رواية لن احررك الفصل السادس 6 – بقلم دهب عطيه
فلااااش باك
“يعني إيه هتسيب جواد يكمل تعليمه في كلية الشرطة يا زهران؟! أنت حصل في
مخك حاجة؟!”
تحدث الخواجة بعصبية وإهانة إلى زهران الواقف يستمع إليه بتهذيب وحين انتهى الخواجة من حديثه الغاضب رد عليه قائلًا بعدم استيعاب..
“أنت عارف إني مينفعش أدخل في اختيارهم يتعلم إيه ويدخله إيه… مانت عارف وجود والدتي أنعام هانم وسيطرتها عليهم وقوانينها عليهم وعليت وبالذات في مستقبلهم…”
ابتسم الرجل وقال بسخرية لاذعة..
“مش معقول دي مش أعذار راجل من رجالاتي لا وكمان دراعي اليمين…”
عبس وجه زهران وهو يتساءل بتوجس
“طب فهمني بس ليه مش عايز جواد يكمل في كلية الشرطة؟! يعني عشان شغلنا وكده؟”
أجابه عجوز على مشارف الموت بمكر غير مبالٍ بأفعاله وهدم مستقبل أحدهم..
“مش بس عشان شغلنا… عشان جواد لازم يكون واحد مننا لازم يكون دراعك اليمين يا زهران.”
نظر له زهران بطرف عينيه وقال باقتراح يعاكس فكرته..
“بس أنا شايف إن سيف أفضل واحد يكون دراعي اليمين وعلاقتي بيه أفضل بكتير من علاقتي بجواد…”
نظر الرجل إليه وهو يهز رأسه رفضًا للفكرة مضيفًا..
“سيف عمره ما هيسد في شغل بتاعنا يا زهران… سيف مش هيضيف حاجة معانا خليه أحسن بره اللعبة كلها… لكن جواد هيضيف لينا كتير ده اللي قلبه ميت حياته كلها خصصها لدراسته ومستقبله بعد موت أمه وأبوه وأخته… يعني لو خسر مستقبله ومر بأزمة معينة هيتحول فيها لجوكر اللي أنا عايزه قلب ميت وعقل مش بيشتغل غير في الطريق اللي أنا عايزه… وبكده هنكون ضربنا عصفورين بحجر واحد ضمنا جواد وضمنا سلامنا من حضرة الضابط المنتظر.”
نظر زهران إليه بتساؤل..
“طب إزاي يعني هنخليه مننا وشبهنا؟ مش شايف إنك متعرفش جواد كويس يا خواجة؟
ده ابن أخويا وأنا عارف أخلاقه كويس.
مستحيل يوافق يكون معانا ده لو عرف إني بتاجر في سلاح ممكن يبلغ عني أنا علاقتي بيه مبقتش زي الأول أنت عارف… من ساعة موت أهله وهو بقى عدواني أوي مع كل اللي في البيت وأهم حاجة عنده دراسته ومستقبله… يعني صعب يبقى الجوكر اللي أنت عايزه…”
رد عليه الخواجة بخبث لعين وهو يحرك إصبعيه بجانب بعضهما…
“اتنين… ضربتين في الرأس بتوجع وبتقتل…”
“إزاي بس؟!”
تحدث الخواجة عن الخطة بتفكير شيطاني وكانت كالآتي..
“هنحط في شنطته كام حتة حشيش ونبلغ البوليس وياداري ما دخلناش شر..”
قاطعه زهران معلقًا بشك..
“طب ما ممكن يشك فينا لما نحاول نشغله معانا؟”
أكمل الخواجة حديثه بخفوت وبأكثر مكر
“لأ إحنا هنسيبه ياخد كام سنة سجن بعد الحكم عليه… عضمه ينشف كده ويعيش شوية وسط تجار السلاح والحشاشين والقتلة. وهوصي عليه رجالة تابعنا تاخد بالها منه وكمان تتصاحب عليه.”
“وبعد كده؟”
أشعل الرجل سيجارته ونظر إلى نقطة معينة أمامه ثم أجاب..
“هخلي حد من رجالاتي يشيل القضية مكانه ويطلعه منها ده بعد ما أتأكد من رجالاتي اللي جوه السجن إنه بقى الجوكر اللي أنا عايزه وقلبه مات صح…”
سأل زهران بفضول وتوتر أيضًا من انضمام جواد للعمل معه ولكن نظرة الرجل الكبير الذي يعمل تحت يده زهران الغمري جعلته يستمع وينفذ باحترام فالخواجة جون كلمة “لا”
ليست جيدة في قاموس عملهم ولها ثأر وثمن غالٍ لمن تجرأ على قولها.
