
ركضت على المفتاح اخذته و قفلت الباب..
شمرت هدومه بالگاع و طلعت كتبي و الملازم و ذبيت حرگتي كلها بالدراسه هالفتره راح ابلش تطيبق و لازم اكون جاهزه
كعدت كدام الكتب وكل شوي دموعي تنزل ابجي شوي و امسح دموعي و ارجع اركز بدراستي..
اندكت باب الغرفه غلست ما جاوبت.. رجع دكه بقوه اكثر وعاط بصوت
رسيم: رواسييي فتحي الباب
غلست عليه ما جاوبته بقه يدك بالباب لحد ما صار
صوت طبه قويه و اختفى صوته…
شويه وسمعت صوت غسان و محمد بكل البيت و يصيحون ب اسمه كمت من مكاني
فتحت باب الغرفه شفته متمدد بالكاع فاقد و الكل مجتمعين فوك راسه !
عطت بيهم وركضت عليه دفعت هيا من يمه
و كعدت يمه نزلت روحي و حطيت راسي على صدره
اسمع دكات گلبه مو منتظمه ابد
رفعت راسي وعطت بخوف
رواسي: ماكو جهاز ضغط بالبيت؟؟
عذراء: اني عندي هسه اجيب
راحت ركض لغرفتها جابته و رجعت
قستله الضغط بسرعة شفته مرتفع كلش، انتبهت عليه صار يعرك بشكل مو طبيعي
رواسي: فوتوا على الغرفه بسرعه هسه اجي
ركضت للمطبخ صرت ادور على خل تفاح ما
لكيت.. بقيت اروح و اجي ادور ماله اي اثر
رجعت ركضت و صعدت فوك نسيت بروحي حامل
دخلت عليهم للغرفه
رواسي: هوَ عنده سكر او ضغط؟
محمد: اي اي عنده سكر
رواسي: وين علاجه؟
فتحت هيا المجر مال كومدي و طلعت من عنده
علبه بيها ادويه و ابر انسولين
اخذتهن منها و طلعت جهاز السكر قسته هم طلع مرتفع
رأساً ضربته ابره انسولين تحت الجلد
رواسي: اذا ما نزل لازم ناخذه لمستشفى اذا يبقى سكره مرتفع يصير عنده غيبوبه سكر
طفرت هيا وصارت تعيط بعرامة
هيا: كلهههه منج أنتِ كلشي ما چان بي من دخلتي حياتنه دمرتييي و دمرتينا كلنا
رفعت ايدي بهدوء و حجيت
رواسي: مالي خلك هاي طلعوها منا
عذراء:هياوي تعالي ويايه بلا مشاكل
دگت رجلها بالكاع وجتفت ايدها
هيا: ما اطلع اذا ميصحى رسيم اذا معاجبها ترجع منين ما اجت
زفرت نفسي بعصبيه و هزيت راسي
معاجبني لا وجودها و لا كلامها، بالبدايه سوت روحها البنيه الي ماكو مثلها و هسه طلعت على حقيقتها
بقيت انتظر مرت عشر دقايق و رجعت قستله
السكر، نازل شوي تنفست ب ارتياح
رواسي: نزل الحمدلله، هسه شوي و يصحى
غسان: تعاركتوا انتو؟
رواسي: لا جنت ادرس
باوع لملابس رسيم بالكاع وصار يأشر عليهن
غسان: هاي دراستج؟
باوعتله و حجيت بتوتر
رواسي: هاا شسمه، من اجيت اني فرغلي الكنتور و مصار مجال ارجع ارتبهم اله
محمد: رواسي ديري بالج على رسيم والله يحبج و احنه كلنا شاهدين على حبه الج
رواسي: شاهدين على حبه لو على خطفه الي حدد؟
محمد: من دخل السجن يلا عرفنه انو هوَ خطفج ما جنه نعرف ابد
رديت عليه ببرود
رواسي: اوكي
مرّ الوقت وبلش يصحى شوي شوي، رفعت راسه بحضني و سندت ظهره على صدري
رواسي: مي فدوه
ركضت هيا جابتله مي و اجت تريد تشربه
سحبت الكلاص من ايدها و قربته لحلگه شربه كله ريگه نشف بسبب ارتفاع السكر..
