رواية لن احررك (كاملة جميع الفصول) حصريا عبر موقع نوفل بقلم دهب عطيه
رواية لن احررك الفصل الاول 1 – بقلم دهب عطيه
“حاسس إنك مش مرحب بوجودي في بيتك يا سراج يا خويّ…”
هتف زهران بجملته وهو يجلس على مقعد المكتب أمام سراج شقيقه الأكبر…
رفع سراج عينيه وهو يزفر مستاءً وقال..
“إنت عارف ومتأكد أنا مش مرحب بوجودك ليه هنا…”
تطلع زهران إلى الناحية الأخرى بضيق ليغير مجرى الحديث قائلًا…
“خلينا في المهم… أنا عايز أبيع العمارتين
اللي في الساحل وكنت عايزك تخلص لي الإجراءات بما إنك محامي كبير وفاهم في القانون.”
اتسعت عينا سراج بدهشة وهو يرد عليه..
“تبيع إيه يا زهران؟! ده آخر حاجة في أملاك أبوك…. إنت ناسي إن العمارتين مش ملكك لوحدك؟”
رد زهران سريعًا…
“عارف إنهم مش ملكي لوحدي وإنك ليك فيهم زي ما ليا تمام… لكن أنا داخل صفقة كبيرة ومحتاج سيولة عالية.”
ابتسم سراج بسخرية وقال..
“صفقة إيه؟!… سلاح؟”
نهض زهران بقوة من مقعده وأولاه ظهره متصنعًا الدهشة بخبث..
“سلاح إيه بس يا سراج؟! استغفر الله يا جدع…. أنا فاتح شركة استيراد وتصدير
ومعايا توكيلات لناس كبيرة أوي في البلد جوا مصر وبرا…
إنت ناسي أخوك بيشتغل في إيه؟!”
أشعل سراج سيجارته بغضب وهو ينهي الحديث قائلًا..
“مهما حاولت تضحك عليا مش هتقدر يا زهران… أنا عارف عنك كل حاجة لكن ساكت عشان خاطر الدم اللي بيجمعنا.”
تنهد سراج بأسى ثم قال…
“خلاص الكلام بيني وبينك… أنا مش هفرّط في آخر حاجة سابها أبوك لينا… أنا مش موافق على البيع يا زهران…”
صاح زهران فجأة بغضب..
“يعني إيه مش هتوافق؟!.. بقولك محتاج سيولة الصفقة كبيرة والمفروض تساعدني مش تغرقني.. “
نهض سراج وتحدث أمام وجه شقيقه بغضب وخزي…
“لو بتتكلم عن المفروض أعمل إيه فلازم تعرف إن المفروض أبلغ عنك… بما إني راجل بمثل القانون وبترافع عن الحق وبنصر المظلوم….
والمجرم عندي عقابه الحبس والعدالة هي اللي بتحدد نسبة عقابه… وللأسف قدامي مجرم لحم ودم ماشي في سكة ضلمة وسودة ونهايتها معروفة…”
لوى زهران شفتيه بامتعاض قائلًا..
“كفاية فلسفة يا محامي الغلابة وخلينا في المهم… لو معاك فلوس تشيل العمارتين وتديني حقي أنا موافق.”
“وأنا قلت لك إني مش هبيع.”
نظر زهران إليه بشر وهو يجز على أسنانه بغضب…
“يعني ده آخر كلام عندك؟”
رد عليه سراج سريعًا..
“بالظبط… ده آخر كلام ما بينا.”
ابتعد عنه زهران سريعًا متوجهًا إلى الخارج بضيق وعيناه بركتان من اللهيب المشتعل…
وضع يده على مقبض الباب وكاد أن يخرج ولكن سراج ناداه بخشونة وأمر..
“زهران…”
استدار له زهران بعينين غاضبتين ولكن متسائلتين…
ليُكمل سراج بأمر حاد..
“ابعد عن جواد وسيف… ولادي مش شبهك وبعيد أوي عن سكتك.”
ابتسم زهران بحقد…
“ولادك هم ولادي يا سراج ولا عشان ربنا حرمني من الخِلفة بقيت بتستخسر فيّا
حب ولادك ليه؟”
لوى سراج شفتيه باستياء..
“إنت عارف أنا بتكلم عن إيه كويس أوي فبلاش اللف والدوران.”
