رواية لن احررك الفصل الثامن 8 – بقلم دهب عطيه
وضعت الطعام على السفرة وجلست بجانب زوجها ثم زفرت بيأس نظر إليها أمجد زوجها وسألها…
“لسه برضه تلفونها مقفول…..”
وضعت الطعام في الطبق أمام ابنها كريم وهي ترد عليه بقلق..
“من ساعة آخر مكالمة…. أنا قلقانة عليها أوي يا أمجد.”
ربت أمجد على يد زوجته وهو يبث إليها الاطمئنان وقال…
“إن شاء الله خير يا دعاء…. أنا هكلم أمنية صاحبتها وهحاول أعرف منها اسم صاحبتها اللي قاعدة عندها دي وربك ييسر…..”
سألت دعاء بشك..
“وتفتكر فعلًا كلام بسمة صح وهي قاعدة عند واحدة صاحبتها إحنا منعرفهاش…..”
“قصدك إن بسمة بتكدب…..”
ردت عليه بيقين..
“أو مجبورة تكدب……”
نظر الاثنان إلى بعضهما بحيرة وسؤال يتردد داخلهما من الذي أجبر بسمة على اختراع تلك الكذبة عليهما؟
……………………………………………………….
يجلس في المغطس ذي الماء الدافئ وعقله لا يتوقف عن التفكير بها… كم هي عنيدة وتمتلك شجاعة مفرطة!
ولا ينكر أن عينيها العسليتين تأسرانه دومًا جميلة وعفوية والقدر ألقى بها عليه وهو يستغل تلك الفرصة لتبقى بين براثنه وتحت سطوته وامتلاكه لها.
هل يستغلها لتبقى بقربه أم أنه يخشى على حياتها من الموت؟
ولماذا هي؟
لأنها تشبه أسماء شقيقته في الشخصية أم أن ذات العيون العسلية لها سحر خاص على قلبٍ متبلد تجاه مشاعر الحب؟!
زفر وهو ينهض من المغطس ليجفف جسده ومن ثم حاوط المنشفة حول خصره المنحوت وهو يتمتم بضيق…
“اطلعي من دماغي بقى يا بسمة…..”
خرج من المرحاض وهو يجفف شعره بمنشفة وما زالت زوبعات الأسئلة تلاحقه بإصرار…
أخرج ملابسه من خزانة الملابس وهمَّ بارتدائها ولكن أوقفه رنين الهاتف.
ذهب ناحية المنضدة وانحنى قليلًا ليرى اسم المتصل (إنجي)…
“إنجي عايزة إيه……مش ناقص صداع على الصبح….”
جعل الهاتف على وضع الصامت…
بعد أن ارتدى ملابسه ومشط شعره أمسك الهاتف مرة أخرى وأجرى اتصالًا بعد مدة قصيرة فُتح الخط.
تحدث جواد بفتور..
“كمان ساعتين هكون عندك…. لازم نتكلم في الصفقة إياها….”
رد عليه زهران عبر الهاتف على مضض..
“كويس إنك لسه فاكر الشغل أنا قولت المحامية خلتك تنسى أهلك وشغلك…..”
جلس جواد على حافة الفراش وهو يرتدي ساعته ورد عليه بنزق..
“ملوش لازمة الكلام ده…. خلينا في الشغل وسيب موضوع بسمة على جنب…..”
انفعل زهران من حديثه وقال..
“يعني إيه أسيب موضوعها على جنب؟ البت دي مش هييجي من وراها غير المشاكل
ويمكن ننكشف كلنا لو بقت واحدة مننا. ده مش بعيد تسلمنا للبوليس بإيديها… اعقل يا جواد وسلمني البت دي وأنا هخلصك منها بطريقتي وهطلعك أنت من الليلة كلها….”
قاطعه جواد بصوت حازم…
“أنا قلت لك قبل كده بسمة تخصني ومحدش يقدر ياخد حاجة تخص جواد الغمري حتى لو كان مين بالذي…سمعتني يا زهران بيه؟ بسمة تخصني.”
أغلق الخط بعصبية وهو ينهال عليه بأقذع الكلمات…
نزل على سلالم البيت فاستقبلته الخادمة أم إيمان وهي تقول بتهذيب..
“الفطار جاهز يا سعادة البيه تحب تفطر فين؟”
رد عليها جواد بهدوء..
“حطي في أوضتي…….”
استغربت الخادمة قليلًا ولكن سرعان ما ذهبت لتنفيذ أوامره.