“وهيقتنع إزاي بشغلنا؟ والأهم مش هيشك إننا ممكن نكون إحنا اللي دخلناه السجن بتهمة دي؟”
أجابه الخواجة ببسمة خبيثى..
“برافو عليك… هي دي البداية. إحنا هنعرفه بطريقة غير مباشرة إن اللي لبسه التهمة واحد عدو لينا حاول ينتقم مننا عن طريقه وإننا حاولنا نخرجه قانوني بس للأسف معرفناش..
وهياخد منك بعدها معلومات عن الراجل ده وعنوانه وهو هيعمل الباقي والباقي ده بداية جواد الجوكر دراعك اليمين. ها قولت إيه؟”
نظر له زهران بتفكير ثم ابتسم وهو يقول
“عايز تخلص على النمساوي عن طريق الجوكر المنتظر… ده على كده لسه أدام النمساوي عمر وطالما صابر عليه يبقى الصبر وراه مصالح مش كده؟”
ابتسم الرجل وهو يقول بشر..
“بالظبط… موت النمساوي دلوقتي فيه ضرر على شغلنا… أنت نسيت إنه ماسك شغلنا كله وبيدير كل حاجة أدام الحكومة باسمه وبمكانته في البلد.”
لم يقدر زهران على منع السؤال من الخروج من شفتيه فقال باستغراب…
“وليه قررت تستغنى عنه؟”
أجاب الخواجة جون بلهجة غضب وحقد
“بدأ اسمه يتلطخ بالتراب وقريب هتلاقي الحصانة بتتسحب منه ده غير إنه شغال مع ناجي التهامي وعزيز ابنه وفاكرين إني مش عارف إنه مغافلني… لكن الحساب يجمع. ولأن الطلقة خسارة في النمساوي لكن مش خسارة أبدًا توقيت موته وبالذات على إيد جواد اللي هيبقى دراعك اليمين يا زهران…”
باااااااااااااااااك
تنهد زهران وهو يتمتم بغضب من ذكرياته المشؤومة…
“الله يحرقك يا خواجة موت أنت وسبتني مع الجوكر اللي عملته بنفسك… بس لو كنت أعرف إن هييجي اليوم اللي يخرج فيه جواد عن طوعي كنت عمري ما وافقت على الفكرة الهباب دي…”
طرق على باب مكتب زهران ودلف سيف بعد الاستئذان بابتسامة بشوشة ثم جلس على مقعد مقابل عمه وقال بجدية..
“خير يا عمي طلبتني في حاجة عايزني أضيفها في اجتماع النهارده؟”
نظر له زهران وهز رأسه نفيًا ثم سأله بتحفز
“قولي يا سيف جواد كلمك إمبارح أو النهارده الصبح؟ أصلي برن عليه تليفونه مقفول…”
رد سيف على عمه بتلقائية..
“أنا لسه قافل معاه لأنه كان بايت إمبارح بره البيت… ورد عليا وقالي إنه عنده شغل بره البلد وإنه سافر عشان يخلصه… هو مش حضرتك يا عمي أنت اللي مكلفه بالشغل ده؟ أصله بيقول إن أنت اللي مكلفه بالشغل ده وسافر عشانه…”
طرق زهران بالقلم على سطح المكتب أمامه بتحفز وسأله بثبات حتى لا يثير الشك داخل سيف الذي يتحدث ببساطة لا تدل على إخبار جواد له بأي شيء عما يدور بينهما…
“هو قالك كده؟”
اكتفى سيف بهز رأسه بالإيجاب…
…………………………………………………….
“يعني إيه أختي راحت؟! أنا هوديك في ستين داهية يعني إيه مستشفى طويلة عريضة مفيهاش كاميرات مراقبة؟!”
صاحت دعاء بانفعال في ردهة المشفى أمام مكتب المدير الذي توتر وبدأت جبهته تتعرق خوفًا من أن ينكشف أمره أمام رجال الشرطة ووكيل النيابة، الذي ينظر إليه بشك وتكاد نظراته تحكم عليه بالإعدام شنقًا…
تحدث أسر وكيل النيابة قائلًا..