وقبل أن يفتح زهران الباب التفت إليه وقال بصوت هادئ ولكن يشوبه التهديد..
“لو عايز نفضل إخوات ودم واحد بلاش تقف في طريقي… وفكر كويس في موضوع بيع العمارتين لأن الصفقة دي لازم تتم زي ما أنا عايز… “
ثم أكمل حديثه بمكر..
“وآه الخواجة الكبير بيحذرك من آخر مرافعة اترفعت فيها ضد سمير المسيري.. وهو مش ناوي لك على خير… خاف على نفسك… وياريت تخاف على مراتك وولادك التلاتة.”
رد سراج بعناد حاد…
“سراج الغمري ما يعرفش غير الحق… ووصل رسالتي للي مشغلك…. قوله إن طول ما فيّا نفس.. هكمل في سكتي مهما كانت النتيجة.”
…………………………………………………….
وضع السيجارة بعصبية داخل المنفضة وانتفض بحدة قائلًا…
“يعني إيه الفلوس اللي معاك مش مكفية زهران؟!”
نهض زهران أمامه بحزن مصطنع:
“غصب عني يا خواجة… إنت عارف سراج وتصميمه… مصمم إنه ما يفرّطش في آخر ورث سايبه لينا أبونا.”
احتقن وجه الخواجة، قائلًا بحدة…
“ده كلام فارغ يا زهران… أخوك مصمم يتحدانا ومن فترة اترفعت قضية ضد واحد مهم من رجالتنا… وبعتنا له إنذار وهو ولا همه… ولسه ماشي في سكته. ولولا وجودك لكنت محيت اسمه من نقابة المحامين ولبسته تهمة كمان.”
ابتسم زهران بمكر وعيناه تلمعان بشر..
“أنا من رأيي تبعت له إنذار جديد يا خواجة بس مش بحبر على ورق…”
نظر له الخواجة بعدم فهم…
“مش فاهم قصدك إيه يا زهران؟”
ابتسم زهران بخبث..
“برصاص يا خواجة… قصدي إنذار برصاص.”
بعد عدة أسابيع…
صاح زهران بغضب محتدم…
“إحنا متفقناش على كده يا خواجة متفقناش على كده!”
رفع الخواجة عينيه إليه ببرود، وقال…
“وطي صوتك يا زهران… بتزعق ليه؟”
صاح زهران بانفعال أكبر…
“بزعق ليه؟! إنت متعرفش إيه اللي حصل في فيلا سراج الغمري؟!”
همهم الخواجة ببرود…
“أيوه عرفت. فيلا سراج الغمري اتحرقت… ماس كهربائي مش كده يا زهران؟”
اتسعت عينا زهران بصدمة…
“إنت بتقول إيه يا خواجة؟! إنت اللي…”
قاطعه بحدة ومكر..
“أنا اللي إيه يا حبيبي؟!…. اعقل يا زهران وبلاش تمثل عليّا…
إنت كنت عايز كده من أول ما اقترحت عليّا إنذار الرصاص…. إنت كنت عايز تخلص من أخوك وعيلته وأنا خلصتك منهم. فبلاش بقى دراما زيادة هنا يا حبيبي عشان إحنا ورانا شغل… ولا نسيت؟”
صمت زهران بتوتر وهو يتطلع إلى الخواجة بصمت مريب…
بعد مرور تسعة عشر عامًا…
“بلاش تسبني يا سيف… أنا خايفة.”
نظر لها بخوف وهو يتطلع إلى المسافة من الأعلى إلى الأسفل بذعر ويداه متشبثتان بيدها رعبًا من أن تنزلق…
“امسكي نفسك يا أمل امسكي نفسك يا حبيبتي.”
نزلت دموعها بخوف…
“مش قادرة يا سيف… أنا حاسة إني هموت خلاص.”
صاح سيف بإصرار وذعر…
“مش هسيبك يا أمل… مش هسيبك.. “
لينزل على رأسه شيء ثقيل يجعله يفقد الوعي سريعًا ولكن صوت صراخها في أذنيه كان مثل اللحن الصاخب الذي ينهش روحه بقسوة…
“آااامل… آااامل!”
نهض بذعر وبوجه مبلل بالعرق أحمر من شدة الانفعال… حتى بعد مرور السنوات لم يتغير الكابوس ولم يقدر على تبديل الماضي أو محو أي شيء يمر الآن في حياته…
طرق على الباب جعله يعود من عواصف أفكاره…
“مين؟”
“أنا شادية يا بيه… الست إنعام عايزاك تجهز عشان الست أسيل مستنياك تحت.”
