رواية لم يكن تصادف الفصل الثامن 8 – بقلم زينب محروس

الشاب اتصل ع يارا، و حاول بدل المرة عشر مرات، و في كل مرة كانت بتسمع الرنة و تشوف اسم المتصل و متردش…. و اخر ما زهقت رفضت المكالمة و قفلت الفون خالص، من غير ما تهتم هو بيرن عليها كتير ليه؟ و لا هو برا البيت بيعمل ايه؟ و هو مش من عادته خالص أنه يسهر لقرب الفجر برا البيت. 

تاني يوم قرب الضهر كدا، كانت يارا واقفة قدام المرايا و بتجهز نفسها عشان تروح الكلية، خلصت و أخدت شنطتها و خرجت تلبس الشوز بتاعها قدام باب الشقة، و هي واقفة لقت هدى طالعة و معاها صينية و عليها الفطار، و اول ما شافت يارا سألتها باهتمام:

– انتي رايحة فين يا حبيبتي؟ 

يارا بجدية: 

– نازلة الجامعة. 

هدي بحب: 

– لاء بلاش النهاردة، عشان عمر قال لازم نروح النهاردة عند الدكتور عشان نطمن عليكي. 

يارا باعتراض: 

–  مش هينفع النهاردة عشان عندي امتحان. 

هدى بتزكر: 

– بالحق سمية بتقولك إن عمر كلمها الصبح و قالها إنه اضطر يسافر بالليل عشان في مشكلة في الشغل. 

يارا بجمود: 

– ماشي. 

هدى خطر على بالها إن يارا زعلت عشان هو سافر من غير ما يقولها فقالت بمرح: 

– اكيد هيرن عليكي و يعرفك، هو بس تلاقيه مضغوط في الشغل، و عمومًا يا حبيبتي هو وصا سمية عليكي و طلب منها تجهزلك الفطار عشان تاخدي العلاج، و أنا و هي هنروح معاكي عند الدكتور. 

يارا باعتراض: 

– لاء مش هينفع النهاردة خلينا بكره. 

هدى باستسلام: 

– و الله انتي حرة مع حماتك، أنا هدخلك الأكل جوا و أفطري و خدي العلاج قبل ما تنزلي. 

يارا اتكلمت مع سمية قبل ما تروح الكلية عشان يأجلوا مشوار الدكتور، لكن سمية رفضت تأجل بسبب تأكيد عمر عليها لما كان بيكلمها، و بالفعل اتفقت مع يارا هيستنوها قدام الكلية لما تخلص الامتحان و يروحوا لإعادة الكشف. 

تاني يوم بعد ما يارا خلصت المحاضرات، و خرجت من مجمع الكليات عشان ترجع البيت و كانت معاها مريم، لكنها قررت هتنفذ قرارها النهاردة بعد ما شافت أحمد واقف وساند ع العربية و مستنيها، أما مريم فأول ما شافته قالت بضيق: 

– هو الكائن الساذج دا ايه اللي جابه تاني، مش قولتيله ميجيش؟؟ 

يارا قالت بضيق مماثل: 

– بعد إذنك يا مريم، متغلطيش في أحمد تاني، لو حابة يعني نكمل في صحوبيتنا. 

مريم بزعل و ترقب: 

– أنت بتحطي أحمد قصاد صحوبيتنا؟! مستعدة تتخلي عني و تنسي كل السنين اللي كنا فيها اكتر من صحاب….. دا احنا كنا حتى اكتر من الاخوات……مستعدة تمحي دا كله عشان خاطر أحمد اللي حبتيه من كام شهر؟!! 

يارا بصت لأحمد و قالت: 

– مستعدة اتخلى عن كل العالم عشان خاطر أحمد. 

مريم بجدية: 

– طب و لو قولتلك إني ضد فسخ علاقتك بعمر عشان تبقى مع أحمد. 

يارا باستخفاف: 

– تبقى فعلًا بتنهي صحوبيتنا. 

مريم ضحكت بخذلان و عيونها دمعت و قالت بقلة حيلة:

– مفيش فايدة….مفيش فايدة، اتغيرتي خالص، عمومًا براحتك، أنا نصحتك و عملت اللي عليا، و أظن كل واحد عارف هو عايز ايه كويس..

يارا اتنهدت بضيق و قالت: 

– ما هو براحتي فعلًا، يلا بقى هروح عشان أحمد مستني. 