گال بتعب
رسيم: ممرضتي الحلوه تعبتج
رواسي: خوفتنا عليك رسيم، ليش ما كتلي عندك سكر؟
رسيم: مو شي مهم
رواسي: لا مهم و كلش مهم
غسان: ناخذك مستشفى؟
– اخذ نفس بتعب
رسيم: لا ميحتاج هسه اصحصح
هزو راسهم وشافوا كلش تعبان طلعوا كلهم من الغرفه بعد ما اطمنوا عليه انو مابي شي، بقت بس هيا واكفه و تباوع لرسيم
بعيونها المدمعة مهتميت الها وحطيت ايدي على راسه
رواسي: حَبيبي نام ارتاح شوي
رسيم: نوميني بحضنج
ضحكت و همستله..
رواسي: والله لو ما هاي واكفه چان جاوبتك جواب يبرد گلبي
بسته من راسه و اردفت بصوت مسموع..
رواسي: اني و حضني كلنا الك
رفع عيونه على هيا
رسيم: من تطلعين سدي الباب وراج اريد انام
هيا: من شوكت تطردني من غرفتك؟
رفعت حواجبي بعصبية و حجيت بنتر
رواسي: الرجال تعبان متشوفي شلون؟؟ طلعي و سدي الباب خلينه نرتاح
طلعت من الغرفه وطبكت الباب بقوه عود عصبيه، ابتعدت عن رسيم وعطت
رواسي: ووجعع كوون بنص گلبج
انداريت عليه و اردفت بعصبيه
رواسي: لو صاييير بيك شييي استاااذ ؟؟؟
ابتسم بتعب
رسيم: على كيفج بابا اهدي مابيه شي
رواسي: لا عبالك خايفه عليك، بس اذا تموت اترمل اني و بعدني بعز شبابي
رفع حاجبه بصدمة
رسيم: ترديني اموت يعني؟
رواسي:اذا تموووت اموتككك والله
ضحك بصوت عالي
رسيم: شلون رهمتيها؟
رواسي: معليك ترهم نام و اشبع نوم اليوم مسموحلك تنام هنا
رسيم: روسيه خجلتيني بكرمج والله
عطت بدون وعي
رواسي: انجب
حطيت ايدي على حلكي وطفرت من مكاني و درت وجهي عنه انعل يومج رواسي شلون تكوليله انجب قندره على راسج و حلگج…
ظل ساكت ثواني وصاح ب اسمي درت وجهي عليه اشرلي ب اصبعه بمعنى تعالي
مشيت وكفت يمه
رسيم: نزلي روحج تعاي
رواسي: اخر مره والله بالغلط
رسيم: كلتت نزلي روحج مابيه حيل اكوم
رواسي: اريد اكمل دراسه
نتر بيه قاطع كلامي …
رسيم:قربييي روحج عليه اكثر
نزلت روحي لمستواه مد ايده على اذني
و سحبني منها
رسيم: ممنووععع تنعاااد رواسي
عطت بوجع
رواسي: شبيييك رسيييمممم!!
رسيم: اني لو أنتِ ؟
رواسي: گتلك اخر مره بالغلط طلعت مني، عوف اذني تخبلتتت أنتَ؟
عاط بصوت
رسيم: و تالي وياججج متعرفين تحجين ب احتراام!!
مديت ايدي على ايده اريد اخلي يعوف اذني شلعها شلع قندره عليك رسيم..