حك شعره بضيق..
“أسيل؟!… عايزة إيه؟”
ابتسمت الخادمة قائلة..
“عشان تختار معاها فستان كتب الكتاب يا بيه.”
زفر سيف باختناق…
اليوم سيتم كتب كتابه على أسيل الحسيني، ابنة عمته الغالية التي توفيت يوم ولادتها في أسيل…
لتعيش أسيل مع والدها في دبي مدة لا تقل عن عشر سنوات ثم يموت والدها بعدها بسبب أزمة قلبية وتعود أسيل إلى أرض الوطن ويتكفل برعايتها جواد وجدتها إنعام.
بعد فترة ستصبح أسيل زوجته تلك التي كان يحملها على يديه حين تتذمر منه… يعلم أن الفرق بينهما ليس كبيرًا فهو يكبرها بخمس سنوات لكنه لا يراها إلا مثل أسماء شقيقته.
تنهد بحزن…
الماضي يحمل الكثير من الأوجاع له ولكن هناك من يحمل أكثر من الأوجاع جعله مثل الصخرة الصلبة الباردة مع الجميع…
هتف سيف من بين شفتيه بشرود…
“جواد…”
استلقى على بطنه فوق سطح مبنى ضخم ومرتفع ممسكًا بسلاحه الكبير ويداه على زناد السلاح…
كانت عيناه كعيني نمر ثاقبتين تترصدان هدفًا معينًا…
خرج ذلك الرجل من شركته وهو يتحدث في الهاتف بمكر وابتسامة ترتسم ببشاعة على ثغره….
في نفس اللحظة حدد جواد الهدف بعينين كعيني النمر وأطلق الرصاصة لتصيب قلب الرجل فور خروجه…
ازدحم المكان من حول الرجل بذعر وصدمة..
ليخرج جواد وسلاحه في حقيبته بوجه بارد كالثلج لتُضاف نقطة دم أخرى إلى أنهار جواد الغمري.
رفع الهاتف إلى أذنه وقال ببرود..
“علام… اتمحى من الدنيا.”
أغلق الخط ليرمي الهاتف في أقرب سلة قمامة…
ومر من أمام رجل يقف بدراجة بخارية على الطريق العام ليرمي الحقيبة السوداء على الدراجة وقال بخشونة لصاحبها..
“وصل الأمانة.”
بدأ يسير بهدوء ليجلس على مقهى كلاسيكي، ومن بعيد تلمح عيناه تجمع الناس حول الرجل الذي أُصيب بمقتل من طلقة رصاص مجهولة المصدر….
“تؤمر بحاجة يا فندم؟”
رفع جواد عينيه إلى الشاب الواقف أمامه
ليرد عليه بوجه كالصخرة الصلبة
“قهوة سادة.”
أومأ الشاب وابتعد عن مرمى عيني جواد.
أشعل جواد سيجارته بسخرية وهو يتطلع إلى البعيد دون شفقة….
ليصدح هاتفه الخاص!
نظر إلى الهاتف ببرود وهو يزفر بغضب ليفتح الخط قائلًا بصوت كاللوح الثلجي…
“عايزة إيه يا إنجي؟”
استمع إليها وهو يرتشف القهوة بتلذذ بارد
“ممم… طب خلصتي كلامك؟ بصي يا إنجي لما أعوزك هاجي وهتشوفيني… غير كده مفيش… وتحذير أخير بلاش أشوف رقمك تاني على التليفون.”
أغلق الخط سريعًا وهي ما زالت تتحدث إليه.
رفع عينيه ليجد بعض النساء ينظرن إليه بإعجاب وهمسات وقحة تلتقطها أذناه بمكر.
هو وسيم ومن يجفل عن ذلك؟!
يمتلك عينين زيتونيتين داكنتين بلون قاسٍ وبارد دومًا وهذا ما يجعلهما في بعض الأحيان مصدر إعجاب للجنس الناعم…
شعر أسود ناعم جسد رياضي وقامة طويلة ساحرة وبشرة خمرية داكنة قليلًا وملامح رجولية طاغية بشدة عليه وقسوة وبرود اكتسبهما من رحلة الماضي….
