رواية لن احررك الفصل الثالث 3 – بقلم دهب عطيه
أوقفت السيارة أمام مبنى ضخم فخم المظهر ثم نزلت منها متأففةً بقلة صبر.
كانت ترتدي تنورة قصيرة من الجينز تعلو ركبتيها وسترة بيضاء بحمّالات رفيعة.
خطت أسيل خطواتها إلى داخل المبنى ولكن قبل أن تدخل وقفت عند أعتابه تسأل حارس العمارة بهدوء
“لو سمحت هي شقة رامي التهامي الدور الكام؟”
نظر إليها الرجل من أول شعرها المنساب إلى آخر حذائها الأزرق ذي الكعب العالي.
“في شقة رقم ١٣.”
تحدث حارس العمارة باختصار جعلها تنظر إليه بدهشة فمن المفترض أن يسألها
من أنتِ؟ ماذا تريدين؟ سؤالان يجعلانها لا تشك في اعتياد الرجل على تلك الأسئلة من الغرباء..
لكنها نفضت الفكرة سريعًا متوجهةً إلى داخل المبنى الضخم.
رنّت جرس الباب ففتح رامي الباب بابتسامة سمجة….
رسم على محياه الحب أمام بعينيها في ثوانٍ معدودة فرامي الحب الذي لم يتجاوز عمره عامين فقط عامين وهي تتوهم حبه!
رامي التهامي ثلاثة وثلاثون عامًا قصير القامة أبيض البشرة شعره أسود تتخلله شعيرات بيضاء ولحية كثيفة جذابة. هو جذاب شكلًا ولكن باطنه يختلف عن وسامته التي تعشقها أسيل فيه !
“أسيل، أخيرًا…وحشتيني يا حبيبتي ادخلي.”
دلفت أسيل إلى داخل الشقة بتوتر. برغم كل شيء كانت تشعر بتوتر لم يجتمع معها يومًا فمقابلاتهما كانت دائمًا في أماكن عامة…
جلست على الأريكة وهو بجانبها يعبث بشعرها بحنان وقال…
“مالك يا أسيل متوترة كده ليه؟ أوعى تكوني خايفة مني.”
أبعدت خصلات شعرها بيدها بارتباك قائلةً بخفوت وخجل..
“لا هخاف منك ليه؟ أنت عارف إني بحبك وواثقة فيك.”
ابتسم رامي بخبث ليضع يديه على كتفها محاوطًا جسدها بوقاحة وقال..
“تعرفي إنك وحشتيني أوي وكنت مستني اللحظة اللي نكون فيها مع بعض.”
قرّب وجهه منها فانتفضت اسيل ناهضة بضيق
واشمئزاز قائلة…
“رامي إحنا اتفقنا على إيه؟”
زفر رامي بقلة صبر معلنًا عن غضبه منها..
“في إيه يا أسيل؟ مش معقول كده كل ما أحاول أقرب منك تصديني بالشكل ده.”
“عشان إحنا لسه مفيش بينا رابط شرعي.”
“أمال إنتِ جاية ليه؟”
قالها بتأفف لتنظر إليه أسيل بصدمة من ظنه المشين بها ثم صرخت عليه فجأة..
“جاية ليه؟! لدرجة دي شايفني واحدة زبالة من اللي تعرفهم؟! أنا كنت فاكرة إنك بتحبني وعشان كده جيت أقولك إن سيف معندوش مشكلة يتجوزني…
يعني جوازي منه هيتم وكنت مفكرة إنك هتشوف حل أخلص منه من المصيبة دي
لكن تصدق بالله نار سيف ولا جنة واحد خاين وندل زيك”
أخذت حقيبتها معلنةً انتهاء الحديث وانتهاء كل شيء بينهما فأوقفها رامي سريعًا وقال بلهفة…
“أسيل رايحة فين؟”
“سيب إيدي إياك تفكر تلمسني.”
نظرت إليه باحتقار وهي تحاول الإفلات من قبضته…
حاول التحدث معها بتمهل حتى تهدأ قليلًا.
“أسيل أنا آسف، صدقيني مكنش قصدي. أنا مضغوط اليومين دول بسبب أبويا وكلامه ليا مانتي عارفة.”
أغمضت عينيها بضيق وزفرت بقلة صبر…
ليكمل رامي حديثه بنبرة أكثر حزنًا ليجعل قلبها الأبله يشفق عليه ويمحو حديثه منذ قليل…
“صدقيني يا أسيل أنا بحبك وعايزك مراتي وأم عيالي بس إنتِ عارفة أبويا والعداوة اللي بينه وبين خالك موقفه الجوازة…
صدقيني يا حبيبتي أنا بعمل كل اللي في
إيدي وعمال أقنعه بحبي ليكِ ومن ساعتها وهو منعني من دخول الفيلا ومصمم أنزل معاه الشغل عشان يشغل تفكيري عنك. ميعرفش إن قلبي وعقلي ملكتيهم من زمان.”