“ما ترد على المدام يا أستاذ صادق وتقولها كاميرات المراقبة ساعة وقوع الواقعة واختفاء بسمة محمد الرفاعي كانت معطلة ليه؟”
مسح الرجل جبهته المتعرقة وقال بثبات حاول التحلي به…
“يا حضرة الظابط الكاميرات معطلة بقالها أكتر من أسبوع، وبتوع الصيانة لسه جايين النهارده يشوفوا عطلها… وأنا معرفش حاجة عن الآنسة بسمة ده حتى الأمن اللي على البوابة ميعرفش إزاي خرجت من المستشفى…”
انفعل أمجد الذي كان يستمع إلى حديث الرجل المتناقض وأمسك لياقة قميصه
وهو يقول بغضب…
“يعني إيه متعرفش عنها حاجة؟!
لو مخرجتش من بوابة المستشفى واختفت في المستشفى يبقى أنت بتشيل التهمة كلها بنفسك وبعدين إحنا أول ما دخلنا وسألنا على موضوع الكاميرات دي قلت إنها اتعطلت لوحدها
ودلوقتي بتقول معطلة بقالها أسبوع… معنى إيه تغير أقوالك؟! إنك حافظ مش فاهم؟! قسمًا بالله لو ما قلتليش بسمة فين ومين خطفها من المستشفى هقتلك ومش هتفرق معايا روحك”
أبعد أسر أمجد عن مدير المشفى بصعوبة وأمر رجال الشرطة بأخذ الرجل ووضعه في سيارة الشرطة حتى يتم التحقيق معه بطريقة قانونية….
نزلت دموع دعاء خوفًا وهي تسأل وكيل النيابة أسر…
“هنعمل إيه دلوقتي يا حضرة الظابط؟! هو ممكن مدير المستشفى يتكلم ويقول الحقيقة ولا إيه؟ أنا مبقتش فاهمة حاجة وخايفة على بسمة أوي…”
أخذها أمجد في أحضانه ثم قال لأسر بشك
“أنا حاسس إن اللي عمل العملة دي جواد الغمري أكيد هو اللي خطفها…”
رد عليه أسر بعد تفكير وهو يجمع الخيوط
“أنا عندي معلومات إن جواد سافر بره مصر بعد زيارته لبسمة في المستشفى يعني قبل
ما تختفي… توجيه تهمة ليه هتكون محاولة فاشلة بكل المقاييس… أكيد الموضوع بره جواد الغمري… بس عايز أستفسر منك يا
أستاذ أمجد عن المكالمة اللي جتلك وأنت
في المستشفى.”
تريث أمجد برهة قبل أن يقول متذكرًا…
“جت لي مكالمة من واحد انتحل شخصية المدير وقال إن ابني في المستشفى وتعبان. خدت العنوان ومن لهفتي جريت على المستشفى ودعاء كانت معايا لكن مكنش في اسم طفل مريض في المستشفى اسمه كريم أمجد…
وبعدين اكتشفت إن ابني كان في المدرسة وإن المكالمة كلها كانت لعبة وإن الهدف كان إنهم يبعدوني أنا ودعاء عن مكان بسمة في الوقت اللي اختفت فيه… بس أنا متأكد إن سفر جواد ده وسيلة عشان يبعد الشك عنه وإن رجاله هما اللي قاموا بالمهمة دي.”
زفر أسر بتعب من التفكير في اختفاء بسمة فمنذ البارحة وهم يبحثون عن أي خيط ولو رفيع للوصول إليها ولكن دون فائدة…
رد أسر بعد مدة على اتهام أمجد وإصراره على اتهام جواد في قضية اختفاء أخت زوجته..
“مفيش أي صلة لاتهام جواد الغمري بخطف بسمة مش بس عشان سفره يا أستاذ أمجد
لأ لأن التحقيق اللي اتعمل إمبارح وحضرتك اتهمت جواد بضرب النار على بسمة هي نفت الكلام ده ومضفتش اسمه في التحقيق.
يعني مش مقنع اتهام شخصية زي جواد الغمري وعيلته في تهمة اختفاء محامية صغيرة زي بسمة إلا لو كان في دليل
لكلامك واتهامك لجواد…”
سأله أمجد بغضب..
“يعني إيه الكلام ده يا حضرة الظابط؟!”
رد أسر عليه باختصار…
“يعني القانون أدلة وإثباتات… ولازم يكون معاك جزء بسيط يثبت صحة كلامك. تاني حاجة أنا هبذل كل جهدي عشان أرجع بسمة بيتها سليمة… بعد إذنكم.”
تركهم أسر وذهب سريعًا إلى خارج المشفى ليبدأ التحقيق في قضية اختفاء بسمة محمد الرفاعي.
………………………………………………..
انعكست أشعة الشمس المنبعثة من شرفة الغرفة التي كانت نائمة بها على عينيها
لتفتحهما ببطء وهي تضع يدها عليهما بضيق وحاولت النهوض وتذكر ما حدث ليلة أمس.