مريم بصتلها بتكشيرة و قالت بتحذير: 

– أنتي قبل ما تكوني بتخالفي المجتمع، فأنتي بتخالفي الدين و بتخوني ثقة و تربية أهلك و عمر……اللي كل ذنبه إنه حبك و وافق يساعدك. 

يارا اتغاضت عن تحذيرات مريم، و سابتها واقفة و اتحركت تجاه أحمد اللي ابتسم أول ما شافها بتقرب منه.

فتح لها باب العربية و استناها تركب و بعدين هو ركب و قال: 

– افهم من موقفك ده، إنك متقبلة مشاعري؟؟ 

ابتسمت بخفة و قالت: 

– ايوه. 

أحمد ضحك بسعادة وقال بعدم تصديق: 

– بتتكلمي بجد؟؟ 

اتنهدت و قالت: 

– ايوه بجد، بس لازم تعرف حاجة، أنت لو عايزني فعلاً لازم تستنى طلاقي من عمري. 

سألها بحماس: 

– و دا هيحصل امتى؟

– المفروض كمان عشر شهور، اتفقنا من الأول هنتجوز على ورق لمدة سنة  و بعدين نطلق، و فات منهم شهرين. 

أحمد بجدية: 

– طب و انتي ليه تستني لما السنة تخلص، طالما كدا كدا زواج مزيف، اطلبي الطلاق دلوقت. 

يارا باقتناع: 

– خلاص لما أوصل البيت هكلمه و اطلب منه الطلاق…..احنا فعلاً مش لازم نكمل السنة. 

أحمد سألها باستغراب: 

– بس هو جوازكم كان اتفاق ليه؟ على حد علمي عمر مكنش مغصوب ع الجوازة…..

منعته يكمل و قالت هي: 

– بس أنا كنت مغصوبة، أنا وافقت على عمر في الأول على أساس إنه أنت. 

بالفعل يارا أول ما طلعت شقتها، اتصلت ب عمر، أول مرة مردش، فجربت تاني و المرة دي المكالمة اتفتحت، لكن اللي رد عليها هو علاء اللي بدأ كلامه ب:

– السلام عليكم، مساء الخير يا مدام يارا.

يارا استغربت الصوت، لكنها ردت بهدوء: 

– و عليكم السلام، مين معايا؟ 

علاء باعتذار: 

– مع حضرتك علاء، أنا آسف جدًا لو تعديت حدودي و رديت  بدل بشمهندس عمر، أنا قولت ممكن تكوني قلقانة بسبب اللي حصل امبارح فقولت اطمنك لأن البشمهندس فى اجتماع و ممكن يطول شوية، و سايب فونه معايا. 

يارا مهتمتش خالص إنها تسأل عن الوضع اللي يخليها تقلق، و قالت بجدية: 

– تمام، بعد إذنك لم يخرج خليه يكلمني ضروري. 

علاء بود: 

– أول ما يخرج هعرفه علطول. 

كانت يارا هتقفل لكن منعها علاء لما كمل بتذكر: 

– ايوه صح، ألف سلامة علي حضرتك، صحتك احسن دلوقت؟ 

يارا بضيق مكتوم: 

– بخير الحمدلله.

علاء: 

– يستاهل الحمد يا مدام يارا، بالمناسبة عايزة اقولك إن بشمهندس عمر بيحبك جدًا و الله، لما عرف بتعبك صمم فورًا إنه يتنازل عن حلم حياته عشان بس يكون جنب حضرتك و يطمن عليكي. 

يارا باختصار: 

– و أهو الحمدلله صحتي بقت تمام. 

علاء: 

– يارب دايمًا يا مدام يارا إن شاء الله اول ما الاجتماع يخلص هقول للبشمهندس إنك محتاجاه ضروري. 

علاء قفل المكالمة مع يارا، و كان مستغرب طريقتها الباردة في الكلام، و بسبب برودها و سفر عمر المفاجئ و عدم مجيها تشوف عمر خلاه يعتقد إنهم متخانقين عشان كدا حب يقول عن حب عمر ليها، على أساس إن كلامه ممكن يساعدهم لو في فعلا خلاف. 

الباب خبط و دخلت بنت فى العشرينات، لابسة شيك و محجبة، قعدت قدام علاء و هي بتقول بحماس: 

– ها بقى، فين مكتبي؟ 

ضحك بمرح و قال: 

– و عليكم السلام يا ستي. 

ضربت على جبهتها و قالت بأسف: 

– آسفة نسيت اقول السلام. 

قال بمشاكسة: 

– مستعجلة أوي انتي ع الشغل، مع إنك ممكن متتقبليش. 

