رواية لن احررك الفصل السابع 7 – بقلم دهب عطيه
جلست على أريكة المكتب أمام عيني جواد المتفحصة لها بتركيز…
كانت تتحدث في الهاتف بتردد محاولةً تمثيل الثبات لبث الطمأنينة الكاذبة الى شقيقتها.
“أنا بخير يا دعاء… صدقيني كويسة… عند واحدة صاحبتي… لا مش هتعرفيها أصلي عمري ما ذكرت اسمها قدامك… قاعدة عندها فترة كده عشان… عشان هي في مشكلة قانونية وقعت فيها وبحاول أحلها معاها… فترة قصيرة وهتلاقيني عندكم… سلميلي على كريم وأنا هكلمك تاني… متقلقيش عليا… مع السلامة…”
أغلقت الهاتف وهي تنظر إلى جواد بحزن… بحزن على كذبها على شقيقتها الوحيدة
بحزن على ما أصبحت عليه
بحزن على كل شيء مرت به وما ينتظرها
مع الغمري ورجاله…
“خرجي الشريحة من التلفون.”
نظرت له بسمة بعدم فهم…
زفر جواد بقلة صبر ثم نهض ووقف أمامها وأخذ منها الهاتف من بين يديها وأخرج شريحة الهاتف ليضعها في كوب الماء الموجود على سطح المكتب..
“ممكن أفهم أنت بتعمل إيه؟”
صاحت بدهشة من فعلته…
عاد جواد جالسًا على مقعد المكتب الوثير وهو يرد عليها ببساطة..
“بعمل اللي المفروض أعمله… عشان محدش يقدر يوصل لمكانك.”
اكفهر وجهها وهي تزمجر بعدم رضا..
“ولحد إمتى هفضل في السجن ده؟”
بدأ يخط بقلمه على ورقة بيضاء وهو يرد عليها بملل من موهبة الثرثرة التي تملكها..
“أولًا إنتي بقالك في السجن ده أقل من أربعة وعشرين ساعة… ثانيًا أنا بحاول أفكر في حل يرضي الكل وبدون خساير.”
علقت على حديثه بسخرية..
“بدون خساير؟ أنت مش شايف إنك جاي عليا وعلى حياتي عشان نفســ…”
قاطعها بحزم..
“عشان حياتك ياريت تفهمي ده كويس.”
ترك كل شيء وتطلع إليها بنظرة مخيفة تحذرها من إنكار حديثه الموثق منذ البداية.
لكنها لم تخشَ عينيه المخيفتين اللتين تكاد تندفع منهما النيران الحارقة وسألته بعناد.
“وليه ده كله؟ هفرق إيه أنا عن علام الخفاجة اللي مات على إيدك؟ هفرق إيه عن كل اللي موتهم قبلي؟”
لم ينظر لها بل وضع عينيه على الورقة الفارغة وهو يرد عليها ببرود
“مش مجبور أرد على سؤالك… ولا من حقك تسأليني ليه بحمي حياتك من بين إيديهم.”
نهضت وهي تهدر بانهيار من إصراره على ارتداء قناع البرود واللامبالاة أمامها دومًا
“آمال إيه اللي من حقي؟ إيه اللي المفروض أعمله وأقوله في مكان زي ده؟ ليه أنا… ليه أنا هنا؟ ليه الحق مستخبي في ضلمة؟ وليه الباطل مش بيشوف غير النور؟”
نهض جواد وهو يرد عليها بجفا..
“زمان سألت نفس سؤالك… عارفة كانت الإجابة إيه؟”
سألته بعينيها العسليتين اللامعتين.
مر من جانبها وهو يميل على أذنها هامسًا بصوت مجرد من المشاعر…
“الحق اتدفن زمان مع كل اللي طالب بيه…”
خرج من المكتب وترك قلبها يخفق بين ضلوعها بقوة من قربه منذ ثوانٍ وأنفاسه الرجولية التي همس بها في أذنها…
جهلت فهم تلك المشاعر الغريبة وفسرت ما حدث داخلها منذ ثوانٍ بأنه ليس إلا توترًا من قربه المفاجئ منها…
ليس إلا… ليس إلا…
ــــــــــــــــــــــــــــــــــــــــــــــــــــ
بعد عدة أيام
وقفت أسيل أمام بوابة النادي وهي تزفر بضيق فقد تعطلت سيارتها اليوم وأرسلتها إلى الصيانة.
