رواية كارثه في العسكر الفصل السادس 6 – بقلم صباح عبد الله
في شركة.. في مكتب سامي عم زياد… قاعد سامي راجل كبير مع ابنه يحي شاب وسيم.
يحي بزهق
يوووه بقى، أنا زهقت، طلع عينينا في الزفت الشركة ومش عارفين نتحكم في حاجة بسبب الزفت ابن أخوك ده.
سامي بخبث
طيب اهدي، وكلها يومين وهتسمع أخبار هتعجبك قوي.
يحي بشك
أخبار إيه؟ وإنت عملت حاجة ولا إيه؟
سامي بخبث
يعني ظابط جيش عمل حادث قضاء وقدر، مثلًا اتكهرب ومات قضاء وقدر، برضه اتسمم واحد من صحابه غار منه كده يعني؟
يحي يبتسم بخبث
حلوة قوي الأخبار اللي زي دي، وطبعًا الوارث من بعده العم وابنه.
سامي
ما تخليش خيالك ياخدك لبعيد، عمك لسه عايش..
يحي
ده مافيش منه خوف، يوم في البيت وشهر في المستشفى وأيامه معدودة.
سامي بسخرية
عيب يا ض يا يحي، ده مهما كان عمك، أنا علمتك كده؟
يحي بضحك
آه، الابن لأبوه.
الاتنين يضحكوا مع بعض.
————
بالليل في الكتيبة
في غرفة الأكل… العساكر كلهم قاعدين بيأكلوا.. زينة تدخل بكسوف.
زينة
السلام عليكم يا رجالة.
واحد من العساكر يرد بسخرية
— وعليكم السلام ورحمة الله وبركاته يا نسوان.
العساكر يضحكوا، وزينة ترد بحنق.
زينة
على أبو تقل دم أمك يا أخي.
العسكري يقف بغيظ
سمعيني تاني كده بتقولي إيه؟ إنتي لسه منفوخة من الظابط زياد وشكلك عاوزة تتنفخي تاني.. وعجبك العمود اللي بره.
زينة
عقبالك ما تتنفخ إنت كمان ونرتاح من الأشكال اللي تسد النفس على المسا دي.
العسكري يبص لها بغيظ.. وزينة تعمل نفسها مش شايفة حاجة وتروح وتقعد علشان تأكل، تبص لشويش.
زينة
عاملين أكل إيه النهارده يا شويش عطية؟
الشويش بحنق
قلتلك اسمي زكريا يا زين هانم.
زينة
لله في لله كده، مش قادرة أشوفك غير الشويش عطية اللي في فيلم إسماعيل ياسين.
الشويش بسخرية
وأنا لله في لله كده مش عارف أشوفك غير إسماعيل ياسين.
العساكر كلهم يضحكوا، وزينة تبص لشويش بغيظ.
زينة
طيب يا خفيف، عاملين إيه لينا النهارده؟ أنا فطسانة جوع.
زكريا
قدامك أهو فول مدمس وجبنة وطرشي..
زينة بقرف
لا يا عم، مش كفاية خلقتك اللي تسد النفس؟ هتعشّيني طرشي وفول مدمس كمان.
الشويش يبص لها بغيظ، وزينة تشم جامد وهي بتقول.
زينة
الله، الريحة دي مش غريبة عليا، إنت بتطبخ إيه جوه كده؟
الشويش بحنق
فراخ وحمام لزياد باشا، وحسّك عينك تيجي ناحيتهم، أنا بقولك أهو.
زينة بغيظ
وهو زياد باشا بتاعك؟ ياكل فراخ وحمام وإحنا طرشي وفول مدمس ليه؟ شاخخ علينا الكلب يعني ولا إيه؟
الشويش بسخرية
لا يا ظريفة زياد باشا معه فلوس بيشتري أكله هو وايهاب باشا. لو معاكي فلوس قومي هاتي اللي انتي عاوزه وفكينا.
