رواية لن احررك الفصل الرابع 4 – بقلم دهب عطيه
خرج الطبيب إليهم ليأتي عليه كلٌّ من أمجد ودعاء بهلع قائلين
“طَمّنّا يا دكتور…. بسمة عاملة إيه دلوقتي؟”
ابتسم الطبيب قائلًا بتمهّل…
“اهدوا يا جماعة الحمد لله هي بخير. الرصاصة ما صابتْهاش هي بس عملت جرح عميق شوية بجانب الذراع الأيمن وده بسبب مرور طلقة الرصاص… والحمد لله عملنا خياطة للجرح… بس على فكرة إحنا بلغنا البوليس بالواقعة وقريب هيوصلوا عشان ياخدوا أقوال الآنسة بسمة.”
تحدث أمجد بعد تنهيدة شكر..
“الحمد لله… ممكن ندخل نشوفها يا دكتور؟”
“آه طبعًا… اتفضلوا… حمد لله على سلامتها.”
أخبرهم الطبيب بذلك ثم غادر من أمامهم.
دخل أمجد ودعاء إلى بسمة التي كانت جالسة على فراش المشفى وعيناها غارقتان في شرود عميق…
“بسمة… حبيبتي ألف سلامة عليكِ.. “
تحدثت دعاء وهي تحتضن أختها بدموع الخوف…
قالت بسمة بثبات غريب..
“أنا كويسة يا دعاء كفاية عياط.”
رفعت بسمة عينيها إلى أمجد بتردد لتجد وجهه محمرًّا غضبًا وينظر إليها بعدم رضا
عن كل ما يراه…
قال أمجد بعد صمت..
“حمد لله على سلامتك يا بسمة.”
“الله يسلمك.”
حاولت أن تجفل عن نظراته الواثقة التي تعني الكثير وخافت مما قد يصدر عنه بعد هذا الحادث.
تريث أمجد برهة قبل أن يقول..
“على فكرة البوليس هييجي كمان شوية ياخد أقوالك. هتقولي لهم مين ضرب عليكِ النار ولا أقول أنا؟”
نظرت بسمة إليه بتحذير وهي تنقل نظرها بينه وبين دعاء التي نظرت إليهما بشك وغضب من إخفائهما حقيقة الأمر عنها.
“في إيه يا أمجد؟ معنى إيه كلامك ده؟ أنت عارف مين ضرب عليها نار عارف… وإنتِ
كمان عارفة…. وأنا اخر من يعلم… “
حاولت بسمة التحدث بقنوط وإصلاح الوضع قليلًا..
“دعاء أمجد مش قصده. هو بس بيخمن مين ممكن يكون عايز يأذيني… و…”
صاح أمجد بغضب..
“بلاش تبرير يا بسمة طالما فكروا يقتلوكي مرة وما صابتش هيحاولوا تاني وتالت. لازم البوليس يدخل ويحميكِ منهم!”
هزت رأسها بتعب..
“غلط… الواقع بيقول إن إحنا مش قدّهم وليقين اللي عندي إني بقيت ميتة خلاص
في نظرهم فاضل بس الحكم عليت.”
ضربت دعاء على صدرها بهلع وصدمة..
“ينهار أسود هي حصلت؟ ليه؟ ليه يعملوا كده؟ وإنتِ عملتِ إيه عشان تدخلي في دايرة الناس دي يا بسمة؟ عملتِ إيه؟”
نزلت دموعها بتعب وخوف من القادم داخل هذه الدائرة التي أحاطت بها بإصرار لتقول بضعف..
“معملتش حاجة يا دعاء… كل الموضوع إني اخترت الحق…والحق بالنسبة ليهم جريمة عقابها الموت.”
نهضت دعاء وهي تنظر إلى أمجد قائلة بسرعة…
“لازم نبلغ البوليس… لازم نعمل محضر فيهم!”
قال أمجد باحتقار…
“أول واحد هعمل فيه محضر هو الزبالة اللي اسمه جواد الغمري.”
دلف في هذه اللحظة طبيب يرتدي معطفًا أبيض وكمامة تخفي وجهه وقبعة طبية.
وهو يقول..
“لو سمحتوا يا جماعة الدكتور معاذ مستنيكم في مكتبه.”