وضع النقود على الطاولة وخرج من المكان بعد أن رمى عليهم نظرة احتقار ذكورية.
……………………………………………….
“أسيل حاولي تتكلمي مع سيف أكتر من كده. إنتِ مش بتحكي معاه نهائي… وفردي وشك واضْحكي قدامه… حسسيه إنك فرفوشة ومش بتحبي النكد عشان يقرب منك أكتر.”
كانت تتحدث إنعام كبيرة العائلة أم سراج وزهران
هي سيدة من سيدات المجتمع الراقي وما يميزها عن البعض صلابتها أمام الجميع وأوامرها إليهم وأهم شيء لديها مكانة العائلة واسمها.
ولكن هذا لا يمنع أنها تمتلك قلب أم تحب أحفادها وتخاف عليهم…
لوت أسيل شفتيها وهي تعبث في الهاتف بقلة صبر من أوامر جدتها إنعام…
التي لا تمل من وضع أوامرها ونصائحها كل يوم أمام وجهها وبالأخص عندما تمت خطبتها من ابن خالها سيف الغمري.
زفرت بضيق…
فهي ستجمع عمرها وحياتها مع شخص مثل سيف الغمري الذي لا يعرف الحديث قط قليل الكلام غامض جدًا شفرة صعب اختراقها وشخصية صعب استحواذها…
هي على يقين أن سيف لا يحبها وليس بينهما أي حديث منذ طفولتهما ولكن المثير في الأمر أنه قبل الزواج منها دون أي كلمة اعتراض واحدة…
ماذا يعني هذا؟!
يجب التحدث معه هذا الأفضل لي وله. يجب أن يفهم مشاعري تجاهه ومشاعره تجاهي.
بعد ازدحام الأفكار في رأسها خطرت لها فكرة للحل الأمثل والتي كانت تعد لها منذ أكثر من شهرين…
بعد الشجاعة يا أسيل… القليل منها فقط.
تنفست بعمق وأخرجت زفيرًا عاليًا بعد أن حسمت أمرها…
نظرت إنعام إليها بعدم فهم متسائلة..
“أسيل فهمتي هتعملي إيه مع سيف؟”
إيماءة بسيطة كانت الرد على إنعام…
جلست إنعام بجانبها على الأريكة الوثيرة وهي تربت على يدها قائلة بحنان الأم وبنبرة صوت حزينة…
“أسيل أنا عارفة إنك قلقانة من ارتباطك بسيف لكن صدقيني سيف طيب وجدع وابن حلال… لكن اللي مر بيه هو وجواد كان فوق طاقتهم… فهتلاقي شوية صعوبات في قربك منه بس ده مش هيمنع إنك أنسب واحدة لسيف الغمري.”
تنهدت بصمت…
ماذا تقول لجدتها؟ القلب يهوى غيره وصعب أن يُرغم المرء على تبديل حبه مهما كانت الأسباب !
هي ضعيفة وتعلم ذلك ولكن ليس عندها الجرأة للوقوف أمام من اعتنت بها بعد موت والدها ووالدتها… هي أمها الثانية وليست فقط جدتها.
وحتى إن كانت ذات طباع صارمة تظل الأم الثانية لها في هذه الدنيا…
صدح هاتفها بوصول رسالة من شخص تحفظه عن ظهر قلب…
فتحت الرسالة..
“وحشتيني يا أسيل… هنتقابل إمتى؟”
أغمضت عينيها بألم وهي تغلق الهاتف وغاب عقلها عن الواقع ليرسم بعض الخطط التي ستخلصها من هذا المأزق…
في نفس الوقت دلفت لميس زوجة عمها زهران حديثًا وهي ترتدي بنطال جينز
ملتصقًا بشدة بجسدها وبلوزة زرقاء واسعة قليلًا وتطلق شعرها الأسود القصير حول وجهها…
ولم تنسَ لميس وضع زينة وجهها التي تُعد من أكبر وأغلى مستحضرات التجميل…
وقفت لميس أمامهما قائلة بتكبر..
“هاي يا أسيل… هاي يا إنعام هانم.”
لم ترد إنعام عليها بل أشاحت بوجهها إلى الناحية الأخرى باشمئزاز…
لترد أسيل عليها بهدوء محاولة أن تتغاضى عن نظرة النفور إليها والتي لا تعلم سببها..