نظرت إليه بخجل لتتحدث بحرج..
“صحيح يا رامي؟ فتحت والدك في الموضوع؟”
“صحيح يا حبيبتي وهكدب عليكِ ليه
وقريب أوي هيوفق وهتبقي مراتي يا سوو”
تنهدت بسعادة تتوق شوقًا إلى ذلك اليوم…
………………………………………………….
يجلس فوق سطح مبنى عالٍ ممسكًا بالجيتار وينظر إلى نقطة معينة…
اقتربت منه بحياء بملابسها المحتشمة وحجابها الرقيق الذي يحلي ملامحها البريئة والعادية بجاذبية يعشقها فيها… هي بسيطة وهو عاشق للبساطة.
هي (أمل)… وأجمل أمل دخل حياته مداويةً أوجاعه وحرمانه من أقرب الناس إليه وآخرهم جواد الذي سينال البعد عنهما
فترة محددة…
“مالك يا حبيبي؟”
نظر إليها سيف وابتسم بحزن وقال..
“مفيش يا أمل أنا كويس.”
جلست بجانبه وتنهدت تنهيدة عالية وقالت
“زعلان على جواد مش كده؟”
زفر بضيق..
“مش عارف ليه عمل كده؟ ليه يشيل حاجة زي دي معاه في شنطة؟ ليه؟”
قاطعته برقة أنثى…
“كفاية يا سيف اهدأ. كل حاجة هتتحل عمك هيحل الموضوع… وجواد هيخرج وهيرجع بيته وشغله… بس إنت اهدأ عشان خاطري. أنت عارف أخوك بيحبك قد إيه وأكيد مش هيبقى حابب يشوفك كده بسببه…”
تحدث سيف بنبرة حزينة…
“جواد آخر واحد باقي ليا أنا مش هستحمل خسارة تانية… كفاية أسماء وأمي وأبوي كمان جواد؟”
فتحت ذراعيها ليضع رأسه في أحضانها كالطفل فاقد الأمان فيجد أمانه وسط أحضانها…
استيقظ من ذكرياته على نسمات الهواء العابرة باردةً تحمل رائحة الياسمين يمتزج معها الأمل ليهتف بعذاب مشتاق…
“وحشتيني…”
بدأ يعزف على الجيتار لحنًا هادئًا حزينًا. للحظة كانت صورة الذكريات وحدها تحاوط مخيلته والحبيبة الوحيدة تسير على أوتار جيتاره بنعومة…
تغيرت تلك الصورة بصورة أوضح وأقرب ولكن الصورة ليست من الماضي المظلم الصورة من الواقع المنتظر… أسيل!
ومعنى الاسم السهل اللين فهل علاقته بها ستأخذ نصيبًا من اسمها أم ستبقى بعيدة كل البعد عن السهل واللين؟!
تنهد بضيق لا يريد أسيل زوجةً له المشكلة ليست في أسيل بل فيه هو هو لا يرى حواء أخرى بعد أمل لا يرى حواءً تكن له وطنًا حقيقيًا مثل أمل…
لن يقارن أسيل بأمل قط أسيل شيء وحبيبته شيء آخر.
ولكن يجب أن يتزوج ليرضي السيدة التي كانت له أمًا بعد فقدان عائلته.
ليتذكر حديثه مع أسيل أمس…
جلس أمامها مباشرةً في مقهى يطل على النيل وقال بهدوء…
“اتفضلي يا أسيل.. حابة تتكلمي في إيه؟”
كان سيف ينظر إلى الماء العذب بتمعن وحين قالت جملتها خلع نظارته الشمسية السوداء وقال بفتور..
“في حاجة في تجهيزات كتب الكتاب مش عجباكِ؟”
“مش ده الموضوع.”
لوى فمه بقلة صبر وقال..
“أمال إيه الموضوع؟ أنا سمعك على فكرة اتكلمي.”
اشتدت عيناها غضبًا وهي تتحدث بيديها.
“أهوه هو ده الموضوع شايف طريقة كلامك معايا؟ مش طريقة اتنين هيكتبوا كتابهم كمان شهر… طريقتك وحشة معايا في الكلام.”
رد بفظاظة
“بعد الجواز هتغير… ها أيه تاني؟”
رفعت حاجبيها بقهر..
“وبتكلمني بقرف وبتنطق اسمي بتكبر كده.”
“بكلمك بقرف؟ يبقى هعصر على نفسي لمونة. بنطق اسمك بقرف؟ فده نقص عندك لإنك مش عاجبك اسمك… فبلاش تقولي كلام ملوش وجود من الأساس.”
عضت على شفتيها بتفكير… تريد أن تفسد رابط الزواج منه ويبقى الرفض منه هو وفي ذات الوقت لن تلومها أنعام جدتها على شيء فحفيدها الفظ البارد هو الذي رفضها وليس هي.
