رواية لن احررك الفصل الخامس 5 – بقلم دهب عطيه

16 دقائق قراءة

 رواية لن احررك الفصل الخامس 5 – بقلم دهب عطيه

صرخت بسمة بدهشة امتزجت بالخوف حين أطلق الرجال الرصاص على سيارة جواد…
“هنعمل إيه دلوقتي؟! آآآآآه”
بدأ يزيد من سرعة السيارة بتركيز وهو يصرخ بها وسط طلقات النار..
“نزلي راسك تحت بسرعة!”
خفضت رأسها دون نقاش ليبدأ هو بإمساك سلاحه موجّهًا إياه إلى الخارج من نافذة السيارة بجانبه وأطلق عليهم وابلًا من الرصاص الطائش لم يُصب أحدًا منهم
بل شتّت انتباههم فقط.
بدأ جواد في تلك اللحظة الإفلات بسيارته عن مرمى أعينهم ومرّ بجانب طريق مزدحم قليلًا بالبشر ليُطلّ برأسه من نافذة السيارة ويطلق في لحظة خاطفة رصاصة على عجلة سيارتهم…
وقبل أن يسيطر الرجال على الموقف وجدوا السيارة تنحدر داخل أحد المحال المجاورة للطريق…
اتسعت عينا بسمة وهي تهتف بعتاب..
“حرام عليكم… دمرت محل الراجل.. “
هزّ رأسه بسخرية وهو يقود السيارة بسرعة..
“بس أنقذت حياتي…”
رمقته ببرود وسألته بتهكم..
“وبالنسبة لحياتي؟”
“دي تخصك لوحدك.”
ردّ عليها بفظاظة ثم أسرع أكثر بالسيارة متناسيًا أمر الرجال بينما أخذ أحدهم الهاتف وقال..
“ألو يا باشا… للأسف البت هربت مع جواد الغمري…. أيوه الجوكر هو اللي بوّظ الخطة.”
بدأت السيارة تسير على الطريق السريع طريق خالٍ من البشر لا تعبره سوى السيارات التي تمر بسرعة دون التفات.
تنهدت بسمة بارتياح وهي تضع يدها على صدرها وقالت بفتور..
“شكرًا على اللي عملته معايا… ممكن توصلني للبيت؟”
أوقف السيارة فجأة فأصدرت صوتًا مزعجًا ثم رمقها جواد بغضب وهدر بانفعال..
“عايزة تروحي فين؟”
ردت عليه بمنتهى الهدوء..
“البيت… هروح البيت إيه؟ قلت حاجة غريبة؟”
ضرب بيده على عجلة القيادة أمامه وهو يقول بعصبية..
“آه إنتِ شكلك هبلة بقى وهتقرفيني… وأنا أصلًا خلقي ضيق.”
زمجرت به بغضب..
“أي هبلة دي؟! ما تحترم نفسك ما بقاش غير المجرمين كمان اللي هيقلّلوا مني!”
“المجرمين دول هما اللي لسه عايشة لحد دلوقتي بسببهم.”
قالت بسمة بتبرم..
“إنت هتذلّني ولا إيه؟! أصلًا كل اللي بيحصل معايا ده بسبب حضرتك.”
ردّ عليها ساخرًا..
“لأ وإنتِ الصدَقه واحدة… ده بسبب روح المغامرة اللي عندك.”
تسرعت وهي تقول بشجاعة مفرطة..
“أنا أقدر أحمي نفسي منهم.”
خرج جواد من السيارة وفتح الباب من ناحيتها ونظر إليها بتحدٍّ ثم قال ببرود..
“بما إنك شجاعة أوي كده… انزلي من عربية المجرم واحمي نفسك بعيد عني.”
عضّت على شفتيها وهي تخرج من السيارة بعناد وقالت بكبرياء أنثى..
“ماشي… يلا خد عربيتك وتوكّل على الله.”
أفلتت أعصابه للحظة فأمسك ذراعها وهو يتحدث من بين أسنانه بقلة صبر..
“أنا كده كده ماشي فبلاش تستفزيني…”
نفض ذراعها باشمئزاز ثم صعد إلى السيارة وانطلق بها بسرعة دون أن يعيرها أي اهتمام.
“هستنى إيه يعني من واحد مجرم؟!”