قالت دعاء بتردد وهي تربت على كتف أختها
“مش هنتأخر عليكِ يا بسمة هنشوفه عايز إيه ونيجي لك.. “
تحدث أمجد وهو يهم بالخروج..
“دقايق وجايين يا بسمة. وهنكمل كلامنا في موضوع المحضر…”
خرج الجميع لتنظر بسمة إلى الطبيب بشك.
نزع الكمامة والقبعة الطبية وهو يقول بخشونة ساخرة…
“حمد لله على سلامتك يا آنسة بسمة.”
اتسعت عيناها وهي تقول بصدمة…
“أنت…”
……………………………………………………
نظرت أسيل إلى فستان كتب الكتاب باشمئزاز وهي تقول…
“يعني إيه يمشي كلامه عليا ويدخل في لبسي؟ إزاي سمح لنفسه يدخل في حياتي؟ وليه؟”
لتتذكر ما حدث منذ يومين…
دخلت الأتيليه وكان يسير بجانبها بهدوء بارد.
كانت قد انبهرت باستايل الفساتين وأشكالها وألوانها…
“أهلًا يا أسيل هانم نوّرتي المكان. تحبي أساعدك في حاجة؟”
رفعت أسيل نظرها إلى سيف لتجده منشغلًا بهاتفه وقد وقف في مكان بعيد نسبيًا عنها مستندًا إلى الحائط خلفه بإهمال وملل من وجوده في هذا المكان…
عادت أسيل بعينيها إلى الفتاة لتقول بحماس
“حابة ألبس فستان سهرة توب ولحد فوق الركبة.”
ابتسمت الفتاة وهي تشير إلى صف من الفساتين أحدث طراز…
“حضرتك ممكن تختاري واحد من دول.”
بعد مدة خرجت أسيل وهي ترتدي فستانًا قصيرًا وكانت تنظر إلى المرآة الكبيرة غافلة عن العين التي تراقبها بسخرية…
ليأتي عليها سيف وقال بتأفف..
“على فكرة يا بنت عمتي إحنا جايين عشان نشتري فستان لكتب الكتاب… مش جايين نشتري قمصان نوم… وبعدين إزاي تطلعي كده قدام البنات اللي في الأتيليه؟”
نظرت له بوجه محتقن لتهتف من بين أسنانها
“ممكن توطي صوتك؟ وبعدين قمصان نوم إيه اللي بتكلمني فيها؟ ده فستان كتب الكتاب يا محترم… “
نظر لها بدهشة ليكبح غضبه وهو يسألها من بين أسنانه…
“ده الفستان اللي هتظهري بيه قدام الناس يا محترمة؟”
“آه… عندك مانع؟”
سحبها وراءه بقوة إلى غرفة تغيير الملابس وكانت نظرات الفتيات من حولهم هي الأكثر فضولًا…
أغلق الستارة عليهما في هذا الركن الصغير.
صاحت أسيل بضيق..
“إنت بتعمل إيه يا سيف؟ وسّع كده عايزة أخرج.”
“مش تستني؟ اما اكمل فرجة على جسمك.”
شهقت بصدمة ونظرت له بعينين مشتعلة وهي تقول..
“تصدق إنك بني آدم قليل الأدب؟”
نظر لها بتمعّن وقال ببرود..
“كلمتي ضايقتك مش كده؟ ماهو لو تعرفي كلام الرجالة على أي واحدة مبيّنِة لحمها بيقول عليها إيه مش هتفكري تطلعي من
بيتك أصلًا.”
قالت أسيل بإهانة..
“دول ناس مش متربين زيك.”
“وإنتِ بقى بلبسك ده متربية؟”
“غصب عنك وبعدين أنا حرة ومن حقي ألبس اللي أنا عايزاه.”
“جاكي كسر حقك.”
نظرت له بضيق واشتعل وجهها باحمرار قاتم.
تحدث سيف بصرامة..
“قدامك نص ساعة تختاري فستان محترم يليق بواحدة محترمة زيك. ياما.”
“ياما إيه يا ابن خالي؟”
مرر يده على كتفها العاري ببرود وقال بتسلية
“هكمّل مبدأ الحرية بتاعك بنفسي.”
خرج وتركها بعدما أشعل وجنتيها حرجًا وغضبا وجعل قلبها يخفق بتوتر وارتباك شعرت بهما في قربه.