زينة بحنق
طيب خلاص ياعم انت هتذل اللي جيبنا وسمي الله كده وانت بتقول الاسماء اللي تسد النفس دي لا نلاقي ناطط زي القضي اللي تجيب سيرته تلاقي جاي ينط.
يدخل زياد هو ايهاب وسعيد.. يسمعوا كلام زينة.. زياد يحط ايدها على راسه وهو بيقول بيأس.
زياد
اعمل فيها اي دي عشان تقصر لسانها شويه بس ياربي.
العساكر كلهم يقفوا لا زينة تبص لزكريا بغيظ.
زينة
انا ما بقولك وشك يقطع الخلف ابقي صدقني…
ايهاب يضحك زياد يبص له بغضب ايهاب يحط ايده على بوقه بخوف.. وسعيد يقول بصوت عالي.
سعيد
بت انتي ازاي تتكلمي بشكل ده علي زياد باشا انتي اتجننتي؟
زينة ببرود
استني بس الكلمه محشورة في زوري هتموت وتطلع بس لو قولتها انا عارفه هاخد الليل كله متعلقه في العمود يبقي احترم نفسي واسكت احسن.
زياد بسخرية
طيب الحمدلله نفخت الصبح جات بفيدة قصري لسانك بقي علشان ما تتعلقيش تاني. واسمعي الكلام وانتي زي الشاطرة كده.
زينة تبص له بخبث وهي بتقول بتفكير.
زينة
ده انتي اللي هتتنفخ قريب نفخة عمرك بس اصبر علي رزقك.
زياد
هي مالها دي بتبصلي ليه كده شكلها مش مطمني
إيهاب يحط إيده على كتف زياد وهو بيقول بضحك.
إيهاب
من حقك تخاف يا صاحبي، والله دي مجنونة رسمي.
زينة تبص لإيهاب بغيظ بس تخاف تتكلم.. زياد يبص لزكريا وهو بيقول بزهق.
زياد
الطُّفح جاهز يا بني ولا إيه؟
زكريا
خمس دقايق بس يا باشا، هحمر الحمام في الزبدة وهجيبه لحد عند سيادتك.
زينة تبص لزياد بغيظ وهي بتمتم لنفسها.
زينة
حمام بزبدة وفراخ وإحنا فول وطرشي، اللهم تزور وإنت بتأكل..
تسكت شوية وبعدين تبص لزكريا بخبث، وتقوم تشده تقعده على الكرسي.
زينة
والله يا عمي زكريا ما إنت تاعب نفسك، اقعد يا راجل يا بركة، أنا هجهز الأكل للباشا، إنتُم معاكم ست هنا، عيب تدخل المطبخ وأنا موجودة..
زياد يبص لها باستغراب، وزكريا يبص لها بقلق.. زينة تسيبهم وتمشي علشان تدخل المطبخ.. زكريا يقوم بسرعة يمسكها من كفها يرفعه لفوق وهو بيقول.
زكريا
بت إنتي، دي مش بيت أبوكي تدخلي وتعملي اللي على مزاجك، اترزي وإنتي ساكتة أحسن أنفخك.
زينة
يا عم نزّلني، وتنفخ إيه؟ ما كفاية ريحتك المعفنة نفختنا على المسا..
سعيد يبص لزياد ولزينة بخبث وهو بيقول بتفكير.
سعيد
البت دي شكلها هتنفعني، لازم أستغلها كويس لحد ما أنفذ اللي في دماغي.
يبص لزكريا وهو بيقول.
سعيد
نزّلها يا زكريا وسبها، هي تجهز الأكل، ده حمامتين هتحمّرهم، وتعالى إنت عايزك في حاجة مهمة.
إيهاب يبص لسعيد بشك.
إيهاب
وإنت هتعوزه في إيه؟
سعيد بزهق
وإنت حاشر مناخيرك في كل حاجة ليه؟ ما تخليك في نفسك وتسكت.
إيهاب يبص له بغيظ وما يردش، زياد يبص للكل وهو بيقول.