تطلعت إلى المكان من حولها لتجد نفسها على الطريق السريع سيارات تعبر بسرعة ولا وجود لأي مكان مأهول من حولها…
زفرت بقهر من تسرعها في الرد لكنها لم تفعل شيئًا. كل ما قالته أن ينقلها إلى منزلها لكنه متسلط اللسان… هي ثرثارة لكنها ليست سليطة أو فظة مثله…
“هعمل إيه دلوقتي؟”
سألت نفسها بيأس وهي تحاول إيجاد سيارة تنقلها إلى منزلها وسط سرعة هذا الطريق…
بدأت تقف وتشير بيدها إلى أي سيارة عابرة من أمامها ولكن دون فائدة…
زفرت هذه المرة بيأس طغى عليها مرّت ساعة ونصف وبدأ النهار يخفت معلنًا اقتراب الليل
وبينما كانت بسمة تقف بجانب الطريق السريع وتشير بيدها لإيقاف أي سيارة توقفت أمامها سيارة فارهة…
توترت قليلًا بخوف وهي تتطلع إلى أصحابها لتجد أربعة شباب يبدو عليهم البذخ الشديد يرتدون ملابس عصرية وشعورهم مصففة بطريقة غريبة وتتدلّى حول أعناقهم سلاسل ذهبية وتحيط بمعاصمهم وأصابعهم إكسسوارات ذهبية برسومات وأشكال 
مجهولة بالنسبة إليها.
ازداد توترها حين خرج الشباب الأربعة من السيارة وقال أحدهم بوقاحة..
“أول مرة أشوف واحدة بتبيع الهوى على الطريق السريع.”
لم تفهم سؤاله فتحدثت بشفاه مرتجفة..
“هوى إيه حضرتك؟ إنت فاهم غلط.”
ردّ صديقه الآخر بخبث أكبر…
“يا بني افهم… هي بتوزع نفسها في الاماكن الصح”
ضحك الأربعة معًا باستمتاع مستمتعين بخوف بسمة الجليّ عليهم…
حاولت بسمة التحدث بحزم وشجاعة..
“أوعى حد يقرب مني هصوت و…”
ردّ أحد الشباب عليها بعبث..
“طب ما تصوتي حد منعك؟! ده حتى الصويت في اللحظات دي بيبقى أوبشن هايل.”
ضحك الأربعة مرة أخرى بمكر…
حين شعرت أنهم لن يتوقفوا عما يريدون
ولن يبتعدوا عنها ركضت من أمامهم بسرعة ليركضوا خلفها باستمتاع مريض فالفريسة ضعيفة أمامهم وهم صيادون ماهرون ويجب على الصياد أن يستمتع قليلًا بمحاولة الفريسة الهرب منه!
بدأت أنفاسها تتقطع من سرعة الركض وكلما نظرت خلفها وجدتهم يقتربون منها والمسافة بينها وبينهم ليست بعيدة.
وفي أثناء التفاتها إلى الخلف بخوف اصطدم جسدها بشيء صلب.
شهقت بخوف وهي تنظر إلى ما أعاق هروبها
“جواد… الحقني دول…”
نظر إليها نظرة مجردة من المشاعر ليرد عليها باستهانة..
“مالك خايفة ليه؟ راحت فين روح المغامرة اللي عندك؟”
عضّت على شفتيها بحرج وصمت..
“اقعدي في العربية… ومهما حصل أوعي تخرجي منها.”
أمرها بثبات وكانت نبرة صوته باردة كلوح من الثلج…
فعلت ما أمرها به وهي تشاهد المشهد من نافذة السيارة أمامها…
صاح أحد الشباب الأربعة وهو يلتقط أنفاسه بسرعة..
“على فكرة يا برنس… البت دي تخصنا.”
اقترب منهم جواد وهو يرد عليهم بتعجرف
“لأ… شكلك غلطان هي تخصني أنا.”
ردّ الشاب الآخر بقنوط..
“مش هنختلف تخص مين… بس اللي ياكل لوحده يزور…”
ردّ الآخر بمكر..
“بالظبط يا زميلي… إنت الأول وإحنا وراك.”
مسح جواد أنفه بطرف سبابته وابتسم من زاوية واحدة ثم ابتعد قليلًا من أمام سيارته وهو يقول بصوت رخيم..