قالت بضيق زائف..
“تعرف يا ابن خالي إني مش بستلطفك أبدًا.”
رفع حاجبه ليضع قدمًا فوق أخرى وقال
ببرود..
“تصدقي نفس الشعور. كده المشاعر متبادلة، وفي توافق هايل مبينا. مبروك يا بنت عمتي.”
نظرت إليه بدهشة لتهتف من بين أسنانها
“أنت حقيقي بـ…”
“لا حلم…. تشربي إيه؟”
قاطعها ببرود وهو يطلب لها..
“لو سمحت فنجان قهوة سادة وكوباية لبن.”
اندهشت أكثر وهي تسأله بشك..
“اللبن ده ليك أنت؟”
عبث في هاتفه وهو يقول ببرود..
“لا أنا كبرت على الحاجات دي. ده ليكِ أهوه، بحاول أبقى لطيف… مش ده كلامك؟”
جن جنونها لتهتف بغضب..
“أنت بتعاقبني ولا إيه؟! أنا مش بحب اللبن ومستحيل أشربه.”
نظر لها بطرف عينه وقال ببرود..
“مع سيف الغمري مفيش مستحيل.”
نظرت له بغضب ليأتي النادل ويضع المشروبات ثم يذهب.
“يلا سمي الله واشربي.”
اكتفت بكلمة واحدة وبعناد قالت
“ده بعدك مستحيل.”
تحدث بخشونة وصرامة..
“لسه قايلك مفيش مستحيل معايا. اشربي اللبن يا إما هشربه ليكِ بنفسي قدام الناس ولطقم الجديد اللي عليكِ ده هنكمل المشوار بتاعنا بيه وريحة اللبن هتبقى البرفان الجديد اللي هيتبهروا بيه صحاب الأتيليه.”
ارتفع الغضب والغيظ عندها إلى مستوى يصعب السيطرة عليه ولكن نظرة سيف
الجادة جعلتها ترتشف اللبن على مضض.
احتسى سيف قهوته بتلذذ وهو ينظر إلى النيل بهدوء..
ليتحدث بعد مدة قائلًا…
“على فكرة في كلام بينا لازم يتقال وكلام مشروط لازم يتحط قبل ما أكتب عليكِ. ووعد مني لو مش هنتفق في القعدة دي هرفضك بنفسي وقدام أنعام هانم زي ما إنتِ عايزة. بس نتكلم الأول.”
قالت بلهفة..
“بجد؟ طب هنتكلم إمتى؟”
احتسى القهوة وقال جملة واحدة باختصار
“كل حاجة في وقتها أحلى.”
نظرت إليه بخيبة أمل وظنت أن معنى حديثه هو أن الزواج منه سيحدث عاجلا غير اجلا
فلن يتنازل سيف ويرفضها عند جدتها أنعام ومستحيل أن ترفضه هي أمام جدتها ستصيبها بخيبة الأمل فيها.
ماذا عليها أن تفعل؟
الانتظار… فقط الانتظار
ابتسم وهو يستمع إلى لحن الجيتار ثم غيّر اللحن إلى نغم ناعم مجنون يحمل صخب الحياة ونعومة تفاصيلها وسهُل على يديه حفظه…
وكان اللحن خاصًا بها؟!
ــــــــــــــــــــــــــــــــــــــــــــ
وضعت أمامه فنجان القهوة وهي تقول بامتعاض..
“القهوة يا جواد بيه.”
رفع عينيه إليها ومن ثم إلى فنجان القهوة. أمسك الفنجان وارتشف منه بهدوء ثم أنزله عن فمه ووضعه على سطح المكتب وقال بتكبر….
“مش بطال… اقعدي يا آنسة بسمة.”
احتقن وجهها احمرارًا وقلة صبر من قلة الذوق المحيطة بهذا الكائن…
“حضرتك عايزني أترافع عن أي قضية؟”
رفع عينيه إليها بدهشة وبحاجب مرفوع بعلامة استفهام وقال…
“عفوًا؟ قضية إيه؟”
تحدثت بمكر لتخفي خوفها من ظهوره الآن أمامها..
“أمال حضرتك جاي ليه؟”
أطلق جواد ضحكة عالية يشوبها السخرية وهو يقول..
“آه فهمت إنتِ فاكرة إني جاي ليكي في قضية تخصني أحلامك عالية أوي يا آنسة بسمة.”
لوَت شفتيها وهي ترد عليه بقلة تهذيب مماثلة له
“فعلاً أحلامي أعلى من إني أمسك قضية لواحد سمعته سبقاه.”
نظر لها بوجه حجري لم يؤثر حديثها عليه قط كما ظنت.
“فعلاً… المهم أنا جيت عشان أخد الأمانة.”