“أوف بقى… حتى مفيش تاكسي راضي يوقف.”
زفرت باستياء وصدح رنين الهاتف بين يديها وأنار باسم (سيف الغمري)…
ابتسمت وهي تفتح الخط فمنذ أن وعدها سيف بكونه الصديق والأخ لها وهو دومًا يراسلها عبر الهاتف للاطمئنان عليها
ولا يمل من سماع بعض أحاديثها غير المهمة عن روتين يومها الطبيعي وأسئلته عن عملها وموهبتها في رسم بعض اللوحات المعبرة والتي تُعرض في معرض يكاد تكون له
شعبية طفيفة…
“ألو يا سيف عامل إيه؟”
هاتفيا أجابها بنبرة عادية..
“الحمد لله تمام… خلصتي في النادي ولا لسه؟”
قالت أسيل بنبرة شبه مستاءة..
“آه خلصت… المهم أنت عامل إيه في شغلك؟ هتوصل إمتى البيت؟”
كان يقود السيارة بانزعاج من كل هذا الوقت الذي يتبخر بسبب ذلك الزحام ولكن رغم كل شيء لم يغفل عن نبرة صوتها الغريبة….
“مالك يا أسيل؟ أنتِ كويسة؟ حد ضايقك في النادي؟”
أجابته أسيل سريعًا..
“لا طبعًا مفيش حاجة.”
نظر إلى ساعته بضيق وهو يتساءل..
“آمال مالك؟”
“العربية بتاعتي في الصيانة… و… مش عارفة الطريق ماله النهارده مفيش أي تاكسي فاضي.”
رد عليها دون تردد…
“طب نص ساعة وهتلاقيني عندك عشان أوصلك.”
عضت على شفتيها بحرج وهي تقول..
“بس يا سيف… مــ…”
“اسمعي الكلام نص ساعة وهبقى قدامك.”
أغلقت الخط وهي تقف في مكانها بانتظاره وعلى ثغرها ابتسامة رقيقة من اهتمام سيف بها ورجولته الطاغية معها تجعلها ترى الرجولة معه بمنظور آخر.
“مش بتردي على اتصالاتي ليه يا سوو؟”
استدارت أسيل بعد أن عرفت صاحب الصوت لتحدج به بازدراء وهي تهتف..
“رامي… عايز إيه؟ وجاي ليه؟”
ــــــــــــــــــــــــــــــــــــــــــــــــــــ
رفع سيف الهاتف إلى أذنه منتظرًا مجيبًا.
بعد عدة ثوانٍ فُتح الخط بصوت رجولي ناعس..
“أوعى تقولي إنك لسه نايم.”
رد جواد عبر الهاتف بكلمات متقطعة..
“سيف… في حاجة؟ بترن ليه؟”
مسح سيف وجهه بيده وهو يرد عليه بنفاذ صبر
“أنت فين يا جواد؟ وإيه كل الغياب ده؟
بقالي أكتر من أسبوع بحاول أوصلك من
آخر مكالمة… أنت مطول في سفرك ده لحد إمتى؟”
رد جواد عليه بنزق..
“شوية كده… عندك مشكلة في غيابي؟”
تمالك سيف أعصابه ثم هتف
“جواد في اجتماع مهم يهم الشركة والفرع اللي أنت ماسكه مشارك فيه وبما إنك صاحب الفرع والمسؤول عنه فلازم تحضر.”
رد جواد بعدم اكتراث..
“بعدين يا سيف أجّل كل حاجة لحد ما أرجع.”
بادر سيف بسؤال..
“وهترجع إمتى يا جواد؟”
“قريب أوي هظبط أموري هنا وراجع متقلقش.”
تنهد الآخر وهو ينهي النقاش
“تمام هكلمك بليل… سلام.”
أغلق الخط وهو يصف سيارته بجانب بوابة النادي… ترجل من سيارته وبحث بعينيه عن أسيل ليجدها تقف مع شخص ما لم يتعرف عليه فكان يوليه ظهره…
“عايز إيه يا رامي مني؟ إحنا خلاص علاقتنا انتهت لحد كده…”
قالتها أسيل بحزم وبوجه متشنج.