“أنا من رأيي إنك إنت الأول.”
اتسعت عينا بسمة بصدمة من كل ما يفعله جواد…
نظر الشاب إلى جواد بشك وبلع ريقه بتوتر.
ليبثّ جواد فيه الاطمئنان قائلًا..
“يلا يا زميلي عشان زمايلك يلحقوك.”
ابتسم الشاب بانتصار وهو يقول..
“برافو عليك تعجبني… أصل البت جامـ…”
وقبل أن يمر من جانب جواد وجد شيئًا ثقيلًا يصطدم بوجهه دون سابق إنذار…
ولم يكن ذلك الشيء سوى سلاح جواد الذي ضربه بقوة في وجهه ليسقط الشاب على الأرض وتسِيل الدماء من أنفه بغزارة.
نظر الشباب الثلاثة إلى صديقهم الملقى على الأرض أمامهم…
أخرج جواد سيجارة من جيب معطفه وأشعلها أمامهم ثم أخرج الدخان من فمه وهو يقول بدعوة خبيثة..
“اللي حابب ياخدها يتفضل أنا مش ممانع… واللي مش حابب يقدر يمشي سليم وأنا للأسف مسامح.”
سحب الشباب الثلاثة صديقهم المستلقي أرضًا وابتعدوا عن مرمى عيني جواد ثم صعد كل منهم إلى السيارة وانطلقوا بها دون رجعة…
رمى جواد السيجارة تحت قدميه ودهسها تحت حذائه الأسود ثم دخل إلى سيارته بجانب بسمة التي تطلعت إليه بدهشة
وعيناها تعكسان تعجبها من برودة كلامه وشراسة أفعاله وهذا جديد عليها كليًا.
“إنت إزاي كده؟!”
رفع عينيه إليها ليرد عليها باستهانة..
“المجرمين كلهم كده… ولا نسيتي كلامك؟”
أشاحت بوجهها بعيدًا عنه وهي ترد عليه بضيق..
“لا مش بنسى كلامي… لكن واضح إنك نسيت إنك خرجتني من عربيتك ومشيت. إيه اللي رجعك؟!”
“بصي وراكي وإنتِ هتعرفي.”
نظرت خلفها لتجد حقيبة يدها التي تحتوي على جميع متعلقاتها الشخصية.
عبث وجهها بحرج ولم ترد..
ليتحدث هو بإهانة..
“بلاش خيالك يرمي لبعيد لأني قلتلك قبل كده إني معنديش قلب يخاف على حد.”
“وليه إعادة الجملة؟! هحتاج قلبك وخوفك في إيه يعني؟! على العموم شكرًا إنك أنقذتني.”
نظر لها بطرف عينه وسألها بخبث..
“يا ترى الشكر ده على أول مرة ولا تاني مرة؟”
أجابت باختناق..
“الاتنين… باختصار.”
أشعل محرك السيارة وهو يقول بسخرية
“احتفظي بشكرك لنفسك يا آنسة.”
ــــــــــــــــــــــــــــــــــــ
طرق على باب غرفتها ببطء وانتظر.
فتحت أسيل له الباب ناظرة إليه بدهشة من وجود سيف أمام غرفتها لأول مرة.
“سيف… في حاجة؟”
تردد قليلًا قبل أن يقول بهدوء..
“عايز أتكلم معاكي شوية في جنينة الفيلا… ده لو كنتِ فاضية.”
ردت بعيون مرتبكة..
“لا فاضية أنا جاية معاك.”
تقدمت ومرت من أمام إطار باب غرفتها لكن سيف أوقفها قائلًا بحزم غير قابل للنقاش..
“ادخلي غيري يا أسيل هدومك دي الله
يرضى عليكي.”
نظرت أسيل إليه بذهول ثم عادت بنظرها إلى ملابسها وكانت ترتدي هوت شورت من الجينز وسترة علوية ذات حملات رفيعة…
“أنا مش شايفة إن فيه في هدومي حاجة غلط على فكرة.”
رد عليها سيف بسخط..
“بالعكس كلك على بعضك غلط. غيري المسخرة دي. وسبقيني على تحت.”
عضّت على شفتيها بضيق من طريقته الفظة  دومًا معها.