قالت بحزن: 

– ليه؟ مش قولتوا موافقين أشتغل؟ 

علاء بمشاكسة: 

– قولنا موافقين ع الشغل، لكن مش في شركتنا! الأول هتعملي مقابلة و لو نجحتي هنشغلك. 

بصتله بغيظ طفولي و قالت: 

– طب اتفضل اعمل المقابلة. 

ابتسم على ريأكشن وشها و قال: 

– لاء مش أنا، اللي هتشتغلي معاه هو اللي هيعمل المقابلة. 

قبل ما تسأل عن هوية الشخص، الباب خبط تاني و المرة دي دخل عمر اللي كان لافف شاش على جبهته، بسبب الجرح اللي صابه لما عمل حادثة. 

أول ما علاء شافه قال بابتسامة: 

– أهو يا ستي البشمهندس عمر اللي هيعملك المقابلة، و دي يا سيدي مريهان اتخرجت السنة دي من هندسة معماري….اتفضل اقعد بقى و اسألها شوية أسئلة كدا عشان نشوف هتفيدنا لو اشتغلت و لا لاء، و استصعب الأسئلة. 

مريهان بصت ل علاء بتوعد ، أما عمر رحب بيها باحترام و قعد ع الكرسي اللي قصادها، فكان فاصل بينهم طربيزة صغيرة، و بدأ فعلاً يسألها شوية أسئلة تخص تخصصها و كان كل مرة بيصعب السؤال عن اللي قبله، لكنها كانت بتجاوب بثقة، و بعد دقايق عمر ابتسم و قال: 

– برافو يا بشمهندسة، أنا عن نفسي شايفة إن وجودك في الشركة هيكون شرف لينا. 

علاء بصلها و قال بمشاكسة: 

– يا عم براڤو ايه! إسألها أسئلة صعبة عن كدا. 

مريهان قالت بهزار: 

– متحاولش يا علاء، أنا هشتغل هنا يعني هشتغل هنا، حتى لو بالواسطة، و انت عارف إن معايا واسطة ممكن تخليني اقعد مكانك. 

علاء قال بضحك: 

– اهي دي بقى الحاجة الوحيدة اللي والدتك مش هتأثر على بابا فيها. 

ابتسمت و قالت بتأييد: 

– ايوه صح، بابا ميعرفش حد في الشغل. 

عمر كان بيبتسم بس على كلامهم لكنه خرج عن صمته و قال بتفاجئ: 

– انتوا أخوات! 

مريهان هزت راسها و قالت بحماس و هي بتقوم: 

– ايوه اخوات، هرجع البيت بقى عشان اقول الخبر الحلو دا ل ماماتي. 

عمر قال باستغراب: 

– ماماتي!!! 

علاء رد عليه بتوضيح: 

– تقصد مامتها و مامتي، بابا متجوز واحدة مصرية اللي هي والدتي، و التانية أجنبية اللي والدة مريهان…… المهم  أنت فطرت؟ 

– لاء، لسه. 

علاء بضيق: 

– عمر أنت نسيت الكلام اللي الدكتور قاله امبارح و إنك لازم تاكل كويس و تبطل القهوة اللي بتشربها عمال على بطال دي؟ 

عمر ضحك و قال: 

– لاء مش ناسي. 

علاء بصله بغيظ و قال: 

– طب خد فونك و ايوه صح المدام اتصلت و أنا رديت عليها و قالت عايزاك في موضوع ضروري. 

عمر قال باندفاع: 

– اوعى تكون قولت ع الحادث؟؟ 

علاء قاله بالتفصيل ع الحوار اللي دار بينه و بين يارا، و بعدين سأله: 

– هو محدش في البيت يعرف؟ 

عمر بجدية: 

– لاء محدش يعرف، الشاب اللي نقلني المشفى البارح رن على يارا قبل ما يرن عليك بس هي مردتش، و أصلا الموضوع مش مستاهل، هي مجرد جرح بسيط اهو و أنت سمعت كلام الدكتور امبارح إني فقدت الوعي بسبب الإرهاق و القهوة و قلة الأكل. 

علاء: 

– تمام هي أصلا مأخدتش بالها، خلص مكالمتك بقى و تعال عشان نتغدى سوا. 

عمر رجع مكتبه و أول حاجة عملها غير اسم يارا على فونه، و بدل ملجأى سجله باسمها، و بعدين اتصل عليها و قبل ما ينطق هي سبقته و قالت باقتضاب: 

– أنا عايزة أطلق.