رد رامي بمكر بعد أن رأى سيارة سيف تأتي نحوهما من بعيد ولمح صاحبها وهويته
“يهون عليكي حبنا يا سوو؟ يعني مش قادرة تصدقي إن الفيديو اللي وصلك ده متفبرك؟ صدقيني يا سوو دول ناس عايزين يوقعوا بينا. أنا لسه بحبك يا سوو وعايزك.”
احتقن وجه أسيل وهي ترد عليه بانفعال.
“بيوقعوا بينا؟ أنت عايزني أكدب عيني وأصدقك انت
أنا مش ساذجة للدرجادي يا أستاذ…
وهي كلمة واحدة يا رامي ابعد عن طريقي وانسى أي حاجة كانت بينا لأني نسيتها من ساعة ما اكتشفت كذبك وخيانتك.”
عض رامي على شفتيه بخزي زائف وهو يرد عليها بلؤم بعد أن اقترب سيف منهما..
“أبعد عنك إزاي؟ إحنا لازم نتجوز يا أسيل… إنتِ إزاي هتقدري تنسي حبنا وكل اللي حصل بينا في شقة المعادي؟ معقول كل ذكرياتنا تدوسي عليها بالشكل ده؟”
اتسعت عينا أسيل بصدمة في محاولة لاستيعاب ما قاله..
“أنت بتقول إيه؟ أنت اتجننت؟ شقة إيه و…”
شهقت بدهشة حين وجدت رامي ملقى أمامها على الأرض بعد أن سدد له سيف لكمة أطاحت بجسده أرضًا..
أمسك سيف رسغها بقوة بين قبضته وهو يكز على أسنانه بغضب وقال..
“يلا يا هانم، وكفاية فضايح لحد كده.”
سحبها بقوة نحو السيارة..
“سيف اسمعني… ده بيكدب انا…”
ألقى بها في السيارة بجانبه وهو يغلق الباب عليها بوجه متهكم…
صعد بجانبها وهو ينظر لها بازدراء وأشعل محرك السيارة محاولًا السيطرة على أعصابه. فإذا كان عليه أن يلقنها درسًا على ما سمعه بأذنيه فلا يعلم إن كان ما قاله صحيحًا أم افتراءً عليها من هذا الوغد… لا يعلم لكنه فضل الصمت حتى يصل بها إلى البيت
وهناك سيعرف الإجابة.
وصلت السيارة أمام باب البيت. نظرت أسيل بوجه مبلل بالدموع إلى النافذة وأشاحت عينيها بعيدًا عن عيني سيف المسلطتين عليها فكانت نظرته كفيلة بإهانة كرامتها أو ما تبقى منها بعد افتراء هذا الدنيء عليها والذي للأسف، كانت متيمة به وكانت تراه شريك حياتها.
“انزلي… استنيني في أوضتي.”
رفعت أسيل عينيها بعدم فهم..
“أوضتك؟”
أمسك ذراعها وهو يرد عليها بغضب..
“آه أوضتي… لازم نتكلم يا هانم في الكلام اللي سمعته من الزفت اللي كنتي بتحبيه.”
“أنت لسه قايل اللي كنت بحبه… يعني مفيش حاجة بينا يا سيف وهو ا…”
قاطعها وتشدق…
“مش هنتكلم هنا يا هانم… اسمعي الكلام واستنيني في أوضتي يا أسيل… أنا لحد دلوقتي ماسك أعصابي لكن قسمًا بالله لولا صلة الدم أنا كنت رديت عليكي بطريقة مش هتعجبك… انزلي.”
امتثلت له على مضض فهي كارهة لهذا الأسلوب وغطرسة الرجال في أوامرهم.
ترجلت من السيارة وسارت باتجاه باب الفيلا. فتحت لها الخادمة شادية وولجت أسيل إلى صالة البيت بوجه متجهم…
“السلام عليكم يا تيته.”
قبّلت جبين أنعام الجالسة على أريكة الصالون. ابتسمت أنعام وهي ترد عليها بلطف…
“وعليكم السلام… ها يا حبيبتي أخلي شادية تحضرلك الغدا؟”
“لا مش جعانة، ا…”
قاطعها صوته الرجولي وهو يقول بهدوء شبه آمر
“أسيل ممكن تيجي شوية لو سمحتي؟”
نظرت أسيل إليه بتوتر.