دلفت إلى الغرفة لتبدّل ملابسها بأخرى أكثر احتشامًا…
ارتدت بنطال جينز أسود وفوقه سترة علوية بنصف كم من اللون الأحمر الداكن وربطت شعرها على شكل كعكة عالية بإهمال.
نزلت إليه بتأفف من إصراره على التدخل في ملابسها وحياتها بشكل عام…
رفع عينيه ليجدها تهبط على السلالم بتذمر فابتسم وهو يعلم جيدًا سبب تذمرها.
“ولسه يا بنت عمتي؟!”
قال جملته بتوعد إما أن تتغير وإما أن تظل مرغمة على تنفيذ أوامره على مضض كما تفعل الآن.
جلست على المقعد أمامه وهي تقول بضيق
“ها يا ابن خالي؟ كنت عايز إيه؟”
نظر إليها بمكر ثم تجاهل سؤالها وسألها 
بخبث..
“مش شايفة إن البنطلون ضيق شوية؟”
ضربت بيدها على الطاولة الصغيرة أمامها بغضب..
“وإنت مش شايف إن عينك بتركز في حاجات عيب تركز فيها؟!”
رد عليها سيف باستهزاء..
“ده مش ذنبي ده ذنب حضرتك. إنتِ اللي مصممة تلبسي هدوم تلفت نظر الرجالة ليكي.”
نهضت متزمجرة بوجه مكفهر وقالت..
“بجد؟! طب بما إن دي نظرتك ليا هتجوزني ليه؟!”
“متقلقيش أنا مش هتجوزك ولا هكتب عليكِ من الأساس.”
للحظة شعرت أنها ابتسمت بسعادة لكنها حاولت السيطرة على سعادتها وهي تقول بجدية…
“طب كويس… بس هتقول إيه بقى لتيتة إنعام؟”
نظر إلى هاتفه وهو يعبث به وقال..
“سيبي الموضوع ده عليا”
أومأت بسعادة وهي تقول..
“أوك.”
ولكن قبل أن تستأذن وتذهب من أمامه وجدت سيف يمد يده لها بالهاتف.
“خدي اتفرجي على الفيديو ده.”
“فيديو إيه ده؟”
قالتها وهي تأخذ منه الهاتف.
تطلعت إلى الفيديو أمامها لتجد رامي في مكان يشبه الملهى الليلي وفي أحضان فتاة وبينهما قبلات ومشاهد أثارت الغثيان داخلها.
ركزت أكثر في الفيديو لتجده يفتح ورقة صغيرة تحتوي على شيء أبيض اللون ثم يستنشق ما بها بتلذذ غريب.
شهقت أسيل وهي تضع يدها على فمها بصدمة وتطلعت إلى سيف بدهشة وعيناها تسألان سؤالًا محددًا…
قرأ سيف سؤال عينيها فرد عليها بعد أن أخذ الهاتف…
“عرفت ارتباطك بيه عن طريق مراقبة واحد من رجالة جواد ليه… جواد هو اللي بعت الفيديو بعد ما عرف إنك بتحبيه وناوية ترتبطي بيه وإن في ما بينكم مقابلات وكلام.”
“جواد عرف كل ده إزاي؟ وليه بيراقب رامي من الأساس؟”
مطّ سيف شفتيه وقال بلا مبالاة..
“يمكن لأن أبوه بيكره خالك زهران وبينهم عداوة من زمان فعشان كده جواد قرر ياخد حذره منهم.”
جلست على المقعد بدموع تنساب بغزارة تحت عيني سيف المتفحصة لها باهتمام.
مرّت الدقائق وهي تعاني حالة من الصدمة فمد سيف يده لها بمنديل ورقي وهو يقول بحنان..
“على فكرة مش مستاهل الدموع دي كلها.”
أخذت أسيل منه المنديل ومسحت دموعها، وهي تحاول التحدث بثبات..
“أنا مش بعيط.”
رد عليها بمزاح..
“معقول؟! ده إنتِ غرّقتي الترابيزة دموع.”
عضّت على شفتيها وهي تسأله بسخرية..
“غريبة إنك يعني مزعقتش ليا أو شكيت في أخلاقي بعد ما عيطت على خيانة وغدر الشخص اللي كنت فاكراه بيحبني.”
رد عليها بهدوء وعقلانية..