للحظة ظنت أنها في غرفتها وكل ما مرت به كان حلمًا… لا بل كابوسًا لعينًا من بطولة جواد الغمري وأتباعه…
ولكن حين بدأت تجول بعينيها في أركان الغرفة والسرير النائمة عليه أصابها الذعر. نظرت إلى ملابسها سريعًا لتجد نفسها كما
هي منذ أن كانت في المشفى.
نزلت من على السرير وهي تحاول تذكر أي شيء من ليلة أمس لكنها لم تتذكر إلا حديث جواد عن وجودها معه لفترة زمنية لحين انتهاء قرار موتها من قبلهم جميعًا!!
اللعنة عليهم وعلى غبائي في تصديق هذا المجرم المخادع..
تمتمت بضيق داخلها وبخزي من براءة عقلها وقلبها كذلك.
اتجهت إلى باب الخروج من هذه الغرفة ووضعت يدها على مقبض الباب وكانت تظن أنه أغلق الباب عليها وسجنها هنا لكنها اندهشت من فتح الباب بين يديها.
خرجت ببطء وهي تطلع على المكان من حولها. بيت جميل طرازه ريفي وكذلك علمت من رائحة الطبيعة التي تدغدغ أنفها…
هل انتقل بها إلى مكان خارج المحافظة التي تقطن بها؟
لم تحتج إلى الإجابة فهي في مكان بعيد كل البعد عن مكانها الأساسي.
تنفست بضيق بوجه متذكر من كل ما يحدث معها….
نزلت على سلالم البيت إلى الأسفل وهي تجول بعينيها في كل مكان بضيق وفضول أيضًا…
وجدت باب البيت مفتوحًا ودلف منه جواد الذي كان يرتدي بنطالًا أسود وسترة علوية بيضاء بنصف كم ذوقه في الملابس دومًا يتحدث عنه عن الحدة والجمود، والقسوة والغموض… البئر العميق المظلم الذي يصعب اكتشافه أو الغوص فيه لشدة عمقه وسواد ظلماته.
“مالك بتبصي لي كده؟ أول مرة تشوفيني؟”
سألها جواد وهو يرفع عينيه بتساؤل.
بلعت ما بحلقها وهي ترد عليه بسؤال مختصر
“إحنا فين؟”
“في بلاد الله الواسعة.”
أجابها باختصار يحرق ما تبقى من صبرها
ثم تركها بعد جملته ودخل إلى المطبخ ليطلب من الخادمة أم إيمان الذهاب من المنزل الآن لفترة قصيرة كأنه يعلم أن الضيفة الجديدة في بيته ستهب عواصف غضبها وتثرثر بأشياء
لا يريد لغيره سماعها…
بدأ في إعداد القهوة بهدوء داخل المطبخ الفارغ باستثناء صاحب القهوة التي تفوح رائحتها الذكية بإصرار مدغدغة أنفها بقوة.
بارع في القهوة… مثل كونه بارعًا في الإجرام ومثل الكذب والتمثيل… بارع في كل شيء وأي شيء لكن لن يكون بارعًا في خداعها للمرة الثانية…
دلفت إلى المطبخ بعصبية وهي تقول بغضب
“ممكن أفهم أنا فين؟ وهفضل معاك في المكان ده لحد إمتى؟”
استدار لها كليًا واستند على رخامة المطبخ خلفه بكلتا يديه ناظرًا إليها بجرأة غير مدرك أن نظراته الثاقبة أربكتها وارتعش جسدها خوفًا من قسوة عينيه وجرأتهما في التطلع إليها بكل هذا التركيز الغريب.
رد عليها جواد بعد برهة من الصمت..
“السؤال الأول مش مجبور أجاوب عليه
لأني مش هينفع أقولك إحنا فين بالظبط لأن باختصار مش بثق في ناس غريبة عني…
لكن السؤال التاني هو إني مش عارف هتفضلي معايا لحد إمتى لكن إن شاء الله إقامتك مش هتطول وده اللي بتمناه.”
لم تقدر على النظر إلى عينيه ووجهه أكثر من ذلك فأبعدت وجهها وعينيها عن مكان بعيد عن مرمى عينيه القاسيتين.
خرجت بسمة من المطبخ فلم تقدر على الصمود أمام طريقة هذا الغمري معها.
ماذا حدث لها هي تتعامل دومًا مع شخصيات مثل جواد…
مثل جواد الغمري؟!