وزعت أنعام الأنظار بينهما ثم سألت
“مالك يا سيف؟ وشك أحمر كده ليه؟ وإنتي كمان يا أسيل مالك وشك مخطوف كده؟ هو فيه حاجة حصلت معاكم ولا إيه؟”
لم ترد أسيل بل همّت بالانصراف من أمام كليهما…
سألت أنعام بتوجس…
“مالها أسيل يا سيف؟ أنت زعلتها؟”
رد سيف بإيجاز..
“هي كويسة… أنا طالع أغير هدومي.”
ترك أنعام في شك من تصرفهما وسارع الخطى ليلحق بها…
كادت أن تغلق باب غرفتها عليها عازمة النية على الانعزال اليوم عن الجميع وأهمهم سيف ابن خالها…
وجدت من يعيق الباب بحذائه فرفعت عينيها بدهشة من أمره…
“سيف…”
ولج إلى داخل الغرفة وهو يغلق الباب خلفه ناظرًا لها ببرود…
“المفروض نتكلم في اللي قاله الزفت ده عنك.”
اشتدت عيناها وهي ترد عليه بعناد..
“هنتكلم في إيه؟ أنت عارف إنه بيكدب وبيفتري عليا… أنا معترفة إني كنت بحبه وكنت حابة أرتبط بيه لكن بعد الفيديو اللي شوفته اتقطعت علاقتي بيه.”
“وقبل الفيديو يا بنت عمتي… كنتي بتروحي شقته؟”
عضت على شفتيها بقهر قبل أن ترد عليه بصراحة..
“روحت شقته… بس مرة واحدة ومحصلش بينا اي حاجة.”
أولاها ظهره وهو يحاول السيطرة على أعصابه من برودة حديثها وعدم المبالاة التي تُرسم بوضوح على وجهها.
تحدث بسخط..
“واضح من كلامك إن عادي أوي بنت محترمة زيك تروح شقة واحد أعزب ومش أي أعزب ده ابن.*.”
عضت على شفتيها من اللفظ الذي قاله دون اكتراث بوجودها معه…
استدار لها بتهكم وقال
“بصي بقى يا بنت عمتي… مش معنى إني فركشت ارتباطنا ببعض يبقى إنتي مش مسؤولة مني…
لا إنتي مسؤولة مني سواء أنا أو جواد لحد
ما نسلمك لجوزك… ومن هنا ورايح كل حاجة هتبقى بحساب ولازم قبل أي حاجة يكون عندي خبر… أنا مش هستحمل كلمة تانية من حيوان تاني بسبب قلة تربيتك اللي كلنا قصرنا فيها.”
اتسعت عيناها وهي ترد عليه بذهول..
“قصدك إيه؟ إني مش متربية؟”
نظر لها باستهجان..
“بالظبط كده وأنا اللي هعيد تربيتك تاني
يا أسيل… وعلى إيدي.”
تقدمت منه في غيظ شديد…
“أنت بتقول إيه؟ أنت مفكر نفسك ولي أمري؟ فوق ده كل الفرق اللي بينا خمس سنين و…”
وجدته يلوي ذراعها خلف ظهرها في ثوانٍ وهو يهدر بها من تحت أسنانه..
“إياكي يا أسيل صوتك يعلى عليا.. والخمس سنين اللي مش عاجبين سيادتك حاولي تحترمي وجودهم بينا من باب الاحترام اللي إنتي نسيتي تتعلميه…”
ترك يدها وخرج من الغرفة مغلقًا الباب بقوة خلفه…
دلكت ذراعها مكان قبضته وهي تهتف بكبرياء وتحدٍّ..
“والله لأوريك يا سيف… أنا مش محترمة ومحتاجة أتربى؟ طب والله لأربيك على إيدي عشان تعرف مين هي أسيل الحسيني.”
ــــــــــــــــــــــــــــــــــــــــــــــــــــ
نهضت لميس عن الفراش وهي تلف حول جسدها شرشفًا يخفي جسدها العاري. أشعلت سيجارتها وهي تنفث دخانها قائلة..
“أهوه بقاله فترة مش على بعضه من ساعة موضوع الورق ده… وكمان بعد ما عرف إن جواد ابن أخوه بيعصي أوامره ومصمم يحمي البت المحامية دي بعيد عن إيده وهو مش طايق حد وأوقات بيبات برا البيت.”