“إنتِ قولتي بنفسك إنك عيطتي على غدره وخيانته مش عليه خالص. وبعدين أنا واثق فيكي وواثق في أخلاقك.
ثانيًا لو بضايقك بكلامي كل شوية عشان طريقة لبسك فده لأني بخاف عليكي زي أختي… مش أكتر.”
“أختك؟!”
قالتها باستنكار..
ابتسم بجاذبية وهو يقول بصدق..
“مينفعش أقول غير كده يا سيل… وإنتِ عارفة كده كويس.”
أومأت بحرج ثم عرضت عليه شيئًا ما.
“ممكن نبقى صحاب يا سيف؟ يعني لو ينفع… إحنا الفرق ما بينا مش كبير ونقدر نبقى صحاب وتغيّر معاملتك دي وتتعامل معايا 
زي أختك وتنصحني كمان.
أصلي عايزة أتغير وأنسى أسيل القديمة الطايشة اللي بتجري ورا وهم اسمه حب.”
قاطع حديثها وهو يقول بهدوء..
“عمر الحب ما كان وهم… إحنا بس اللي بنختار حياتنا وإحنا مغمضين… لو بس نفتح عينينا هنشوف الصورة كاملة.”
وأكمل حديثه بأكثر جاذبية ولباقة..
“وعلى العموم أنا موافق يبقى عندي أخت وصاحبة زي القمر كده.”
ابتسمت بحزن…
لم يأتِ في مخيلتها يومًا أن تكون هي وسيف أصدقاء لكنها تحتاج إلى شيء نظيف أبيض القلب وشخصية شديدة السيطرة عليها وهذا ما اكتشفته في اليومين الماضيين.
هي فقط تريد أن تتغير للأفضل وسيف في عينيها هو الأفضل… لا يناسبها كزوج فقط
صديق مقرب واخ ودود حنون مثله..
ــــــــــــــــــــــــــــــــــــــــــــ
دخل رامي إلى الفيلا مترنحًا من كثرة الشراب وبدأ يدندن ببشاعة…
وقبل أن يصعد إلى غرفة نومه أوقفه والده وهو يقول بغضب..
“حمد الله على السلامة يا بيه أخيرًا تكرمت ووصلت البيت.”
زفر رامي بضيق وهو يرد عليه
“نعم؟ عايز إيه؟ لو هتسألني على أسيل فأنا بقالي يومين معرفش عنها حاجة خلاص.”
تحدث عزيز بغضب..
“يعني إيه الكلام ده؟! مش عارف تمسك على البت دي أي حاجة نذل بيها زهران وولاد أخوه؟!”
أجابه رامي بتهكم…
“شكلها بيقول إن أبوها عرف يربيها… دي بترفض حتى إني أمسك إيديها لو بالغلط.”
صاح عزيز باحتقان..
“غبي طول عمرك غبي مش فالح غير تحب في المحامية الفقيرة بتاعتك.”
رد رامي باستهزاء..
“المحامية الفقيرة دي رفضت ابنك من أول يوم شافته فيه يعني بلاش نفتح السيرة دي كتير لأني معرفش عنها حاجة من ساعة مقابلة سعادتك ليها.”
اكفهر وجه عزيز حين تذكر مقابلته بهذه الفتاة وتهديده لها بالابتعاد عن ابنه الوحيد وعرضه عليها مبلغًا من المال حتى تبتعد عن ابنه واسمه وأملاكه إلى الأبد.
لكن الفتاة صدمته حين قالت باستعلاء..
“خلي فلوسك معاك يا عزيز بيه. أنا لا عايزة ابنك ولا تلزمني فلوسك واسمك.
وبدل ما تيجي تهددني وتساومني بالفلوس ابعد ابنك اللي من ساعة ما شافني وهو قرفني بمقابلاته وبالهدايا الغالية اللي بترجع
ليه في نفس الثانية اللي بيقدمها فيها…”
ــــــــــــــــــــــــــــــــــــــــــــ
كان الصمت مسيطرًا على المكان منذ أن صعدت معه إلى سيارته بعد أن أنقذها من هذين الأوغاد اللذين حاولا إرغامها على…
عضّت على شفتيها وهي تتذكر الدقائق التي مرت بها…
لولا جواد لكانت الآن…
أغمضت عينيها بقوة ثم فتحتهما ببطء.