لا أظن أن مرّ عليها مثل هذه الشخصية…
هو مجرم ولكن مجرم من طراز آخر وكأن هناك شيئًا غريبًا في شخصيته يوحي بالفضول داخلها…
تناقض غريب داخلها عن جواد الغمري والفضول الذي يسحبها ناحية عمق
ظلماته…
جلست على طاولة صغيرة في صالة المنزل الكبير وشردت قليلًا في القادم والخوف الأكبر على عائلتها الصغيرة…
هل من الممكن أن يؤذيهم الغمري وأتباعه؟
قفز قلبها بخوف من تصور شيء كهذا لها.
للحظة كانت ستنهض للتحدث معه في هذا الأمر لكنها وجدته يحمل صينية صغيرة ووضعها أمامها.
كان فطورًا بسيطًا بيضًا وجبنة ومربى الفراولة وبعض شرائح التوست المحمص وفنجانًا صغيرًا من القهوة التي تغمرها رائحتها منذ بداية إعدادها وكأنها تحكي لها عن مدى
تميز صاحبها.
“فطارك يا آنسة بسمة أنتِ أكيد جعانة.”
نظرت إلى الطعام مرة أخرى بجوع ولكن كبرياء الأنثى داخلها أصر عليها بالرفض
فقالت بعصبية مفرطة أدهشته..
“مش عايزة أكل إيه هو كمان الأكل بالعافية؟!”
رفع حاجبيه وهو ينظر لها بذهول قبل أن يقول بتمهل..
“اهدي يا آنسة بسمة… الأكل قدامك عايزة تاكلي اتفضلي مش عايزة بلاش أنتِ حرة.”
قاطعته وهي تتبرم بسخرية…
“واشمعنا في دي بس اللي هبقى حرة؟!”
لم يرد عليها بل صعد على الدرج الى الطابق العلوي حيث غرفة نومه وهو يتحدث بأمر…
“تقدري تاكلي منين ما تحبي… لأن ده استثناء مش أكتر وعشان السجن معايا ليه قوانين.”
اكفهر وجهها بغضب وهي تتمتم باستهزاء
“عشان السجن معايا ليه قوانين… لا ديمقراطيّ أوي!”
نظرت إلى الطعام بجوع لتبدأ بالأكل على مضض…
وبعد أن انتهت من طعامها أمسكت فنجان القهوة الذي يغمرها برائحته الشهية وارتشفت منه باستمتاع. فالحق هذه أول مرة تتناول فيها فنجانًا من القهوة من يد رجل وليس
أي رجل وهي تبرهن بذلك…
تنهدت وهي تحتسي القهوة بشرود..
على الناحية الأخرى ابتسم جواد ابتسامة لم تصل إلى عينيه وهو ينظر إلى اللاب توب الذي يعرض له صورة بسمة وهي تتناول فطورها بجوع وتلذذ أيضًا…
أشعل سيجارته وهو ينهض ويتطلع من شرفة غرفته إلى هذه الساحة الخضراء والجو الريفي العاشق له منذ الصغر….
فكان والده دومًا يسافر بهم وهم صغار إلى بعض الأقارب الذين يعيشون في مناطق
ريفية بسيطة يشوبها الهدوء والبساطة والرضا عكس حياة المدينة وصخبها..
وكان هو عاشقًا للبساطة والرضا والقليل من كل شيء في حياته يتقبله…
لكن الحياة لم تتقبل رضا قلبه وشخصيته فأحبت أن ترى شيطانه فقط… شيطانه حتى ترضى عن تمرده وغروره وعنجيهته الفارغة.
أفاق من زوبعات الماضي على صوت هاتفه. نظر إلى شاشة الهاتف التي تضيء باسم
“زهران الغمري”وفتح الخط بتنهيدة
مستاءة
“ألو… أيوه يا زهران بيه اتفضل أنا سامعك.”
صاح زهران من الناحية الأخرى..
“أنت فين يا جواد؟ أخدت البت المحامية ورحت بيها فين؟! وليه من الأساس تبوظ الخطة وتعصي كلامي؟!”
رد جواد عليه بثبات..
“أنا مش بعصي كلامك بس بسمة تخصني ومينفعش تأذي حد يخصني.”
سأل زهران من الناحية الأخرى بصياح وشك:
“تخصك؟! تخصك من إمتى؟! إيه الألغاز دي يا جواد؟!”
حك جواد في أنفه بتفكير، وقال…
“من زمان في علاقة بتجمعنا بس موضوع علام هو اللي وقف كل حاجة…”
صاح زهران بقلة صبر..
“يعني إيه الكلام ده؟ وضح أكتر يا ابن سراج!”