نهض عزيز وهو يلتقط كأس الخمر بيده. ارتشف منه دفعة واحدة وهو يهتف بشر
“آه لو قدرت أوصل لبنت الإيه دي قبل زهران ساعتها هلعبها على الشناكل.”
امتعض وجه لميس وهي ترد بحنق…
“كلام يا عزيز مش باخد منك غير كلام… ومن ساعة ما اتجوزة الزفت ده وإنت بوء وخلاص.”
هدر عزيز بغيظ..
“يعني أعمل إيه يا لميس؟ ما هو على قد ما بحاول أوقعه نفسي أرميه في سجن بإيدي دول، وأذله وأخلي سمعته في الأرض وبعد كده أقتله وكل أملاكه تبقى تحت إيدي.”
نظرت لميس له بغموض وهي ترد عليه بلؤم
“طب ما تبدأ بابن أخوه جواد… اكسر دراعه اليمين… إنت قلت لي قبل كده إنك عارف حقيقة موت أهله وإن زهران هو اللي ورا كل حاجة. ما توقعهم في بعض وخليهم يخلصوا عليه بعض ونخلص منهم.”
نظر لها عزيز برهة ورد عليها بقنوط
“يا ريت، ده هو الحل… لو السر انكشف مش هستفاد حاجة غير إني وقعت واحد بس والتاني هيفضل واقف لي زي اللقمة في
الزور. وأنا عايز أخلص عليهم سوا عشان أرتاح منهم مرة واحدة وكشف الحقيقة مش في صالحي يا لميس بالعكس ده يمكن يفتح علينا أبواب تانية مع زهران اللي لحد دلوقت ميعرفش إننا عايزين نخلص منه.”
سألت لميس بيأس…
“طب هتعمل إيه يا عزيز؟ إحنا مش هنفضل ساكتين كده كتير. لازم تصرف أنا زهقت من عيلة الغمري ومن عيشتي وسطهم.”
أثبت عينيه على نقطة وهمية وبتركيز وحك في لحيته النابتة، وهو يقول..
“في شحنة سلاح باسم زهران الغمري هتتسلم في منطقة ((……)) وجواد هيكون مع رجالة زهران ساعة تسليمها… والعربيات المشحون فيها السلاح عليها شعار شركة (الغمري) يعني لو بلغنا البوليس جواد وزهران أقل واجب هياخدوا إعدام والقضية لبساهم لبساهم.”
زين ثغر لميس ابتسامة سخيفة، وهي ترد عليه بإعجاب..
“أيوه كده يا عزيز… وساكت من بدري وإنت معاك الحل اللي يخلصنا من كل اللي إحنا فيه. يبقى نبلغ عنهم ونفضحهم وساعتها هيبقى سهل الباقي بعد ما يتسجن زهران.”
هز عزيز رأسه وهو يرد عليها بتشدق
“يا ريت الموضوع سهل يا لميس.”
“وإيه الصعب في كده؟ أنت مش معاك معلومات كافية عن شحنة السلاح دي وكمان ميعاد تسليمها؟”
رد عليها بازدراء
“معايا لكن… جواد الغمري مش سهل ومينفعش نستخف بيه للدرجة دي.”
قالت لميس بإقناع له…
“انوي إنت بس يا عزيز ويمكن المشاكل اللي بينه وبين زهران تلهيه عن اللي إحنا بنخطط ليه ويقع المرة دي.”
رد عليها بعد أن عقد العزم
“إن شاء الله أوقعه وأخلص منهم هما الاتنين وأرتاح بقى.”
سارت لميس نحوه بتغنج وجلست في أحضانه قائلة بصوت أنثوي ناعم..
“هنخلص منهم يا زيزو ونرجع مع بعض تاني وقريب أوي كمان.”
ربت على كتفها العاري بعبث..
“طبعًا يا حبيبتي قريب أوي هخلصك من عيلة الغمري كلها وتبقي إنتِ الوريثة الوحيدة لأملاكهم.”
لمعت عينا لميس بطمع..
ــــــــــــــــــــــــــــــــــــــــــــــــــــ
فتحت عينيها ببطء وانتصبت في جلستها قليلًا وهي تدلك عينيها بضيق تثاءبت وهي تنهض وولجت داخل المرحاض لتقف قليلًا أمام المرآة المعلقة عل.. ى الحائط، وهي تنظر إلى وجهها باستهزاء.