“أهلًا يا لميس… على فين كده؟”
ردت وهي تشعل سيجارتها أمامهما بوقاحة..
“النادي… مش رايحة ولا إيه؟”
ردت أسيل بالنفي وهي تحاول إخراج الحديث من فمها فالحديث متعلق بالزواج المنتظر..
“لا… أصلي رايحة مع سيف عشان أشوف الفستان اللي هلبسه في حفلة كتب الكتاب.”
فغرت لميس شفتيها بتمثيل متقن لتقول باستهزاء..
“مش معقول هتشتري فستانك من هنا؟! لا وكمان رايحة تلفي وتدوري؟! خليني أكلم المصمم الإيطالي اللي بيصمم لي فساتيني يصمم ليكي فستان على ذوقه.”
استغفرت إنعام بصوت عالٍ حتى تتوقف زوجة ابنها الشمطاء عن الحديث الذي لا يروق لها.
ردت أسيل عليها ببرود..
“لا شكرًا. أنا بحب ألبس من صناعة بلدي وبحب ألبس على ذوقي مش على ذوق
حد تاني.”
رفعت لميس كتفيها وأنزلتهما بقلة حيلة قائلة بنعومة..
“براحتك… كنت بحاول أساعدك.”
كادت أن ترد أسيل ولكن سبقتها إنعام بوجه مكفهر…
“إحنا مستغنين عن مساعدتك يا مرات ابني، وياريت قبل ما تقدمي مساعدتك تسألي إذا كنا عايزينها فعلًا ولا لأ.”
زين ثغر لميس ابتسامة باردة مستفزة..
“سوري يا ماما إنعام… ماخدتش بالي. عن إذنكم بقى.. لحسان اتأخرت.”
خرجت لميس وهي تتمايل في سيرها بدلال مستفز لهما…
تمتمت إنعام بضيق..
“جتك موووت… أعوذ بالله من الأشكال اللي بدخلها علينا يا زهران.”
ابتسمت أسيل باستياء وهي تهز رأسها…
فالحقيقة الواضحة في هذا القصر أن إنعام يصعب عليها أن تحب شخصًا خارج دائرة عائلتها المحدودة.
دخل في هذا الوقت سيف يرتدي حلة سوداء، تعكس وسامة رجولته الطاغية عليه.
سيف يمتلك جسدًا نحيفًا وطولًا مناسبًا، وشعرًا بنيًا وعينين بنيتين جذابتين.
لدى سيف الوسامة الكافية لسحر عيون بنات حواء به ولكن هناك حاجزًا داخله يصعب اختراقه.
سلّم سيف على جدته ناظرًا إلى أسيل التي تختلس النظر إليه بحرج وتردد مما تنوي
فعله.
“عاملة إيه يا إنعام هانم دلوقتي؟”
ردت عليه إنعام بحنان…
“بخير يا حبيبي… طول ما أنتم بخير.”
“إزيك يا أسيل؟”
رفعت أسيل عينيها لتجده يتحدث إليها
فردت بخفوت…
“الحمد لله… إزيك إنت يا سيف؟”
رد عليها بصوت يكاد لا يصل إلى أذنيها ولكنها فهمت أنه رد عليها بالحمد كما فعلت…
نظرت إنعام إلى سيف وأسـيل لتتحدث بنبرة ذات معنى إلى أسيل..
“يلا يا أسيل عشان ما تتأخروش على مشواركم… وإنت يا سيف طول بالك على عروستك، لأني واثقة إنها هتطلع عينك لحد
ما تختار فستان كتب الكتاب.”
حرك سيف شفتيه إلى ناحية واحدة في إشارة تدل على عدم رضاه عن هذه الخروجة….
صعدت أسيل إلى السيارة بجانب سيف لتنظر إليه قائلة بتردد…
“سيف ينفع قبل ما نروح أي حتة نتكلم مع بعض شوية؟”
نظر إليها وقال بنبرة خالية من المشاعر..
“هنتكلم في إيه؟”
حاولت التحلي بالصبر أمام جفاء صوته..
“موضوع مهم لازم تعرفه قبل أي حاجة.”
لم يرد عليها بل انطلق بالسيارة بصمت وقناع اللامبالاة مرسوم على وجهه بإبداع فنان…
……………………………………………….
“اصحي يلا يا خالتوو… اصحي بقى! صلاة الجمعة هتروح عليكي.”