ثم بعد فترة
أغمضت عينيها بغضب وهي تطلع إلى الفستان المحتشم الطويل ذي الأكمام الطويلة والصدر المغلق احتشامه لا يناسب طريقة لبسها.
غامت عيناها بعناد وهي تقول..
“مستحيل الجوازة دي تتم.”
…………………………………………………….
اتسعت عيناها وهي تقول بصدمة..
“إنت…”
جلس على مقعد أمامها، ونظر إليها بعينين باردتين وقال..
“ها بقيتي أحسن دلوقتي؟”
أبعدت وجهها عن مرمى عينيه وهي تنظر إلى النافذة لتقول بخزي…
“إنت إيه اللي جابك؟ وعايز إيه مني..”
“جاي أطمن عليكِ.”
قالت بسمة بذهول بعد أن التفتت بوجهها
إليه…
“تطمن عليّا؟ إنت مش برضه اللي ضربت عليّا نار؟”
تنهد وهو يقول بلا مبالاة…
“أيوه أنا اللي ضربت عليكِ نار.”
على تنفسها بعصبية وقالت بتهكم..
“ما بتعرفش تكذب يا ابن الغمري مش كده؟”
نظر إلى عمق عينيها وهو يقول باختصار..
“الجبان بس هو اللي بيلجأ للكذب.”
قالت بسمة بثبات امرأة..
“كان ممكن تموتني… ليه ضربت على دراعي مش على قلبي إيه أهدافك؟ هل عندك إجابة مقنعة ولا هتطلع جبان وتكدب؟”
تلاقت العيون في حوار قاسٍ عيناها عسليتان صافيتان لامعتان تضيئان ببريق خافت وعيناه زيتونيتان قاتمتان بطريقة تجعل الناظر إليهما يجفل عن إكمال صراع النظر…
لكنها لمست شيئًا فيهما شيئًا حانيًا حزينًا.
رأت نظرة الندم في عينيه حين تلاقتا بعينيها ثم انتقلتا إلى جرح ذراعها.. شعرت بندم جليّ عليه لكنه أبى أن يظهره لها إلا أنه ظهر أمامها بوضوح…
“إنت ليه بتعمل كده؟ ليه لابس وش مش وشك؟”
نظر لها بوجه حجري مجرد من المشاعر..
“تقصدي إيه بكلامك؟”
“إنت جيت ليه؟ أوعى تكون خايف إني أموت مع إن ده هدفك إنت واللي شغال عندهم.”
نهض وهو يقول بصرامة..
“أنا مش خايف عليكِ ولا عندي قلب يخاف على حد… كل الفكرة إني جاي أحذرك. بلاش اسمي أو حوار الورق ييجي في تحقيق. فهمتي؟”
تحدثت بسمة باحتقار هذه المرة..
“كل اللي فهمته إنك جبان وبتكدب… كان ممكن تموتني لِـ…”
قاطعها بشراسة..
“أولًا لسانك ما يطولش. ثانيًا إنتِ كده كده ميتة وإجابة سؤالك مش عندي عندهم هما؛ لأنهم هما اللي أمروا بكده مش أنا.”
“كداب!”
صرخت فيه بيقين أنثى تشعر بشيء للمرة الأولى نحوه الفضول.
فضول لمعرفة ما يخفيه هذا الجواد وما يريده ولمَ تردد في قتلها وهو من يقتل بدم بارد وموت البشر بالنسبة له شيء عادي ويمكن نسيان ما اقترفه بسهولة.
“إنتِ عايزة توصلي لإيه بالظبط؟”
نظرت له بصمت نظرة صامتة ليكمل هو حديثه بعدما قرأ فضول عينيها..
“بلاش أنا يا بسمة… عشان هتتعبي أوي معايا… “
دخل في هذا الوقت المحقق ليأخذ أقوال بسمة عن الحادث.
رفع جواد عينيه إلى المحقق وكذلك فعل الآخر…
نظر أسر الضابط الذي سيحقق مع بسمة في الواقعة التي حدثت معها، وقال..
“مش معقول فرصة سعيدة يا صاحبي.”
نظرت بسمة إليهما باستغراب ليكمل أسر حديثه بسخرية..
“إنت جاي تهددها ولا إيه؟”
ثم نظر إلى بسمة وقال بهدوء يبث لها الاطمئنان..
“متقلقيش يا آنسة بسمة. إحنا خدنا أقوال جوز أختك،وعرفنا إن سبب الواقعة دي جواد الغمري بس طبعًا هناخد منك التفاصيل وأسباب الواقعة.”