توترت وهي تسأله بعينين زائغتين…
“أمانة إيه؟ أنا مش فاهمة حضرتك تقصد إيه.”
احتسى القهوة بتمهل وهو يقول ببرود..
“الأمانة اللي سلمها ليكِ علام الخفاجي قبل
ما يموت.”
“قصدك قبل ما تقتله؟”
نطقت بسمة بتلك العبارة بعينين تشتعلان من وقاحة هذا الرجل.
ابتسم جواد ابتسامة بدت في عينيها شديدة الظلام والسادية لتسمعه يقول ببرود…
“واضح إنك فتحتي الورق وعرفتي كل حاجة.”
بلعت ما بحلقها وتحلت بشجاعة زائفة قائلة
“آه، عرفت كل حاجة… والورق ده هيوصل للبوليس وساعتها…”
“وساعتها هتموتي قبل ما تفكري تمسكي الورق تاني بين إيديك… اعقلي يا شاطرة إنتِ مش قد أصغر اسم مكتوب في الورق ده…
ولا إنتِ روح المغامرة عندك عالية؟”
هتفت بذهول..
“أنت جاي عشان تهددني ولا جاي تخلص عليا؟”
“عايزة كام؟”
أشعل سيجارته وهو ينظر إليها بسخرية…
رفعت بسمة إحدى زاويتي شفتيها بامتعاض
“تفتكر الورق يساوي كام من وجهة نظرك
ولو إنت مكاني هتاخد كام؟”
أخرج الدخان الرمادي من فمه وقال بتمعن
“الورق يساوي كتير… وأنا لو مكانك هطلب أكبر رقم ممكن يعيشني ملك طول عمري. لكن في نفس الوقت هبقى واثق إن الفلوس اللي هاخدها هموت قبل ما أشم ريحتها حتى.”
سألته بسمة بشك من معنى حديثه…
“قصدك إني بقيت في دايرة الخطر؟”
“لا في دايرة الموت وفي لعبة إنتِ مش قدها.”
نهضت بغضب وهي تتحدث بصراخ مجنون
“أنت جاي ليه وعايز إيه؟ اللي شغال عندهم هما اللي بعتوك عشان تموتني؟”
نهض ليقف أمامها وقال بنفس الصلابة..
“بلاش تستعجلي على الموت يا آنسة. مفيش حد بيموت ناقص عمر.”
اقترب منها ببطء ليقف أمامها عن قرب
وقال…
“وبعدين إنتِ جميلة ومثقفة وبصراحة خسارة فيكي الموت.”
مرر يده على وجهها ومن ثم على عنقها ليمسك خصلات شعرها بقبضته ويجذبها أمام رأسه بقوة…
تأوهت بألم من آثار همجيته معها ليكمل حديثه في أذنها بزئير كالأسد الجائع…
“خدتي أكتر من وقتك معايا… الورق فين يا بت انــــطــــقــــي يا روح أمك!”
حاولت الإفلات منه وبدأت تضربه في صدره العريض بقبضتاها وهي تصرخ بصياح وجنون..
“ابعد عني يا حيوان أقسم بالله لأحبسك أنت والكلاب اللي بتشتغل عندهم سيبني يا حيوان سيبني “
قذفها بعيدًا عنه باحتقار وهو يتنفس بصعوبة وقال..
“شكلك مش خايفة على أختك وجوزها وابنهم…”
نظرت له بصدمة واتسعت عينيها بوجل وبدا جسدها ينتفض من شدة الخوف متصورة الابشع بعد هذا التهديد الصريح منه لتخرج الحروف بصعوبة من بين شفتيها…
“تقصد إيه؟”
أخرج هاتفه ولم يرد عليها ليقول عبر الهاتف جملة واحدة…
“نفذ اللي اتفقنا عليه.”
وقع قلبها بين يديها بعد جملته تلك لتصرخ بخوف وهي تنقض عليه بشراسة…
وقبل أن يبعدها جواد عنه ويتدارك الموقف كانت قد تركت أظافرها الحادة جرحًا رفيعًا على تجويف عنقه.
أبعدها ووضع يده على الجرح ليجد بعض الدماء البسيطة على أطراف أصابعه…
“يا بنت المجنونة!”
هتف بالجملة بشرود سمعته بسمة وحاولت أن تنقض عليه مرة أخرى ولكنه كان الأسرع في الإمساك بيدها لتقترب الوجوه من بعضها مع فارق الطول بينهما…
نظر جواد إليها بعينين مشتعلة وقال بصرامة
“إياكي تفكري تمدي إيدك تاني… إنتِ فاهمة؟”
سالت دموعها من عينيها ويدها ترتجف بين يديه وقالت بترجٍ…
“أوعى تقتلهم أنا ماليش غيرهم دول هم اللي فاضلين ليا بعد موت أبويا وأمي… أوعى تقتل عيلتي أبوس إيدك. أنا من غيرهم أضيع.”