فتحت بسمة عينيها ذات العسل الصافي بنعاس وهي تبتسم لابن أختها الوحيد
ابتسامة يشوبها عدم التركيز…
“كريم… عايز إيه؟”
زم الصغير شفتيه وهو يتحدث بقلة صبر مضحكة..
“صبرني يا رب بقولك الجمعة هتروح عليكي. قومي يا خالتو.. قومي بقى.”
فتحت بسمة عينيها مرة أخرى بتركيز لتجلس على الفراش فغمرتها رائحة شيء ما لتحرك أنفها يمينًا ويسارًا باستمتاع سائلة الصغير بشك..
“كريم… أوعى يكون اللي في بالي.”
ابتسم الصغير مجيبًا إياها بخبث بريء..
“هو رنجة وسردين مملح… مش بقولك النهارده الجمعة؟ الفطار ملوكي.”
ابتسمت بسمة له وهي تنهض قائلة
بذهول…
“إنت متأكد إنك عندك عشر سنين؟”
حرك كريم عينيه إلى الأعلى والأسفل كحركة تدل على التفكير العميق في معضلة صعب حلها..
“آه الشهادة بتقول كده… المهم أنا رايح أتوضى وألحق بابا.. ويلا إنتِ عشان بعض الأكلة الملوكي.. ورانا هوم ورك ومحتاج مساعدتك.”
خرج الصغير وتركها تقف تضحك على طريقته الجدية معها لتتمتم بطريقة الخالة..
“قمر يا خواتي… شبهي أوي الواد كرملة ده. فينا من بعض كتير… “
وضعت دعاء شقيقة بسمة أطباق زجاجية على سفرة الطعام والتي تفوح منها روائح الأسماك البحرية المالحة بطريقة تفتح شهية متذوقها ومحبي أكلها…
“الله الله يا رويحك يا أم كريم.”
ابتسمت دعاء لزوجها أمجد بحب ليقبلها من وجنتها وهو يقول برضا…
“تسلم إيدك يا حبيبتي… ويديمك نعمة في حياتي.”
ردت عليه بخفوت…
“حبيبي اللي مدلعني… ربنا ما يحرمني منك يا أمجد.”
“تيرارررررار… تيرارررررر… الأكل هيبرد يا جوز أختي مش كده؟”
كان هذا صوت بسمة وهي تتقدم منهما لتجلس أمامهما مباشرة…
جلس كريم وهو يهمس لبسمة بمزاح..
“المفروض يراعوا سنجلة البائسة اللي بمر بيها.”
كبحت بسمة ضحكتها وهي ترد عليه بصدمة ومزاح..
“إنت بتمر بسنجلة بائسة؟!”
رد بسرعة..
“أيوه.”
“أنا كده هطلع على المعاش.”
جلست دعاء على السفرة وهي تبدأ بوضع الطعام أمام زوجها وأختها وابنها الوحيد كريم وهي تتمتم بشك..
“إنتوا بتتكلموا في إيه؟”
رد كريم سريعًا مقاطعًا أول حروف بسمة..
“ولا حاجة يا ماما… كنت بكلم خالتو عن الهوم ورك… ها نويتي تذكري ليه إمتى؟”
نظرت له بسمة لتغمز له بمكر قائلة بنبرة ذات معنى…
“أي وقت يا كرملتي… أنا قادرة.”
تحدث أمجد هذه المرة قائلًا..
“صحيح يا بسمة عملتي إيه في آخر قضية مسكتيها؟”
وضعت قطعة من الخبز في فمها وهي ترد عليه بسعادة..
“كسبتها طبعًا.”
استغرب إجابتها وسألها بإعجاب..
“إزاي عملتيها؟ دول العيال اللي عملوا الجريمة دي تحت السن القانوني.”
نظر أمجد إلى كريم ومن ثم إلى بسمة لتفهم بسمة سريعًا أن أمجد لا يريد أن يذكر جريمة الشباب أمام ابنه.
نعم الجريمة مخجلة، فهي منتشرة بكثرة منذ فترة طويلة… الاغتصاب…
وهنا نرى مجتمعًا أصبح بعض أفراده تحركهم الشهوة ليصبح الإنسان حيوانًا بلا عقل يركض وراء هواه ويدمر من لا يملكون إلا الشرف والعِرض
بينما الثوب الأبيض تتناثر عليه دناسة يصعب محوها أمام نظرة المجتمع الراسخة….