نظر جواد إلى بسمة بتهديد وتحذير من بوح سر الأوراق…
بدأت تتردد بعد نظرته المهددة لها لتبتلع ما بحلقها بتوتر قائلة…
“بعد إذن حضرتك هدخل أغسل وشي عشان أقدر أركز في أقوالي.”
أومأ لها أسر بهدوء لتدخل بسمة حمام الغرفة التي يقفون بها.
جلس أسر على مقعد ما وهو ينظر إلى جواد بتمعّن، وقال..
“واضح إني خلاص قربت أمسكك وأدخلك السجن بنفسي زي أول مرة كده. بس المرة
دي مش هتقضي خمس سنين في السجن
لا هيكون مؤبد إن شاء الله.”
ابتسم جواد ببرود وهو يحرك سبابته بجانب بعضها..
“بلاش تنسى إني كان ممكن أكون معاك في نفس الرتبة يا حضرة الظابط.”
أكمل أسر حديث جواد..
“كان ممكن لكن إنت اخترت طريق عمك ونسيت وصية أبوك… والغريبة إنك كنت في كلية شرطة وبتاجر في المخدرات لا وبتبيع كمان. مش شايف إن الموضوع مش راكب يا صاحبي؟”
“دي طبيعة المجرم اللي زيّي مش ده رأيك؟”
أجاب جواد ساخرًا فمن سيرى الماضي والحقيقة غيره؟ فهم يحكمون على الظاهر ويتناسون الباطن وما يخفيه.
أشعل جواد سيجارته وهو ينظر من نافذة الغرفة بضيق…
ليتحدث أسر بشرود..
“يوم ما جتلي إخبارية إن معاك مخدرات في شنطتك مصدقتش وكذبت الإخبارية… لكن روحت وقبضت عليك والإخبارية طلعت صح. لكن الغريبة إن الحكم عليك كان مؤبد بس بعد خمس سنين جه اللي شال القضية مكانك وطلعك منها مظلوم.. يا ترى كان هدف عمك إيه من ده كله؟”
استدار له جواد بصدمة وغير مدرك معنى حديثه..
“ماله عمي ومال اللي حصلي؟”
نظر أسر إليه وهو يقول بصدق..
“يمكن انهارده إحنا أعداء وإنت في نظري مجرم ولازم تاخد جزأك… لكن زمان ويوم ما قبضت عليك كنت واثق إنك لسه نضيف. بس تعرف؟ عمك لعبها صح.”
لم يرد عليه جواد بل اكتفى بالقول الباتر..
“أنا من رأيي نفضل أعداء وننسى أي حاجة جمعتنا زمان حتى لو بالغلط. وآه خف شوية عني رجالتك لأنهم بيتعبوا معايا على الفاضي.”
استدار جواد ليخرج وأكمل حديثه ببرود وعنجهية..
“وآه عايز أعرفك حاجة مهمة مفيش معلومة بتوصلك غير لما أكون راضي عنها زي شحنة السلاح اللي خليتك تصادرها كده… سلام يا حضرة الظابط.”
كاد أن يخرج ليوقفه صوت أسر…
“أنا بحذرك للمرة الأخيرة. الطريق اللي اخترته آخرته موت يا جواد.”
لم ينظر له ولم يلتفت بل رد عليه بكل ثبات
“وأنا الموت اختارني.”
أغلق الباب وراءه بقوة…
خرجت بسمة بعدما سمعت كل شيء وصل إلى مسامعها بسبب حدة حديثهما.
زفر أسر وهو يراقب بسمة الواقفة أمامه بتعب وإرهاق جليّ عليها..
“جاهزة يا آنسة بسمة؟ تقولي أقوالك وتؤكدي في أقوالك إن اللي ضرب عليكِ نار هو جواد الغمري. ومتقلقيش وجودنا هنا في المستشفى هيأكد الـ…”
“جواد ملوش دعوة… وأنا معرفش مين عمل كده.”
نظر أسر إليها بصدمة.
لا تعرف لمَ تتعاطف مع قاتل ولا تعرف هل إخفاء الحقيقة سببه خوف من تهديد نظراته أم خوف عليه؟
ماذا؟
تخاف على من أطلق عليها الرصاص؟
انه قاتل ومجرم… أنتِ تقذفين بأمثاله في السجن بعد مرافعة قوية منكِ.