دلف إلى الغرفة التي في الدور الأرضي والتي تجلس بها بسمة منذ البارحة…
دلف بعد أن فتح الباب بالمفتاح فتطلع إليها فوجدها تنام جالسة مكانها بعد أن انتحبت
من البكاء.
من دون أن يوقظها مال عليها وحملها بين ذراعيه.
فتحت بسمة عينيها إثر تلك الحركة بعد أن شعرت بحركة جسدها وبرائحة العطر الرجولي.
“إنت بتعمل إيه؟…. نزلني…..”
لم يرد عليها جواد بل أكمل صعوده إلى غرفة نومه.
زفرت باستياء وهي تحاول إفلات جسدها من بين يديه…
“إنت إيه أطرش؟ بقولك نزلني…. نزلني…”
“شششش….. اخرسي…..”
اتسعت عيناها من طريقته الفظة معها لترد عليه بصوت عالٍ منفعل…
“لا مش هخرس نزلني بقولك إنت مفكر نفسك اشتريتني إنــ….”
قاطعها جواد بقلة صبر..
“أيوه اشتريتك اخرسي بقى وبطلي عناد….”
زاد عنادها وهي ترد عليه بازدراء..
“يعني إيه اشتريتني؟ إنت مش طبيعي إنت أكيد مجنون…… آااه….”
وجدت جسدها ملقى بقوة على الفراش الوثير. حدقت حولها لتجد نفسها في غرفة جواد.
نظرت إليه بقلق وجسدها يرتجف وخرج صوتها بصعوبة…
“إنت جايبني هنا ليه وعايز مني إيه…..”
جلس على مقعد بعيد عنها نسبيًا وهو ينظر إليها باستهجان…
“هكون عايز إيه يعني…..”
تشنج جسدها وقالت بسخط…
“إنت بترد السؤال بسؤال؟ أنا في أوضتك ليه؟”
نظر جواد إليها بخبث ومن ثم تحدث بلؤم..
“واحد جايب مراته في أوضة نومه قبل جوازهم بكام يوم هيكون جايبها ليه يعني؟ أكيد عشان….”
قاطعته بحدة وهي تلوح بسبابة إصبعها
بحذر
“إياك تكمل كلامك….. أنا مش مراتك ومستحيل تلمسني أو تقرب مني…..”
رد عليها ببرود…
“هو إنتِ فعلًا لسه مش مراتي بس هتكوني قريب أوي مراتي أما بالنسبة لـ…. فأنا مش جايبك أوضتي عشان كده….”
انتصب في وقفته ودس يده في جيبه ناظرًا إليها قبل ان يقول باختصار..
“أنا جبتك عشان تفطري….”
فغرت بسمة شفتيها بعدم استيعاب..
“هـــا…..”
طرق الباب في هذا الوقت نظر له بخبث وهو يشير بأصابعه ناحية باب الغرفة المغلق…
“الفطار وصل يا زوجتي العزيزة……”
أشاحت بوجهها عن عينيه وهي تزفر بغضب فقلبها يخفق بقوة منذ بداية فتح عينيها على وجهه الرجولي وجسده الصلب الذي كانت بين يديه كريشة والأحمق يخفق بشدة بعد حديثه عن الزواج منها وطريقة تملكه لها.
ماذا يحدث لها؟ مشاعر متخبطة. وقلبها سيجذبها ناحية الهاوية
وليست أي هاوية !!
فتح جواد باب الغرفة وأخذ صينية الإفطار من يد الخادمة مغلقًا الباب خلفه وضع الطعام على طاولة صغيرة وهو يقول ببرود…
“الفطار وصل ياريت تفطري كويس
عشان أ….”
“أنا مش جعانة ومش عايزة أكل…. وبطل طريقتك دي…..”
قطب جواد جبينه وهو يسألها بعدم فهم
“مالها طريقتي دي؟…..”
زفرت وهي تبعد عينيها عنه بضيق..
“أنا هنا ليه؟… إمبارح حبستني في أوضة الكراكيب والصبح جبتني على أوضتك
ممكن أفهم إيه اللي اتغير؟”
أجابها بمنتهى الثبات ولكن في داخله ذبذبة صعب السيطرة عليها…
“اتغير حاجات كتير….. أولًا إمبارح كنت بعاقبك على جنانك واستهتارك بحياتك….