نظر لها بتمعن ووجهه لا يوحي بأي تأثر بحديثها…
لتكمل بوجه أحمر وعيون حمراء من احتمالية
فقدان عائلتها الوحيدة بسببها هي….
“أنت متعرفش يعني إيه أهل… أكيد عمرك ما كان عندك اللي تخاف عليه… أكيد عمرك ما اتوجعت لفراق حد بتحبه.”
نظر لها بقوة وتلك الكلمات شديدة البؤس تجذبه الى حادثة قلبت حياته راسا على
عقب…
“جواد تفتكر أمك عاملة لنا إيه على الغدى؟”
تحدث سيف وهو يمسك معدته بجوع.
ابتسم جواد وهو يقول بمكر..
“أكيد ورق عنب أصلي طلبته منها الصبح.”
اتسعت ابتسامة سيف وقال بمزاح..
“ما شاء الله البيت كله بيحفل عليه. أنت لازم تطلب الحاجة اللي مش بحبها.. “
رد جواد بضحك..
“بصراحة يا أبو بوز ده اقتراح أسماء عشان تغيظك شوية.”
تحدث سيف وهو ينظر إلى الأمام بينما وقف جواد ليعدل رباط الحذاء الرياضي الذي يرتديه:
“ماشي ماشي… هي إيه الزحمة اللي عند بيتنا دي؟”
رفع جواد عينيه باهتمام ليرى الحريق مشتعلًا في فيلا والده ورجال الإطفاء يحاولون إخماد الحريق ومجموعة من البشر يقفون يشاهدون المشهد بشفقة ومن ضمنهم عمه زهران وجدته أنعام.
ركض جواد بقوة وهو يصرخ بخوف..
“أسماااااااء….. باباااااا….. إمــــــــــي!”
ركض بين الناس ليدخل وسط الحريق وفي آخر لحظة أنقذه رجال الإطفاء ولكن النيران أصابت ظهره وما زال الجرح يترك أثرًا في جسده حتى هذا اليوم…
حينها صرخ وصرخ عاليًا ينادي عائلته بقوة بينما كان سيف يبكي في حضن جدته أنعام
ويخفي وجهه عن كل ما يحدث…
صرخ جواد وهو ينظر إلى البيت بعد ان انطفا
وبقت اثار الحريق عليه
حاول وقتها الافلات بشكلا عدواني ورجال الإطفاء يمسكون بقوة حتى لا يتهور مرة أخرى..
“أسماء بلاش تسبيني خديني معاكي أنا خايف يا أسماء… عشان خاطري ارجعي ورجعي أمي وأبويه معاكي….
طب صحيني من الكابوس ده عايز آخدك في حضني وأقولك إنك أحن أخت في الدنيا دي. أسماااااااااااء ردي عليا”
فقد الوعي سريعًا ليدخل في انهيار عصبي دام سنوات…
عاد جواد من تلك الذكرى السوداء على وجه
بسمة المنهارة امامه فقال ببرود جليدب
“لو خايفة عليهم بجد قولي على مكان الأوراق.”
ابتعد عنها ليوليها ظهره محاولًا إخفاء صخب مشاعر الماضي التي أخرجتها هذه المحامية بجملة واحدة.
“لو عرفت مكان الورق… هتسيبهم؟ توعدني.”
“أوعدك.”
تحدث بسرعة..
اتجهت إلى درج مكتبها وأخرجت ملف الأوراق منه لتقف مكانها قائلةً بنبرة مبحوحة من آثار البكاء..
“ده الورق. أنا شيلته عندي في البيت من يوم ما خدته لكن النهارده نزلت بيه وشلته في مكتبي عشان كنت ناوية أسلمه للبوليس.
بس حياة أهلي أغلى عندي من مبدئي.”
مسحت دموعها المنسابة بظهر يدها.
نظر لها جواد بتفحص وأخذ الورق منها
“المكالمة كانت تهديد مش أكتر. مفيش حد من رجّالتي دخل شقتك… اطمني يا آنسة.”
نظرت بسمة إليه بصدمة…
ابتعد جواد عنها ناحية الباب ليقف أمام إطاره وقال بحذق…
“عايز أنصحك نصيحة من واحد مش هتشوفيه تاني…بلاش تستهوني بنسمة هوا جاية عليكِ من بعيد لأنها ببساطة ممكن توقعك… سلام يا آنسة بسمة…”
خرج وتركها…
لتترك جسدها على الأرض الصلبة تستقبلها بقسوة وضمت قدميها أمام صدرها وهي تبكي بقوة من خسارتها أمام أول قضية كبيرة في حياتها… انتصر عليها الباطل وضعف سلاح الحق أمامه…
ــــــــــــــــــــــــــــــــــــــــــــ
جلست لميس على الفراش وهي تتحدث بتوجس..
“أيوه يا عزيز.”