زياد
فضّوا المهزلة دي، معاكم ربع ساعة، الأكل يكون في مكتبي.. وسيبها يا زكريا تكمّل الأكل علشان لو باظ تتنفخ
نفخة مظبوطة.
زينة بصوت واطي
اللهم نفخة في نفوخك ونخلص.
تبص لزكريا بغيظ.
زينة
ما تنزّلنا يا عم إنت كمان، ولا عاجبك قلة القيمة دي قدّام البشوات دي؟
زياد يهز راسه بيأس ويسييبهم ويمشي، وإيهاب وسعيد يمشوا وراه. زكريا يبص لها بتحذير وهو بيقول.
زكريا
أنا عدّدت الحمام وعلّمت الفراخ، أقسم بالله تيجي ناحيتهم هطفّحهملك، إنتي فاهمة؟
زينة
يا عم حمام وفراخ إيه اللي خايف أجي ناحيتهم؟ يا معفن، إنت شايفني محرومة زيك ولا إيه؟
زكريا ينزّلها وهو بيقول.
زكريا
طيب كويس، روحي شوفي هتعملي إيه، وأنا هشوف سعيد باشا محتاج إيه وهجيلك.
زكريا يسيبها ويمشي، زينة تسبّهم بشر وهي تقول.
—————
في مطبخ الكتيبة
زينة واقفة عاملة تأكّل في الحمام والأكل لحد ما تشبع.. تمسح بوقها وإيدها وهي بتقول بابتسامة وهي حاطة إيديها على بطنها.
زينة
الحمد لله الذي أطعمنا وزقّان، احمر بقى الحمام عشان الزفت ده ما يقرفني في عِشتي.
تيجي تاخد الحمام ما تلاقش غير العضم، تبرق بصدمة وهي بتلطم وبتمثل العياط.
زينة
يا ليلة سودة ومربربة بطين، فين الحمام اللي هيتحمر ده؟ أعمل إيه دلوقتي يا ربي؟ منها لله بطني الطفسة اللي مودّياني في داهية.. أنا أحسن حاجة أنفد بجلدي قبل ما شويش الغبرة ييجي..
زينة تطلع من المطبخ جري وهي بتبص حواليها بخوف.. من غير قصد تخبط في سعيد.. سعيد ماسك كيس.
سعيد باستغراب
مالك يابت؟ شكلك عامل زي اللي قاتلة قتيل، ليه كده؟
زينة بتمثيل العياط
أنا هتنفخ لحد ما أطرشق ياخويا، نفخة من الشويش عطية ونفخة من الزفت الباشا زياد.
سعيد باستغراب
ليه؟ عملتي إيه؟
زينة بكسوف
كنت بدوق الأكل علشان أشوف الملح مظبوط ولا إيه، لاقيته طار زي البنزين المكشوف.
سعيد بزهق
قصدك طفستك اللي طيرته.
زينة تبص له بغيظ.. سعيد يبص للكيس وبعدين يبص لزينة بخبث ويبص حواليه وبعدين يقول.
سعيد بخبث
طيب ما تقلقيش طول ما أنا جنبك (يناولها الكيس)خدي ده حمام وفراخ جاهزين، كنت جايبهم علشان أتعشى، خديهم حطيهم مكان اللي خلص.
زينة تاخد الكيس بفرحة.
زينة
روح يا شيخ، اللهم ربنا ما يوقعك في زنقة ولا في ضيق ويرزقك، حاسب نواياك سودة أو بيضا وإنت وحظك.
سعيد بزهق
طيب اخلصي، روحي شوفي هتعملي إيه قبل ما زكريا يرجع ينفخك.
زينة تبص حواليها بخوف وبعدين تاخد الكيس وترجع على المطبخ جري.. سعيد يبتسم بخبث وهو بيقول.
سعيد
يلا بالهنا والشفا يا زيزو، كان نفسي أقولك تعيش وتاخد غيرها، بس للأسف مافيش عيشة..
•تابع الفصل التالي “رواية كارثه في العسكر” اضغط على اسم الرواية