أكملت بسمة الحديث بطريقة عادية ولكنها متحفظة على وجود الطفل بينهم..
“الموضوع كان فيه لعب في شهادة ميلادهم… بس أنا حليتها وطعنت في شهادة ميلادهم وأثبت إنها مزورة… واتحكم عليهم.”
ابتسمت دعاء بفخر لبسمة قائلة…
“ربنا يقويكي يا بسمة وينجحك كمان وكمان. إنتِ طيبة وجدعة وتستاهلي كل خير… ده كفاية وقفتك مع الناس الغلابة ومرافعتك ليهم من غير ما تمدي إيدك في جيبهم.”
نهضت بسمة وهي تتمتم بصياح..
“يارب ادعيلي يا دودو… أمسك قضية من القضايا الكبيرة… وأترافع فيها وأكسبها وساعتها بقى اسم بسمة محمد الرفاعي هيسمع في المحماة ومش هبقى ملحقة
على القضايا… “
نهض أمجد وهو يحمل بعض الأطباق الفارغة وقال بمزاح..
“أيوه والدنيا تلعب معاكي وتنسي جوز أختك الغلبان.”
حملت بسمة عنه الأطباق وهي ترد عليه بنفس المزاح…
“حد ينسى أستاذ التاريخ برضه أبويه الصغير؟! على العموم ليك نسبة من الأرباح.”
قهقهت دعاء وهي ترد عليها بمكر..
“واخد بالك يا أمجد؟ بسمة بتوزع نسبة أرباحها وزمان العشر جنيه اللي في جيبها بتزغرد….”
دخلت بسمة إلى المطبخ قائلة بمزاح..
“عشر إيه؟! أنا مش فقيرة للدرجة دي…
هم سبعة ونص في جيب البنطلون.”
هتف كريم بصياح عالٍ…
“خالتوو… السبعة ونص دول يلزموني!”
ردت عليه وهي تحضر الشاي..
“إياك ثم إياك تفتح الخزنة أزعلك. المهم
مين هيشرب شاي بالنعناع؟”
ردت دعاء عليها…
“اعملي دور لينا كلنا… بس خلي كوباية كريم خفيفة وصغيرة…”
“أوك.”
وضعت بسمة صينية الشاي في الصالون لترفع عينيها إلى التلفاز وتجد خبرًا ما على الشاشة:
(علام خفاجة رجل الأعمال المشهور يتلقى رصاصة مجهولة المصدر أمام باب شركة الـ*، التي تُعد واحدة من الشركات التي يمتلكها. وقد تم نقله إلى المستشفى صباح اليوم
ولكن جثته وصلت دون روح إنا لله وإنا إليه راجعون…)
انتفض قلب بسمة سريعًا واحتل الذعر جسدها كليًا..
لاحظ أمجد تغير ملامحها والحالة التي سيطرت عليها ليسألها بقلق..
“مالك يا بسمة؟ إنتِ تعرفي الراجل ده؟”
نظرت دعاء إلى التلفاز لتتذكر شيئًا مهمًا
“ده علام خفاجة… ده صديق بابا من أيام الجامعة.. وتردد علينا بعد وفاة بابا في كذا زيارة لكن اختفى فجأة ورجع تاني وظهر من فترة قريبة في مكتب بسمة.”
توترت بسمة قليلًا وهي تستأذن منهم لدخول غرفتها….
أغلقت الباب بالمفتاح وفتحت خزانة ملابسها بمفتاح خاص بهذه الخزانة التي تخفي بها أهم أوراقها…
أمسكت الملف لتنظر فيه وهي تقرأ بعض أسماء وأرقام لأناس من المفترض أنهم مثال للمجتمع الراقي العطاء بكل نقطة دم فداءً للوطن وشعبه كما يتحدثون أمام كاميرات الصحافة!
بعض الأسماء الكبيرة والأرقام الهائلة بعض العمليات الكبيرة التي تحتوي على أسلحة غير مرخصة دخلت البلاد بطريقة غير قانونية.
أسماء كبيرة تعرفها وأخرى تجهلها ولكن اسمين شدّا تركيزها..
(زهران الغمري)
(جواد سراج الغمري)
فلاش باك…
كان علام متوترًا وهو يضع الأوراق أمام مكتب بسمة…
“خلي الأوراق دي معاكي يا بسمة يا بنتي.”