تحدث عزيز من الناحية الأخرى بضيق..
“عملتي إيه يا لميس؟ عرفتي حاجة عن مكان الورق اللي كان مع علام؟”
نهضت لميس سريعًا وأغلقت باب غرفتها وقالت بتوتر…
“معرفتش حاجة… كل اللي أعرفه إنه مع واحدة محامية اسمها بسمة… ده اللي سمعته وأنا واقفة قدام باب مكتب زهران.”
تحدث عزيز بقلة صبر…
“يعني متعرفيش اسمها بسمة إيه بالكامل؟”
تحدثت لميس بخفوت…
“لا معرفش يا عزيز ده اللي سمعته وكأن زهران بيتكلم بالهمس هو وابن أخوه جواد وكأنهم مش عايزين حد يسمعهم.”
زفر عزيز بضيق..
“صبرني يا رب بقالك أكتر من سبع شهور متجوزة الغبي ده وعمرك ما جبتيلي خبر
عدل أو كامل.”
قالت لميس بامتعاض..
“طب وأنا أعمل إيه يا عزيز؟ ما زهران كتوم ومش بيأمن لحد على أسراره.”
تحدث عزيز من بين أسنانه..
“اشمعنا مأمن أسراره لجواد ابن أخوه؟”
قالت لميس بصرامة..
“معرفش يا عزيز معرفش. بس اسمع لازم الاتفاق اللي بينا يتم… أنا اتجوزت زهران عشان بعد كام شهر أورثه
وتخلص على أهله كلهم قبل ما يموت وبعد
ما تقتله أكون أنا الوريثة الوحيدة ليه وثروته وأملاكه تبقى ليا وليك وكمان السوق هيفضى قدامك. ها هتنفذ اتفاقنا إمتى يا عزيز؟ أنا بدأت أزهق… “
“قريب يا لميس متقلقيش. هندفنهم أنا وإنتِ واحد واحد.”
ــــــــــــــــــــــــــــــــــــــــــــ
وضع جواد ملف الأوراق على سطح المكتب وهو يقول باختصار..
“الأوراق أهي اتأكد منها بنفسك.”
نظر له زهران بهدوء وأمسك الأوراق بين يديه وتفحصها بتمعن ليتمتم وسط تفحصه لها..
“لقيتهم عند البنت المحامية مش كده؟”
“بالظبط.”
تحدث زهران مرة أخرى وعيناه على الأوراق يدقق بها النظر:
“وخلصت عليها؟”
“لا.”
ترك زهران ما بيده ورفع عينيه إلى جواد
باستفهام…
“وليه مخلصتش عليها؟”
(أوعى تقتلهم أنا ماليش غيرهم دول هم اللي فاضلين لي بعد موت أبويا وأمي. أوعى تقتل عيلتي أبوس إيدك. أنا من غيرهم أضيع…)
نفض جملتها التي تدوي في أذنيه بإصرار ليرد على زهران بثبات..
“وقتلها هيفدنا في إيه؟ إحنا كنا عايزين الورق وهي سلمته لينا من غير مقابل. يبقى قتلها هيفدنا في إيه؟..)
قال زهران بضيق..
“مش هيفدنا ولا هيضرنا لكن هي دخلت اللعبة ولازم تموت… وبعدين إنت من إمتى بيهمك روح حد؟ دايمًا بتنفذ الأوامر ليه المرة دي بتخالف أوامري يا دراعي اليمين؟”
نظر له جواد بصمت بوجه بارد حجري لا يحكي عن شيء سوى انعدام المشاعر.
“بكرة هبعت حد من الرجالة يخلص عليها.”
تحدث وهو يوليه ظهره للمغادرة.
ليوقفه زهران بجملة واحدة..
“محدش هيخلص على البنت دي غيرك يا جواد.”
لم يلتفت إليه بل نظر ناحية اليمين وهو يرد عليه ببرود..
“اعتبرها ماتت… وخبرها هيوصلك بكرة.”
ابتسم زهران ابتسامة جانبية…
يريد أن يموت سراج داخل جواد يريد أن يقتل الشفقة والقلب ويريد أن يبقى جواد الذئب الجائع دمًا وشرًا وقسوةً وجحودًا يتذوقها بلذة ويخرجها لأعدائه بلا رحمة
هذ هو هدفة من البداية!
فتح الباب عليهما في هذا الوقت ليطل منه سيف وهو يبتسم بجاذبية وقال
“هو إنتوا ناويين تعشونا الفجر ولا إيه؟ العشا هيبرد يا جماعة وأنعام هانم هتقلبها محاضرة عن القواعد والنظام الملكي.”
ابتسم جواد ابتسامة لم تصل إلى عينيه وهو يقول..
“هو إنت دايمًا همك على بطنك كده؟”
“والنبي يا فخامة بطل تريقة ويلا ناكل.”