تكره ما تمر به تكره الضعف وسلطة (الغمري) عليها.
نظرت إلى نفسها بضيق وهي تتمتم
“لحد إمتى هتفضلي في السجن ده؟ مالك ساكتة ليه؟ اتمردي اصرخي ارفضي وجودك هنا يا بسمة… إنتي مش ضعيفة عشان تخافي ولا إنتي مجرمة عشان تستخبي. لازم تهربي من المكان ده لازم تهربي.”
لمعت عيناها بذهول فالحل بين يديها وهي غافلة عنه..
“لازم أهرب من هنا وأبلغ البوليس عن المجرمين دول… كفاية كده أنا مش هفضل في السجن ده لحد ما أموت. لازم أهرب…”
فتحت صنبور المياه وهمّت بغسل وجهها وعقلها منشغل بوضع مخطط يحررها من حصار الغمري وأتباعه للأبد.
خرجت من المرحاض وهي تجفف وجهها. طرق باب الغرفة بهدوء. علقت بسمة المنشفة جانبًا وتوجهت نحو باب الغرفة… فتحت الباب لتجد أم إيمان أمامها تنظر لها بفتور، وهي تقول:
“صباح الخير يا ست بسمة.”
ابتسمت لها بسمة قائلة ببساطة.
“صباح النور يا أم إيمان.”
تحدثت السيدة بنبرة عادية ولكنها كانت تبث في بسمة رجفة توتر في جسدها حين نطقت اسم سجنها..
“جواد بيه مستني حضرتك في الإسطبل.”
“إسطبل؟ فين ده؟”
“هوديكي لحد عنده… بس استعجالي يا ست بسمة وأنا هستناكي تحت.”
ابتعدت السيدة عن مرمى أبصارها لتعود أدراجها أسفل البيت إلى الصالة…
استنشقت الهواء بقوة وأخرجت زفيرًا ببطء،
وهي تتمتم بتفكير مع نفسها..
“يا ترى عايز مني إيه؟ مش مهم أشوفه وبعدين أظبط خروجي من هنا على بليل… وده هيكون أحسن وقت والكل نايم.”
ــــــــــــــــــــــــــــــــــــــــــــــــــــ
كان يداعب الخيل بيده ويطعمه باليد الأخرى.
وقفت خلفه بعد أن تركتها أم إيمان ورحلت إلى عملها… لم تبادر بالحديث بل تركت عينيها تتأملانه بصمت…
حنون في تعامله مع هذا الخيل وكأنه رفيق الصغر…
لا تعرف لمَ هي فضولية في معرفة شخصية (الغمري)، ولمَ قلبها ينبض بسرعة حين تكون معه ولمَ تصيبها رجفة في جسدها حين يتطلع بعينيه المخيفتين إليها ولمَ تصمت أمام هالة رجولته وحديثه المتغطرس لها…
لمَ ولمَ ولمَ… ركام الأسئلة داخلها يدوي دون أن تحاول حل واحدة منها.
“حضري نفسك… هتجوزك آخر الأسبوع.”
أصابها الشلل بعد جملته التي ألقاها عليها بكل فتور وكأن ما قاله يعد شيئًا عاديًا…
“أنت بتقول إيه؟”
نطقت بصعوبة..
استدار لها وهو يرمقها ببروده المعتاد منذ أول لقاء…
“اللي سمعتيه… هتجوزك.”
اتسعت عيناها بصدمة وتشدقت..
“تجوزني؟ إنت… إنت أكيد اتجننت.”
وضع يديه في جيب بنطاله وهو يرد عليها بغطرسة…
“لا مش جنان ده الصح… عشان حياتك و…”
قاطعته قبل أن يكمل حديثه وهي تنهال عليه قائلة…
“عشان حياتي ولا عشان تذلني تحت رجلك وترضي اللي مشغلينك؟ اسمعني كويس انسى موضوع الجواز ده عشان من رابع المستحيلات إن اسمي يكون جنب اسمك وحتى لو على ورق.”
نظر لها نظرة أرعبتها ولكنها حاولت بث الطمأنينة في قلبها قدر المستطاع…
تقوس فم جواد جانبًا وهو يرد عليها بغرور
“وأنا مش بطلب… أنا بأمر… بأمر بس.”
قطبت جبينها بتبرم وهي ترد عليه باستهزاء
“والمفروض إني أوافق مش كده؟”
“بالظبط.”