النهاردة إنتِ في أوضتي عشان خلص وقت العقاب من وجهة نظري ولأن كلها كام يوم وهتبقي مراتي ومينفعش مراتي تبات في مكان بعيد عني…..”
نظرت إليه بدهشة لتقول بتشنج…
“بلاش كلمة مراتي دي عشان ده استحالة يحصل وبعدين أنا مش مقتنعة بكل الكلام ده.”
حدجته بشك…
انحنى عليها وحل تلك الأسوار الحديدية من حول يديها وهو يرد عليها ببرود…
“مش مجبورة تقتنعي بكلامي إنتِ تسمعي الكلام وبس علشان دي الأصول يا حرم
جواد الغمري…..”
ارتبك جسدها من قربه وأنفاسه التي تغمر وجهها.. بلعت ما بحلقها بتوتر وهي تتلعثم بحنق…
“طب ابعد شوية ا…. إنت لازق أوي فيا و….”
كان كل تركيزه مصوبًا على الأسوار الحديدية ولكن عقب جملتها المتلعثمة رفع عينيه نحوها ليجد وجهها يكسوه الاحمرار وصدرها يعلو ويهبط بطريقة ملحوظة.
رفع حاجبه وهو يسألها بمكر..
“مالك؟ إنتِ سخنة؟”
وضع كف يده على جبهتها المتعرقة لتتقابل العيون للحظات يغرق هو في تلك البركة العسلية اللامعة وتدقق هي في عينيه الباردة والمخيفة كما تظن…
تنفست بصوت مسموع محاولة السيطرة على توترها وذاك الخجل الواضح عليها…
“جواد….. لو سمحت……”
ما زال يحدج بها بتمعن وبعينين ثاقبتين ورد بصوت أجش..
“عايزة إيه يا بسمة؟….”
تتزايد نبضات قلبها بعد سؤاله وتزداد رجفة جسدها من قربه الطاغي عليها…
صوب جواد عينيه على شفتيها المرتعشتين واللتين تتكئ بأسنانها عليهما بين الحين والآخر بتوتر ملحوظ.
للحظة كاد يتهور ويقبلها ولكن….
وضعت بسمة كف يدها على صدره وخرج صوتها بصعوبة من تلك الحالة المثيرة
بالضعف لكليهما..
“ابعد يا جواد…… مينفعش كده……”
ابتعد عقب جملتها ولمست يداها صدره وكانت كالصاعقة التي جعلته يعود إلى
رشده.
حك بسبابته أنفه وانتصب في وقفته وقال بحرج..
“تقدري تقومي دلوقتي تفطري وتاخدي شاور لو عايزة…. أنا عندي مشوار مهم وأول ما أرجع هنتكلم في موضوع الورق اللي معاكي و….”
نظر إليها لعلها ترد ولكن وجدها تثبت عينيها في ركن ما وتكتفي بإيماءة بسيطة.
عض جواد على شفته فهو يعلم ما تفكر به. لولا أن بسمة منعت قربه لكاد يتمادى معها مؤكدًا أنه كان سيفعل
فهي تستفز رجولته وهذا أكثر الأشياء التي تجذبه إليها…
خرج وتركها.
تنفست الصعداء بعد خروجه ووضعت وجهها بين راحتي كفيها وهي تتمتم بضيق من نفسها..
“لازم أهرب من هنا….. أنا مش عارفة إيه اللي بيحصلي وأنا معاه وليه بضعف بالشكل ده
أنا تعبت وخايفة الموضوع يطور أكتر من كده…..”
………………………………………………………..
في مكان ما يسمى بالملهى مكان صاخب بالأصوات خافت الإضاءة بطريقة تثير
أصحاب الأجساد المترنحة من كثرة شراب الخمر والفتيات العاريات في كل مكان يقع عليه بصرك…
على الـ«بار» كانت تجلس وتشرب الخمر بكثرة فمعذب قلبها يتركها تلتوي بنار البعد عنها…
جلس رامي بجانبها وهو يبتسم ساخرًا..
“إيه حبيب القلب؟… لسه مش راضي يعبرك؟….”
وضعت الكأس مرة واحدة على فمها وأنزلته فارغًا وهي ترد عليه بتهكم..
“بقولك إيه يا رامي ابعد عني الساعة دي لحسن أنا اللي فيا مكفيني….”
“يا بنت فكك منه ده جوكر مش بيفرق معاه حد ولا عنده قلب يحب…..”
“لا وإنت ما شاء الله قلبك شبه البسكوتة بيدوب في الحب…..”