المجرم أنقذها مرتين!
أيعقل أن ذلك القاتل ينقذ؟!
من أطلق عليها النار بلا مبالاة هو نفسه من أنقذها مرتين؟!
اتجهت بعينيها إليه. وتطلعت إليه بتمعن.
كان يقود السيارة بتركيز وصمت مريب. وجهه خالٍ من أي تعبير وكأنه لا يفكر إلا في المسار الذي أمامه…
وسيم بهذا الشعر البني الداكن الناعم كذلك وعيناه الباردتان اللتان تجذبان النظر لكنهما تنفّران الأشخاص منهما في النظرة الأولى
فهما تمتلكان جاذبية باردة ومخيفة أيضًا يشوبها قدر من القسوة وهذا ما اتضح لها
منذ لقائهما الأول.
لم تتطلع إلى جسده الرياضي وعضلاته المفتولة أو قامته الطويلة. لم ترد أن تكمل صورته في عينيها بصورة خاطئة تدور في ذهن أي فتاة ترى رجلًا وسيمًا مثل جواد الغمري.
تطلعت إليه فقط لترى أي شيء يكذب صوت عقلها الذي يخبرها أنه قاتل ومجرم.
هل تتمنى ألّا يكون بالصورة التي ظهر بها؟
هي تتمنى ذلك وليس من أجله بل من أجلها حتى لا تكون تساعد مجرمًا وتخفيه عن العدالة.
يا إلهي وصل بي الحال إلى أن أتمنى أن يكون المجرم شريفًا ونبيل الأخلاق !
خفضت جفنيها ناظرة إلى يدها التي ترتجف منذ أول اليوم حين رأت الرجال الثلاثة.
زفرت بضيق. هي معه منذ ساعات ولا تعرف إلى أين تتجه مع هذا المجرم صاحب العيون الباردة والشخصية النادرة…
“ممكن أفهم إحنا رايحين فين؟”
لم ينظر إليها بل تريث برهة قبل أن يرد عليها ببرود..
“لما نوصل هتعرفي.”
تطلعت إلى النافذة بجانبها وهي تسأله بتوتر
“أنا بقالي ساعات معاك في قلب العربية وبقينا نص الليل ولسه بتقولي لما نوصل هتعرفي وليه معرفش دلوقتي؟”
نظر إليها بطرف عينه وهو يرد عليها بسخرية
“هخطفك مثلًا؟! أوعي تكوني شايفة إني ممكن أبقى زي العيال السيس دول اللي لسه مخلصك من إيديهم…”
ردت عليه بتبرم غير راضية عن تذكيره لها بشهامة رجولته معها في المرتين..
“مش كل مرة هنتكلم في الموضوع ده وبعدين ليه؟ مش كل الرجالة نوعية واحدة.”
رد عليها ببرود.
“يمكن كلنا نوعية واحدة… بس كمان كل واحد وليه ذوقه الخاص… وإنتِ يا آنسة بسمة مش ذوقي خالص.”
رفعت حاجبيها من إهانته الصريحة وتصريحه المهين لترد عليه ببرود..
“كويس أوي طمنت قلبي. ممكن أعرف بقى إحنا هنروح فين؟”
“على بيتي.”
رفعت زاوية شفتيها بصدمة وسألته بسخط
“بيتك؟! اللي هو إزاي يعني؟ مش فاهمة.”
رد عليها بفتور…
“حياتك مهددة بالقتل وحاليًا رجالة زهران الغمري وناس تانية قريتي أساميهم في
الورق بيدوروا برده عليكي عشان يقتلوكي.”
“وليه ده كله؟”
رد عليها جواد بلا مبالاة…
“شايفين إن حياتك خطر عليهم وممكن تكلمي أو تذكري للبوليس حاجة من اللي قريتيها في الورق.”
تحدثت بسمة بسرعة وبدون أن تفكر مع من تصرح بنواياها…
“يبقى لازم نروح للبوليس وهو يقدر يحميني منهم وكمان لازم يعرف كل حاجة.”
ابتسم جواد بطريقة بشعة وهو يرد عليها ساخرًا من عقلها..
“المفروض إني أساعدك يعني في الخطوة دي؟! أبلّغ عن نفسي مثلًا عشان حياتك تبقى في أمان؟!”