استيقظي يا بسمة هذا فضول تريدين أن تشبعيه تجاه هذا الشخص الغامض..
………………………………………………………
نهض زهران بهلع وهو يقول..
“إنت بتقول إيه يا جواد؟ اسمك جه في التحقيق؟”
كان جواد يجلس ببرود ويتطلع إلى لا شيء، ورد بفتور..
“جوز البت المحامية قال إني أنا اللي ضربت عليها نار لكن لسه ما كتبش في التحقيق إيه السبب وليه. على العموم هم بياخدوا أقوال المحامية وهنشوف هتقول إيه.”
لف زهران حول المكتب بوجه مكفهر، ليتحدث وسط انفعاله…
“كان لازم طلقة الرصاص تموتها… أول مرة يخونك مسدسك يا جواد؟”
نظر جواد إلى سطح المكتب سائلًا بشرود..
“اللي حصل… المهم هتعمل إيه؟”
“هبعت حد يخلّص عليها في المستشفى.”
انتفض جواد صائحًا بصدمة
“إنت بتقول إيه؟ هتقتلها؟ وأنا لسه بقولك التحقيق اتكتب فيه اسمي إنت عايز توديني في داهية؟”
نظر له زهران واقترب منه وربت على كتفه وقال
“متقلقش أنا عمري ما أضحي بيك. لكن لو أنا ما خلصتش عليها…الأسامي اللي كانت موجودة معانا في الأوراق هتعمل كده.”
تحدث جواد متأففًا..
“بلّغهم إنها متعرفش حاجة عنهم ولا فتحت الأوراق.”
نظر له زهران بشك..
“إنت بتحاول تحمي نفسك ولا بتحاول تحميها؟”
تحدث جواد ببرود وثبات..
“هحميها ليه؟ أنا أعرفها منين؟ بس موتها في التوقيت ده هيثير الشبهات حواليّا.”
قال زهران بتفكير شيطاني خبيث…
“إذا كنت خايف على نفسك فبلاش تقلق. حقنة بسيطة هتوديها للي خلقها وساعتها هيبقى عيب الدكاترة والمستشفى الرخيصة اللي قاعدة فيها… يعني إنت في السليم. لكن لو خايف عليها هي يبقى ده موضوع تاني.”
تناول مفاتيح سيارته وهاتفه بين يديه وهو يرد عليه بضيق..
“اعمل اللي تعمله… أنا ماشي.”
نظر زهران إلى جواد وهو يختفي عن مرمى عينيه ليقول بشرود خبيث..
“هقتلها يا جواد. ماهو مش معقول بعد السنين دي كلها تيجي حتة بت تغيّرك عليها.”
قاد سيارته بسرعة وهو يحاول نسيانها ونسيان فكرة موتها الذي سيتم الليلة…
“غبية دخلت نفسها في اللعبة وهي مش قدها.”
لكن لماذا يهمك أمرها؟
ولماذا يستيقظ هذا المراهق البائس داخلك؟
لماذا لا ترضى بكونك سيئًا؟
لماذا تريد الصواب؟
وهل اختارك الصواب يومًا؟
أنت كُتب عليك الظلام، فلا تدمر نور أحدهم!
اتركها. إن كُتبت لها الحياة ستحيا، وإلا فهذه أقدار…
عقله يتحدث بإصرار أن يترك زمام الأمور للقدر الذي كتب بيد الواحد القهار ويحثه
على أن يتذكر من هو وما اختاره منذ البداية.
هو سيئ وسيظل على نهج اختاره وسط طيات ظلامه.
أوقف السيارة أمام مبنى فخم.
طرق على باب شقتها لتفتح له إنجي بوجه يشوبه الاستغراب..
“جواد… ما قلتليش إنك جاي يعني.”
دلف وهو يقول ببرود
“وأنا من إمتى بقول؟ معاكِ حد؟”
جلس على المقعد وهو يسند ذراعه على منضدة بجانبه ليريح رأسه على ذراعه.
ردت عليه إنجي بحنان..
“إنت عارف إني من ساعة ما عرفتك وأنا قفلت قلبي عليك. إيه لازمة سؤالك ده؟”
“سؤالي كان عادي ومش مهم.”