تنهد رامي بحزن وهو يرد عليها بصدق..
“أيوه بحب…بس واحدة أنضف من إنها تفكر في واحد زيي…..”
“مين؟ البت المحامية اللي حكيت لي قبل كده عنها؟….”
رد عليها بعد تنهيدة ماكرة..
“هي في غير بسمة اللي شغلاني؟…. يلا مليش نصيب فيها…..”
علقت على حديثه بسخط.
“ملكش نصيب ولا خايف من أبوك؟….”
قال رامي بنزق..
“الاتنين ماهو أنا مش قد حرماني من فلوس عزيز التهامي…… وبعدين مانا طلبت منها نتجوز عرفي هي اللي رفضتني…..”
أطلقت إنجي ضحكة استخفاف عقب انتهاء حديثه..
“قصدك طردتك…. بلاش تحور عليا يا رامي البت من أول يوم وهي مش طايقة تشوف وشك وإنت اللي مصمم تجرب النضيف بزيادة يعني مش حب دي للعبة كان نفسك تلعب بيها شوية وتسيبها….”
رفع حاجبيه بسخط وهو يرد عليها باستفزاز
“لا برافو عليكي يا إنجي فاهمة دماغي أوي… والغريبة إننا فاهمين بعض…. أنا كنت حابب أجرب النضيف وإنتِ بتحاولي توقعي الجوكر في حبك عشان تضمني فلوس الغمري واسمه…..”
توترت قليلًا وهي تبعد عينيها عن مرمى عينه الخبيثة..
“إيه الكلام اللي بتقول ده؟ إنت سكرت ولا إيه؟….”
انتصب في جلسته مربتًا على كتفها وهو ينهض وقال بتشدق..
“متخفيش يا جيجي سرك كبير…. مصير مصالحنا تبقى واحدة بعد ما تبقي مرات الجوكر….. باي يا جيجي هانم….”
ذهب من أمامها وهو يدندن باستمتاع…
………………………………………………………..
دلف جواد إلى مقر شركة «الغمري» بطلته المعتادة وهالة شخصيته الطاغية على أي مكان يولج إليه…
نهضت السكرتيرة الخاصة به صوب دخوله عليها وابتسمت بعملية قائلة بتهذيب…
“حمد لله على سلامتك يا جواد بيه…. تحب أحضر أوراق صفقة الشناوي بيه؟….”
رد بإيجاز…
“حضري أي ورق اتأجل الفترة اللي فاتت وهاتيهم على مكتبي بسرعة…..”
أومأت له وهي تهم بتحضير بعض الأوراق المهمة…
بعد مدة كان منهمكًا بين الأوراق.
دخل زهران عليه المكتب بوجه مكفهر وهو يصيح بانفعال…
“اتأخرت ليه عليا يا جواد؟ مش متفق معايا إن إحنا هنتكلم في الصفقة إياها؟….”
رد جواد وعيناه على الأوراق بتركيز…
“كنت هخلص الورق اللي في إيدي وجيلك…. تشرب إيه؟….”
جلس زهران على مقعد مقابل له ووضع قدمًا على أخرى وقال بضجر..
“البت فين؟ روحتها؟….”
“بت مين؟….”
سأله جواد وعيناه لم تفارقا الأوراق…
“المحامية….. اللي ا….”
قاطعه جواد بنبرة تحذير وعيناه تحدجان به بتهديد..
“زهران بيه…. أنا جاي أقابلك عشان أتكلم في الشغل الشغل وبس أي حاجة تانية لا….”
قوس زهران فمه بامتعاض من طريقة حديث جواد معه والتي كل يوم تتزايد سوءًا فغير مجرى الحديث وقال..
“إنت لسه مصمم تخرج السلاح في عربيات الشركة؟….”
“آه إحنا متفقين أنا وإنت قبل كده على كل حاجة… إيه اللي جاد؟”
تردد زهران وهو يسأله..
“افرض الحكومة ما…..”
طرق جواد بالقلم على سطح المكتب وقال بعينين ثاقبتين…
“سيب الموضوع كله عليا إنت ليك السلاح يتسلم والحكومة متقطعش عليك…. وكل حاجة هتمشي زي ما أنا عايز…..”
نهض زهران عن مقعده وقال بإيجاز..
“تمام….. هتروح على الفيلا ولا هتختفي تاني؟….”
انتصب جواد في جلسته ورجع بظهره إلى الوراء، وقال بثبات…
“في شوية ترتيبات كده هخلصها وهرجع الفيلا قريب…..”