اقتربت منه عدة خطوات وهي تقول بسخط
“بص بقى يا ابن الغمري أنا مش هوافق على المهزلة دي… وأنا لا ضعيفة عشان أنفذ أوامرك ولا مذنبة عشان أحمي نفسي بورقة جواز من واحد زيك…
وكده كده أنا كنت همشي من المكان ده بليل… بس تصدق إن الأفضل إني أبلغك بخروجي من سجنك؟”
نظرت له بكبرياء…
قبل أن تعود أدراجها لتحمل حقيبتها الصغيرة وتذهب من هنا وقبل أن تخطو خطوتين كانت يد جواد تطبق على مرفقها..
“مش بالساهل تخرجي من سجني يا… يا بسمة…”
اتسعت عيناها بدهشة من تجرئه عليها وهتفت من تحت أسنانها بتحدٍّ..
“سيب إيدي… أقسم بالله لندمك على كل لحظة حاولت تتطاول فيها عليا… وخليه وعد بيني وبينك محدش هيحطك في سجن غيري.”
ابتسم جواد ابتسامة خالية من أي مشاعر عقب جملتها الأخيرة…
“ويا ترى إنتي قد الوعد ده… يا… يا بسمة؟”
عضت على شفتيها بعصبية وهي تحاول تحرير ذراعها من بين قبضته القوية..
“سيبني أمشي… وأنا هوريك إذا كنت قد وعدي ولا لأ… آآآه إيدي!”
اتكأ أكثر على ذراعها وهو يشعر بضيق من هذا الوعد المقيت الذي تلقي به على مسامعه وتلك النغزة التي تصيب قلبه ألمًا من جملتها الأخيرة…
لم يتأثر من حديثها فهذه طبيعة صاحبة أشهر (روح مغامرة)… لمَ الضيق إذًا؟
زفر وهو يحاول السيطرة على نفسه من تلك الحالة الغريبة وهو يرد عليها باستخفاف…
“يا ترى بقى معاكي الدليل اللي يوصلني لحبل المشنقة ولا… لا؟”
نظرت لعينيه بغضب وهي تهتف بحنق..
“معايا الورق اللي يثبت إجرامك إنت واللي شغالين معاهم.”
تشنجت قسمات وجهه وهو يسألها بعينين ثاقبتين..
“ورق؟ ورق إيه؟”
تأملت صدمته من حديثها لتحول رد الصاع صاعين له وهي تقول بثبات…
“ورق علام الخفاجة… هو إنت ما تعرفش إن ميزة المحاماة إن أي ورق مهم لازم يتعمله نسخة تانية؟ أي نعم بتكون الصورة مش الأصلية لكن أهي بتوفي بالغرض.”
“يا بنت الـ…”
صمت ولم يكمل جملته احمرت عيناه وهو يرى شخصيته واسمه على حافة الهاوية بسبب تلك الغبية التي تريد أن تنهي حياتها قبل حياته….
نظرت له بعناد قائلة..
“مش إنت لوحدك اللي بتعرف تخطط… بس ممكن نعمل ديل سوا.”
لم يرد عليها وتركها تكمل حماقتها…
عضت على شفتيها بغيظ من نظرة الاستهزاء المرسلة لها لترمي جملتها بكبرياء قائلة..
“لو حررتني من السجن ده هسلمك نسخة الورق اللي معايا.”
نظر لها نظرة لم تفهمها وقال بسخرية
“لأ شاطرة… بس أنا هاخد الورق ومش هحررك من سجني.”
قبل أن تترجم جملته الغامضة وجدته يسحبها داخل البيت… حاولت الإفلات من قبضة يده والذهاب من هنا قبل أن يفعل بها شيئًا هي لا تدري به بعد…
“سيب إيدي… أنت واخدني على فين؟ سبني ا…”
“ششش… اخرسي.”
امتثلت لأوامره بخوف فتحت أبواب جهنم عليها وليست أي أبواب… ((الغمري)) صاحب الشخصية التي تصيب قلبها وروحها نحو منحدر الهلاك….
دخل بها إلى غرفة صغيرة في الدور الأرضي. كانت قديمة الشكل يوضع بها بعض الأغراض غير المهمة وبها سرير حديدي صغير في وسط الغرفة ونافذة خشبية صغيرة مغلقة لا تنبعث منها الشمس الأتربة متراكمة في كل مكان وهذا ما رأته بوضوح حين أشعل الإضاءة.