جلست أمام قدميه وهي تضع يدها على ذراعه قائلة بحنان
“شكلك تعبان. اطلع ريّح فوق أنا محضّرة لك الحمام.”
رد عليها بعد تنهيدة تعب..
“لا يا إنجي اعملي لي فنجان قهوة لأني شوية وخارج.”
“خارج؟ خارج رايح فين؟”
تردد لحظة ثم قال بصرامة أرعبتها..
“مش شغلك. قومي اعملي القهوة من سكات.”
نهضت وهي تتمتم بتهكم..
“مش هسيبك يا جواد اعمل ما بدالك… في الآخر هتجوزني والدنيا كلها هتعرف إني مراتك…. الصبر بس شوية… الصبر.”
………………………………………………………..
“ليه عملتي كده يا بسمة؟ ليه كذبتي في أقوالك؟”
تحدث أمجد صائحًا بغضب…
حاولت دعاء التحدث بتبرير لأختها..
“اهدأ يا أمجد أكيد عملت كده خوف منهم.”
رد عليها أمجد باستياء
“أختك حياتها في خطر. كان ممكن البوليس يحميها منهم لكن بسمة بقت بتسمع من دماغها والنتيجة بقت واضحة قدامنا.”
عضّت بسمة على شفتيها بحرج. ماذا تقول له؟ لقد تعاطفت مع مجرم ومن المؤكد أنه سيعود ليقتلها..
“أمجد لو سمحت، أنا تعبانة ومحتاجة أنام ومش حابة أتكلم في الموضوع ده دلوقتي.”
“إنتِ مش تعبانة… إنتِ بتهربي من حقيقة غلطتك إنك بقيتي مقتنعة إن البلد مفيهاش قانون يحميكي مع إنك أول واحدة يا بسمة بتمثلي القانون.”
صاحت بسمة فيه بانفعال..
“في قانون مؤمنة بيه… قانون الغمري واللي معاه وأنا مش هنسى القانون ده لحد ما ياخد روحي… عايز تسمع إيه أكتر من كده يا أمجد؟ أنا عملت كده عشان خايفة عليكم ومستعدة للموت كمان المهم يبعد عنكم خالص.”
قال أمجد بخزي..
“تفكيرك غلط يا بسمة.”
لترد عليه بيقين..
“بالعكس المنطق بيقول إن ده أسلم حل.”
رن هاتف أمجد ليرفع الهاتف إلى أذنه وقال بهدوء
“ألو… أيوه أنا أمجد والد كريم… إيه؟ ماله كريم؟ وقع إزاي؟ طيب أنا جاي حالًا.”
أغلق أمجد الهاتف وعلامات وجهه تدل على كارثة هذه المكالمة…
وقفت دعاء أمامه بخوف، وقالت.
“ماله كريم يا أمجد؟ ماله ابني؟ رد عليا”
تحدثت بسمة بسرعة..
“مين كان بيكلمك يا أمجد؟”
“مدير المدرسة بيقول إن كريم وقع في حوش المدرسة وخدوه على المستشفى.”
خبطت دعاء على صدرها بفزع..
“ابني… ابني يا أمجد!”
تحدث أمجد بتمهل
“اهدي يا دعاء. المدير طمّنّي وبيقول إنه كويس.”
نهضت بسمة وهي تقول بصرامة..
“إحنا هنفضل نتكلم كتير؟ يلا نروح له.”
منعها أمجد وقال بإصرار..
“خليكِ يا بسمة لسه الدكتور هيكتب ليكي على علاج عشان الجرح.”
“جرح إيه وزفت إيه؟ أنا جاية معاكم.”
تحدثت بعدم اكتراث وهي تحاول ارتداء معطفها الجلدي القصير.
قالت دعاء هذه المرة ببكاء وترجٍّ..
“اسمعي الكلام يا بسمة. نص ساعة وهتلاقيني عندك وكريم معانا. عشان خاطري اصبري لحد ما الدكتور يشوف الجرح ويكتب لكِ علاج.”
جلست على حافة الفراش وهي تزفر باختناق من إصرارهم عليها لتفكر برهة ثم قالت
“طب روحوا إنتوا وأنا هستنى الدكتور وبقوا طمنوني عليه في التليفون.”
قبّلتها أختها وخرجت ونظر لها أمجد بحنان ثم ذهب من الغرفة.