عضّت على شفتيها بضيق من غبائها. كان يجب التفكير بصوت منخفض وتنفيذ ما
تريده دون أن يعلم هذا الجواد الذي هو شخص منهم.
هل نسيت أنه مجرم مثلهم ولا يختلف شيئًا عنهم؟!
“بلاش تفكري تاني بصوت عاليوبالذات قدام واحد مجرم… ولازم تعرفي إني هحميكي منهم زي ما وعدتك لكن البوليس يعرف حاجة أو إنك تفكري تهربي مني عشان تروحي تثبتي صحة كلامك عن الورق اللي كان معاكي… الكلام ده تنسيه نهائي.”
تحدث بمنتهى الشموخ ولكن نبرة صوته كان يشوبها التحذير والتهديد.
ارتجف جسدها بعد حديثه وجملته وسألته بصوت يكاد يخرج من الأعماق المظلمة..
“يعني إيه الكلام ده؟! يعني إيه تحميني منهم وفي نفس الوقت هتمحي وجودي عن البوليس وعن أهلي وعن شغلي وعن حياتي؟! يعني إيه؟! مش فاهمة… بدل ما أموت على إيد المجرمين اللي زيك هتسجن في بيتك؟!”
أجابها جواد بحزم وخشونة…
“ومش هخرجك منه يا بسمة غير لما ينسوا فكرة موتك نهائي وأنا كفيل بحمايتك.”
صرخت به بقلة صبر..
“دي مش حماية ده سجن عشان تحمي نفسك وإنت والناس اللي شغال معاهم…. اللي إنت بتفكر فيه ده ظلم أنا لازم أخرج من هنا. 
وقف العربية لو سمحت.”
حاولت بسمة فتح باب السيارة بغضب فأمسك جواد يدها مانعًا إياها من هذا الجنون الذي أصابها وهدر بها بغضب..
“إنتِ اتجننتي؟! بتعملي إيه يا مجنونة؟!”
صاحت فيه بجنون…
“سيبني بقولك أنا مستحيل أوافق على كلامك ده! أنا عندي أموت ولا إني أعيش بيت واحد
زيك…انا هبلغ عنكم…..هبلغ واللي يحصل 
يحصل”
“فات اوان الكلام ده… إنتِ مبقتيش ملك نفسك.”
رد عليها بحزم وإصرار ونطق للمرة الثانية اسمها مجردًا…
أخرج جواد قيدًا حديديًا من جيب معطفه ثم سحب يد بسمة بقوة ليحيط معصمها بأحد سوارَي القيد ويضع القطعة الأخرى في معصم يده تحت أنظار بسمة التي أصابها الذهول من فعلته…
هَدرت بجنون…
“إنت بتعمل إيه؟! فك إيدي من الزفت ده!”
لم يرد عليها وبدأ يقود ببرود غير مبالٍ بصراخها العنيف عليه.
حاولت رفع يدها المقيدة لتضربه في ذراعه بها لكنها فشلت من شدة الألم ولأن اليد الأخرى أصبح جواد مسيطرًا عليها بعد أن شبك يده معها في القيد الحديدي نفسه.
“فكني يا جواد فكني بقولك”
“انسي فكرة إني أفكك أو أحررك مني حاليًا. لازم تفهمي إن كل اللي بيحصل ده في صالحك.”
نزلت دموعها بضعف وتمتمت من بين بكائها بغضب مكتوم..
“بكرهك يا جواد… بكرهك.”
أغمض عينيه وفتحهما ببرود وقال..
“احتفظي بحقيقة مشاعرك لنفسك لأنها مش فارقة معايا أصلًا.”
أغمضت عينيها بغضب من غبائها..
ليتها لم تثق به !
ليتها ظلت في المشفى !
ليتها ماتت وانتهت حياتها قبل أن ترى هذا المجرم الذي كذب عليها وخدعها بوعد قاله فقط لينقذ نفسه ومن معه…
وكم كان محتالًا ومخادعًا لعينًا وعدها فقط حتى يظل بأمان وعدها ولم يعلم أن وعده كان بداية كل شيء
أوقف السيارة أمام مزرعة يتوسطها بيت كبير في منطقة بعيدة تمامًا عن يد زهران وأتباعه فلا أحد يعلم عنوان هذه المزرعة…
 كانت حديثة الشراء وكتبها باسم شقيقة سيف حتى تكون بعيدة كل البعد عن تحريات زهران ورجاله…
نظر إليها ليجدها قد غفت على زجاج السيارة ودموعها أخذت مكانًا من وجنتيها الحمراوين لتحكي حكاية حزنها وخوفها من القادم المجهول.