تحدث زهران هذه المرة سائلًا سيف
“عملت إيه يا سيف في الاجتماع بتاع النهارده؟”
“كل تمام كل الشروط اللي ضفتها وقولتها لهم وافقوا عليها زي ما أمرت… وكل حاجة تحت السيطرة يا عمي متقلقش.”
قال زهران وهو يفتح خزنة مكتبه..
“برافو عليك يا سيف. طب اسبقوني إنتوا
وأنا جاي وراكم.”
خرج الاثنان وتحدث سيف بمزاح لا يعرفه إلا مع شقيقه وعائلته الوحيدة…
“وإنت عامل إيه يا فخامة في شغلك؟”
رد عليه جواد بقلة صبر…
“الشغل ماشي كويس. وبقولك إيه بلاش الاسم ده عشان مش قادر أبلعه.”
“تصدق طول ما إنت كاره الاسم هكرره كتير.”
سأل باستياء..
“دي رزالة بقى.”
تحدث سيف بإزعاج..
“لا دي مش رزالة. أنا بقدرك كده عشان تمشي منفوخ في الشارع أكتر ما إنت منفوخ… آه!”
أمسك جواد سيف من أذنه بقوة وقال بتحذير
“كلمة تانية وهزعلك… يلا عشان تاكل. مش جعان ولا غيرت رأيك؟”
حاول سيف إبعاد يد جواد عن أذنه..
“أيوه جعان بس شيل إيدك يا عم إيدك تقيلة.”
“انشف يا واد.”
قال سيف بمزاح
“مش القصد بس إيدك ممكن توحشك.”
ضحك جواد وهو يهز رأسه بيأس من تغير سيف.
ولكن في الحقيقة هو الوحيد الذي يهون عليه كل شيء في الحياة أو باختصار وجودهما معًا يهون على كليهما كل شيء.
جلس جواد على السفرة في أول مقعد والجدة أنعام أمامه مباشرة وبجانبه يجلس سيف وعلى رأس الطاولة زهران.دد
تحدثت أنعام للخادمة شادية قائلة
“هي أسيل مش هتنزل كمان النهارده يا شادية؟”
ردت الخادمة بهدوء..
“سألتها يا ست هانم قالت إنها شبعانة وهتنام.”
تحدث زهران متسائلًا..
“هي مالها أسيل يا أمي؟ لو تعبانة أتصل بدكتور ييجي يشوفها.”
“هي كويسة بس من ساعة ما خرجت مع سيف وهي بقالها يومين بتتهرب من إنها تقعد معانا على سفرة واحدة… وأكيد سيف عارف مالها.”
نظرت أنعام إلى سيف بتفحص.
ليمضغ سيف الطعام ببرود
“بصراحة أنا مش هقدر أجاوب على سؤال معرفش إجابته فمِن رأيي اسألي صاحبة
الشأن مالها.”
زفرت أنعام بضيق من وقاحة هذا الجيل وبرودة مشاعرهم.
ليتحدث زهران منهيًا الحديث..
“وأنا كمان رأيي من رأي سيف. اسأليها يمكن في حاجة تانية.”
دخلت عليهم في هذا الوقت لميس وهي تتحدث بنعومة ودلال..
“هاي يا جماعة… أهلًا يا بيبي.”
مالت لميس على زهران وقبلته من وجنته بوقاحة أمام أنعام التي أهانتها في سرها بأفظع الألفاظ.
تحدث زهران بحرج من نظرات والدته غير الراضية عن هذه العلاقة من البداية..
“أهلًا يا حبيبتي. اقعدي يلا اتعشي معانا.”
“لا يا بيبي أنا عاملة دايت. عرفت إنك لسه جاي من الشغل قلت أسلم عليك. المهم هستناك فوق بقى… متتأخرش عليا.”
مالت مرة أخرى عليه وقبلته من وجنته.
حمحمت أنعام بعدم رضا لتذهب لميس من أمامهم وهي تتمايل بنعومة…
“استغفر الله العظيم… البيت خلاص سكنته الشياطين.”
تنحنح زهران وهو يتحدث بحرج..
“أمي… الأكل هيبرد.”
تحدث وهو يتصنع انشغاله في الطعام.
لتنظر أنعام إلى جواد الصامت من بداية الجلسة وتقول بحنان..
“وإنت يا جواد يا حبيبي ناوي إمتى تفرحني بيك؟ أخوك كلها كام شهر ويبقى في بيته مع مراته. ها وإنت إمتى هتفرحني بيك؟”
“لسه شوية.”
رد عليها جواد ببرود.
“شوية لحد إمتى؟ إنت بقيت خمسة وتلاتين سنة! إيه ناوي تتجوز على الخمسين؟ إيه اللي في رقبتك ده يا جواد؟”
لفت نظرها شيء ما في جانب عنق جواد.
وضع جواد يده على الجرح الرفيع الذي كان سببه هذه الفتاة وهجومها عليه كالمجنونة.