عاف اذني و رأساً سحبني
صرت فوكاه حضني من خصري وهمس بصوت خافت
رسيم: عقابي الج غير، كل غلط تغلطي اخذ منج بوسه
و البوسه شوي شوي تتطور و تصير غير شي
دفعته بخفه
رواسي: بس عوفني ممكن؟
حضني اكثر
رسيم: غلطتي مرتين و لازم تتعاقبين عليهن ثنينهن
گلبني و صار فوگايه، نزل وجهه عليه اكثر
غمضت عيوني بقوه.. صار يطبع ببوساته على كامل وجهي و ختمها ببوسه عميقه على شفايفي
ابتعد عني وثنينه نجر النفس بقوه.. شوية وصارت لمساتة اجراء ولزم ملابسي، توترت كلش اريد بس ابعده عني ب اي طريقه..
صرت حاول ارفع روحي بس سرعان ما قيد حركتي بيده
رسيم: ما اعوفج اليوم روسيه أنتِ حلالي
حجيت برجفة
رواسي: عوفني رسيم
قرب وجهه يم اذني وهمس
رسيم: ما اريد أاذيج حَبيبي لتمنعيني منج
رواسي: ما اريد حباب ما اكدر
مد ايده على راسي و دخل اصابعه بشعري
سحبني بقوه وردف بجدية
رسيم: لتمنعيني ما اريد اضربج
لزمت ايده اريد ابعده
رواسي: دتأذيني وخر عني
فجاة انفتح باب الغرفه بقوه وهوَّ بسرعة كام عني
وباوع للباب ماكو احد تقدم خطوات وطلع من الغرفه شوي و رجع وجهه ما يتفسر
رسيم: راح اطلع اذا ارجع و اجيج و هم ترفضيني تشوفين مني شي مراح يعجبج رواسي
رواسي: تكرهني بيك بهاي تصرفاتك خاف متعرف
هز راسه بتوعد
رسيم: هينه رواسي يصير خير
اخذ اغراضه و طلع من الغرفه معصب
ما اهتميت اله كمت فتت للحمام غسلت وجهي و صرت اباوع على روحي بالمرايه
رواسي:شنوو تردين بالضبط رواسي؟؟ يعجبج تنضربين و ياخذ منج الي يريده مثل قبل؟
اخذت نفس بتعب ونشفت وجهي و رجعت بمكاني بقيت ادرس و اراجع الي فاتني لوقت متأخر، فزيت ع صوت التلفون شفته رسيم وجاوبته
رواسي: نعم؟
جاوبني بحديه
رسيم: بدلي و تعالي انتظرج بالسياره
رواسي: ما اريد نعسانه راح انام
رسيم: انتظرج بسرعه يلا
سد الاتصال بوجهي واني استسلمت للامر الواقع و كمت بدلت ملابسي و نزلت، البيت هدوء الكل نايمين لان عدهم دوام الصبح، فتحت باب البيت بهدوء و قبل ما اطلع اجاني صوتها.. التفت عليها واكفه متخصره على الدرج
هيا: ويه منو متواعده بتالي الليل؟؟؟
أبتسمت بأستهزاء
رواسي:ميخصجج!
فجاة صارت تصيح بصوت عالي على الكل
وكلهم طلعوا من غرفهم مفزوعين، تجمعوا يم الدرج يباوعون عليها يردون يفهمون شكو
هيا: تريد تنهزم من البيت متواعده ويه حبيبها
نزل غسان من الدرج مصدوم اجه يمي
غسان: وين طالعه ساعه ٢ بالليل؟
رواسي: ما اعرف رسيم خابرني كلي طلعي و اجت هاي صارت تصيح و اتهمتني
غسان: رسيم ما رجع بعده؟؟
رواسي: هسه اجه دينتظرني بره
انداريت عليها وعطت بصوت عالي
رواسي: متواعده ويه حَبيبي و اريد اطلع عندج مانع؟؟
هيا: شكد بلا اخلاق وينه رسيم خلي يجي يشوف هاي الي لفاها ببيتنه
دخل رسيم على صوتنه يباوع مستغرب، وهيَّ بس شافته عاطت..