وقفت أمام شرفة غرفة المشفى التي تقطن بها وذراعها مثني أمام صدرها بسبب هذا الجرح العميق.
“جواد…”
قالت اسمه لتراه يقف بجانب سيارة فارهة أمام المشفى… ومن الناحية الأخرى وجدت ثلاثة رجال يخرجون من سيارة سوداء وجوههم إجرامية ويبدو أن الزيارة لا
توحي بزيارة مريض.
شهقت شهقة عالية بعد أن استنتجت مجيئهم إلى هنا.
عادت بنظرها إلى جواد لتجده اختفى من أمام سيارته.
على صوت تنفسها بخوف أكبر مع تسارع نبضات قلبها بسرعة لتأخذ متعلقاتها بسرعة وتغادر المشفى قبل وصولهم إليها…
من الناحية الأخرى كان الرجال الثلاثة يضعون مبلغًا ماليًا في مكتب مدير المشفى…
كانت تسير بتوتر وخوف في رواق المشفى لتجد الرجال مقبلين عليها ولكن قبل أن يلمحوا طيفها وجدت من يجذبها إلى غرفة
ما ويغلق الباب عليهما.
شهقت بصوت عالٍ لتجده يضع يده على فمها وأنفاسه الساخنة تلفح صفحة وجهها الشاحبة بالخوف…
“إنتِ كويسة؟ حد شافك منهم؟”
هزت رأسها نفيًا بينما لا يزال واضعًا يده على فمها….
أبعد يده عن فمها ببطء وهو يقول..
“إنتِ لازم تيجي معايا دلوقتي.”
من بين ذعرها همست بعدم فهم..
“أجي معاك فين؟ ومين الناس دول؟
هم تبعك؟”
أجابها وهو ينظر لها ساخرًا..
“يعني لو اللي عايزين يموتوكِ دول تبعي هخبيكي منهم ليه؟”
“يعني في حد عايز يموتني غيرك؟”
قالت جملتها بشفاه ترتجف خوفًا…
تنفس بصوت مسموع وهو يجيب عليها..
“حياتك بقت في خطر وكل ده بسبب الورق اللي كانت معاكي.. المهم لازم نخرج من هنا حالًا.”
تقدم من نافذة الغرفة وفتحها ليجد نفسه أمام حديقة المشفى فالغرفة التي اختارها كانت في الطابق الأرضي…
مد يده لها وقال بجدية
“هاتي إيدك يا بسمة.”
نظرت إلى يده ومن ثم إلى عينيه وسألته بشك..
“إنت هتسلّمني ليهم مش كده؟”
تافف بقلة صبر وهو يقول..
“لازم تثقي فيا.”
“وليه أثق في واحد زيك؟”
قالتها وهي تخفي خوفها ودموعها.
رد عليها بصوت مجرد من المشاعر..
“لأن مفيش قدامك حل تاني.”
“هاتي إيدك يا بسمة أنا هحميكي منهم.”
لامست الصدق في نبرة صوته ولكن ما زال في نظرها القاتل المجرم الذي حاول قتلها ولكن الغاية تبرر الوسيلة…
ستذهب معه فليس لديها خيارات أخرى
إما أن تُقتل وإما أن تهرب مع جواد الغمري. ستختار الغمري ولعلها تكون آخر اختياراتها في هذا اليوم المشؤوم..
نزل من نافذة الغرفة وكانت هي على وشك
أن تنزل مثله لكنه أمسك خصرها بين يديه وأنزلها على الحشائش الخضراء ببطء.
“شكرًا.”
تمتمت بها على مضض من قربه غير المقبول بالنسبة إليها ليترك جواد خصرها ويمسك يدها وهو يقول..
“يلا.”
ركضت معه بتعب لتجد نفسها خارج المشفى أمام سيارته.
ولكن حين فتح جواد باب السيارة لها وجد هتافات خشنة وغاضبة خلفهما..
رفع عينيه هو وبسمة ليجد الرجال الثلاثة مقبلين عليهما بتوعّد وشر…
“اركبي العربية بسرعة!”
صرخ جواد بهذه الجملة لتفيق من صدمتها وتصعد السيارة وفعل هو المثل ليقود السيارة بسرعة….
والرجال الثلاثة بدأوا سريعًا في إدراك الموقف ليصعدوا سيارتهم ملاحقين بهما….
•تابع الفصل التالي “رواية لن احررك” اضغط على اسم الرواية