“ترتيبات إيه؟….”
حدج زهران به بتمعن فضولي…
“هتعرف قريب أوي إن الترتيبات مش هتكمل غير بوجود العيلة كلها…..”
نظر له زهران بتوجس وقال..
“ناوي على إيه يا جواد؟….”
“كل خير….. كل خير يا يا عمي.”
……………………………………………………….
“إنت متأكد من المعلومات دي يا أسر؟….”
تحدث اللواء مدحت وهو يدلف إلى مكتبه.
رد أسر بجدية…
“الإخبارية بتقول كده والمكالمة فيها كل المعلومات اللي محتاجينها عن الشحنة…. فاضل نقبض عليهم متلبسين.”
“خلاص يا أسر هطلع معاك قوات مسلحة والمهمة هتكون في سرية تامة وإن شاء الله الإخبارية تصدق ونمسك الغمري ورجالته…..”
نهض أسر وأدى التحية العسكرية وقال بخشونة…
“تمام يا فندم…. هبلغ الرجالة بميعاد العملية وإن شاء الله نمسك المجرمين متلبسين…..”
“ربنا معاكم……”
………………………………………………………
حدقت في نفسها عبر المرآة بتوتر ورهبة مما تفعله ولكن طمأنة قلبها بأن جواد ليس في البيت وسيكون سهلًا هروبها الآن فقد حل الظلام الدامس وأصبحت الأجواء أكثر هدوءًا.
حملت حقيبة يدها الصغيرة التي كانت معها منذ بداية خروجها من المشفى بصحبة هذا الجواد.
تنهدت بارتباك عقب تفكيرها به. نظرت إلى صورتها المنعكسة في المرآة وهي تقول..
“اهدي يا بسمة إن شاء الله هتعرفي تهربي من هنا. إن شاء الله هتخرجي من السجن ده وللأبد…. اجمدي يا بسمة هتعرفي تهربي اجمدي…..”
قلبها يتمتع بروح المغامرة شرسة الشخصية متهورة وعصبية ولكنها أنثى تحمل الضعف والخوف ولن تنكر أن تلك المشاعر تذبذب قرارها الآن…
ولكن لا وقت للرجوع عن هذا.
أغلقت باب الغرفة خلفها ببطء حتى لا يصدر ضجيجًا…
نزلت ببطء على درج السلالم وهي تلتفت حولها متوجسة…
فتحت باب البيت الكبير وخرجت منه وأغلقته بخفوت…
سارت بخطى شبه سريعة وقلبها ينبض بخوف وجسدها يرتجف برهبة من خروجها بمفردها في تلك المنطقة شبه المنقطعة…
أثناء سيرها نظرت خلفها بتوجس ليصطدم جسدها بحائط صلب التفتت بارتباك…
“على فين يا بسمة؟…..”
قال جواد جملته وهو يحدج بها بعينين ثاقبتين أرعبتاها…
ازدردت ريقها بصعوبة وتلعثمت..
“جــ…. جــواد….. أنا… كــنــ….”
فقدت الوعي بين يديه فتلقى جسدها قبل أن يسقط ارضًا وهتف باسمها بقلق واضح..
“بــســمـــة….. بــســمـــة…. ردي عليا….”
حملها بين ذراعيه وهو يتجه بها نحو البيت.
بعد دقائق……
فتحت عينيها العسليتين ببطء ووضعت يدها على جانب رأسها قائلة بتعب..
“آآآآه….. رأسي…. آآه…. أنا فين؟….”
جلس جواد بجانبها على حافة الفراش وقال بهدوء يخفي به قلقه عليها..
“إنتِ بقيتي كويسة دلوقتي؟ حاسة بحاجة؟….”
انتصبت قليلًا وجلست وهي تحاول إبعاد عينيها بحرج عن عيني جواد المحدقتين بها.
“ليه عملت كده؟….”
سألها بنفاد صبر.
عضت على شفتيها وهي ترد عليه بضيق
“إنت اللي اضطرتني… لو كنت سبتني أمشي إمبارح مكنتش هفكر أهرب النهاردة….”
“إنتِ ليه مش قادرة تقدري خوفي عليكي؟….”
تحدث جواد بسرعة ومن دون تفكير جعلها ترمقه بغرابة…
نهض بغضب زائف وهو يوليها ظهره…
“أنا قصدي إنك لازم تخافي على نفسك أكتر من كده وكمان لازم تخافي على أختك وجوزها وابنهم هم كمان ممكن يتأذوا بسبب استهتارك ده…..”