رمت بسمة نظرة إلى الأوراق بتمعن قبل أن تسأله بفضول..
“إيه الأوراق دي يا أستاذ علام؟”
مسح علام حبات العرق بتوتر وقال..
“دي أمانة يا بسمة يا بنتي… تقيلة أوي عليكي بس غصب عني… إنتِ الوحيدة اللي مستحيل يدوروا عليها عندك… الأوراق دي تمنها روحي وروح أي حد يمتلكها.”
اتسعت عينا بسمة بتوتر..
“معقولة للدرجة دي؟! يبقى لازم نبلغ البوليس.”
وضعت يدها على الهاتف بجانبها سريعًا ليمنعها علام بتوتر قائلًا..
“لا…. البوليس لأ.”
راقبت بسمة توتره وكلماته المتناثرة بذعر وشك….
ليكمل علام حديثه بطريقة أقل هدوءًا ورزانة:
“البوليس هيعرف.. بس مش دلوقتي يا بنتي. كلها يومين، يومين بس وهاخد الأمانة منك. ولو حصلي حاجة هييجي اللي ياخد الأمانة منك ويسلمها بنفسه للبوليس… عشان أنا مش عايز أحطك في الصورة لأنك مش قد الناس دي ولا قد شرهم… وبلاش تفتحي الأوراق دي يا بسمة لو عايزة تكملي حياتك بسلام.”
نظرت له بسمة وهي تراقب تهديده الصريح.
كانت تود لو ترفض إخفاء هذه الأوراق ولكن روح المحامية المغامرة استحوذت عليها لتجد نفسها في النهاية تخرج تنهيدة مستسلمة للأمر الواقع وانتظار اليومين كما أخبرها….
باك…
أغمضت عينيها بخوف من القادم من تحت هذه الأوراق..
“لازم أخلص من الأوراق دي وأسلمها لمكانها المناسب… أنا مش مرتاحة للي بيحصل ده… وأكيد في حاجة غلط من البداية…”
………………………………………………….
يقف أمام نافذة مكتبه الزجاجية الشفافة لينظر إلى المارة ببرود….
وصوت صراخ من الماضي يدوي في أذنيه بإصرار حتى إنه ظن أنه صمّ سمعه وغير
قادر على سماع غيره…
ولكن طرق الباب ودخول أحد رجاله جعلا الرشد يعود إليه.
“عملت إيه يا سيد؟”
تحدث جواد وما زال على وضعه وكأن لم يدخل أحد عليه.
رد الآخر بعملية وصوت خشن…
“الأوراق موجودة عند واحدة محامية اسمها بسمة محمد الرفاعي… محامية على قدها ودايمًا بتترافع عن قضايا الناس الغلابة
ومعظمهم من غير مقابل مادي. والغريبة إنها بتنجح في أي قضية تدخلها بشهادة الناس وعايشة مع أختها الكبيرة أستاذة في مدرسة حكومية وجوزها كمان أستاذ تاريخ في نفس المدرسة وعندهم ولد واحد عنده عشر سنين.
والمحامية دي فاتحة مكتب صغير كده في قلب الحارة اللي عايشة فيها… وده الملف اللي فيه معلومات أكتر عنها وعن حياتها من أول ما اتولدت.”
نظر إلى البعيد ببرود وهو يرد عليه…
“تمام… سيبه عندك وخد الباب في إيدك.”
خرج الرجل ليتنفس جواد بقلة صبر من مسألة أخذت أكبر من حجمها معه…
جلس على المكتب وفتح الملف لتقابله صورة هذه الفتاة التي تبتسم بسعادة للحياة وعيناها ذات العسل الصافي تلمعان بأمل نقي…
ملامح وجهها تدل على طموح وحلم رُسم بريشة فنان وشعرها الأسود المنساب بتألق يحكي قصيدة غزل خاصة بها وحدها ولم
يكن هناك منافس لها !
ابتسم بسخرية وهو يقرأ اسمها..
“بسمة محمد الرفاعي…”
ثم رفع عينيه عن الملف وقال بمكر..
“يا ترى هتيجي بلين ولا هتحصلي صاحب الأمانة اللي معاكي؟”يتبع…
•تابع الفصل التالي “رواية لن احررك” اضغط على اسم الرواية