عض جواد على شفتيه وهو يحاول النطق بكلمات مدروسة في عقله قبل خروجها إلى عمه..
“أنا وبسمة في علاقة بتجمعنا ببعض من فترة… و… وأنا هتجوزها قريب أوي.”
شحب وجه زهران بغضب مكفهر…
“مستحيل يا جواد جواز إيه وزفت إيه
البت دي لازم تموت!”
تحدث جواد بانفعال وإصرار زائف..
“البت دي هتبقى قريب أوي مراتي وشايلة اسمي سامعني يا زهران باشا؟! هتشيل اسم عيلة الغمري ومستحيل حد يقدر يمس شعرة منها طول ما أنا عايش.”
“أنت بتلعب بالنار يا جواد ومستحيل أسمحلك تهدم اسمنا ومكانتنا في المجتمع عشان واحدة غبية زي دي.”
ضحك جواد باستهزاء ليعلق على حديثه..
“المكانة في المجتمع اللي بتتكلم عنها مش فارقة معايا وبسمة مش غبية… لأ هي تعيسة حظ عشان وقعت مع ناس زينا… سلام يا زهران باشا.”
أغلق الهاتف في وجهه وهو يتمتم بأسوأ الألفاظ لهذا الرجل الذي من المفترض أنه
عمه ولكن منذ اليوم الذي علم فيه بعمله وسحب حياته المحطمة إلى الإجرام بمعنى الكلمة…
من طالب في كلية الشرطة إلى مجرم وقاتل… يا لها من أقدار وتغيرات فجاة بصورة مريعة
طرق على الباب فأوقف عواصف دارت في عقله…
فتح الباب فوجدها أمامه بسمة.
نظر لها وهو يرفع عينيه بتساؤل…
“في حاجة يا آنسة بسمة؟”
وضعت كف يدها على كتفها الآخر، وهي تتحدث بحرج..
“ممكن نتكلم شوية؟”
ابتعد عن إطار الباب وهو يقول بهدوء
“اتفضلي.”
جلست على مقعد بعدما اختلست النظر بعينيها إلى الغرفة التي يجلس بها.
ابتسم جواد من زاوية واحدة وهو يخبر فضولها..
“أوضتي هي اللي أنتِ مقيمة فيها حاليًا… المهم خير؟ كنتِ عايزاني في إيه؟”
جلس على حافة الفراش وهو يتطلع إليها.
تنحنحت بحرج وهي تحاول إخراج الكلمات من فمها قائلة:
“كنت عايزة أتكلم في موضوع أهلي… يعني أختي وجوزها وابنهم مصيرهم إيه في كل اللي بيحصل ده؟ وأنت عارف طبعًا إنهم ملهمش ذنب في اللي حصل ده كله…”
كان يتفحص تلعثمها في الحديث، ويدقق النظر إليها في كل تفصيل بها.
جمالها خاطف ومميز ولكن لم يكن هذا هو انجذابه إليها…
الذي يجذبه للنظر إليها هو شخصيتها حبها لعائلتها النقاء داخلها جنونها وتسرعها في الركض وراء المغامرة ما جعلها تبقى معه
في هذا المكان.
“روح المغامرة…”
تمتم بهذه الكلمة بشرود وهو يغوص بعينيه الباردة والقاسية فيها…
“أنت ساكت ليه يا أستاذ جواد؟”
رفع حاجبه باستنكار وقال بعدم رضا..
“أستاذ؟ أمرك عجيب يا آنسة بسمة. إمبارح كنتِ بتناديني بالمجرم والنهارده أستاذ… على العموم أهلك اطمني أنا مكلف ناس سهرانة لحمايتهم من غير ما هما يلاحظوا حاجة… اطمنتي؟”
سألته بسمة بقلة صبر..
“اطمنت أكيد وشكرًا… بس أنا عندي تعليق مهم.”
نظر لها وقال بفتور…
“اتفضلي.”
قالت بسمة ببرود
“هو أنت مبتعرفش تكلم كلمتين عدلين ليه؟! داخل زي المنشار كده بتقطع الكلام وخلاص ومش مهم بقى وصلت كلامك بطريقة عدلة ولا لأ… المهم تنهي الموضوع بسرعة وتخلص.”
رفع حاجبه وهو يتحدث بثبات بارد..
“الكلمة اللي تقصديها إني دبش.”
“لا تلج.”
صاح متسائلًا عما قالت لترد عليه بإصرار
“أنا من رأيي تغير أسلوبك لأن وجودنا مع بعض مطول وأنا مش هستحمل طريقتك دي.”