قالت بسمة بحزن ويأس…
“إنت ليه مش قادر تفهم إن صعب عليا إني أبقى معاك في مكان واحد؟ صعب إني أسكت على كل اللي عرفته…..”
أخرج جواد سيجارة من جيب بنطاله وأشعلها وهو ما زال يخفي وجهه عن مرمى عينيها..
“لازم تسكتي يا بسمة لأن ده الأفضل ليكي ولأهلك… لازم تسكتي وتنسي…..”
لم ترد عليه بل عقدت ساعديها وهي تنظر أمامها بعدم اقتناع فهي تصمت خوفًا على عائلتها الصغيرة التي يركض خلفهم الخطر
من دون أن يدركوا ذلك.
حسمت أمرها وهي تتنهد باستياء…
“أنا تعبت….. قولي عايزني أعمل إيه وهعمله عشان أطلع أنا وأهلي من اللعبة دي…..”
جلس على الكرسي الوثير ورجع بظهره إلى الخلف، وهو ينفث سجارته، وقال بثبات..
“الحل الوحيد إننا نتجوز فترة قصيرة كام شهر بس على الورق…هنبعد عنك العين وقتها وهيوصل للكل إنك بقيتي مراتي ومن عيلة الغمري يعني مش هيبقى في منك خوف….. بعدها بمدة هطلقك هنقول إننا مش متفقين فانفصلنا وخلاص وتنتهي القصة على كده. ترجعي إنتِ حياتك عادي وأنا كمان وكأننا متقابلناش…..”
“يعني مفيش حل تاني غير الجواز؟….”
رد عليها بحزم…
“مفيش غيره والقرار بإيدك… توافقي وتستحملي الكام شهر دول…. يا تقومي دلوقتي أوصلك على بيت أختك…. بس لو حصل ليهم أي حاجة أنا مش مسؤول…..”
نظر إليها قليلًا ليرى تأثير حديثه عليها وصراع الجلي على وجهها الشاحب.
أغمض عينيه بتعب وتمتم داخله بضيق من النصيب الذي جمعهما معًا…
“يا ريت في حل تاني غير الجواز….. للأسف ده الحل الوحيد اللي هيبعدهم عنك يا بسمة…..”
فاق من حيرته على صوتها المتردد..
“أنا موافقة طالما جوازي منك هيكون كام شهر بس……….”
ابتسم جواد ابتسامة مجاملة وهو يرد عليها بثبات…
“تمام….. يبقى لازم تنامي دلوقتي عشان بكرة هرجعك على بيت أختك…..”
اتسعت مقلتاها وهي تسأله بعدم فهم..
“بيت أختي؟ طب و……”
حمل سترته من على المقعد وهو يرد عليها بتوضيح أكثر..
“لازم تروحي بكرة…. وتكلمي أختك وجوزها في موضوع جوازي منك….. وبعدين هجيب أهلي وأجي أتقدملك لازم كل حاجة تمشي طبيعي قدامهم عشان محدش يحس بحاجة. فهمتيني يا بسمة؟…..”
أومأت له بتردد ليخرج من الغرفة تاركًا إياها تنام بها…
أغمضت عينيها عقب خروجه لتنزل العبرات الحزينة دون تردد
فقد دُمرت أحلامها الوردية
زوجها الذي كانت دومًا تحلم به مع شخص خلوق ذا شهامة وشجاعة وهالة رجولية تحتويها وتسيطر على جنونها وتهورها !
كانت تتمنى شخصًا لم يدنس يديه بدماء الأبرياء.
تبخر الحلم مع رجل عكس كل الصفات التي تمنتها منذ أن كانت مراهقة صغيرة…
تبخرت بسبب تلك الأوراق وتبخر الأمان داخلها بعد أن أصبحت تحت سطوة
«جواد الغمري».
“يارب لو كان كل اللي بيحصل ده خير
نور بصيرتي بالخير ده…. وإن كان شر
نور بصيرتي ليه وأبعده عني يا رب…. يارب….. يارب…..”
ظلت تبكي وتدعو ربها بإلحاح…
نهضت بعد مدة لتقضي فرض الفجر ولم تتوقف عن الدعاء لتيسير أمرها وحياتها التي دُمرت بسبب ذلك الجواد ورجاله..
•تابع الفصل التالي “رواية لن احررك” اضغط على اسم الرواية