تطلع إليها بعينين هادئتين يطالعها دون برود أو جمود مشاعر كما يفعل دومًا مع أي شخص.
شخصيتها تشبه أسماء كثيرًا إصرارها طموحها حتى براءتها في الحديث إلى الأغرب فيها الكثير من أسماء شقيقته التوأم.
هل لهذا السبب يحمي حياتها الآن ويعرض حياته للخطر ويهدم علاقته مع عمه زهران؟
زفر بغضب….
يكره زهران وعمله وكل شيء وقع فيه بسبب زهران…
استغل سجنه وأرغمه على العمل معه في تهريب شحنات الأسلحة غير المرخصة وجعله قاتلًا يقتل كل من يحاول إفساد عمل زهران الغمري ورجاله….
لماذا اختار الشر ولم يختر سواه؟
وهل كان أسر معه حق في الحديث الذي لمح إليه؟
أيعقل أن من هدم مستقبله هو عمه؟!
لا إجابة للأسئلة التي تدور في عقله فلكل سؤال سؤال آخر ولا إجابة على كليهما.
عاد بعينيه إلى بسمة النائمة بتعب وتنفس بصوت عالٍ قبل أن يحملها بين ذراعيه ويدلف بها إلى المزرعة….
دلف إلى غرفة النوم ووضعها ببطء وللحظة لم يلاحظ القيد الذي يربط يده بيدها…
كاد أن يرفع جسده للذهاب من الغرفة لكنه وجد يده تمنعه من الابتعاد بسبب الحديد الموضوع بينهما…
نظر إليها فوجدها ما زالت نائمة.
أخرج المفتاح من جيب بنطاله وفتح القيد الحديدي وأبعده عن يد بسمة ويده…
قذفه بإهمال على المنضدة بجانب السرير.
وأطفأ الأنوار وأغلق باب الغرفة ببطء حتى لا يُحدث ضجيجًا يوقظها فهي عانت كثيرًا في هذه الليلة المليئة بالأحداث الصادمة وهو يعلم أن ما مرت به وما قاله لها ليس هينًا في تقبله أو تنفيذه لكنه مضطر لحمايتها وحماية نفسه كذلك !
ــــــــــــــــــــــــــــــــــــــــــــ
نزل على سلالم البيت بشموخ وهو ينادي بصوت رخيم..
“عم ناصر… عم ناصر”
هرول الرجل الكبير الذي يُدعى العم ناصر وهو الذي يرعى المزرعة مع بعض الرجال البسطاء في هذه القرية…
“حمد الله على سلامتك يا سعادة البيه.”
رد عليه جواد..
“الله يسلمك يا راجل يا طيب ست أم إيمان جت ولا لسه؟”
رد الرجل باحترام..
“شيّعت ليها ابني محمد من ساعة كده سعادتك… من ساعة ما حضرتك كلمتني 
وأهي زمانها على وصول… “
دلفت أم إيمان في هذه اللحظة وهي تقول باحترام..
“حمد الله على السلامة يا سعادة البيه… نورت المزرعة.”
أومأ لها جواد بهدوء وهو يقول..
“الله يسلمك يا أم إيمان منورة بيكم. المهم عايزك تحضّري أوضة الضيوف عشان أوضتي نايمة فيها الضيفة اللي معايا…”
أومأت المرأة بطيبة واحترام قائلة..
“عيني يا بيه دقايق وتبقى جاهزة.”
بعد دقائق…
ذهب إلى الغرفة وخلع قميصه واستلقى على الفراش بتعب…
وكاد أن يغلق عينيه حين صدح هاتفه معلنًا عن اتصال من عمه زهران…
زفر بغضب وأغلق الهاتف في وجه المتصل ثم قذفه جانبًا على الفراش بضيق….         

•تابع الفصل التالي “رواية لن احررك” اضغط على اسم الرواية

السابق الفصول التالي