نهضت لتغادر وهي تقول جملتها فأوقفها جواد وهو يرد عليها ببرود…
“آنسة بسمة… خلي في حدود بينا أكتر من كده… وكمان طريقة كلامي وأسلوبى
يخصوني لوحدي ومش مجبور إن طباعي تعجبك وتقبليها… وكمان أنتِ مش مجبرة تتعاملي مع طباع وشخصية غير المستحبة بالنسبة ليكِ.”
كانت توليه ظهرها في هذا الوقت وبدون أن تستدير لتنظر إلى عينيه الباردتين المخيفتين، شعرت ببرودة كلماته وقسوته…
ولكنها ابتسمت بسخرية وهي ترد عليه دون أي التفاتة منها…
“مجبورة أتقبلك ومجبور تتقبل كلامي طالما بقينا مع بعض في طريق محدش عارف نهايته إيه… يا جواد.”
نطقت اسمه مجردًا وبدون ألقاب لتذهب من الغرفة سريعًا متوجهة إلى الغرفة التي كانت تنام بها…
بعد مرور خمس ساعات على هذه الأحداث…
طرق رقيق على باب غرفة بسمة.
فتحت بسمة الباب فوجدت فتاة جميلة ذات وجه وملامح رقيقة تنظر لها مبتسمة بلطف، وقالت.
“آنسة بسمة مش كده؟”
أومأت لها بسمة بنعم، وعيناها تسألانها
من تكونين؟
“أنا الدكتورة نوال. جواد بيه كلمني عشان أكشف على حضرتك وأغيرلك على جرح دراعك وكمان نشوف موضوع العلاج اللي
لازم تاخديه عشان الجرح يلم بسرعة ويخف.”
اندهشت قليلًا من اهتمام جواد بها ولكن لا داعي للدهشة فصاحب العيون المخيفة الباردة متوقع منه أي شيء !!
“اتفضلي يا دكتورة نوال.”
لم يكتفِ جواد بهذا فقط بل بعث لبسمة أيضًا حقيبة كبيرة من الملابس مع أم إيمان ومعها كل ما تحتاجه.
كان ذوقه رفيعًا ولكن هذا ليس ذوق رجل بل ذوق امرأة من المؤكد أن اختيار الملابس كان لامرأة تفهم جيدًا في الموضة والملابس النسائية.
بعد ساعتين من هذه الأحداث وبعد أن أخذت بسمة حمامًا باردًا وارتدت ملابسها
والتي كانت عبارة عن بنطال قطني بخطوط متداخلة باللونين الرمادي والزهري وسترة علوية بنصف كم من اللون الزهري وعليها
كلمة بالإنجليزية باللون الرمادي.
أما شعرها فربطته على شكل ذيل حصان.
لم تضع أي شيء على بشرتها فهي صافية وجميلة دون أي مساحيق تجميلية.
وجهها أصبح أكثر طفولة بعد هذا المظهر الخلاب… جميلة وكل شيء يليق بها ولها.
خرجت من غرفتها متوجهة إلى سفرة الغداء، كما أخبرتها الخادمة أم إيمان أن جواد ينتظرها على سفرة الطعام.
ستشارك الطعام معه وعلى طاولة واحدة أيضًا.
أي قصة كتبت لها مع هذا الغمري؟! أي قصة؟! يا الله أخشى القادم معه… أخشى بقوة.
صرخت داخلها بقهر وغضب من كونها ضعيفة مربوطة الأيدي أمام قرارات هذا الرجل الفظ في الحديث دومًا معها.
كان يجلس في غرفة الطعام ينتظر قدومها.
غمرته رائحتها الناعمة على الأنف فرفع عينيه إليها وتطلع عليها بهذه السترة الأنيقة والتي تزيدها أناقة عندما ارتدتها صاحبة عيون العسل الصافي.
تنحنح وهو يعيد عينيه إلى طعامه….
جلست بسمة بعد أن ألقت السلام عليه بهدوء.
مدت يدها ووضعت قطعة من اللحم المشوي في الطبق أمامها وغرزت الشوكة بها لترفع قطعة صغيرة إلى فمها غير مدركة كيف ينظر إليها صاحب العيون المخيفة، وكيف يتأملها بدقة.
أعجبت بطعم اللحم ومذاقه وطهيه المبتكر على النار فقالت بعفوية طفلة تلامسها جواد من بين حروفها…
“بجد اللحمة لذيذة أوي… بجد أم إيمان دي أحسن من أشهر شيف!”
“كويس.”