هيا: همزييين اجيت، تعااال شوف هاي ال** متواعده ويه حبيبها و تحجيها بكل عين صلفه تريد تنهزم وياه
غسان كام يضحك
غسان: شكد مريضه أنتِ شلون ما جنه حاسين عليج؟
كال بتعجب
رسيم: شبيكم؟
رواسي: متواعده ويه حَبيبي و شافتني اريد اطلع كعدت الكل بصوتها المزنجر
حط ايده وره ظهري وسحبني عليه
رسيم: روحوا نامو ماكو شي اني خابرتها اريد اطلعها شوي
طبطب غسان على كتفه
غسان: لتتأخرون دنيا ليل كلشي يصير
رسيم: ناخذ فره و نرجع منتأخر
صعد غسان واخذ مرته و عذراء رجعت لغرفتها
بس هيا بقت واكفه بمكانها تباوع علينه
فرني عليه و باسني من شفتي
رسيم: يلا حَبيبي امشي
طلعنا من البيت ركبنا السياره حرك و صار يفرني بشوارع بغداد واني طول الطريق ساكته مزعوجه كلش، وكف يم مطعم
رسيم: شتحبين اجيبلج؟
رواسي: ما اشتهي نفسي تلعب
رسيم: ممتعشيه أنتِ بس على الغده
انداريت عليه وردفت بجديه متسائله
رواسي: وين رحت رسيم؟؟
رسيم: طلعت ويه جماعتي
رواسي: لتعيدها بعد
مسح ع وجهه و گال
رسيم: لو باقي يمج اكثر چان اذيتج و اني حلفت ما اذيج بعد
رواسي: بس اذيتني برغم حلفانك اذيتني
رسيم: بشنو اذيتج؟
عطت بقهر
رواسي: بكلشييي، تزوجتني و أنتَ متزوج و خليتني طرف ثالث بعلاقتكم و هاي اكبر اذيه الي
رسيم: ماكو علاقه بيناتنه حتى تكونين طرف ثالث
رواسي: رجعني للبيت تعبانه كلش بطني تأذيني بسببك
مد ايده على بطني بخوف
رسيم: متعبج؟
ركزت بعيونه
رواسي: مو بكد تعبي من ابوه
رسيم: حبيني رواسي، حبيني بكل حواسج
رواسي: احبك والله بس اعرف نهايتنا مراح تكون مرضيه
رسيم: سلميني روحج و خلي حياتنه تتغير
رواسي: اغتصبتني مرتيييين أنتَ و اليوم جانت راح تصير الثالثه
خزرني وتنر بية
رسيم: مرتي أنتِ رواسي يا اغتصاب الي تحجين عنه
وخرت ايده عن بطني ..
رواسي: اخذت كلشي غصب عني فرضت روحك عليه
و خليتني امام الامر الواقع
درت وجهي على الجامه وكملت كلامي بغصة..
رواسي: رجعني للبيت باجر عندي دوام بالمستشفى
سكتت وحرك السياره بدون ميحجي شي و رجعنا للبيت
نزلت من السياره قبله و طكيتها بركضه للغرفه فتت و قفلت الباب عليه حتى ميجي يمي..
شوي و صار يدك بالباب يريدني افتحه بالاخير جزع مني وعاط
رسيم: اذا متفتحين الباب اروح انام يم هيا و ما اطلكها!
عفته ما جاوبته و لا فتحتله الباب، خليت الوقت يمر
و كمت من مكاني فتحت الباب على كيفي و طلعت اتسحب من الغرفه بدون صوت، رحت يم غرفه هيا
شفت الباب مسدود و الضو مفتوح
قربت راسي على الباب بهدوء وسمعت صوته جوه يعني راح يمها ؟..
يتبع…
- يتبع الفصل التالي اضغط على (رواية رواسي الدهر) اسم الرواية