ترك يدها بقوة لتجد جسدها يترنح على الفراش المتهالك فتقع عليه…
“أنت بتعمل إيه؟ أنت اتجننت؟”
صرخت بها وهي تنظر له بازدراء…
أغلق الباب عليها وصعد إلى غرفته.
وقبل أن يصعد على السلالم وجد أم إيمان تخرج من المطبخ لتتفقد صوت بكاء بسمة وصراخها عليه…
قالت السيدة بتوتر وهي تطرح السؤال..
“هو في إيه يا سعادة البيه؟ هي مالها ست بسـمـ…”
“مش عايز حد في المزرعة أو في البيت النهارده بلّغي الكل إني عايز المكان فاضي خلال دقايق…”
توترت السيدة وهي تقول بتلعثم
“بس ااا…”
هتف جواد بصرامة أكبر..
“مش عايز كلام كتير. مش عايز مخلوق في البيت فهمتي؟”
ارتجف جسد السيدة واكتفت بإيماءة بسيطة وهي تعود إلى المطبخ لأخذ أغراضها.
“يا ترى إيه اللي قلبه بالشكل ده؟ استر يا رب على الغلبانة اللي جوا دي.”
ولج إلى الغرفة التي تقطن بها بسمة مرة أخرى وفي يده ((كلبشات حديدية)).
“أنت مفكر نفسك إيه؟ أنت بتعمل إيه؟ فكّني بقولك فكّني يا مجرم فكّني!”
وضع الأسوار الحديدية في يديها الاثنتين ورد عليها ببرود…
“كده نقدر نتكلم.”
حاولت فك يديها من تلك الأسوار وصاحت بحنق..
“مفيش كلام بينا… فكّني… فكّني بقولك”
“فين الورق يا بسمة؟ حطيتيه فين؟”
“مش هقول حاجة وهسجنك يا جواد هسجنك… فكّني!”
صرخت آخر كلمة بنفاذ صبر فهي لم تتوقع أن يتعامل معها بهذا الأسلوب… هو بارد الشخصية ومتغطرس عليها ولكن ليس بشعًا بتلك الصورة، ليربطها بهذه الأسوار ويسجنها في هذه الغرفة القبيحة ويعاملها بكل تلك المهانة…
عض جواد على شفتيه بغضب وهو يقول..
“تمام… خليكي على قرارك وأنا كمان على قراري… هتجوزك آخر الأسبوع ده اعملي حسابك على كده.”
تحدثت بسمة بتشنج ملحوظ…
“مستحيل أوافق… انسى فكرة الجواز دي خالص أنا هخرج من هنا يعني هخرج حتى لو…”
قاطعها جواد وهو ينحني عليها قليلًا قائلًا بمكر أوصل رجفة الخوف إلى جسدها…
“بلاش تتحديني… عشان أنا ممكن أخدك غصب عنك دلوقت وخليكي تقعدي تحت رجلي تترجيني أتجوزك وأستر عليكي.”
اتسعت عيناها وهي تقول بخوف..
“وقح وندل وابن…”
“لسانك يا قطة… أنا أكيد وقح لكن مش ندل بدليل إنك لسه زي ما إنتي… وعشان تطمني أكتر لو وافقتي على جوازنا… مـ… مش هلمسك غير لما إنتي اللي تطلبي كده.”
“مستحيل… إنت بتحلم.”
انتصب في وقفته وهو يضع يده في جيب بنطاله وقال بخبث..
“إيه هو المستحيل؟ إني أتجوزك… ولا إنك تطلبي مني الـمـسـك؟”
نظرت له بغضب لترد عليه بعناد..
“الاتنين يا ابن الغمري وأهمهم إن عمري ما هكون مراتك… “
نظر جواد في ساعة يده بتمهل ورد عليها ببرود…
“الاتنين هيتنفذوا يا بسمة… والمطلوب مني أنفذ الأولى والتانية هسيبها ليكي… أصلي مش متعود أغصب الستات عليا وبالذات لو من نوعيتك…”
نظر لها ببرود وخرج وتركها مغلقًا الباب وراءه بالمفتاح….يتبع
•تابع الفصل التالي “رواية لن احررك” اضغط على اسم الرواية