“ده خدش صحيت لقيته كده.”
نظر سيف الذي يجلس بجانبه ليدقق النظر في عنق جواد وقال بعد ثوانٍ بصياح..
“خدش إيه؟ دي ضوافر واحدة معلّمة عليك!”
لكمه جواد في بطنه دون أن يلاحظ أحد ليهتف سيف سريعًا:
“لا ده خدش… واضح إن نظري ضعف. هحاول أكشف على عيني. خدش يا جماعة الموضوع مش مستاهل.”
غمز له سيف بخبث لينزل جواد عينيه على طعامه واجما وهو يلعن بسمة وما فعلته ب
اظافرها..
ــــــــــــــــــــــــــــــــــــــــــــ
كانت تجلس على الفراش بعينين شاردتين ووجه شاحب مما تعرضت له اليوم…
دلف أمجد إليها بعد الاستئذان لينظر لها باهتمام وقال
“مالك يا بسمة؟ إنتِ تعبانة ولا إيه؟”
ردت عليه بسمة بنفي حزين
“لا أنا كويسة يا أمجد مفيش حاجة.”
جلس على حافة الفراش وهو يسألها بشك
“أمال مش عايزة تقومي تتعشي معانا ليه؟ وليه قافلة على نفسك من ساعة ما رجعتي من بره؟ مالك يا بسمة؟ في حاجة مخبياها عليا؟”
نزلت دموعها فور سؤاله الحنون.
تحدث أمجد هذه المرة بيقين:
“لا في حاجة بجد. احكيلي إيه اللي حصل النهارده في الشغل.”
نظر لها أمجد بجدية وإصرار على سماع حقيقة ما مرت به اليوم.
حسمت بسمة أمرها وهي تقول بصوت مبحوح…
“هحكيلك بس اوعدني إنه هيكون سر ما بينا. مش عايزة دعاء تعرف عشان متقلقش عليا.”
ــــــــــــــــــــــــــــــــــــــــــــ
في الصباح، استيقظ مبكرًا وارتدى حلة سوداء ومعطفًا أسود طويلًا فوقها ثم ارتدى نظارته ومشط شعره ونظر إلى نفسه في المرآة ليلفت انتباهه الخدش الواضح في عنقه…
زفر بضيق وهو يرفع لياقة المعطف قليلًا حتى تخفي آثاره..
نزل الدرج وكان المكان شبه خالٍ ما زال الجميع نائمين.
صعد دراجته البخارية وانطلق بها بعد أن وضع قناعها…
في الناحية الأخرى خرجت بسمة من البيت بعد إلحاح على أمجد زوج أختها بتركها للعمل. اليوم لديها قضية مهمة إحدى قضايا الطبقة البسيطة التي تترافع فيها دوماً.
“ست بسمة…”
أوقفتها امرأة تحمل طفلًا صغيرًا على يدها.
وقفت بسمة وقالت بود..
“إزيك يا أم فريدة؟….. عاملة إيه؟”
ردت السيدة بحرج..
“الحمد لله يا ست بسمة… أنا كنت طالبة من حضرتك خدمة ويارب ما ترفضي.”
سألتها بسمة بتركيز..
“قولي يا أم فريدة، عايزة إيه؟”
قالت المرأة بحياء..
“أخويه الصغير كان شغال على توكتوك ومسكته الحكومة وكان معاه يعني حشيش في جيبه.”
سألتها بسمة بشك…
“بيتاجر في المخدرات؟”
قالت المرأة بنفي سريع
“لا تعاطي والله يا ست بسمة. كنا عايزينك تمسكي القضية دي. ده الواد غلبان، وهو اللي بيصرف على أمي وخواتي البنات.”
في الناحية الأخرى جلس جواد فوق مبنى عالٍ، وحدد هدفه بسمة الواقفة تتحدث مع تلك المرأة.
أمسك سلاحه ووضع يده على الزناد وعقله يجبره على فعلها ولكن هناك حواجز داخله تمنع فكرة قتل تلك المحامية
/مش هيفدنا ولا هيضرنا لكن هي دخلت اللعبة ولازم تموت… وبعدين إنت من إمتى بيهمك روح حد؟ دايمًا بتنفذ الأوامر ليه المرة دي بتخالف أوامري؟..)
تذكر كلام زهران ليحدد الهدف للمرة الثانية ولكن بيقين فاعل وليس مترددًا.
أطلق النار نحو هدفه ولكنه أخطأ في شيء كان مدركًا له تمامًا !
أنزل السلاح ونظر إلى مكانها ليجدها قد اختفت وسط تجمع الناس عليها والهلع والخوف الواضحان على وجوه أختها وزوج أختها اللذين هبطا من العمارة بعد سماع صوت الرصاص.
•تابع الفصل التالي “رواية لن احررك” اضغط على اسم الرواية