اكتفى جواد بهذه الكلمة وهو يكمل طعامه مبتعدًا بأنظاره وتفكيره عنها.
مطت بسمة شفتيها باستغراب من رده لتكمل الطعام بصمت.
أتت إليهما أم إيمان وهي تضع بعض أطباق الخضار المشوي على الفحم.
أخبرتها بسمة بإعجاب معلقة على الطعام المعد:
“بجد يا أم إيمان اللحمة تحفة… تسلم إيدك.”
وضعت بسمة قطعة صغيرة في فمها وأنزلت الشوكة منتظرة رد السيدة عليها.
ابتسمت أم إيمان بلطف وردت على بسمة بمحبة..
“ربنا يجبر بخاطرك يا ست بسمة… لكن مش أنا اللي عاملة اللحمة المشوية.”
سألتها بسمة بفضول…
“آمال مين اللي عملها؟”
ردت أم إيمان بسرعة وهي ترحل..
“ساعت البيه هو اللي بيشوي اللحمة بنفسه… بعد إذنكم.”
غادرت الخادمة غرفة الطعام…
نظرت له بسمة بذهول وهي تقول بعفوية
“غريبة أنت مش بس شاطر في عمايل القهوة لا، ده أنت شيف هايل كمان… عملتها إزاي دي؟”
توقف عن الأكل وهو ينظر لها وقال بثباته المعتاد..
“بيقولوا بالبلدي… نفس الست في الأكل لا يُعلى عليه بس في الواقع في رجالة نفسهم في الأكل يغلبوا أشطر ست بيت.”
“أتفق معك…”
قالت جملتها سريعًا لينظر لها جواد بعدم فهم.
أكملت بسمة حديثها بشرود حزين..
“بابا كان شاطر أوي في المطبخ لدرجة إن ماما كانت بتصر عليه في أيام إجازته يطبخ بنفسه وتكون هي مساعدة الشيف محمد الرفاعي… بس بصراحة الأكل كان بيبقى خطير والمواعين اللي بتبقى بعد الأكل أخطر.”
أطلقت ضحكة خافتة عند تذكره…
ابتسم جواد ابتسامة بسيطة لم تصل إلى عينيه لكنها كانت ابتسامة رأتها بسمة لأول مرة.
قالت بذهول..
“سبحان الله… طلعت بتبتسم زينا!”
نظر إلى طعامه وهو يرتدي قناعه الحجري
ولم يعلق على جملتها.
عادت إلى طعامها بصمت.
قطع جواد هذا الصمت بعد دقيقة وقال بخشونة وأمر..
“بعد الأكل هتاخدي تلفونك وتعملي مكالمة لدعاء أختك وجوزها عشان تطمنيهم عليكِ.”
رفعت عينيها وسألت بشك..
“تليفوني؟! هو تليفوني معاك؟”
رد بفتور لا يناسب جملته:
“طبيعي التليفون يبقى معايا وكمان مقفول عشان اتصالات أختك وجوزها. على العموم، مش ده المهم. المهم تطمنيهم عليكِ وتحاولي تخترعي أي عذر لاختفائك الكام يوم الجايين لأنهم بلغوا البوليس وسمعت إنهم موجهين ليه اتهام بخطفك.”
لم تندهش من اتهام أختها وأمجد زوجها بل هذا المتوقع ولكن الفضول سيطر عليها، فسألته مرة أخرى بشك:
“يعني دلوقت البوليس بيدور عليك؟”
“مش بالظبط.”
“يعني إيه مش بالظبط؟”
رد جواد على فضولها بهدوء:
“أنا بالنسبة للحكومة مسافر بره مصر والأوراق عندهم بتثبت كده. مسافر قبل اختفائك بساعات يعني من الصعب أثبت اتهام جوز أختك وأختك إني خطفتك مثلًا.”
رفعت حاجبها وهي تقول بسخرية:
“مرتب لكل حاجة برافو… بس مش ملاحظ إنك لحد دلوقت مش محدد مصيري إيه في اللعبة دي وفي المكان ده؟”
نهض وهو ينظر لها نظرة مجردة من المشاعر ورد عليها بغموض…
“مصيرك معايا اتحدد يا بسمة من أول مرة شوفتك فيها.”
ابتعد عنها وعن مرمى عينيها….
زفرت باختناق من طريقته وجملته الغامضة.
وسؤال هنا أي مصير يجمعها معه؟
الاختلاف بينهما صعب تحديده والمقارنة بينهما مثل السماء والأرض…يتبع…
•تابع الفصل التالي “رواية لن احررك” اضغط على اسم الرواية